ಧರ್ಮಮಂಥನ – ೨

ಧರ್ಮ ಎಂದರೇನು? ಹಿಂದೂಗೂ ಧರ್ಮಕ್ಕೂ ಏನು ಸಂಬಂಧ? ಹಿಂದುತ್ವ, ಹಿಂದೂಯಿಸಂ, ಹಿಂದೂಧರ್ಮ ಇವೆಲ್ಲಾ ಒಂದೇನಾ?…..ಎಂಬ ಜಿಜ್ಞಾಸೆ

Advertisements
ಕೆಲತಿಂಗಳ ಹಿಂದೆ, ರಕ್ಷಿತ್ ಪೊನ್ನಾಥಪುರ ಎಂಬ wannabe ಚಿಂತಕನೊಂದಿಗೆ ಯಾವುದೋ ವಿಷಯ ಚರ್ಚಿಸುತ್ತಿದ್ದಾಗ, ಆತ ಹಿಂದುತ್ವ ಬೇರೆ, ಹಿಂದೂಯಿಸಂ ಬೇರೆ. ನಾನು ಹಿಂದೂಯಿಸಂಗೆ ಬೆಂಬಲಿಸ್ತೀನಿ, ಹಿಂದುತ್ವಕ್ಕೆ ನನ್ನ ಬೆಂಬಲವಿಲ್ಲ ಅಂದಾಗ ನಾನು ಚರ್ಚೆ ಅಲ್ಲಿಯೇ ನಿಲ್ಲಿಸಿಬಿಟ್ಟೆ. ನಿಲ್ಲಿಸಲು ಮೊದಲ ಕಾರಣ ನನಗೆ ಉಕ್ಕಿ ಬಂದ ನಗು. ಎರಡನೆಯದು, ಈ ಕೆಲ ಜೊಳ್ಳುಗಳಿಗೆ ಕೆಲ ಇಂಗ್ಳೀಷ್ ಪುಸ್ತಕಗಳನ್ನೋದಿಕೊಂಡು ಅದನ್ನು ಕನ್ನಡೀಕರಿಸುವ ಅಥವಾ ಇಂಡೀಕರಿಸುವ ರೋಗವಿದೆ. ಈ ಹಿಂದೂಯಿಸಂ, ಹಿಂದುತ್ವದ್ದೂ ಇದೇ ತಲೆಹರಟೆ. ಇದಕ್ಕೆ ಮದ್ದು ನಾವು ಅರೆಯುವುದು ಕಷ್ಟ. ಅದು ಇನ್ನೂ ಹೆಚ್ಚಾಗಿ, ಯಾವುದೇ ಪೂರ್ವಗ್ರಹವಿಲ್ಲದೇ ಈ ನೆಲದ ಜ್ಞಾನವನ್ನ ಅಧ್ಯಯನ ಮಾಡಿದಾಗ ಮಾತ್ರ ಗುಣವಾಗಬಲ್ಲಂತದ್ದು. ಈ ರೋಗ ಶಶಿ ತರೂರನಿಗೂ ಬಿಟ್ಟಿಲ್ಲ. Infact, ಈ ರೋಗ ಇಲ್ಲಿಯದನ್ನು ಅರ್ಧ ಓದಿಕೊಂಡು, ಅಲ್ಲಿಯದನ್ನು ಅರ್ಧ ಓದಿಕೊಂಡು ಅದನ್ನು ಸಮ್ಮಿಳಿಸುವ ಪ್ರಯತ್ನದ ಫಲ. ಆಯಾ ಜ್ಞಾನಗಳು ಆಯಾ ಪ್ರದೇಶದಿಂದ, ಅಲ್ಲಿನ ಇತಿಹಾಸದಿಂದ, ಅಲ್ಲಿಗೆ ಅನನ್ಯವಾಗಿ ಹುಟ್ಟಿದಂತವು. ಅವನ್ನು ಇನ್ನೊಂದರೊಂದಿಗೆ ಸಮೀಕರಿಸುವುದು, ಸಮ್ಮಿಳಿಸುವುದು ಎಲ್ಲಾ ಸಮಯದಲ್ಲೂ ಸೂಕ್ತವಲ್ಲ. ವಸಾಹತುಶಾಹಿ ಚಿಂತನೆ ಇಂತಹುದೇ ಒಂದು ಸಮ್ಮಿಳಿತದಿಂದ ಹುಟ್ಟಿದ ವ್ಯಾಧಿ.
ಈಗ ಇದೊಂದು ಹೊಸಾ ಟ್ರೆಂಡ್ ಶುರುವಾಗಿದೆ. ಹಿಂದುತ್ವ ಬೇರೆ, ಹಿಂದೂಯಿಸಂ ಅಂದ್ರೆ ಬೇರೆ, ಹಿಂದೂ ಧರ್ಮ ಅಂದ್ರೆ ಬೇರೆ….ಬ್ಲಾ….ಬ್ಲಾ…ಬ್ಲಾ ಅಂತಾ ಕೂಗಾಡುವುದು. ಇದು ಹಿಂದೂ ಜೀವನರೀತಿಯನ್ನು ಪಾಶ್ಚಾತ್ಯ ರೀತಿಯಲ್ಲೇ ಅರ್ಥಸಿಕೊಳ್ಳುವ ಪ್ರಯತ್ನ ಮಾಡುವ ರಿಲೀಜಿಯನ್ ಮನಸ್ಥಿತಿಗಳು ಹುಟ್ಟುಹಾಕಿರುವ ಹೊಸಾದೊಂದು ತಲೆಕೆರೆತವಷ್ಟೇ. ಮತ್ತೇನೂ ಅಲ್ಲ. ಹಿಂದೂಯಿಸಂ ಎಂಬುದೊಂದು ‘ಇಸಂ’ ಇರಲು ಸಾಧ್ಯವೇ ಇಲ್ಲ ಅಂತಾ ಈ ism ಎಂಬ ಪದದ ಮೂಲಗೊತ್ತಿರುವವರಿಗೆ ತಿಳಿದಿರುತ್ತೆ.
ಈ ಇಸಂ ಎಂಬ ಪ್ರತ್ಯಯದ ಮೂಲ ಪುರಾತನ ಗ್ರೀಕ್ ಭಾಷೆಯ ಇಸ್ಮೋಸ್ (-ismos) ಎಂಬ ಪ್ರತ್ಯಯ. ಇದು ಲ್ಯಾಟಿನ್ನಿನಲ್ಲಿ ಇಸ್ಮಸ್ (-ismus) ಆಗಿ, ಅಲ್ಲಿಂದ ಫ್ರೆಂಚಿನಲ್ಲಿ ಇಸ್ಮೆ (-isme)ಯಾಗಿ ಇಂಗ್ಳಿಷಿನಲ್ಲಿ ಇಸಂ ಆಯ್ತು. 1680ರಲ್ಲಿ ಈ ಇಸಮು ಎಂಬುದನ್ನು ಕ್ರಿಯಾಪದವನ್ನು ನಾಮಪದವಾಗಿ ಬದಲಾಯಿಸಲು ಬಳಸಲಾರಂಭಿಸಲಾಯ್ತು. ಉದಾಹರಣೆಗೆ baptize ಮಾಡುವುದನ್ನು baptism ಎಂದೂ, criticize ಮಾಡುವುದನ್ನು criticism ಎಂದೂ, plagiarize ಮಾಡುವುದನ್ನು plagiarism ಎಂದು ಕರೆಯಲು ಬಳಸಲಾಯ್ತು. 19ನೇ ಶತಮಾನದಲ್ಲಿ ಥಾಮಸ್ ಕಾರ್ಲೈಲ್ ಈ ಪದವನ್ನು ಒಂದು ಪೂರ್ವನಿಯೋಜಿತ ಐಡಿಯಾಲಜಿಗಳನ್ನ ಅಂದರೆ ಸಿದ್ಧಾಂತಗಳನ್ನ ಸೂಚಿಸಲು ಬಳಸಿದ. ನಂತರದ ಚಿಂತಕರಾದ ಜೂಲಿಯನ್ ಹಕ್ಸ್ಲೀ ಮತ್ತು ಜಾರ್ಜ್ ಬರ್ನಾರ್ಡ್ ಷಾ ಕೂಡಾ ಸಾಮಾಜಿಕ ಮೌಲ್ಯಗಳ ತಮ್ಮ ಬರಹಗಳಲ್ಲಿ ಬಳಸಿ ಪ್ರಸಿದ್ಧಿಗೆ ತಂದರು. ಅಮೇರಿಕದಲ್ಲಿ ಹತ್ತೊಂಬತ್ತನೇ ಶತಮಾನದ ಮದ್ಯಭಾಗದಲ್ಲಿ ಈ -ಇಸಂ ಪ್ರತ್ಯಯಗಳನ್ನು ಅಂದಿನಕಾಲದಲ್ಲಿ ನಡೆಯುತ್ತಿದ್ದ ಸಾಮಾಜಿಕ ಚಳುವಳಿಗಳನ್ನು, ಅಂದರೆ ಫೆಮಿನಿಸಂ, ಅಲ್ಕೋಹಾಲ್ ಪ್ರಾಹಿಬಿಷನಿಸಂ, ಪ್ಯಾಸಿಫಿಸಂ, ಅರ್ಲೀ ಸೋಷಿಯಲಿಸಂ ಇತ್ಯಾದಿಗಳನ್ನು ಉದ್ದೇಶಿಸಿ ಬಳಸಲಾಯಿತು. ಹೀಗೆ ಒಂದು ಸಿದ್ಧಾಂತವನ್ನು ವಿವರಿಸುವಾಗ ಬಳಸುವ ಪದ ಇಸಂ. ಹಿಂದುತ್ವ ಅನ್ನೋದು ಒಂದು ಸಿದ್ಧಾಂತ ಅಲ್ಲವೆಂದು ಏಳನೇ ಕ್ಲಾಸಿನ ಮಗುವಿಗೂ ತಿಳಿದಿದೆ. ಇದು ಯಾರೋ ಕಮ್ಯೂನಿಸಂ, ಕ್ಯಾಥೋಲಿಕಿಸಂ, ಸೋಷಿಯಲಿಸಂನ ಸಿದ್ಧಾಂತಗಳನ್ನು ಓದಿ ತಲೆಕೆಡಿಸಿಕೊಂಡ ಅಡ್ಡಕಸಬಿಗಳು ಹುಟ್ಟುಹಾಕಿದ ಪದವಷ್ಟೇ. ಹಿಂದೂಯಿಸಂ ಎಂಬ ಪದಕ್ಕೆ ಯಾವುದೇ ಅರ್ಥವಿಲ್ಲ.
ಇನ್ನುಳಿದದ್ದು ಎರಡು ಪದಗಳು, ಹಿಂದುತ್ವ ಹಾಗೂ ಹಿಂದೂಧರ್ಮ. ಇವೆರಡೂ mutually exclusive ಪದಗಳಲ್ಲ. ಒಂದನ್ನು ಬಿಟ್ಟು ಇನ್ನೊಂದನ್ನು ವಿವರಿಸಲು ಸಾಧ್ಯವಿಲ್ಲ. ಹಿಂದೂಧರ್ಮಕ್ಕನುಗುಣವಾಗಿ ಜೀವನ ನಡೆಸುವುದಷ್ಟೇ ಹಿಂದುತ್ವ. ಜೀವನವೆಂದರೆ ಅದು ಯಾರದ್ದೂ ಆಗಬಹುದು. ರಾಜನದ್ದಾಗಬಹುದು, ರೈತನದ್ದಾಗಬಹುದು, ಸೈನಿಕನದ್ದಾಗಬಹುದು, ವೈದ್ಯನದ್ದಾಗಬಹುದು, ಚಮ್ಮಾರ ಕಮ್ಮಾರ ಬಾಣಸಿಗ ಕೂಲಿ ಯಾರದ್ದೂ ಸಹ. ಯಾರ ಜೀವನವೂ, ಅವರ ವರ್ತನೆಗಳೂ, ಜೀವನ ನಿರ್ಧಾರಗಳು ಧರ್ಮಕ್ಕನುಗುಣವಾಗಿರುತ್ತೋ ಅವನ ಜೀವನವೇ ಹಿಂದುತ್ವದ ಉದಾಹರಣೆ, ಅಷ್ಟೇ.
ಹಾಗಾದರೆ ಹಿಂದೂಧರ್ಮವೆಂದರೇನು? ಹಿಂದೂಧರ್ಮಕ್ಕನುಗುಣವಾಗಿ ಬದುಕುವುದು ಎಂದರೇನು? ವೇದಗಳನ್ನು ಪಾಲಿಸುವುದೇ, ಮನುಸ್ಮೃತಿಯ ಪ್ರಕಾರ ಬದುಕುವುದೇ? ವರ್ಷಕ್ಕೊಮ್ಮೆ ಗಣೇಶನ ಹಬ್ಬ ಮಾಡುವುದು ಹಿಂದೂಧರ್ಮವೇ? ಯುಗಾದಿಯನ್ನು ವರ್ಷದ ಮೊದಲ ದಿನ ಅನ್ನೋದು ಹಿಂದುತ್ವವೇ? ಅಲ್ಲ. ಯಾವುದೇ ಒಂದು ಪುಸ್ತಕ, ಪ್ರವಚನ, ವ್ಯಕ್ತಿ ಬರೆದಿಟ್ಟ ಡಾಕ್ಟರಿನ್ ಅಲ್ಲ ಹಿಂದುತ್ವ. “ಎಲ್ಲವೂ ಹೌದು, ಯಾವುದೂ ಅಲ್ಲ” ಅನ್ನುವಂತೆ ಬದುಕುತ್ತದೆ ಹಿಂದೂ ಧರ್ಮ. ಸರಳವಾಗಿ ಹೇಳಬೇಕೆಂದರೆ ಇಡಿಯ ಹಿಂದೂ ಧರ್ಮವನ್ನು ಒಂದು ಹೂವಿಗೆ ಹೋಲಿಸಬಹುದು. ಸಂಪ್ರದಾಯ, ಆಚರಣೆ, ಹಬ್ಬಗಳು, ಜ್ಯೋತಿಷ್ಯ, ವೇದಗಳು, ಅಷ್ಟಾಂಗ ಯೋಗಗಳು, ಸಂಗೀತ, ನಾಟ್ಯ, ಶಾಸ್ತ್ರ, ಸೂತ್ರಗಳೆಲ್ಲವೂ ಹೂವಿನ ಪಕಳೆಗಳಂತೆ. ಆದರೆ ಈ ಎಲ್ಲಾ ಪಕಳೆಗಳನ್ನು ಹಿಡಿದಿಡುವ ಹೂವಿನ ಇದರ ಮಧ್ಯಭಾಗ ಅಂದರೆ ಶಲಾಕೆ ಏನಿದೆ ಅದು ‘ಧರ್ಮ’. ಇಡೀ ಹಿಂದೂ ಜೀವನಪದ್ದತಿಯ ಜೀವಾಳವೇ ಈ ಧರ್ಮವೆನ್ನುವ ಶಲಾಕೆ. ಅದರಿಂದಲೇ ಹೊಮ್ಮಿದ್ದು, ಅದರಿಂದಲೇ ಹಿಡಿದಿಡಲ್ಪಟ್ಟಿದ್ದು ನಮ್ಮ ಹಿಂದೂ ಪದ್ದತಿಗಳು, ಸಂಪ್ರದಾಯ ಹಾಗೂ ನಂಬಿಕೆಗಳು.
ಈಗ ಧರ್ಮ ಎಂದರೇನು? ಎನ್ನುವಲ್ಲಿಗೆ ಬರೋಣ. ಧರ್ಮವೆಂದರೆ ಸ್ಥೂಲವಾಗಿ “ಸರಿಯಾದದ್ದು” ಎನ್ನಬಹುದು. ದಾರಿಯಲ್ಲಿ ಭಿಕ್ಷುಕ ‘ಧರ್ಮ ಮಾಡೀ ಸ್ವಾಮಿ” ಅಂದಾಗ, ಅದರರ್ಥ ಭಿಕ್ಷೆ ಹಾಕಿ ಅಂತಲ್ಲ. “ನನ್ನ ಬಳಿಯಿಲ್ಲದ್ದು ನಿನ್ನ ಬಳಿಯಿದೆ. ಅದರಲ್ಲಿ ಸ್ವಲ್ಪ ನನಗೂ ಕೊಟ್ಟರೆ ನಿನಗೆ ಅಭಾವವುಂಟಾಗುವುದಿಲ್ಲ ಅಂತಾದರೆ, ನನಗೆ ಕೊಡುವುದು ಸರಿಯಲ್ಲವೇ? ನಿನ್ನ ವಿವೇಚನೆಯನ್ನು ಉಪಯೋಗಿಸಿ ಏನು ಕೊಟ್ಟರೆ ಸರಿ ಅಂತನ್ನಿಸುತ್ತದೋ ಅದನ್ನು ಕೊಡು” ಎಂದರ್ಥ. ಧರ್ಮ ಮಾಡಿ ಅಂದಾಗ, ಸರಿಯಾದದ್ದು ಮಾಡಿ ಅಂತಾ ಅರ್ಥ. ನೀವು ಯಾರನ್ನಾದರೂ ಅಧರ್ಮಿ ಅಂತಾ ಯಾವಾಗ ಕರೀತೀರಿ? ಯಾವಾಗ ಕೆಲ ಪ್ರಾಕೃತಿಕ ವರ್ತನೆಗಳನ್ನೂ, ಗುಣಗಳನ್ನೂ ಮನುಷ್ಯ ಮರೆಯುತ್ತಾನೋ ಆಗವನು ಅಧರ್ಮಿಯಾಗ್ತಾನೆ, ಹೌದೋ ಅಲ್ಲವೋ? ಯಾವುದು ಈ ಪ್ರಾಕೃತಿಕ ವರ್ತನೆಗಳು!? ಕೆಲ ತೀರಾ ಸರಳ ಉದಾಹರಣೆಗಳು “ದುರ್ಬಲರನ್ನು ಶೋಷಿಸದಿರುವುದು”, “ಕೊಟ್ಟ ಮಾತನ್ನು ಮರೆಯದಿರುವುದು”, “ಅಭಾವವಿಲ್ಲವೆಂದಾದಲ್ಲಿ ಉಳಿದವರೊಡನೆ ಹಂಚಿಕೊಳ್ಳುವುದು” ಇಂತವು. ಎಲ್ಲರಿಗೂ ಹೊಂದುವಂತಹ ಕೆಲ ನಿಯಮಗಳು. ಒಟ್ಟಿನಲ್ಲಿ ಪ್ರಕೃತಿಯೊಂದಿಗೇ ಬದುಕಿ ಈ ಇಡೀ ಜೀವನ ಹಾಗೂ ಜಗತ್ತನ್ನು ಸಾಧ್ಯವಾಗಿಸುವಂತಾ ಕೆಲ ಕ್ರಮಗಳ ಸಮೂಹವನ್ನೇ ಒಟ್ಟಾಗಿ “ಧರ್ಮ” ಎನ್ನುವುದು. ಯಾವ ಕನಿಷ್ಟ ನಿಯಮಗಳನ್ನು ಮುರಿದರೆ ಒಂದು ಸಮುದಾಯ ಪರಸ್ಪರ ಕಚ್ಚಾಡಿ ಸಾಯುತ್ತದೆಯೋ ಆ ಕನಿಷ್ಟ ನಿಯಮಗಳೇ ಧರ್ಮ. ಸಮುದಾಯಗಳೇ ಸತ್ತಮೇಲೆ ಜಗತ್ತು ಇದ್ದರೂ, ನಮ್ಮಪಾಲಿಗೆ ಅದು ಇಲ್ಲ ಅಲ್ಲವೇ? ನಾವು ಕಣ್ಣುಮುಚ್ಚಿದರೆ ಜಗತ್ತಿದೆ ಹೌದು. ಆದರೇ ನಾವೇ ಇಲ್ಲದಿದ್ದರೆ ಜಗತ್ತೇ ಇಲ್ಲ. ಹೌದು ತಾನೇ? ಅದಕ್ಕೇ ಧರ್ಮವನ್ನು “ಜೀವನ ಹಾಗೂ ಜಗತ್ತನ್ನು ಸಾಧ್ಯವಾಗಿಸುವಂತಾ ಕೆಲ ಕ್ರಮಗಳ ಸಮೂಹ” ಅಂದಿದ್ದು. Dharma doesn’t give life, but it preserves life. ಆ ಕಾರಣಕ್ಕಾಗಿ ಧರ್ಮ ಅಗತ್ಯ.
ಈಗ, ಮೇಲೆ ಹೇಳಿದ ಕೆಲವಷ್ಟೇ ಧರ್ಮಗಳೇ? ಅಲ್ಲ, ಅವು ಕೆಲ ಸರಳ ಉದಾಹರಣೆಗಳಷ್ಟೇ. ಹಾಗೂ ಆ ಸರಳ ಉದಾಹರಣೆಗಳು ಸಮುದಾಯದ ಎಲ್ಲರಿಗೂ ಅನ್ವಯವಾಗುವಂತದ್ದು. ಸಮುದಾಯದ ನಾಯಕನಾದವನಿಗೆ ಧರ್ಮದ ಅರ್ಥ ಹಾಗೂ ಅಗತ್ಯ ಬೇರೆಯೇ ಇರುತ್ತದೆ. “ಎಲ್ಲರನ್ನೂ ಅವರವರ ಸಾಮರ್ಥ್ಯಕ್ಕನುಗುಣವಾಗಿ ನೋಡು ಹಾಗೂ ಸತ್ಕರಿಸು”, “ಸಮುದಾಯ ತೊಂದರೆಯಲ್ಲಿ ಸಿಕ್ಕಿಕೊಂಡಾಗ ಹೆಂಗಸರನ್ನು, ಮಕ್ಕಳನ್ನು ಹಾಗೂ ಹಿರಿಯರನ್ನು ಮೊದಲು ಕಾಪಾಡುವಂತೆ ನೋಡಿಕೋ”, “ಸಾಮಾಜಿಕ ನಿಯಮಗಳು ಎಲ್ಲರಿಗೂ ಒಂದೇ ಇರಲಿ” ಹೀಗೆ ಮುಂತಾದ ನಿಯಮಗಳು ಧರ್ಮವಾಗುತ್ತವೆ. ಮುಂದೆ ಸಮುದಾಯಗಳು ಬೆಳೆದು ದೊಡ್ಡದಾದಂತೆ, ಬುಡಕಟ್ಟುಗಳು ರಾಜ್ಯಗಳಾದಾಗ ಈ ನಿಯಮಗಲೇ ರಾಜಧರ್ಮಗಳಾದವು. ರಾಜ್ಯಭಾರ ಮಾಡುವುದು, ಪಕ್ಕದ ರಾಜ್ಯಗಳೊಂದಿಗೆ ವ್ಯವಹಾರ ಮಾಡುವ ರಾಜಕೀಯವನ್ನೂ ಧರ್ಮದ ಚೌಕಟ್ಟಿನಲ್ಲಿ ನಡೆಸಿದ ಹೆಮ್ಮೆಯ ನಾಗರೀಕ ಜಗತ್ತು ಈ ಭರತಖಂಡ. ಅದನ್ನು ಸಾಧ್ಯವಾಗಿಸಿದ್ದೇ ಹಿಂದೂಧರ್ಮ. ಯಾಕೆಂದರೆ ಆ ರಾಜಕೀಯವೂ ಹಿಂದೂಧರ್ಮದ ನಿಯಮಗಳನ್ನು ಪಾಲಿಸಿಕೊಂಡೇ ಬೆಳೆದದ್ದು. ನಮ್ಮ ರಾಜರುಗಳು ಯುದ್ಧಗೆದ್ದಾಗ ಎದುರಾಳಿ ಸೈನಿಕರ ಸಾಮೂಹಿಕ ತಲೆಕಡಿದ ಒಂದೇ ಒಂದು ಉದಾಹರಣೆಯಿಲ್ಲ. ಸೋತ ರಾಜನ ರಾಜ್ಯದ ಸಂಪತ್ತು ಗೆದ್ದವರದ್ದಾದರೂ, ಸೋತವರ ಮನೆಮನೆಗೆ ನುಗ್ಗಿ ಹೆಂಗಸರನ್ನು ಅತ್ಯಾಚಾರ ಮಾಡಿ, ಮಕ್ಕಳ ತಲೆಕಡಿದ ಉದಾರಣೆಗಳಿಲ್ಲ. ಯಾಕೆಂದರೆ ರಾಜಧರ್ಮ ಅದನ್ನೊಪ್ಪುತ್ತಿರಲಿಲ್ಲ. ಅಂತಹ ವರ್ತನೆ ತೋರಿದವರನ್ನು ನಮ್ಮ ಕಥೆಗಳೂ ಸಹ ಅಧರ್ಮಿಗಳೆಂದೇ ಕಂಡಿವೆ.
(ಇದೇ ಕಾರಣಕ್ಕೆ ಕೆಲವರು ಇವತ್ತಿನ ಕಾಲದಲ್ಲಿ ಬಿಜೆಪಿ ಒಂದು ರಾಜಕೀಯಪಕ್ಷ. ಅವರು ಧರ್ಮದ ವಿಚಾರ ಮಾತನಾಡಬಾರದು ಎಂದಾಗ ನನಗೆ ಆಶ್ಚರ್ಯವಾಗುತ್ತದೆ. ಯಾಕೆಂದರೆ ಹಿಂದೂ ಜೀವನಪದ್ದತಿಯಲ್ಲಿ ಎಲ್ಲದರಲ್ಲೂ ಧರ್ಮದ ಎಳೆ ಇದೆ. ರಾಜಕೀಯದಲ್ಲೂ ಸಹ. ಇದೇ ಕಾರಣಕ್ಕೆ ವೈಯುಕ್ತಿಕವಾಗಿ ಯಾವುದೇ ಪಾರ್ಟಿ ನಾನು ಹಿಂದೂ ಧರ್ಮದ ನಿಯಮಗಳಿಗೆ ಬದ್ಧನಾಗಿ ರಾಜ್ಯನಡೆಸುತ್ತೇನೆ ಎಂದಾಗ ನನಗದು ತಪ್ಪೆನಿಸುವುದಿಲ್ಲ.)
#ಧರ್ಮಮಂಥನ – ೨
[ಮುಂದಿನ ಭಾಗ: ಹಿಂದೂ ಶಾಸ್ತಗಳು, ಚಿಂತನೆಗಳು (ಸಾಂಖ್ಯ, ಯೋಗ, ನ್ಯಾಯ, ವೈಶೇಷಿಕ, ಮೀಮಾಂಸ, ವೇದಾಂತ, ನಾಟ್ಯ, ಆಯುರ್ವೇದ, ಶಾಸ್ತ್ರೀಯ ಸಂಗೀತ ಇತ್ಯಾದಿ) ಮತ್ತು ಹಿಂದೂ ಧರ್ಮ. ಹೇಗೆ ಯೋಗ, ಸಂಗೀತ ಮತ್ತು ಭಾರತನಾಟ್ಯಗಳು ಹಿಂದೂ?]

ಧರ್ಮಮಂಥನ – ೧

ಧರ್ಮ ಎಂದರೇನು? ಹಿಂದೂಗೂ ಧರ್ಮಕ್ಕೂ ಏನು ಸಂಬಂಧ? ಹಿಂದುತ್ವ, ಹಿಂದೂಯಿಸಂ, ಹಿಂದೂಧರ್ಮ ಇವೆಲ್ಲಾ ಒಂದೇನಾ?…..ಎಂಬ ಜಿಜ್ಞಾಸೆ

ಈ ಸರಣಿ ಯಾಕೆ ಬರೀತಿದ್ದೀನಿ ಅಂತಾ ಮುಂದೆ ಹೇಳ್ತೀನಿ. ಈಗ ಸದ್ಯಕ್ಕೆ ಈ ಸಣ್ಣ ಸಣ್ಣ ತುಣುಕುಗಳನ್ನು ಓದೋಣ.

(*****)

ಪ್ರಕೃತಿಯೊಂದಿಗೆ ಬೆಳೆದು ಬದುಕುವುದೂ ಹಿಂದೂ ಧರ್ಮದ ಮುಖ್ಯ ನಿಯಮಗಳಲ್ಲೊಂದು. ಇದೇ ಕಾರಣಕ್ಕೆ ನಮಗೆ ಕಾಲಿಲ್ಲದೇ ನಡೆಯುವ, ಒಂದೇ ಒಂದು ಹೊಡೆತದಲ್ಲಿ ಮನುಷ್ಯರನ್ನು ಕೊಲ್ಲಬಲ್ಲ ಹಾವಿನಲ್ಲಿ ನಮಗೆ ದೇವರು ಕಂಡಿದ್ದು. ನಮ್ಮಷ್ಟೇ ಬುದ್ಧಿಮತ್ತೆ ಹೊಂದಿದ್ದ ಕೋತಿಗಳಲ್ಲಿ ನಮಗೆ ದೇವರು ಕಂಡಿದ್ದು. ಅಷ್ಟು ದೊಡ್ದದೇಹವಿದ್ದ ಆನೆಯೂ ದೇವರಾಗಿ ಕಂಡಿದ್ದು, ಕರಡಿಯೂ ಪೂಜ್ಯವಾಗಿದ್ದು, ಮನೆಗೆ ಸಾವಿರ ರೀತಿಯಲ್ಲಿ ಸಹಾಯಕವಾಗಿದ್ದ ದನ ಕೂಡಾ ದೇವರ ಸಮಾನವಾಗಿದ್ದು. ನಾನಿಲ್ಲಿ ಸಾಮಾಜಿಕ ಹಾಗೂ ಮನೋವೈಜ್ಞಾನಿಕ ದೃಷ್ಟಿಕೋನದಿಂದ ನೋಡುತ್ತಿದ್ದೇನೆಯೇ ಹೊರತು, ಪುರಾಣ ಪುಣ್ಯಕಥೆಗಳ ಕೋನದಿಂದಲ್ಲ. ಅನಾಸ್ತಿಕನಾದ ನನಗೆ, ಈ ಚರ್ಚೆಗೆ, ಹಿರಣ್ಯಕಶಿಪು ಇದ್ದನೋ ಇಲ್ಲವೋ ಎಂಬುದರ ಅಗತ್ಯವಿಲ್ಲ, ಕಾಮಧೇನು ಎಂಬ ಹಸುವಿತ್ತೋ ಅನ್ನೋದೂ ಬೇಡ, ಇಂದ್ರ ವಜ್ರಾಯುಧಗಳ ಕಥೆಯೂ ಬೇಡ. ನಾನು ಕ್ರಿಪೂ 7000ದಿಂದ ಕ್ರಿಶ 100ರವರೆಗೆ ಅಸ್ತಿತ್ವದಲ್ಲಿದ್ದ ಮನುಷ್ಯಕುಲದ ಜೀವನದಲ್ಲಿ ಏನೇನಾಗಿರಬಹುದು ಎಂಬುದರ ಆಧಾರದ ಮೇಲಷ್ಟೇ ಧರ್ಮವನ್ನು ಅವಲೋಕಿಸುತ್ತಿರುವುದು. ನನ್ನ ಪ್ರಕಾರ ಇಂದ್ರನೂ ಇಲ್ಲ, ಅವನಿಗೆ ವಜ್ರಾಯುಧವೂ ಇಲ್ಲ. ಅವೆಲ್ಲಾ (ಹಿರಣ್ಯಕಶಿಪು, ಕಾಮಧೇನು, ಕಲ್ಪವೃಕ್ಷ, ಇಂದ್ರ ಎಲ್ಲವೂ) ಬೇರೆ ಬೇರೆ ಪಾಠಗಳನ್ನು ಕಲಿಯಲು ಬೇಕಾಗುವ ಸಿಂಬಾಲಿಸಂಗಳು.

ಆದರೆ ಶಿಲಾಯುಗದ ಕಾಲದಿಂದಲೂ ಮಿಂಚು ನೆಲಕ್ಕೆ ಬಡಿದಾಗಲೆಲ್ಲಾ ಆದ ಅನಾಹುತಗಳನ್ನೆಲ್ಲಾ ನೋಡಿದ ಮನುಷ್ಯನಿಗೆ ಅಲ್ಲಿ ನಡೆದ ಆ ಹಠಾತ್ ವಿದ್ಯಮಾನಕ್ಕೆ ಒಂದು ಕಾರಣ ಬೇಕಲ್ಲ. ಆಗ ಹುಟ್ಟಿದ್ದೇ ಆ ವಜ್ರಾಯುಧ. ಮಿಂಚೇ ವಜ್ರಾಯುಧ. ಅದನ್ನು ಮುಟ್ಟಿದಾಗಲೆಲ್ಲಾ (ಅಂದರೆ ಸಿಡಿಲು ಮನುಷ್ಯನೊಬ್ಬನಿಗೆ ಬಡಿದಾಗಲೆಲ್ಲಾ) ಜನ ಸತ್ತದ್ದು ನೋಡಿ, ಅದರ ಶಕ್ತಿಯ ಅಗಾಧತೆಯೆಡೆಗೆ ಭಯವೂ, ಗೌರವವೂ ಮೂಡಿತು. ಹೀಗಿದ್ದ ವಜ್ರಾಯುಧವನ್ನು ಬಳಸಲು ಸಾಮಾನ್ಯರಿಗೆ ಸಾಧ್ಯವೇ? ಇದು ದೇವರೇ ಬಳಸುತ್ತಿರುವ ಆಯುಧ. ಅದೂ ಎಂತಾ ದೇವರು!? ಮಿಂಚಿನಿಂದ ಬೆಂಕಿ ಹುಟ್ಟಿದೆ. ಮಿಂಚಿನಿಂದ ಬೆಳಕು ಹುಟ್ಟಿದೆ. ಮಿಂಚಿನಿಂದ ನೀರು ಅಲ್ಲೋಲಕಲ್ಲೋಲವಾಗಿದೆ. ಹಾಗಿದ್ದಮೇಲೆ ಇದನ್ನು ಬಳಸುವವ ಈ ಎಲ್ಲದಕ್ಕೂ ಒಡೆಯ, ಅಂದರೆ ನಮ್ಮ ಬುಡಕಟ್ಟಿನ ನಾಯಕನಿದ್ದಂತೆ ಅವ ದೇವರುಗಳ ನಾಯಕ. ಆ ಒಡೆಯನೇ ಇಂದ್ರನಾದ. (ಇದು ಹಿಂದೂ ಪುರಾಣದಲ್ಲಿ ಮಾತ್ರವಲ್ಲ, ಗ್ರೀಕರ ಝಿಯಸ್’ನ ಆಯುಧವೂ ಈ ಮಿಂಚೇ.) Anyway, ವಿಷಯಾಂತರವಾಯ್ತು. ಏನು ಮಾತಾಡ್ತಿದ್ವಿ!?

ಹಾ! ನಮಗೆ ಎಲ್ಲದರಲ್ಲೂ ದೇವರುಗಳು ಕಂಡರು. ಕಂಡರು ಅನ್ನುವುದಕ್ಕಿಂತಾ, ನಮಗೆ ಎಲ್ಲವೂ ದೇವರೇ ಆಯ್ತು. ಊಟವಿಲ್ಲದಿದ್ದರೆ ಬದುಕಲು ಸಾಧ್ಯವಿಲ್ಲ. ಊಟ ದೇವರು (ಅನ್ನಪೂರ್ಣೆ). ನೀರಿಲ್ಲದೇ ಬರಗಾಲ ಬಂದಾಗ ಜನ ಸತ್ತರು, ಅಂದ ಮೇಲೆ ನೀರು ದೇವರು (ವರುಣ). ಬೆಂಕಿಯಿದ್ದರೂ ಕಷ್ಟ, ಇಲ್ಲದಿದ್ದರೇ ಕಷ್ಟ. ಅಂದಮೇಲೆ ಅದೂ ನಮ್ಮ ಅಸ್ತಿತ್ವಕ್ಕೆ ಮುಖ್ಯ. ಅಲ್ಲಿಗೆ ಅದೂ ದೇವರು (ಅಗ್ನಿ). ನೀರಿನಡಿಯಿದ್ದಾಗ ಉಸಿರುಗಟ್ಟಿ ಸತ್ತರು ಅಂದಮೇಲೆ ಗಾಳಿಯಂತೂ ಮಹಾನ್ ಮುಖ್ಯ ದೇವರು (ವಾಯು). ದನವಿಲ್ಲದಿದ್ದರೆ ಸಗಣಿಯಿಲ್ಲ, ಹಾಲಿಲ್ಲ, ಇನ್ನೊಂದಿಲ್ಲ, ಅಂದಮೇಲೆ ದನ ಗೋಮಾತೆಯಾದ್ಲು. ಹೀಗೆ ಬೆಳೆದದ್ದು ನಮ್ಮ ಸಾಮಾನ್ಯ ಜನರ ದೇವರ ಕಲ್ಪನೆ. ಈ ರೀತಿ ನಾವು ಒಂದಕ್ಕಿಂತಾ ಹೆಚ್ಚಿನದರಲ್ಲಿ ದೇವರನ್ನು ಕಂಡೆವು. ಹಾಗೂ ಎಲ್ಲರೂ ನಮಗೆ ಪೂಜ್ಯರಾದರು. ಈ ರೀತಿ ನಾವು ಒಂದಕ್ಕಿಂತಾ ಹೆಚ್ಚು ದೇವರುಗಳನ್ನ ಕಂಡುಕೊಂಡೆವು.

ಈ ಪ್ರಕ್ರಿಯೆಯ ಬೈ-ಪ್ರಾಡಕ್ಟೇ ತಾಳ್ಮೆ, ಸಹನೆ, ಸಹಿಷ್ಣುತೆ ಹಾಗೂ ಸಹಬಾಳ್ವೆ. ಹೇಗೆ ಅಂತೀರಾ? ಅಗ್ನಿಯನ್ನೇ ದೇವರು ಅಂತಾ ಭಾವಿಸಿದ್ದ ಬುಡಕಟ್ಟೊಂದು, ನೀರನ್ನೇ ದೇವರೆಂದು ಭಾವಿಸಿದ್ದ ಬುಡಕಟ್ಟನ್ನು ಸಂಧಿಸಿದ ದಿನವನ್ನು ಊಹಿಸಿಕೊಳ್ಳಿ. ಅವತ್ತು ಖಂಡಿತಾ ಹೊಡೆಬಡಿದಾಟಗಳಾಗಿರಬಹುದು. ಗೆದ್ದವನ ದೇವರೇ ಅಂತಿಮ ಅಂತ ನಿಯಮವೂ ಆಗಿದ್ದರಬಹುದು. (ಹಾಗೆಯೇ ಹೊಡೆದಾಟ ಆಗದೆಯೂ ಇದ್ದಿರಬಹುದು). ಹಾಗೂ ಪರಸ್ಪರ ತಮ್ಮ ತಮ್ಮ ದೇವರ ಬಗ್ಗೆ ಮಾತನಾಡುವಾಗ ನೀರಿನ ಬುಡಕಟ್ಟಿನವರು, ಅಗ್ನಿಯ ಬುಡಕಟ್ಟಿನವರ ದೇವರ ಮೇಲೆ ತಮ್ಮ ದೇವರನ್ನು ಚೆಲ್ಲಿ “ನೋಡಿ ನಿಮ್ಮ ದೇವರನ್ನು ಕೊಂದೆವು” ಎಂದಿದ್ದರಬಹುದು. ಮರುದಿನ ಅಗ್ನಿಯ ಪಾರ್ಟಿಗಳು, ನೀರಿನ ದೇವರನ್ನು ಒಂದು ಪಾತ್ರೆಯಲ್ಲಿಟ್ಟು ಕುದಿಸಿ ಆವಿಯಾಗಿಸಿ “ನೋಡಿ ನಿಮ್ಮ ದೇವರನ್ನು ನಾಪತ್ತೆ ಮಾಡಿದೆವು” ಎಂದಿದ್ದರಬಹುದು. ಇಬ್ಬರಿಗೂ ಆಶ್ಚರ್ಯ!!! ಇಬ್ಬರಿಗೂ “ಓಹೋ ಈ ಎರಡು ದೇವರೂ ಸಮಬಲರು. ಹಾಗೂ ನಮಗೆ ಇಬ್ಬರದ್ದೂ ಅಗತ್ಯವಿದೆ” ಎಂದು ನಂಬಿ ಬುಡಕಟ್ಟುಗಳು ಎರಡೂ ದೇವರನ್ನು ಜೊತೆಜೊತೆಗೆ ಆರಾಧಿಸಿ ಮುಂದುವರಿವೆ. ಈ ಪ್ರಕ್ರಿಯೆ ಒಂದು ದಿನದಲ್ಲೂ ನಡೆದಿರಬಹುದು, ಅಥವಾ ಸಾವಿರ ವರ್ಷಗಳೂ ತೆಗೆದುಕೊಂಡಿರಬಹುದು. ಆದರೆ ಕೊನೆಯಲ್ಲಿ “ಒಂದಕ್ಕಿಂತಾ ಹೆಚ್ಚು ದೇವರನ್ನು ನಂಬುವುದರಿಂದ ತೊಂದರೆಯಂತೂ ಇಲ್ಲ. ಇದ್ದರೆ ಉಪಯೋಗ ಮಾತ್ರವಷ್ಟೇ” ಎಂಬುದೇ ಎಲ್ಲರ ಕೊನೆಯ ಅಭಿಪ್ರಾಯ.

ಹೀಗೆ ಹಿಂದೂ ಧರ್ಮದ ಒಂದು ಮುಖ್ಯ ಗುಣವಾದ ಬಹುಸಂಸ್ಕೃತಿತ್ವ (ನಾನದನ್ನ ಪ್ರಕೃತಿಯ ಆರಾಧನೆ ಅಂತಾ ಕರೆಯಲಿಚ್ಚಿಸುತ್ತೇನೆ) ಚಾಲ್ತಿಗೆ ಬಂತು. ಇಲ್ಲೂ ಕೂಡಾ ಕೆಲ ರಿಲೀಜಿಯನ್ ಮನಸ್ಥಿತಿಗಳು ಇದನ್ನು polytheism, ಅಂದರೆ ಬಹುದೇವೋಪಾಸನೆ, ಅಂತಾ ಬರೆಯುತ್ತಾರೆ. ಅದು ತಪ್ಪು. ನಾವು ಬಹುದೇವರನ್ನು ಉಪಾಸಿಸುತ್ತಿಲ್ಲ. ನಮ್ಮದು pluralistic, ಅಂದರೆ ಬಹುಸಂಸ್ಕೃತಿತ್ವದ ನಾಗರೀಕತೆ. ಅಂದರೆ ಅಂತಿಮ ಸತ್ಯವನ್ನು ಬೇರೆ ಬೇರೆ ರೀತಿಗಳಿಂದಾ ಕಂಡುಕೊಳ್ಳಬಹುದು ಎಂಬುದನ್ನು ಪ್ರತಿಪಾದಿಸಿ, ನಿರೂಪಿಸಿಕೊಂಡ ಬಹುಸಂಸ್ಕೃತಿಗಳ ಆಗರ ಭಾರತ.

ಜನಪದರು, ಅಂದರೆ ಸಾಮಾನ್ಯಜನರು, ಈ ರೀತಿಕಂಡುಕೊಂಡಿದ್ದನ್ನ, ಆಧ್ಯಾತ್ಮಿಕ ಶೋಧಕರು ಒಂದು ಚೌಕಟ್ಟಿನಲ್ಲಿ ಬರೆದರು. ಅದನ್ನು ಚರ್ಚಿಸಿ, ಹಲವಾರು ತಲೆಮಾರುಗಳ ಕಾಲ ಮಂಥಿಸಿ ‘ಏಕಂ ಸತ್ ವಿಪ್ರಾ ಬಹುಧಾ ವದಂತಿ’ ಎಂದರು.

ಅಲ್ಲಿಗೆ,
(೧) ನಾವು ಬಹುದೇವೋಪಾಸಕರಲ್ಲ. ಬಹುಸಂಸ್ಕೃತಿತ್ವರು. We are not polytheists. We are pluralists.
(೨) ಈ ಬಹುಸಂಸ್ಕೃತಿತ್ವ ನಮಗೆ ಸಹಸ್ರ ವರ್ಷಗಳ ಹಿಂದೆ ನಮ್ಮತರದಲ್ಲದ ನಂಬಿಕೆಗಳೆಡೆಗೆ ಸಹಿಷ್ಣುತೆಯನ್ನ ಕಲಿಸಿಯಾಗಿದೆ. ಹಾಗೂ ಆ ಬೇರೆ ಬೇರೆ ನಂಬಿಕೆಗಳನ್ನು ಚರ್ಚೆ ಹಾಗೂ ಮಂಥನಗಳ ಮೂಲಕ ಪರಿಹರಿಸಿಕೊಳ್ಳಬಹುದೆಂಬ ಸತ್ಯವನ್ನೂ ಪ್ರತಿಪಾದಿಸಿ, ನಿರೂಪಿಸಿ ತೋರಿಸಿಯಾಗಿದೆ.

Social media manipulation and trend management of Kathua incident

I have no soft corner for any heinous criminals. Nor do I support the heinous crimes of journalists of crying wolf, at a time that suits them. But, this guy @WrongDoc on Twitter just spent 30 minutes and was able to call the bluff around this crime and the media/political propaganda, which is being spun to make fools out of common citizens. Read on!

See how the Kathua twitter activity started trending – how this is a social media manipulation and trend management.

I checked the Twitter Trend statistics for and found that it peaked interest late on 9th April 2018. The day ‘s farce of a fast was ridiculed. The Kathua case happened in January 2018.

This is the last three months twitter activity of Kathua hashtag. The crime was discovered and first arrest made on 19th January- so it takes in account the whole timeline. See when the interest peaked?

DaqjXfyU0AA7LIm

The Twitter activity started with This tweet according to analysis. The handle belongs to a journalist who works for – which is run by . This was the kindling.

Next influential tweet about Kathua comes from Barkha. Then and then you can see the following order.

These are the handles that chronologically followed tweeting in synchronicity about Kathua, after this dog whistle was sent out from Print Journo of Shekhar Gupta and Barkha of Quint.

Tweet activity started as clockwork with synchronised timing at 2:30 pm (time zone reference may change actual time) on 12th and 13th April. On 12th April by 7:30 pm the activity was dead but by 13th it grew into real people outraging- the manipulation was successful.

I again checked the chronicity of tweets for last 3 months- to include the full timeline of the crime’s course. No significant interest in twitter outrage before trigger on 9th and 10th.

This is the world-map of influence about Kathua tweets in last 3 months. Interestingly, Russia features here!

DaqrWgKVwAA2EAW

As I give it some time, Turkey, Kazakhstan, Ukraine, Senegal, Nigeria, Saudi Arabia, Iran, Pakistan (naturally!) Phillipines also start lighting up on the tracker.

DaqtLZVU8AAQIdZ

I’m not discrediting or denying your emotions and rage about the Kathua case. You are right to feel angry, I feel much the same. But what exactly are you angry about? Who are you letting use your anger?

Blood and bones of Asifa Bano are being ground up to fertilize your anger, your emotions. Your anger and emotions are being harvested to feed the political hunger of people who go on symbolic fast. Don’t feed their greed now, or they sure will sacrifice another one another day.

This emotional manipulation and outrage harvest are the tools of social media propaganda. This is what Zuckerberg admitted to selling. This is what Twitter is doing, knowingly or otherwise. This is why there was a Hand on the wall of the Cambridge Analytica office.

Don’t you feel fucking stupid, outraging about Cambridge Analytica one day and falling victim to engineered social media outrage harvesting your emotions over the carcass of a child the very next day? Did you think the data harvesters wanted to see your selfies??

All credits of this write-up go to Be’Havin!‏ @WrongDoc.

ಈ ವಿಜ್ಞಾನ ಭವಿಷ್ಯ ತಿಳಿದಿದ್ದೀರೇನು? (ಭಾಗ – 2)

(…ಮುಂದುವರೆದಿದೆ)

3ಡಿ ಮುದ್ರಣ:
3d-printing

ಹತ್ತು ವರ್ಷದ ಹಿಂದೆ ಅತ್ಯಂತ ಅಗ್ಗದ 3ಡಿ ಪ್ರಿಂಟರ್’ಗೆ 18000 ಡಾಲರ್ ಬೆಲೆಯಿತ್ತು. ಇವತ್ತು 400 ಡಾಲರ್’ಗೆ 3ಡಿ ಪ್ರಿಂಟರ್ ಸಿಗುತ್ತಿದೆ. ಇದೇ ಹತ್ತು ವರ್ಷದಲ್ಲಿ ಈ ಮುದ್ರಕ ತನ್ನ ದಕ್ಷತೆ ಮತ್ತು ವೇಗವನ್ನು ನೂರುಪಟ್ಟು ಹೆಚ್ಚಿಸಿಕೊಂಡಿದೆ. ಹೆಚ್ಚಿನ ಶೂ ಕಂಪನಿಗಳು ತನ್ನ ಶೂಗಳನ್ನು 3ಡಿ ಪ್ರಿಂಟ್ ಮಾಡಲು ಪ್ರಾರಂಭಿಸಿವೆ. ಬಹಳಷ್ಟು ದೂರದ ವಿಮಾನನಿಲ್ದಾಣಗಳಲ್ಲಿ ವಿಮಾನದ ಸಣ್ಣಪುಟ್ಟ ಭಾಗಗಳನ್ನು ಫ್ರಾನ್ಸಿನಿಂದ, ಅಮೇರಿಕಾದಿಂದ, ಬ್ರೆಝಿಲ್’ನಿಂದ ಅಮದು ಮಾಡಿಕೊಳ್ಳುವ ಬದಲು ಅಲ್ಲೇ ಹ್ಯಾಂಗರುಗಳಲ್ಲಿ 3ಡಿ ಮುದ್ರಣ ಮಾಡಲಾಗ್ತಾ ಇದೆ. ದೂರದ ನಿಲ್ದಾಣಗಳನ್ನು ಬಿಡಿ, ಇಲ್ಲೇ ದುಬೈನಲ್ಲೇ ಎಮಿರೇಟ್ಸ್ ಕಂಪನಿ ಸಣ್ಣಪುಟ್ಟ ಬಿಡಿಭಾಗಗಳನ್ನು ತಾನೇ ಪ್ರಿಂಟ್ ಮಾಡುತ್ತಿದೆ. ಭೂಮಿಯಮೇಲೆ ಮಾತ್ರವಲ್ಲದೇ ಬಾಹ್ಯಾಕಾಶದಲ್ಲೂ 3ಡಿ ಮುದ್ರಣ ಶುರುವಾಗಿದೆ. ಅಂತರರಾಷ್ಟ್ರೀಯ ಬಾಹ್ಯಾಕಾಶ ನಿಲ್ದಾಣ(ISS)ಕ್ಕೆಂದೇ ವಿಶೇಷವಾಗಿ ತಯಾರಿಸಲಾದ 3ಡಿ ಮುದ್ರಕದಿಂದಾಗಿ ಎಷ್ಟೋ ಬಿಡಿಬಾಗಗಳನ್ನೂ, ಉಪಕರಣಗಳನ್ನೂ ISS ತಾನೇ ಮುದ್ರಿಸಿ, ಬಳಸುತ್ತಿದೆ. ಈಗ ಸಣ್ಣದೊಂದು ರಿವಿಟ್ ಲೂಸಾದರೆ, ಅದನ್ನು ಸರಿಪಡಿಸೋಕೆ ನಾಸಾ ತನ್ನ ಕೊಲಂಬಿಯಾ ಅಥವಾ ಅಟ್ಲಾಂಟಿಸ್ ಶಟಲ್ ಬಸ್ಸುಗಳನ್ನು ಕಳಿಸುವ ಅಗತ್ಯವಿಲ್ಲ.

ಈಗ ನಡೆಯುತ್ತಿರುವ ತಂತ್ರಜ್ಞಾನ ಅಭಿವೃದ್ಧಿ, ನಮ್ಮ ಸ್ಮಾರ್ಟ್-ಫೋನುಗಳೇ 3ಡಿ ಮುದ್ರಣ ಮಾಡಲು ಸಾಧ್ಯವೇ ಎಂಬ ಸಾಧ್ಯತೆಯನ್ನು ಪರಿಶೀಲಿಸುತ್ತಿದೆ. ಅಭಿವೃದ್ಧಿಯ ವೇಗವನ್ನು ಗಮನಿಸಿದರೆ 2020ರ ಹೊತ್ತಿಗೆ, ಮನೆಯಲ್ಲೇ ನಿಮ್ಮ ಕಾಲಿನ ಸ್ಕ್ಯಾನಿಂಗ್ ಮಾಡಿ, ನಿಮ್ಮ ಕಾಲಿಗೆ ತಕ್ಕನಾದ ಚಪ್ಪಲಿಯನ್ನ ನೀವೇ ಪ್ರಿಂಟ್ ಮಾಡುವ ಸಾಧ್ಯತೆಯನ್ನು ಅಲ್ಲಗಳೆಯುವಂತಿಲ್ಲ. Winsun ಎಂಬ ಕಂಪನಿ ಚೀನಾದಲ್ಲಿ ಅದಾಗಲೇ ಸಂಪೂರ್ಣ 3ಡಿ ಮುದ್ರಣದಿಂದಲೇ ಆರಂತಸ್ತಿನ ಮನೆಯೊಂದನ್ನು ಕಟ್ಟಿ ಮುಗಿಸಿದ್ದಾರೆ. 2027ರ ಹೊತ್ತಿಗೆ ಜಗತ್ತಿನಲ್ಲಿ ಉತ್ಪಾದನೆಯಾಗುತ್ತಿರುವ ಎಲ್ಲಾ ವಸ್ತುಗಳ 10% ಉತ್ಪಾದನೆ 3ಡಿ ಮುದ್ರಣದಿಂದಲೇ ನಡೆಯಲಿದೆ.

ಔದ್ಯೋಗಿಕ ಹಾಗೂ ವ್ಯವಹಾರ ಅವಕಾಶಗಳು:
future-proof

ನಿಮ್ಮ ತಲೆಯಲ್ಲೊಂದು ಈವರೆಗೂ ಯಾರೂ ಪ್ರಯತ್ನಿಸದ ಒಂದೊಳ್ಳೆಯ ಬ್ಯುಸಿನೆಸ್ ಐಡಿಯಾ ಇದೆ ಅಂತಿಟ್ಕೊಳ್ಳಿ. ಮುಂದಿನ ಆರು ತಿಂಗಳಲ್ಲಿ ನೀವು ಈ ಬ್ಯುಸಿನೆಸ್ ಶುರು ಮಾಡ್ಬೇಕು ಅಂತಿದ್ದೀರ. ಈ ಹಾಗೂ ಮುಂದಿನ ದಿನಗಳಲ್ಲಿ ಬ್ಯುಸಿನೆಸ್ ಪ್ರಾರಂಭಿಸುವ ಮುನ್ನ ಕೇಳಿಕೊಳ್ಳಬೇಕಾದ ಪ್ರಶ್ನೆಯೆಂದರೆ “ಇವತ್ತಿಗೆ ನನ್ನ ಈ ಉತ್ಪನ್ನದ ಅವಶ್ಯಕತೆಯಿದೆ. ಮುಂದಿನ ಐದು ವರ್ಷಕ್ಕೂ ಈ ಅವಶ್ಯಕತೆ ಇರುತ್ತಾ?”. ಉತ್ತರ ಹೌದು ಎಂದಾದರೆ ನೀವು ತಕ್ಷಣ ಯೋಚಿಸಬೇಕಾದದ್ದು “ಆ ಐದು ವರ್ಷದ ನಂತರದ ಪ್ರಾಡಕ್ಟನ್ನ ಇಂದೇ ಉತ್ಪಾದಿಸುವುದು ಹೇಗೆ?” ಎಂದು. ನಿಮ್ಮ ಈ ಉತ್ಪನ್ನ ಅಥವಾ ಐಡಿಯಾ ಫೋನಿನೊಂದಿಗೆ ಕೆಲಸ ಮಾಡುತ್ತಾ ಎಂದು ಪರಿಶೀಲಿಸಿಕೊಳ್ಳಿ. ಫೋನಿಗೂ ಅದಕ್ಕೂ ಸಂಬಂಧವಿಲ್ಲ ಅಂತಾದರೆ ನಿಮ್ಮ ಬ್ಯುಸಿನೆಸ್ ಐಡಿಯಾ ಗೆಲ್ಲೋದು ಕಷ್ಟವಿದೆ ಎಂದೇ ಅರ್ಥ. ಇಪ್ಪತ್ತನೇ ಶತಮಾನದಲ್ಲಿ ಯಾವ್ಯಾವ ಔದ್ಯೋಗಿಕ ಅವಕಾಶಗಳು ಸಫಲವಾಗಿದ್ದವೋ, ಇಪ್ಪತ್ತೊಂದನೆಯ ಶತಮಾನದಲ್ಲಿ ಗೋತಾ ಹೊಡೆಯೋ ಸಾಧ್ಯತೆಗಳೇ ಹೆಚ್ಚು.

ಉದ್ಯೋಗವಕಾಶಗಳು:

Replaced-By-Robots_v3
ಜಗತ್ತಿನಲ್ಲಿ ಇವತ್ತಿರುವ 40%-50% ಕೆಲಸಗಳು ಮುಂದಿನ 20ವರ್ಷಗಳಲ್ಲಿ ಇರೋದೇ ಇಲ್ಲ. ರಿಸೆಪ್ಷನಿಸ್ಟ್, ಗ್ರಾಹಕರ ಕರೆ ಸ್ವೀಕಾರ ಮಾಡುವ ಕೆಲಸಗಳು, ಮೊದಲಹಂತದ ಗ್ರಾಹಕ ಸಪೋರ್ಟ್, ಮನೆಗೆ ವಸ್ತುಗಳನ್ನು ತಲುಪಿಸುವ ಕೆಲಸಗಳು ಮುಂತಾದುವೆಲ್ಲಾ ಮನುಷ್ಯರಿಗೆ ಸಿಗದೇ ಇರುವಂತೆ ಮಾಯವಾಗ್ತಾವೆ. ಆ ಜಾಗಗಳಲ್ಲಿ ಕಂಪ್ಯೂಟರ್ ಮತ್ತು ರೋಬೋಟುಗಳು ಬಂದು ಕೂರ್ತಾವೆ. ಇನ್ನೆಷ್ಟೋ ಕೆಲಸಗಳು ಈಗಿರುವ ರೀತಿಗಿಂತಾ ಹೆಚ್ಚು ಬದಲಾಗ್ತಾವೆ. ಎಲ್ಲೆಲ್ಲೆ ಸಾಧ್ಯವೋ ಅಲ್ಲಲ್ಲಿ ಕೆಲಸಗಳು ಯಾಂತ್ರೀಕೃತಗೊಳ್ತಾವೆ. ಹಾಗಂತಾ ಮನುಷ್ಯರಿಗೆ ಕೆಲಸಗಳೇ ಇರೊಲ್ಲ ಅಂತಲ್ಲಾ. ಹೊಸಹೊಸ ರೀತಿಯ ಕೆಲಸಗಳು ಸೃಷ್ಟಿಯಾಗ್ತಾವೆ. ಆದರೆ ಈಗಿರುವ ಜನಸಂಖ್ಯೆಯ ಪ್ರಮಾಣಾನುಗತವಾಗಿ ಕೆಲಸಗಳ ಸಂಖ್ಯೆಯೂ ಇರುತ್ತದೆಯೋ ಇಲ್ಲವೋ ಎಂಬುದನ್ನು ಸಮಯವೇ ಹೇಳಬೇಕು. ಆದರೆ ಕೆಲಸಗಳ ಸಂಖ್ಯೆ ಕಡಿಮೆಯಾಗುವುದಂತೂ ಹೌದು.ಕೃಷಿ:

ಕೆಲವೇ ವರ್ಷಗಳಲ್ಲಿ ನೂರು ಡಾಲರ್’ಗೂ ಕಡಿಮೆ ಬೆಲೆಗೆ ಕೃಷಿಸಂಬಂಧೀ ರೋಬೋಟ್ ಮಾರುಕಟ್ಟೆಗೆ ಬರಲಿದೆ. ಅವುಗಳ ಸದ್ಬಳಕೆ ಮಾಡಿಕೊಂಡು ಏಷ್ಯಾದ ಕೃಷಿಪ್ರಧಾನ ದೇಶಗಳ ರೈತರು ದಿನವಿಡೀ ಹೊಲದಲ್ಲಿ ದುಡಿಯುತ್ತಾ ನಿಲ್ಲುವಬದಲು, ವರ್ತಕರು ಮತ್ತು ಮ್ಯಾನೇಜರುಗಳ ಸ್ಥಾನಗಳಲ್ಲಿ ನಿಲ್ಲಬಹುದು. ಕೃಷಿವಿಜ್ಞಾನ ಬೆಳೆದಷ್ಟೂ ನಮ್ಮ ಹೊಲಗಳಲ್ಲಿ ಕಡಿಮೆ ನೀರಿನ ಬಳಕೆಯ ತಂತ್ರಜ್ಞಾನ ಅಭಿವೃದ್ಧಿ ಹೊಂದುತ್ತದೆ. ಹೋದವರ್ಷವಷ್ಟೇ ವಿಜ್ಞಾನಿಗಳು ಪ್ರಯೋಗಶಾಲೆಯಲ್ಲಿ ಮಾಂಸವನ್ನು ಬೆಳೆಸಿದ್ದಾರೆ. ಕೆಲವರ್ಷಗಳಲ್ಲಿ ಪ್ರಯೋಗಶಾಲೆಯಲ್ಲಿ ಬೆಳೆಸಲಾದ ಮಾಂಸ, ಪ್ರಾಣಿಯಿಂದ ಪಡೆದ ಮಾಂಸದಷ್ಟೇ ಅಥವಾ ಅದಕ್ಕಿಂತಾ

Agricultural-Drone

ಅಗ್ಗವಾಗಲಿದೆ. ಸದ್ಯದ ಕೃಷಿಭೂಮಿಯ 30%, ಪ್ರಾಣಿಗಳ ಬಳಕೆಗಾಗಿ ಅದರಲ್ಲೂ ದನಗಳ ಬಳಕೆಗಾಗಿ ಮೀಸಲಿಡಲಾಗ್ತಾ ಇದೆ. ಮಾಂಸಕ್ಕೊಸ್ಕರ ಪ್ರಾಣಿಗಳನ್ನು ಸಾಕದೇ ಇದ್ದಲ್ಲಿ, ಆ ಜಾಗವೂ ಕೃಷಿಬಳಕೆಗೆ ಸಿಕ್ಕರೆ ಎಷ್ಟು ಉಪಯೋಗವಾಗಬಹುದು ಯೋಚಿಸಿ ನೋಡಿ! ಇದು ಮಾತ್ರವಲ್ಲದೇ ಮನುಷ್ಯರ ಮಾಂಸಸೇವನೆ ಬಾಯಿರುಚುಗೆ ಅಂತಾ ನಾವಂದುಕೊಂಡಿದ್ದರೂ ಸಹ, ಅದರ ಮುಖ್ಯ ಕಾರಣ ದೇಹದ ಪ್ರೋಟೀನ್ ಪೂರೈಕೆಗಾಗಿ ಮಾತ್ರ. ಇದೇ ಪ್ರೋಟೀನ್ ಬೇರೆ ಮೂಲಗಳಿಂದಲೂ ದೊರೆಯುವಂತಾದರೆ? ಮಾಂಸಗಳಿಂದ ದೊರೆಯುವ ರೀತಿಯದ್ದೇ ಪ್ರೋಟೀನ್ಗಳನ್ನು ಕೊಡುವ ಕೀಟಗಳಿಂದಲೂ ಅದನ್ನು ಪಡೆದು ಸಂಸ್ಕರಿಸಿ, ಮಾನವ ಬಳಕೆಗೆ ಯೋಗ್ಯಗೊಳಿಸಿ ಮಾರುಕಟ್ಟೆಗೆ ಬಿಡುವ ಸ್ಟಾರ್ಟ್-ಅಪ್ ಕಂಪನಿಗಳು ಆಗಲೇ ತಮ್ಮ ಕೆಲಸ ಆರಂಭಿಸಿವೆ. ಕೀಟಗಳಲ್ಲಿ ಮಾಂಸಕ್ಕಿಂತಾ ಹೆಚ್ಚು ಪ್ರೋಟೀನ್ ಪಡೆಯುವ ಅವಕಾಶವಿದೆ. ಸದ್ಯದಲ್ಲೇ ನಿಮ್ಮ ಸಮೀಪದ ಅಂಗಡಿಯಲ್ಲಿ “ಪರ್ಯಾಯ ಪ್ರೋಟೀನ್ ಮೂಲಗಳಿಂದ ಪಡೆದ ಪಥ್ಯ ಪೂರಕ” ಎಂಬ ಲೇಬಲ್ ಧರಿಸಿರುವ ಬಾಟಲಿ ಕಂಡುಬಂದರೆ ಗಾಬರಿಬೀಳುವ ಅಗತ್ಯವಿಲ್ಲ. (‘ಪರ್ಯಾಯ ಮೂಲ’ ಎಂಬ ಲೇಬಲ್ ಏಕೆಂದರೆ ಹೆಚ್ಚಿನ ಜನರಿನ್ನೂ ಕೀಟಗಳನ್ನು ಆಹಾರವೆಂದು ಸ್ವೀಕರಿಸುವ ಮನಸ್ಸು ಮಾಡದಿರುವುದಷ್ಟೇ).

ಮಾನವ ನಡವಳಿಕೆಗಳು ಹಾಗೂ ನೈತಿಕತೆ:

ಹೆಚ್ಚಿನ ಆಪ್-ಸ್ಟೋರುಗಳಲ್ಲಿ ‘ಮೂಡೀಸ್’ ಅನ್ನುವ ಒಂದು ಆಪ್ ಅದಾಗಲೇ ಇದೆ. ಬಿಯಾಂಡ್ ವರ್ಬಲ್ ಎಂಬ ಕಂಪನಿ ಹದಿನೈದು ವರ್ಷಗಳ ಅಧ್ಯಯನದ ನಂತರ ಬಿಡುಗಡೆ ಮಾಡಿರುವ (ಹಾಗೂ ಮತ್ತೆ ಮತ್ತೆ ಅಭಿವೃದ್ಧಿಪಡಿಸುತ್ತಲೇ ಇರುವ) ಈ ಆಪ್, ನಿಮ್ಮ ಧ್ವನಿಯನ್ನು ಕೇಳಿ ನಿಮ್ಮ ಮೂಡ್ ಹೇಗಿದೆ ಅಂತಾ ಹೇಳಬಲ್ಲದು. ನಿಮ್ಮ ಬಾಸ್ ಹತ್ರಾ ರಜಾ ಅರ್ಜಿ ಹಿಡಿದು ಹೋಗಿದ್ದೀರ. ಬಾಸ್ ನಗದೇ, ಸಿಟ್ಟು ಮಾಡದೇ ನಿಮ್ಮ ಅರ್ಜಿ ಒಪ್ಪಿದ್ದಾನೆ. ಯಾವತ್ತೂ ಇಷ್ಟು ಸುಲಭವಾಗಿ ರಜಾ ಕೊಡಲು ಒಪ್ಪದ ನಿಮ್ಮ ಬಾಸು ಒಪ್ಪಿದ್ದು ಆಶ್ಚರ್ಯವೇ? ಮನಸ್ಸಲ್ಲಿ ಸಂತೋಷವಿದ್ದರೂ, ನಿಮಗ್ಯಾಕೋ “ಈ ಒಪ್ಪಿಗೆ ಯಾಕೋ ಒಂದ್ವಾರ ಕಳೆದ ಮೇಲೆ ತಿರುಗುಬಾಣವಾಗಲಿದೆ” ಅಂತಾ ಅನ್ನಿಸುತ್ತಿದೆಯಾ? ನಿಮ್ಮ ಮೂಡೀಸ್ ಆಪ್ ತೆರೆದಿಟ್ಟು, ಮತ್ತೆ ಬಾಸ್ ಕ್ಯಾಬಿನ್ನಿಗೆ ಹೋಗಿ ಒಂದು ನಿಮಿಷ ಮಾತನಾಡಿ, ನಿಮಗೆ ಉತ್ತರ ಸಿಗಬಹುದು. ಯಾಕೆಂದರೆ ಮೂಡೀಸ್ ಬರೀ ನಿಮ್ಮ ಮೂಡ್ ಮಾತ್ರವಲ್ಲ, ನಿಮ್ಮ ಫೋನಿನ ಮೈಕ್ರೋಫೋನ್ ಅನ್ನು ತೆರೆದಿಟ್ಟರೆ ಯಾರ್ಯಾರು ಮಾತನಾಡುತ್ತಿದ್ದಾರೋ ಅವರ ಚಿತ್ತ, ವರ್ತನೆ, ಸ್ವಭಾವ ಮಾತ್ರವಲ್ಲದೇ ಅವರ ವ್ಯಕ್ತಿತ್ವದ ಬಗ್ಗೆಯೂ ತಿಳಿಯಲು ಸಹಕರಿಸಲಿದೆ.
fwl6wlng49-moodies
ನೀವು ಆಫೀಸಿನಲ್ಲಿ ಕೆಲಸ ಮುಗಿಸಿ ಹೈರಾಣಾಗಿ ಹೈವೇನಲ್ಲಿ 90ಕಿಮೀ ವೇಗದಲ್ಲಿ ಡ್ರೈವ್ ಮಾಡುತ್ತಾ ಮನೆಕಡೆಗೆ ಹೋಗುತ್ತಿದ್ದೀರ. ಹಿಂದಿನ ಸೀಟಿನಲ್ಲಿ ನಿಮ್ಮ ಮಕ್ಕಳಿಬ್ಬರೂ ಏನೋ ವಿಚಾರಕ್ಕೆ ಪಿರಿಪಿರಿಪಿರಿ ಅಂತಿದ್ದಾರೆ. ನಿಮಗೆ ತಲೆಚಿಟ್ಟುಹಿಡಿದು “ಏಯ್! ಸುಮ್ನೇ ಕೂರ್ರೋ!!” ಅಂತಾ ಅರಚುತ್ತೀರಾ. ತಕ್ಷಣ ನಿಮ್ಮ ಫೋನ್ ನಿಮ್ಮ ಧ್ವನಿಯಲ್ಲಿರುವ ಒತ್ತಡ ಹಾಗೂ ಸಿಟ್ಟನ್ನರಿತು, ತಾನು ಕನೆಕ್ಟ್ ಆಗಿರುವ ಕಾರಿನ ಕಂಪ್ಯೂಟರಿಗೆ ಹೇಳಿ ನಿಮ್ಮ ಕಾರಿನ ವೇಗವನ್ನು  60ಕ್ಕಿಳಿಸುವಂತಾದರೆ!!
2020ರ ಒಳಗೆ ನಿಮ್ಮ ಧ್ವನಿ ಮತ್ತು ಮುಖಭಾವವನ್ನು ಗಮನಿಸಿ ನೀವು ಸುಳ್ಳು ಹೇಳುತಿದ್ದೀರೋ ಇಲ್ಲವೋ ಎಂಬುದನ್ನು ಬರೀ ನಿಮ್ಮ ಮೊಬೈಲ್ ಕ್ಯಾಮೆರಾ ಉಪಯೋಗಿಸಿ ಕೆಲಸಮಾಡಿ ಹೇಳುವ ಆಪ್’ಗಳಿಗೆ ಪೇಟೆಂಟ್ ಪಡೆಯಲು ಅದಾಗಲೇ ಕಂಪನಿಗಳು ಕ್ಯೂನಲ್ಲಿ ನಿಂತಿವೆ. ನಿಮ್ಮ ಸ್ಥಳೀಯ ರಾಜಕಾರಣಿ ತನ್ನ ಭಾಷಣದಲ್ಲಿ ಕೊಡುತ್ತಿರುವ ಆಶ್ವಾಸನೆಗಳು, ಮಾಡುತ್ತಿರುವ ಆರೋಪಗಳು ನಿಜವೋ, ಟೊಳ್ಳೋ ಅಂತಾ ಗೊತ್ತಾಗುವಂತಾದರೆ!!
…….ಕಲ್ಪನೆ ಒಳ್ಳೆಯದಿದೆಯಲ್ಲವೇ?
(ಇಷ್ಟೆಲ್ಲಾ ತಂತ್ರಜ್ಞಾನ ಮುಂದುವರೆದರೂ ಹೆಣ್ಣುಮಕ್ಕಳ ಮಾತಿಗೂ, ಅದರ ನಿಜಾರ್ಥಕ್ಕೂ ಯಾವತ್ತೂ ಸಂಬಂಧವಿರಲ್ಲ ಅನ್ನೋ ಜೋಕುಗಳು ನಿಧಾನವಾಗಿ ಹಳೆಯದಾಗುತ್ತವೆಯೋ ಇಲ್ಲವೋ ಇನ್ನೂ ಗೊತ್ತಿಲ್ಲ 🙂 )

ಹಣಕಾಸು:

BiteMyCoin-Cryptocurrency

ಎಲ್ಲೆಡೆ ಸದ್ದು ಮಾಡುತ್ತಿರುವ ಬಿಟ್ ಕಾಯಿನ್ ಎಲ್ಲಾ ವಿರೋಧಗಳ ನಡುವೆಯೂ ಮುಖ್ಯವಾಹಿಸಿಗೆ ಬರಲಿದೆ. ದೇಶಗಳೆಲ್ಲಾ ಒಟ್ಟಿಗೆ ಸೇರಿ ಇದಕ್ಕೊಂದು ನಿಯಮವಾಳಿಗಳನ್ನ ರೂಪಿಸಿದರೆ, ಇದೇ ಸಾಮಾನ್ಯ ರಿಸರ್ವ್ ಕರೆನ್ಸಿಯಾಗಬಹುದು. ಬರೀ ಒಂದೇ ದೇಶದ ಕರೆನ್ಸಿಯಾದ ಡಾಲರ್ ಮೇಲೆ ಅವಲಂಬಿತವಾಗುವ ಬದಲು, ಜಗತ್ತಿನ ಕರೆನ್ಸಿಯಾಗಬಲ್ಲ ಬಿಟ್-ಕಾಯಿನ್ ಮೇಲೆ ತಮ್ಮ ದೇಶೀಯ ಕರೆನ್ಸಿಗಳನ್ನು ಆಂಕರ್ ಮಾಡಿ ತಮ್ಮ ಸ್ಟಾಕ್ ಮಾರ್ಕೆಟ್ಗಳನ್ನು ಈಗಿಗಿಂತಾ ಹೆಚ್ಚು ಸ್ಥಿರವಾಗಿಸಬಹುದು.

ಆಯಸ್ಸು:

how-to-live-longer-and-feel-better-pdf_opt

ಇವತ್ತಿನ ತಂತ್ರಜ್ಞಾನಭಿವೃದ್ಧಿಯ ವೇಗದಲ್ಲಿ ಮನುಷ್ಯನ ಆಯಸ್ಸು ವರ್ಷಕ್ಕೆ ಮೂರುತಿಂಗಳಿನಂತೆ ಹೆಚ್ಚಾಗ್ತಾ ಇದೆ. ನಾಲ್ಕುವರ್ಷದ ಹಿಂದೆ ಮಾನವನ ಸರಾಸರಿ ಆಯಸ್ಸು 79ವರ್ಷವಾಗಿತ್ತು. ಇವತ್ತು ಅದು 80ವರ್ಷವಾಗಿದೆ. ಬರೀ ಸರಾಸರಿ ಆಯಸ್ಸು ಮಾತ್ರ ಹೆಚ್ಚಾಗ್ತಾ ಇಲ್ಲ, ವರ್ಷದಿಂದವರ್ಷಕ್ಕೆ ಆಯಸ್ಸಿನ ವೃದ್ಧಿಯೂ ಹೆಚ್ಚಾಗ್ತಾ ಇದೆ. 2036ರ ಹೊತ್ತಿಗೆ ವಿಜ್ಣ್ಯಾನಿಗಳು ಪ್ರತಿವರ್ಷವೂ ಮಾನವನ ಆಯಸ್ಸಿಗೆ ಒಂದುವರ್ಷ ಸೇರಿಸುವಷ್ಟು ಮುಂದುವರೆಯುತ್ತಾರೆ. ನಮ್ಮ ಆಹಾರಪದ್ಧತಿಗಳಲ್ಲಿ ಗಣನೀಯ ಮತ್ತು ಗಮನಾರ್ಹ ಗುಣಾತ್ಮಕ ಬದಲಾವಣೆಗಳಾದರೆ ಮನುಷ್ಯ ನೂರಕ್ಕಿಂತ ಹೆಚ್ಚು ವರ್ಷ ಬದುಕುವುದು ತೀರಾ ಅಸಾಧ್ಯವಾಗಲಿಕ್ಕಿಲ್ಲ.

ಶಿಕ್ಷಣ:

ಇಂದು ಆಫ್ರಿಕಾ ಮತ್ತು ಏಷ್ಯಾದ ದೇಶಗಳಲ್ಲಿ 10ಡಾಲರ್’ಗಳಿಗೆ ಅತ್ಯಂತ ಅಗ್ಗವಾದ ಸ್ಮಾರ್ಟ್ಫೋನ್ಗಳು ಲಭ್ಯವಿವೆ.

modern-education-app

2022ರ ಹೊತ್ತಿಗೆ
ಜಗತ್ತಿನ 70% ಜನಸಂಖ್ಯೆ ಸ್ಮಾರ್ಟ್ಫೋನ್ ಬಳಸಲಿದೆ. ಈ ಫೋನುಗಳ ಬಗ್ಗೆ ಜೋಕುಗಳದೇನೇ ಇರಲಿ, ಶಿಕ್ಷಣ ಕ್ಷೇತ್ರದಲ್ಲಿ ಅನುಭವವಿದ್ದವನಿಗೆ ಫೋನುಗಳನ್ನು ಬಳಸಿಕೊಂಡು ಹೇಗೆ ಶಿಕ್ಷಣಕ್ಷೇತ್ರದಲ್ಲಿ ಗುಣಾತ್ಮಕ ಬದಲಾವಣೆಗಳನ್ನು ತರಬಹುದು ಎಂದು ತಿಳಿದಿರುತ್ತೆ. ಜಗತ್ತನೆಲ್ಲೆಡೆ ಉತ್ತಮ ಶಿಕ್ಷಣ ಸುಲಭವಾಗಿ ದೊರೆಯುವಂತಾದರೆ ಅದೇ ಅಲ್ಲವೇ ಶ್ರೀಮಂತ ಭವಿಷ್ಯ?

ಇದೆಲ್ಲಾ ಬರೆಯುವಾಗ ನನಗೆ ಇತ್ತೀಚೆಗೆ ನೋಡಿದ “ಪ್ಯಾಡ್-ಮ್ಯಾನ್” ಚಿತ್ರದ ಒಂದು ಸಾಲು ಬಹಳವಾಗಿ ನೆನಪಿಗೆ ಬರುತ್ತಿದೆ. ಅದರ ನಾಯಕ ಕೊನೆಯಲ್ಲಿ UNಅನ್ನು ಉದ್ದೇಶಿಸಿ ಮಾತನಾಡುವಾಗ ಹೇಳ್ತಾನೆ “ನನ್ನ ಪ್ರಕಾರ, ಯಾವ ತಂತ್ರಜ್ಞಾನ ಮನುಷ್ಯನ ಜೀವನವನ್ನು ಮತ್ತು ಮಾನವೀಯ ಮೌಲ್ಯಗಳನ್ನು ತಟ್ಟುತ್ತದೆಯೋ, ಅದೇ ನಿಜವಾದ ಅಭಿವೃದ್ಧಿ”. ನಮ್ಮಲ್ಲಿ ಎಷ್ಟೋ ಜನರು “ಈ ಊಬರ್ ಆಪ್ ಕಂಡುಹಿಡಿದವ ಎಂತಾ ಬುದ್ಧಿವಂತ ಮಾರಾಯ, ಜಗತ್ತನ್ನೇ ಬದಲಾಯಿಸಿಬಿಟ್ಟ” ಅಂತಾ ಹೇಳಿದಾಗಲೆಲ್ಲಾ ನನಗೆ ಹುಸಿನಗು ಬರುತ್ತದೆ. ಯಾಕೆಂದರೆ ಈ ಊಬರ್, ಓಲಾಗಳಿಂದ ಆರ್ಥಿಕವಾಗಿ ನಾವು ವ್ಯವಹರಿಸುವ ರೀತಿ ಬದಲಾಗಿರಬಹುದು, ಟ್ಯಾಕ್ಸಿಗಳಿಗಾಗಿ ನಾವು ಕಾಯುವ ರೀತಿ ನಾವವುಗಳನ್ನ ಬಳಸುವ ರೀತಿ ಬದಲಾಗಿದೆಯೇ ಹೊರತು, ಅದರಿಂದ ಮನುಷ್ಯನ ಜೀವನವೇನೂ ಸುಧಾರಣೆಗೊಂಡಿಲ್ಲ.

ಆ ರೀತಿಯಲ್ಲಿ ನೋಡಿದರೆ ಟೆಸ್ಲಾ ಕಂಪನಿಯ ನಿರ್ಮಾತೃ ಎಲೋನ್ ಮಸ್ಕ್’ನ ಆವಿಷ್ಕಾರಗಳು ಬಹಳಷ್ಟು ಹಂತಗಳಲ್ಲಿ , ಬೇರೆ ಬೇರೆ ಸಮಯಗಳಲ್ಲಿ ನಿಜಕ್ಕೂ ಜನರ ಜೀವನಗಳಲ್ಲಿ ಬದಲಾವಣೆ ತರಬಲ್ಲವಾಗಿವೆ. ಆತನ ಎಲೆಕ್ಟ್ರಿಕ್ ಕಾರುಗಳು, ಟ್ರಕ್ಕುಗಳು ಇವತ್ತಿಗೆ ರಸ್ತೆಯಲ್ಲಿ ಸಣ್ಣದೊಂದು ಚಳುಕು ಹುಟ್ಟಿಸಿವೆ. ಎಲೆಕ್ಟ್ರಿಕ್ ಕಾರುಗಳೆಂದರೆ ಬರೀ ಬೆಂಕಿಪೊಟ್ಟಣದ ಗಾತ್ರದವು, 60 ಕಿಮೀ ವೇಗವನ್ನು ದಾಟಲಿಕ್ಕಿಲ್ಲ ಎಂಬ ಅನಿಸಿಕೆಯನ್ನು ಚೂರುಚೂರಾಗಿಸಿ ಎಲೆಕ್ಟ್ರಿಕ್-ಕಾರು ಕೂಡಾ ಬೆಂಝ್’ನಷ್ಟೇ ಸುಂದರವಾಗಿರಬಲ್ಲುದು, ಪೋರ್ಶದಷ್ಟೇ ವೇಗವಾಗಿ ಚಲಿಸಬಲ್ಲುದು, ಹೋಂಡಾದಷ್ಟೇ ಮಾಲೀಕನ ಜೇಬಿಗೆ ಹಿತವಾಗಬಲ್ಲದು ಎಂಬುದನ್ನು ತೋರಿಸಿಕೊಟ್ಟಿದೆ. ಜೊತೆಗೇ ಈ ಕಾರುಗಳ ಮಾರಾಟ ಉಳಿದ ಕಾರು ತಯಾರಕರಿಗೂ ಎಲೆಕ್ಟ್ರಿಕ್ ಕಾರುಗಳ ಬಗ್ಗೆ ಯೋಚಿಸುವಂತೆ ಮಾಡಿದೆ. ಈ ಟ್ರೆಂಡ್ ಕಾರಣದಿಂದ ವಿದ್ಯುತ್ತನ್ನು ಬೇರೆ ಬೇರೆ ಮೂಲಗಳಿಂದ, ಅದರಲ್ಲೂ ಹೆಚ್ಚೆಚ್ಚು ಅಜೈವಿಕ ಮೂಲಗಳಿಂದ, ಪಡೆಯುವ ರೇಸ್ ಉಂಟಾಗಿದೆ. ಈ ಸ್ಪರ್ಧೆಯಿಂದಾಗಿ ಹೆಚ್ಚು ವಿದ್ಯುತ್ ಕೂಡಾ ಸಿಗುತ್ತಿದೆ, ಜೊತೆಗೇ ವಿದ್ಯುತ್ತಿನ ಬೆಲೆ ಕಡಿಯಾಗುತ್ತಲೇ ಹೋಗುತ್ತಿದೆ. ಅಂದರೆ ಎಲ್ಲರಿಗೂ ದಿನದ 24ಘಂಟೆಯೂ ವಿದ್ಯುತ್, ಅದರಲ್ಲೂ ಅಗ್ಗದ ವಿದ್ಯುತ್ ಸಿಗಲಾರಂಭಿಸುತ್ತದೆ. ಕೈಗಾರಿಕೆಗಳು ಹೆಚ್ಚು ಉತ್ಪಾದಕ ಉದ್ದಿಮೆಗಳಾಗಲಿವೆ. ವಿದ್ಯುತ್ ಆಧಾರಿತ ಸೇವೆಗಳು ಅಗ್ಗವಾಗಲಿವೆ. ಹೀಗೆ, ಒಬ್ಬ ಮನುಷ್ಯನ ‘ವೇಗದ ಎಲೆಕ್ಟ್ರಿಕ್ ಕಾರು ತಯಾರಿಸಬೇಕೆಂಬ’ ಹಂಬಲ, ಛಲದ ಬೆನ್ನಲ್ಲೇ ಸಮಾಜದ ಬೇರೆ ಬೇರೆ ಸ್ಥರದ ಜನರಿಗೆ ಪರೋಕ್ಷ ಉಪಯೋಗವಾಗಲಿದೆ. ಈತನ ಇನ್ನೊಂದು ಕನಸು ಮತ್ತೆ ಮತ್ತೆ ಉಪಯೋಗಿಸಬಲ್ಲ ರಾಕೆಟ್ ಅನ್ನು ತಯಾರಿಸುವುದು. ಇದೂ ಕೂಡಾ ರಾಕೆಟ್ ತಂತ್ರಜ್ಞಾನದಲ್ಲಿ ಭಾರೀ ಬದಲಾವಣೆ ತರಲಿದೆ. ಮುಂದೊಂದು ದಿನ ನಮ್ಮ ಮಕ್ಕಳು ಮಧುಚಂದ್ರಕ್ಕೆ ಚಂದ್ರನ ಮೇಲಿಳಿಯಲೂ, ಅಥವಾ ನಮ್ಮ ಮರಿಮೊಕ್ಕಳು ಬೇಸಿಗೆ ರಜಕ್ಕೆ ಮಂಗಳನ ಅಂಗಳಕ್ಕೇ ಹೋಗಲು ಇಂತಹ ಕನಸುಗಳು ಮತ್ತದಕ್ಕನುಗುಣವಾದ ಅಭಿವೃದ್ಧಿಗಳಿಂದ ಮಾತ್ರವೇ ಸಾಧ್ಯವಿದೆ. ನಾವು ನಿಂತಲ್ಲಿಗೇ ಟ್ಯಾಕ್ಸಿ ಅಥವಾ ಊಟ ಕರೆಸಿದರೇನು ಬಂತು, ಟೆಸ್ಲಾದಂತಹ ಕನಸುಗಳಿಂದಲ್ಲವೇ ಮನುಕುಲ ನಿಜಕ್ಕೂ ಮುಂದುವರೆಯಲು ಸಾಧ್ಯ?  (ಟೆಸ್ಲಾ ಒಂದು ಸುಲಭ ಉದಾಹರಣೆಯಷ್ಟೇ)

ಚಿತ್ರಕೃಪೆ: ಅಂತರ್ಜಾಲ (ಎಲ್ಲಾ ಚಿತ್ರಗಳ ಹಕ್ಕುಗಳು ಆಯಾ ವಾರಸುದಾರರಿಗೆ ಸೇರಿದ್ದು)

 

ಈ ವಿಜ್ಞಾನ ಭವಿಷ್ಯ ತಿಳಿದಿದ್ದೀರೇನು? (ಭಾಗ – 1)

(ರಾಬರ್ಟ್ ಗೋಲ್ಡ್ಮನ್’ರ Future Predictions ಎಂಬ ಪ್ರಬಂಧದಿಂದ ಪ್ರೇರಿತ ಬರಹ)
13315789_10209535133754601_5093488145198763625_n
ಲೇಖನದ ತಲೆಬರಹ ನೋಡಿ ಇದೇನಪ್ಪಾ ಹಸ್ತ ಭವಿಷ್ಯ ಗೊತ್ತು, ವಾಸ್ತು ಭವಿಷ್ಯ ಕೇಳಿದ್ದೀನಿ, ವಿಜ್ಞಾನದಲ್ಲೂ ಭವಿಷ್ಯವೇ ಅಂದ್ಕೋಬೇಡಿ. ಇದು ನಮ್ಮ ವೈಜ್ಞಾನಿಕ ಅಭಿವೃದ್ಧಿಗಳ ನಾಗಾಲೋಟದ ಬೆಳವಣಿಗೆಯ ಬಗ್ಗೆ ಭವಿಷ್ಯದ ನುಡಿ. ನಾವೀಗ ಸದ್ಯಕ್ಕೆ ವಿಜ್ಞಾನದ ಸುವರ್ಣಯುಗದಲ್ಲಿ ಬದುಕುತ್ತಿದ್ದೇವೆ. ನಮ್ಮ ಜೀವನದ ಪ್ರತಿಯೊಂದು ಅಂಗುಲದಡಿಯಲ್ಲೂ ವಿಜ್ಞಾನ ಬೆಳೆದು ಆಕ್ರಮಿಸಿಕೊಂಡಿದೆ. ಹತ್ತುವರ್ಷದ ಹಿಂದೆ ನಾವು ಊಹಿಸಿರದ ರೀತಿಯಲ್ಲಿ ವಿಜ್ಞಾನ ಬೆಳೆದಿದೆ. 2008ರಲ್ಲಿ ಇನ್ನೂ ಮೊಬೈಲ್ ಫೋನಿನ ಮುಖ್ಯ ಉದ್ದೇಶ ಇನ್ನೊಬ್ಬರಿಗೆ ಕರೆ ಮಾಡೋದೇ ಆಗಿತ್ತು. ಉಳಿದಂತೆ ಸಂಗೀತ, ಕ್ಯಾಮೆರಾಗಳೆಲ್ಲಾ ಒಂದರೊಟ್ಟಿಗೆ ಒಂದು ಫ್ರೀ ಎಂಬಂತೆ ಸಿಗುತ್ತಿದವಷ್ಟೇ. ಆದರೆ ಇವತ್ತು ಎಲ್ಲದಕ್ಕೂ ಒಂದು ಆಪ್ ಇದೆ, ಎಲ್ಲಿದ್ದೀವಿ ಏನು ಮಾಡುತ್ತಿದ್ದೀವಿ ಎಂದು ಹೇಳುವುದಕ್ಕೂ ಒಂದು ಕಂಪ್ಯೂಟರ್ ಪ್ರೋಗ್ರಾಮ್ ಬಂದಿವೆ. 2008ರಲ್ಲಿ ತಾನು ತಾಯಿಯಾದರೆ ಕರೆಮಾಡಿ ಹೇಳುತ್ತಿದ ಜನ, 2018ರಲ್ಲಿ ಇನ್ಸ್ಟಾಗ್ರಾಮ್’ನಲ್ಲಿ ಫೋಟೋ ಹಾಕಿ ಹೇಳಲಾರಂಭಿಸಿದ್ದಾರೆ. ನಮ್ಮ ಜನ ಕಟ್ಟಕಡೇ ಎಸ್ಸೆಮ್ಮೆಸ್ಸು ಕಳಿಸಿ ಯಾವ ಕಾಲಯಾವಾಯ್ತೋ! ಈಗೇನಿದ್ರೂ ವಾಟ್ಸ್ಯಾಪ್, ಟೆಲಿಗ್ರಾಮ್, ಸ್ನಾಪ್-ಚಾಟ್ ಕಾಲ. ಅಜ್ಜ ಸತ್ತರೆ ಅಳುತ್ತಿದ್ದ ಮೊಮ್ಮಕ್ಕಳು ಇವತ್ತು ಅಜ್ಜನ ಚಟ್ಟನ ಪಕ್ಕ ನಿಂತು “Last snap with my grandpa” ಅಂತಾ ಫೇಸ್ಬುಕ್ಕಿನಲ್ಲಿ ಫೋಟೋ ಹಾಕುತ್ತಿದ್ದಾರೆ. ಈ ಹತ್ತು ವರ್ಷದಲ್ಲೇ ನಮ್ಮ ಜೀವನ ಹೀಗಾಗಿರಬೇಕಾದರೆ ಮುಂದಿನ ಇಪ್ಪತ್ತು ವರ್ಷಗಳಲ್ಲಿ ಹೇಗಾಗಬಹುದು ಎಂಬ ಕಲ್ಪನೆ ನಮ್ಮೆಲ್ಲರಿಗೂ ಒಂದಲ್ಲ ಒಂದು ಸಲ ಬಂದಿರುತ್ತೆ. ಕನಸೂ ಕಂಡಿರ್ತೀವಿ.
ಆದರೆ , ಜನ ಭವಿಷ್ಯದ ಬಗ್ಗೆ ಮಾತನಾಡುವಾಗ ಎಂತೆಂತದೋ ಕಲ್ಪನೆಗಳನ್ನಿಟ್ಟುಕೊಂಡಿರ್ತಾರೆ. ಹಾಲಿವುಡ್ಡಿನ ಸೈ-ಫೈ ಚಿತ್ರಗಳನ್ನ ನೋಡಿ ಇನ್ನೇನು ಎರಡುಮೂರು ವರ್ಷಗಳಲ್ಲಿ ಹಾರುವ ಕಾರುಗಳೇ ಬಂದುಬಿಡ್ತಾವೆ ಅಂತಾ ನಿರೀಕ್ಷೆ ಇಟ್ಟುಕೊಂಡವರಿಗೇನು ಕೊರತೆಯಿಲ್ಲ. ತಮಾಷೆಯೆಂದರೆ, ಹಾಲಿವುಡ್ಡಿನ ಬರಹಗಾರರು, ಗ್ರಾಫಿಕ್ ಆರ್ಟಿಸ್ಟುಗಳು ಈ ರೀತಿ ಹಾರುವ ಕಾರುಗಳು ಬರ್ತಾವೆ ಅನ್ನೋ ಕಲ್ಪನೆಯನ್ನ 1970ರಿಂದScreen Shot 2018-04-06 at 11.14.04 AMಲೂ ಹರಿಬಿಡ್ತಾಲೇ ಇದ್ದಾರೆ.  ಕ್ರಿಯೇಟಿವಿಟಿಯ ಗ್ರೇವಿಗೆ ಯಾವುದರ ಹಂಗು? ಅದು ತನಗೆ ಹೆಂಗ್ ಬೇಕೋ ಹಂಗೆ ಹರಿಯುತ್ತೆ. ಯಾರೂ ಕೂಡಾ Air Traffic Control ಅನ್ನೋದು ಅದೆಷ್ಟು ಕ್ಲಿಷ್ಟವಿಚಾರ, ಅದೆಷ್ಟೋ ಎತ್ತರದಲ್ಲಿ ಹಾರುವ ಮಾಮೂಲಿ ಏರೋಪ್ಲ್ಲೇನುಗಳನ್ನೇ ಸುಧಾರಿಸೊಕ್ಕೆ ಕಷ್ಟಪಡ್ತಾ ಇದ್ದೀವಿ, ಇದರ ಜೊತೆಗೆ ಮಾರುತಿ-800ಗಳೂ ಹಾರೋಕೆ ಶುರುಮಾಡಿದ್ರೆ ಏನಾಗುತ್ತೆ ಅನ್ನೋದರನ್ನ ಅರ್ಥ ಮಾಡ್ಕೊಳ್ಳೋದೇ ಇಲ್ಲ. ಭವಿಷ್ಯ ಅಂದರೆ ಹೀಗೇ ಹಾರುವ ಕಾರುಗಳ, ರೋಬೋಟುಗಳ ಕಾಲ ಅಂತಲೇ ಅಂದ್ಕೊಳ್ಳುವುದರ ನಡುವೆ, ನಿಜವಾಗಲೂ ಭವಿಷ್ಯ ಹೇಗಿರುತ್ತೆ ಅಂತಾ ಯೋಚಿಸುವವರು ಇಲ್ಲವೇ ಇಲ್ಲ ಅನ್ನುವಷ್ಟು ಕಡಿಮೆ. ಒಂದು ಕ್ಷಣಕ್ಕೆ ಈ “ಇನ್ನೂ ಮುಖ್ಯವಾಹಿನಿಗೆ ಬರದಿರುವ” ತಂತ್ರಜ್ಞಾನಗಳ ಉಸಾಬರಿ ಬದಿಗಿಟ್ಟು, ಈಗಾಗಲೇ ನಮ್ಮ ಬಳಿಯಿರುವ ತಂತ್ರಜ್ಞಾನಗಳು ಹಾಗೂ ಅವುಗಳ ಸುಧಾರಿತ ವರ್ಷನ್ನುಗಳು ತರಬಹುದಾದ ಭವಿಷ್ಯದ ಬಗ್ಗೆ ಯೋಚಿಸುತ್ತಾ ಈ ಬರಹ. ಇದರಲ್ಲಿ “ಹೊಸದಾಗಿ ಏನು ಬರುತ್ತೆ” ಅಂತಾ ಬೂಸಿ ಬಿಡೋದನ್ನ ಬದಿಗಿಟ್ಟು, ಸಧ್ಯದ ಪರಿಸ್ಥಿತಿಯೇ ಮುಂದುವರೆದರೆ “ಈಗಿರುವ ಹಾಗೂ ಹಳೆಯದರ ಕಥೆ ಏನಾಗುತ್ತೆ” ಎನ್ನುವ ಬಗ್ಗೆ ಅವಲೋಕನವಿದೆ.
ಮುಂದಿನದರ ಬಗ್ಗೆ ಯೋಚಿಸುವ ಮುನ್ನ, ನಮ್ಮ ನಿನ್ನೆಗಳು ಹೇಗಿದ್ದವು ಹಾಗೂ ನನ್ನ ಇವತ್ತುಗಳು ಹೇಗೆ ನಿನ್ನೆಯ ಕೆಲ ತಂತ್ರಜ್ಞಾನಗಳನ್ನ ಅಳಿಸಿಹಾಕಿವೆ ಎಂಬುದನ್ನೊಮ್ಮೆ ನೋಡಿ. 1998ರಲ್ಲಿ ಕೊಡಾಕ್ ಎಂಬ ಕಂಪನಿ ಛಾಯಾಚಿತ್ರಗ್ರಾಹಕರ ಮೆಚ್ಚಿನ ಕಂಪನಿಯಾಗಿತ್ತು. ಜಗತ್ತಿನ 85% ಫೋಟೋ ಪೇಪರನ್ನ ತಯಾರಿಸ್ತಾ ಇದ್ದ ಈ ಕಂಪನಿ 1,70,000 ಉದ್ಯೋಗಿಗಳಿದ್ದ ದೈತ್ಯ. ಆದರೆ 2003ರಷ್ಟೊತ್ತಿಗೆ ಕಂಪನಿ ದಿವಾಳಿಯಂಚಿಗೆ ತಲುಪಿತ್ತು. ಅವರ ವ್ಯವಹಾರ ಮಾದರಿ (business model) ನಾಪತ್ತೆಯೇ ಆಗಿಹೋಗಿತ್ತು. 2012ರ ಜನವರಿಯಲ್ಲಿ ಅಧಿಕೃತವಾಗಿ ದಿವಾಳಿಯೆಂದು ಘೋಷಿಸಿಕೊಂಡು ಸರ್ಕಾರದಿಂದ ಸಹಾಯ ಕೋರಿಕೆಗೆ ಅರ್ಜಿ ಹಾಕಿತು. ಕೊಡಾಕ್’ಗೆ ಆದ ಗತಿಯೇ ಇನ್ನೂ ಎಷ್ಟೋ ಕಂಪನಿಗಳಿ ಮುಂದಿನ ಹತ್ತುವರ್ಷಗಳಲ್ಲಿ ಆಗಲಿದೆ. ಹಾಗೂ ಎಷ್ಟೋ ಕಂಪನಿಗಳಿಗೆ ಅದಿನ್ನೂ ತಿಳಿದೂ ಇಲ್ಲ. 1998ರಲ್ಲಿ, ಇನ್ನು ಮೂರುವರ್ಷಗಳಲ್ಲಿ 80% ಜನಸಾಮಾನ್ಯರು ಫಿಲಂಗಳನ್ನುಪಯೋಗಿಸಿ ಫೋಟೋ ತೆಗೆಯೋದೇ ಇಲ್ಲ ಅಂತಾ ಸ್ವತಃ ಕೊಡಾಕ್’ಗೆ ಕೂಡಾ ತಿಳಿದಿರಲಿಲ್ಲ. ತಮಾಷೆಯ ವಿಷಯವೆಂದರೆ 1975ರಲ್ಲಿ ಜಗತ್ತಿನ ಮೊತ್ತಮೊದಲ ಡಿಜಿಟಲ್ ಕ್ಯಾಮೆರಾ ತಯಾರಿಸಿದ್ದು ಇದೇ ಕೊಡಾಕ್ ಕಂಪನಿ. ಆಗಿನ್ನೂ ಅದರಲ್ಲಿದ್ದದ್ದು ಬರೇ ಹತ್ತುಸಾವಿರ ಪಿಕ್ಸೆಲ್’ಗಳು. ಆಮೇಲೆ ಅದನ್ನ ಅಭಿವೃದ್ಧಿಪಡಿಸಿ ಅಗ್ಗವಾಗಿಸಿದ್ದೂ ಸಹಾ ಇದೇ ಕೊಡಾಕ್ ಕಂಪನಿ. ಆದರೆ ಡಿಜಿಟಲ್ ಕ್ಯಾಮರಾವನ್ನ ಕೊಡಾಕ್ ಯಾವತ್ತೂ ಜನಸಾಮಾನ್ಯರ ತಂತ್ರಜ್ಞಾನ ಅಂತಾ ಪರಿಗಣಿಸಲೇ ಇಲ್ಲ. ಅವರು ಬಹುಷಃ ಅದನ್ನ ಹೆಚ್ಚೆಚ್ಚು ಅಭಿವೃದ್ಧಿಪಡಿಸಿ ಹಾಲಿವುಡ್’ಗೆ ಮಾರುವ ಯೋಚನೆಯಲ್ಲಿದ್ದರು. ಕೊಡಾಕ್’ನ ಎಕ್ಸಿಕ್ಯೂಟಿವ್’ಗಳಿಗೆ ಫಿಲಂ ಕ್ಯಾಮರಾ ಇಲ್ಲದ ಜಗತ್ತನ್ನ ಊಹಿಸಲು ಸಾಧ್ಯವಾಗಲೇ ಇಲ್ಲ. ಫ್ಯೂಜಿಪಿಲಂನೊಂದಿಗಿನ ತನ್ನ ವ್ಯವಹಾರ ವೈರತ್ವದಲ್ಲೇ ಬಿಡುವಿಲ್ಲದೇ ತೊಡಗಿಸಿಕೊಂಡ ಕೊಡಾಕ್, ಮೂರ್’ನ ನಿಯಮ (Moore’s Law) ಅರ್ಥೈಸಿಕೊಳ್ಳುವಲ್ಲಿ ಎಡವಿತು. (ಮೂರ್’ನ ನಿಯಮ – ಫೈರ್ಚೈಲ್ಡ್ ಸೆಮಿಕಂಡಕ್ಟರ್ ಹಾಗೂ ಇಂಟೆಲ್’ನಂತಹ ಕಂಪನಿಗಳ ಸ್ಥಾಪಕ ಗೋರ್ಡನ್ ಮೂರ್, 1965ರ ತನ್ನ ಪ್ರಬಂಧವೊಂದರಲ್ಲಿ “ವಿದ್ಯುನ್ಮಾನ ಕ್ಷೇತ್ರದಲ್ಲಿ ಪ್ರತೀ ವರ್ಷಕ್ಕೊಮ್ಮೆ ಇಂಟಿಗ್ರೇಟೆಡ್ ಸರ್ಕ್ಯೂಟ್’ಗಳ ಮೇಲಿರುವ ಘಟಕಗಳ ಸಂಖ್ಯೆ ದ್ವಿಗುಣಗೊಳ್ಳುತ್ತದೆ” ಎಂದಿದ್ದ. ಈಗ ಇದು ಪ್ರತಿ 18ತಿಂಗಳಿಗೊಮ್ಮೆ ದ್ವಿಗುಣಗೊಳ್ಳುತ್ತೆ ಎಂಬಲ್ಲಿಗೆ ಬಂದು ನಿಂತಿದೆ). 1995ರ ತನಕವೂ ತೆವಳುತ್ತಲೇ ಸಾಗಿದ ಈ ಡಿಜಿಟಲ್ ಕ್ಯಾಮರಾ ತಂತ್ರಜ್ಞಾನ, ಮುಂದಿನ ಐದು ವರ್ಷಗಳಲ್ಲಿ ಘಾತೀಯ ಮಟ್ಟದಲ್ಲಿ (exponential rate) ಅಭಿವೃದ್ಧಿ ಹೊಂದಿತು. ಇದೇ ರೀತಿಯ ಬೆಳವಣಿಗೆ ಮುಂದಿನ ದಿನಗಳಲ್ಲಿ ಕೃತಕ ಬುದ್ಧಿಮತ್ತೆ (ಅಥವಾ ಕೃ-ಬುದ್ಧಿಮತ್ತೆ) ಅಭಿವೃದ್ಧಿ (Artifical Intelligence), ವೈದ್ಯಕೀಯ ರಂಗ, ಸ್ವಯಂಚಾಲಿತ ಹಾಗೂ ಎಲೆಕ್ಟ್ರಿಕ್ ಕಾರುಗಳ ಅಭಿವೃದ್ಧಿ, ಶಿಕ್ಷಣರಂಗ, 3D ಪ್ರಿಂಟಿಂಗ್, ಕೃಷಿ ಹಾಗೂ ಉದ್ಯೋಗರಂಗದಲ್ಲಿ ಆಗಲಿದೆ. ನಾಲ್ಕನೇ ಕೈಗಾರಿಕಾ ಕ್ರಾಂತಿಯ ಘಟ್ಟದಲ್ಲಿ ನಾವೀಗ ನಿಂತಿದ್ದೀವಿ. ರಾಬರ್ಟ್ ಗೋಲ್ಡ್ಮನ್ ಎಂಬ ತಂತ್ರಜ್ಞ, ತಮ್ಮ ದ್ವಿಗುಣ-ತ್ರಿಗುಣ ವೇಗದ ಅಭಿವೃದ್ಧಿಯಿಂದ ಜಗತ್ತಿನ ಚಹರೆಯನ್ನೇ ಬದಲಿಸಬಲ್ಲ ಈ ಕೆಲವು ತಂತ್ರಜ್ಞಾನಗಳನ್ನು ಘಾತೀಯ ತಂತ್ರಜ್ಞಾನಗಳು (Exponential technologies) ಎಂದೂ, ಈ ತಂತ್ರಜ್ಞಾನಗಳು ಉಪಯೋಗಿಸಲ್ಪಡುವ ಈ ಕಾಲಘಟ್ಟಕ್ಕೆ ಘಾತೀಯ ಯುಗ (Exponential age) ಅಂತಲೂ ಕರೆದಿದ್ದಾನೆ. ಈ ಯುಗದ ಕೆಲ ಪದರಗಳನ್ನ ಅವಲೋಕಿಸೋಣ ಬನ್ನಿ.
ಹೊಸರೀತಿಯ ಉದ್ಯೋಗಗಳು:
Future-Jobsಕಳೆದ ಹತ್ತುವರ್ಷ ಕಂಪ್ಯೂಟರುಗಳು ನಮ್ಮ ಜೀವನವನ್ನ ಬದಲಾಯಿಸಿದವು. ಕಂಪ್ಯೂಟರುಗಳ ಅವಲೋಕನಾ ಸಾಮರ್ಥ್ಯ ಮತ್ತು ವೇಗ ಎರಡು ಹತ್ತುಪಟ್ಟು ಹೆಚ್ಚಿದವು. ಟಿಕೇಟುಗಳು ಟೂರ್ ಏಜೆನ್ಸಿಗಳಲ್ಲಿ, ಉದ್ದ ಕ್ಯೂ ಇರುವ ಕೌಂಟರುಗಳ ಮುಂದೆ ಬುಕ್ ಆಗುವುದು ನಿಂತು ಯಾವುದೋ ಕಾಲವಾಯಿತು. ಇಂದು ಎಲ್ಲಾ ರೀತಿಯ ಟಿಕೇಟುಗಳು ನಮ್ಮ ಫೋನುಗಳಲ್ಲಿ, ಸಣ್ಣ ಕ್ಯೂಗಳ ಕೌಂಟರುಗಳಲ್ಲಿ ಬುಕ್ ಆಗುತ್ತಿವೆ. ಬಿಲ್ ಕಟ್ಟಲು ಕೆಇಬಿ ಆಫೀಸಿಗೆ ಹೋಗುವ ಅಗತ್ಯ ಇಂದಿಲ್ಲ. ಸಾಫ್ಟ್ವೇರುಗಳು ಎಷ್ಟೋ ಸಾಂಪ್ರದಾಯಿಕ ಬ್ಯುಸಿನೆಸ್ ಮಾಡೆಲ್’ಗಳನ್ನು ಹಾಗೂ ಜೊತೆಗೇ ಜಗತ್ತನ್ನೂ ನಾವಂದುಕೊಂಡದ್ದಕ್ಕಿಂತಾ ಚಿತ್ರ-ವಿಚಿತ್ರರೀತಿಯಲ್ಲಿ ಬದಲಾಯಿಸುತ್ತಿವೆ. ‘ಊಬರ್’ ಇವತ್ತು ಜಗತ್ತಿನ ಅತೀದೊಡ್ಡ ಟ್ಯಾಕ್ಸಿ ಕಂಪನಿ. ಆದರೆ ಈ ಕಂಪನಿಯ ಬ್ಯಾಲೆನ್ಸ್ ಶೀಟಿನಲ್ಲಿ ಒಂದೇ ಒಂದು ಕಾರು ಟ್ಯಾಕ್ಸಿಯ ರೂಪದಲ್ಲಿಲ್ಲ. ‘ಏರ್ ಬಿ-ಎನ್-ಬಿ’ ಎಂಬುದು ಜಗತ್ತಿನ ಅತೀದೊಡ್ಡ ಹೋಟೆಲ್ ಕಂಪನಿ. ಆದರೆ ಇಡೀ ಭೂಮಿಯಮೇಲೆ ಅವರು ‘ನಮ್ಮದು’ ಅಂತಾ ಹೇಳಿಕೊಳ್ಳುವ ಒಂದೇ ಒಂದು ಹೋಟೆಲ್ ಕಟ್ಟಡವಿಲ್ಲ. ಭಾರತದಲ್ಲಿ ಓಲಾ, ಓಯೋ ರೂಮ್ಸ್, ಪೇಟಿಎಂನಂತಹ ಕಂಪನಿಗಳು ಹೊಸರೀತಿಯದ್ದೇ ಕೆಲಸಗಳನ್ನು ಸೃಷ್ಟಿಸುತ್ತಿವೆ. ನೀವಿರುವ ಜಾಗದಿಂದೆದ್ದು ಹೋಟೆಲಿನವರೆಗೆ ಸೋಮಾರಿತನ ಇರುವವರಿಗಾಗಿ ಇವತ್ತು ಝೊಮ್ಯಾಟೋ, ಸ್ವಿಗ್ಗಿಯಂತಹಾ ಆಪ್ ಬಂದಿವೆ. ಜೊತೆಗೇ, ಆರ್ಡರ್ ಮಾಡಿದ ಊಟವನ್ನು ಹೋಟೆಲಿನಿಂದ ನಿಮ್ಮ ಮನೆಗೆ ಕಳುಹಿಸುವ ಡೆಲಿವರಿ ಕಂಪನಿಗಳ ಹೊಸಾದೊಂದು ಉದ್ಯೋಗಾವಕಾಶ ಸಾಧ್ಯತೆಯನ್ನೇ ತೆರೆದಿಟ್ಟಿವೆ.
ಕೃ-ಬುದ್ಧಿಮತ್ತೆ (Artificial Intelligence):
ಕಂಪ್ಯೂಟರುಗಳೀಗ ಜಗತ್ತನ್ನು ಅರ್ಥೈಸಿಕೊಳ್ಳುವಲ್ಲಿಯೂ ಹಿಂದೆಂದೆಂದಿಗಿಂತಲೂ ಹೆಚ್ಚು ನಿಪುಣತೆಯನ್ನು ಪಡೆದಿವೆ. 2017ರಲ್ಲಿ, ಗೂಗಲ್ ಅಭಿವೃದ್ಧಿ ಪಡಿಸಿದ ಆಲ್ಫಾ-ಗೋ ಎಂಬ ಕಂಪ್ಯೂಟರ್, Go ಆಟ(19×19 ಮನೆಯ ಬೋರ್ಡ್ ಮೇಲೆ ಆಡುವ ಸ್ಟ್ರಾಟಜೀ ಗೇಮ್)ದಲ್ಲಿ ಜಗತ್ತಿನಲ್ಲೇ ಚತುರನೆಂದು ಹೆಸರು ಪಡೆದಿದ್ದ ಕೆ ಜೇಯೀ ಎಂಬ 19 ವರ್ಷದ ಆಟಗಾರನನ್ನು ಸೋಲಿಸಿತು. ವಿಜ್ಞಾನಿಗಳ ಹಳೆಯ ಲೆಕ್ಕಾಚಾರದ ಪ್ರಕಾರ ಕಂಪ್ಯೂಟರೊಂದು ಮನುಷ್ಯನನ್ನು ಈ ಆಟದಲ್ಲಿ ಸೋಲಿಸಲು ಇನ್ನೂ ಹತ್ತು ವರ್ಷ ಬೇಕಿತ್ತು.

finnovate-blog-ai-and-blockchain-for-global-stage-banner

ಅಮೇರಿಕಾದಲ್ಲಿ ಹೊಸದಾಗಿ ಕಾನೂನು ಪದವಿ ಪಡೆಯುತ್ತಿರುವವರಿಗೆ ಕೆಲಸಗಳು ಸಿಗುವುದೇ ಕಷ್ಟವಾಗುತ್ತಿದೆ. ಯಾಕೆಂದರೆ ರಾಸ್ಸ್ ಇಂಟೆಲಿಜೆನ್ಸ್ ಎಂಬ ಹೊಸಾ ಕಂಪನಿಯೊಂದು ಐಬಿಎಮ್’ನ ವಾಟ್ಸನ್ ಎಂಬ ಪ್ರಶ್ನೋತ್ತರ ತಂತ್ರಾಂಶಕ್ಕೆ ಅಮೇರಿಕಾದ ಎಲ್ಲಾ ಪ್ರಾಂತ್ಯಗಳ ಕಾನೂನನ್ನೂ, ಹಾಗೂ ಸಾಧ್ಯವಿರುವಷ್ಟು ಎಲ್ಲಾ ಕೇಸುಗಳನ್ನೂ ಕಲಿಸಿಟ್ಟಿದೆ. ಈಗ ಪಾರಾಲೀಗಲ್ಲುಗಳು ಮಾಡಬೇಕಾದ ಕೆಲಸ ತಮ್ಮದೇ ಸಹದ್ಯೋಗಿಯೊಂದಿಗೆ ಮಾತನಾಡುವ ಭಾಷೆಯಲ್ಲೇ ಕಾನೂನಾತ್ಮಕ ಸಮಸ್ಯೆಯೊಂದನ್ನು ಪ್ರಶ್ನಾರೂಪದಲ್ಲಿ ಕೇಳಿದರಾಯಿತು. ವಾಟ್ಯ್ಸನ್ ತನ್ನ ಡೇಟಾಬೇಸಲ್ಲಿರುವ ಕೇಸುಗಳನ್ನೂ, ಪ್ರಶ್ನೆಗೆ ಸಂಬಂಧಿಸಿದ ಕಾನೂನು ಪರಿಚ್ಛೇದಗಳನ್ನೂ ಅವಲೋಕಿಸಿ ಪರಿಹಾರವನ್ನು ಮುಂದಿಡುತ್ತದೆ, ಅದೂ ಸೆಕೆಂಡುಗಳಲ್ಲಿ. ಅದೇ ಪ್ರಶ್ನೆಗಳಿಗೆ ಮಾನವ ಲಾಯರೊಬ್ಬ 70% ಕರಾರುವಕ್ಕಾಗಿ ಉತ್ತರ ಕೊಡುವಲ್ಲಿ (ಅದೂ ಗಂಟೆಗಟ್ಟಲೇ ಅಭ್ಯಾಸದ ನಂತರ), ವಾಟ್ಸನ್ 90% ಕರಾರುವಕ್ಕಾಗಿ ಉತ್ತರಕೊಡುತ್ತದೆ. ಹಾಗಂತ ಲಾಯರುಗಳಿಗೆ ಮುಂದೆ ಕೆಲಸವೇ ಇರುವುದಿಲ್ಲ ಎಂದಲ್ಲ. ಲಾಯರುಗಳು ಇನ್ನುಮುಂದೆ ಕಾನೂನಿನ ನಿರ್ದಿಷ್ಟ ವಿಚಾರಗಳಲ್ಲಿ ಪರಿಣಿತರಾಗುತ್ತಾರೆ. ಆದರೆ ಸಣ್ಣಪುಟ್ಟ ಸಾಮಾನ್ಯಕೇಸುಗಳನ್ನೂ, ಹಾಗೂ ಎಲ್ಲಾ ಕೇಸಿಗಳಿಗೆ ಸಂಬಂಧಪಟ್ಟ ಸಣ್ಣಪುಟ್ಟ ಕೆಲಸಗಳಿಗೆ ಜೂನಿಯರ್ ಲಾಯರುಗಳ ಅವಶ್ಯಕತೆ ಇಲ್ಲವಾಗುತ್ತದೆ. ಇದೇ ವಾಟ್ಸನ್, ವೈದ್ಯಕೀಯ ರಂಗದಲ್ಲಿ, ಕ್ಯಾನ್ಸರ್ ಪತ್ತೆಹಚ್ಚುವಲ್ಲಿ ನರ್ಸ್ ಮತ್ತು ಲ್ಯಾಬ್ ಅಸಿಸ್ಟೆಂಟುಗಳಿಗೇ ಸವಾಲೊಡ್ಡುತ್ತಿದೆ. ಅದೂ ಸಹ ಮನುಷ್ಯರಿಗಿಂತ ನಾಲ್ಕುಪಟ್ಟು ಹೆಚ್ಚು ಪರಿಣಾಮಕಾರಿಯಾಗಿ. ಮನುಷ್ಯರ ಮುಖಗಳನ್ನು ಮನುಷ್ಯರಿಗಿಂತಾ ಹೆಚ್ಚು ಕರಾರುವಕ್ಕಾಗಿ ಫೇಸ್ಬುಕ್ ಗುರುತಿಸಲು ಪ್ರಾರಂಭಿಸಿದೆ. ಮಷೀನ್ ಲರ್ನಿಂಗ್, ನ್ಯಾಚುರಲ್ ಲ್ಯಾಂಗ್ವೇಜ್ ಪ್ರೋಸಿಸಿಂಗ್, ಡೀಪ್ ಲರ್ನಿಂಗ್ ಕ್ಷೇತ್ರಗಳಲ್ಲಿ ಇದೇ ರೀತಿ ಅಭಿವೃದ್ಧಿ ಮುಂದುವರೆದರೆ, 2030ರಲ್ಲಿ ಕಂಪ್ಯೂಟರುಗಳು ಎಷ್ಟೋ ಕೆಲಸಗಳಲ್ಲಿ ಮನುಷ್ಯರಿಗಿಂತಾ ಹೆಚ್ಚು ಬುದ್ಧಿವಂತರಾಗಲಿವೆ.
ಸ್ವಯಂಚಾಲಿತ ಕಾರುಗಳು:
ಭವಿಷ್ಯದ ಕಾರುಮಾರುಕಟ್ಟೆ ಮೈನವಿರೇಳಿಸುವ ಸಾಧ್ಯತೆಗಳಿಂದ ಕೂಡಿದೆ. ಯಾವುದೇ ಹಾಲಿವುಡ್ ಚಿತ್ರಕ್ಕೂ ಕಮ್ಮಿಯಿಲ್ಲದಂತೆ ನಿಮ್ಮನ್ನು ಅಚ್ಚರಿಗೊಳಿಸಲಿಗೆ. ಈ ವರ್ಷದ ಕೊನೆಯಲ್ಲಿ ಮೊತ್ತಮೊದಲ ಸ್ವಯಂಚಾಲಿತ ಕಾರುಗಳು ಮಾರುಕಟ್ಟೆಗೆ ಬರುವ ನಿರೀಕ್ಷೆಯಿದೆ. ನಿರೀಕ್ಷಿಸಿದಂತೆಯೇ ನಡೆದರೆ ಇನ್ನೈದು ವರ್ಷದಲ್ಲಿ ನೀವು ಸ್ವಂತಕ್ಕೆ ಕಾರು ಕೊಳ್ಳುವುದೇ ಬೇಡವೆನ್ನುವ ಮನಸ್ಸು ಮಾಡಿದರೂ ಆಶ್ವರ್ಯವೇನಿಲ್ಲ. ನಿಮಗೆ Aಯಿಂದ Bಗೆ ಹೊಗಬೇಕೆಂದೆನಿಸಿದಲ್ಲಿ, ಫೋನಿನಲ್ಲಿ ಊಬರ್ ಅಥವಾ ಓಲಾ ಬುಕ್ ಮಾಡಿದಂತೆಯೇ ಕಾರೊಂದನ್ನು ಬುಕ್ ಮಾಡಿದರಾಯ್ತು. ಸ್ವಯಂಚಾಲಿತ ಕಾರೊಂದು ಬಂದು ನಿಮ್ಮನ್ನು ಕರೆದುಕೊಂಡು ಹೋಗುತ್ತದೆ. ಪಾರ್ಕಿಂಗ್ ಹುಡುಕುವ ಅಥವಾ ಪಾರ್ಕ್ ಮಾಡುವ ಅಗತ್ಯವಿಲ್ಲ. ನೀವು ಎಷ್ಟು ದೂರ ಓಡಿಸಿದ್ದೀರೋ ಅಷ್ಟಕ್ಕೇ ಹಣ ಪಾವತಿಸಿದರಾಯ್ತು. ಅದೂ ಅಲ್ಲದೇ ಡ್ರೈವರ್’ನ ಕಚಿಪಿಚಿಯಿಲ್ಲ. ನೀವೇ ಡ್ರೈವ್ ಮಾಡುತ್ತಾ ಸಮಯ ವ್ಯರ್ಥ ಮಾಡುವ ಅಗತ್ಯವೂ ಇಲ್ಲ. ಆಫೀಸಿನ ಕೆಲಸವಿದ್ದರೆ ಮುಗಿಸಿಕೊಳ್ಳಿ, ಅಥವಾ ಪ್ರಯಾಣಿಸುತ್ತಲೇ ಅಮ್ಮನಿಗೊಂದು ಸ್ಕೈಪ್ ಕಾಲ್ ಮಾಡಿ. ಬಹುಷಃ ನಮ್ಮ ಮಕ್ಕಳಿಗೆ (ಮಕ್ಕಳಿಗಲ್ಲದಿದ್ದರೂ

intel_lebron_car_0102_lv_1080x10801

ಮೊಮ್ಮಕ್ಕಳಿಗೆ) ಡ್ರೈವಿಂಗ್ ಲೈಸೆನ್ಸ್ ಎಂದರೇನೂ ಎಂದು ತಿಳಿಯಲಿಕ್ಕಿಲ್ಲ ಹಾಗೂ ಅವರುಗಳಿಗೆ ನಾನು ನೀವು ಅನುಭವಿಸಿದ “ನನ್ನ ಮೊದಲ ಕಾರು” ಎಂಬ ಅನುಭೂತಿಯೂ ಆಗಲಿಕ್ಕಿಲ್ಲ.
ಇದರ ನೇರಪರಿಣಾಮವಾಗಿ ನಗರಗಳೂ ಬದಲಾಗಲಿವೆ. ಈ ತಂತ್ರಜ್ಞಾನ ಹೆಚ್ಚೆಚ್ಚು ಫೈನ್-ಟ್ಯೂನ್ ಆದಷ್ಟೂ ರಸ್ತೆಯ ಮೇಲಿನ ಕಾರುಗಳ ಸಂಖ್ಯೆಯಲ್ಲಿ ಗಣನೀಯ ಇಳಿಕೆಯಾಗಲಿದೆ. ಇನ್ನು ಹತ್ತುವರ್ಷದಲ್ಲಿ ಕಾರುಗಳ ಸಂಖ್ಯೆ 60-70% ಕಡಿಮೆಯಾಗಲಿದೆ. ಇದುವರೆಗೆ ಪಾರ್ಕಿಂಗ್ ಮಾಡಲು ಉಪಯೋಗಿಸುತ್ತಿದ ಸ್ಥಳಗಳಲ್ಲಿ ಪಾರ್ಕುಗಳು ನಿರ್ಮಾಣವಾಗಬಹುದು. (ಬೆಂಗಳೂರಂತಾ ನಗರದಲ್ಲಿ ಇನ್ನೊಂದಷ್ಟು ಅಪಾರ್ಟ್ಮೆಂಟುಗಳೂ ತಲೆಯೆತ್ತಬಹುದು ಎಂದು ಕುಹಕವಾಡುತ್ತೀರೇನೋ 🙂 )
ಜಗತ್ತಿನಲ್ಲಿ ಪ್ರತೀವರ್ಷ 12ಲಕ್ಷ ಜನ ರಸ್ತೆ ಅಪಘಾತಗಳಿಂದಾಗಿ ಸಾಯುತ್ತಿದ್ದಾರೆ. ಪ್ರತೀ ಲಕ್ಷ ಕಿಲೋಮೀಟರ್ ಪ್ರಯಾಣಕ್ಕೊಂದು ಅಪಘಾತ ನಡೆಯುತ್ತಿದೆ. ರಸ್ತೆಯಲ್ಲಿ ಸ್ವಯಂಚಾಲಿತ ಕಾರುಗಳ ಸಂಖ್ಯೆ ಹೆಚ್ಚಿದಷ್ಟೂ ಈ ಅಪಘಾತ ಹಾಗೂ ಸಾವುನೋವುಗಳ ಸಂಖ್ಯೆ ಗಣನೀಯವಾಗಿ ಇಳಿಯುತ್ತದೆ. ಅಪಘಾತಗಳ ಸಂಖ್ಯೆ ಪ್ರತೀ ಕೋಟಿ ಕಿಲೋಮೀಟರಿಗೊಂದಾಗುತ್ತದೆ.
ತಮ್ಮ ವ್ಯವಹಾರದ ಮಾದರಿಯನ್ನು ಬದಲಾಯಿಸಿಕೊಳ್ಳದಿದ್ದಲ್ಲಿ ಅನೇಕ ಕಾರುಗಳ ಕಂಪನಿಗಳು ದಿವಾಳಿಯಾಗುತ್ತವೆ. ಹೆಚ್ಚಿನ ಕಂಪನಿಗಳು ವಿಕಾಸನಾಕಾರಿ ತಂತ್ರವನ್ನೇ ಅನುಸರಿಸುತ್ತವೆ ಅಥವಾ ಈಗಾಗಲೇ ಅಸ್ತಿತ್ವದಲ್ಲಿರುವ ತಮ್ಮ ಕಾರುಗಳನ್ನು ಅಭಿವೃದ್ಧಿಪಡಿಸಲು ಪ್ರಯತ್ನಿಸುತ್ತವೆ. ಇದೇ ವೇಳೆ ಟೆಸ್ಲಾ, ಆಪಲ್ ಮತ್ತು ಗೂಗಲ್’ನಂತಹ ತಂತ್ರಜ್ಞಾನೀಯ ಕಂಪನಿಗಳು ಕ್ರಾಂತಿಕಾರಿ ತಂತ್ರವನ್ನನುಸರಿಸಿ, ನಾಲ್ಕು ಚಕ್ರಗಳ ಮೇಲೆ ಕಂಪ್ಯೂಟರನ್ನು ಕೂರಿಸಿ, ಆ ಕಂಪ್ಯೂಟರನ್ನು ಅಭಿವೃದ್ಧಿಪಡಿಸುತ್ತವೆ. ಫೋಕ್ಸ್-ವ್ಯಾಗನ್, ಔಡಿಗಳಲ್ಲಿ ಟೆಸ್ಲಾ ಈಗಾಗಲೇ ನಡುಕ ಹುಟ್ಟಿಸಿದೆ. VW ಆಗಲೇ ತನ್ನ ಮರಿಕಂಪನಿಯಾದ ಪೋರ್ಷ’ಗೆ ಮಿಷನ್-ಇ ಎಂಬ ಎಲೆಕ್ಟ್ರಿಕ್ ಕಾರು ತಯಾರಿಸಲು ಸಜ್ಜು ಮಾಡಿದೆ. ಅದೂ ಸ್ವಯಂಚಾಲಿತವಾಗುವ ದಿನ ದೂರವಿಲ್ಲ.
ಇವೆಲ್ಲಕ್ಕಿಂತಾ ಹೆಚ್ಚಾಗಿ ವಾಹನ ಇನ್ಷೂರೆನ್ಸ್ ಕಂಪನಿಗಳಿಗೆ ಹೊಡೆತ ಬೀಳಲಿದೆ. ಸ್ವಯಂಚಾಲಿತ ಕಾರುಗಳೇ ತುಂಬಿರುವ ರಸ್ತೆಗಳಲ್ಲಿ ಅಪಘಾತಗಳ ಸಂಖ್ಯೆ ಬೆರಳಿನಲ್ಲೆಣಿಸಬಹುದಾದಷ್ಟಾದರೆ, ವಾಹನ ವಿಮೆಯ ಪ್ರೀಮಿಯಂ ಗಮನಾರ್ಹವಾಗಿ ಇಳಿಕೆಯಾಗಲಿದೆ. ಹೀಗೇ ಮುಂದುವರೆದರೆ ಆಮೇಲೆ ಸ್ವಲ್ಪ ಸಮಯದಲ್ಲಿ ಕಾರ್ ವಿಮೆಯ ವ್ಯವಹಾರವೇ ಬಂದ್ ಆಗಬಹುದು.
ರಿಯಲ್ ಎಸ್ಟೇಟ್ ಉದ್ಯಮ ಸಂಪೂರ್ಣ ಬದಲಾಗಲಿದೆ. ಯಾಕೆಂದರೆ ನಿಮ್ಮ ಮನೆಯಿಂದ ಆಫೀಸಿಗೆ ತಲುಪುವ ಸಮಯ ಹೆಚ್ಚೆಚ್ಚು ಕರಾರುವಕ್ಕಾಗಿ ಊಹಿಸಬಲ್ಲುದಾದಾಗ, ನಿಮ್ಮ ಆಫೀಸು ಹೆಬ್ಬಾಳದಲ್ಲಿದ್ದರೂ ಸಹ ಕೆಂಗೇರಿಯಲ್ಲಿ ನೋಡಿದ ಸುಂದರವಾದ ಅಪಾರ್ಟ್ಮೆಂಟಿಗೆ ಹಣಹೂಡಲು ನೀವು ಹಿಂಜರಿಯುವುದಿಲ್ಲ.
ಇವಿಷ್ಟೂ ಸ್ವಯಂಚಾಲಿತ ಕಾರುಗಳ ವಿಷಯವಾಯ್ತು. ಈಗ ಇನ್ನೊಂದು ಮುಖ್ಯ ವಿಚಾರ ಅವಲೋಕಿಸೋಣ. ಈ ಸ್ವಯಂಚಾಲಿತ ಕಾರುಗಳಲ್ಲಿ ಹೆಚ್ಚಿನವು ಎಲೆಕ್ಟ್ರಿಕ್ ಕಾರುಗಳು. ಈ ಎಲೆಕ್ಟ್ರಿಕ್ ಕಾರುಗಳು ನಮ್ಮ ಭವಿಷ್ಯವನ್ನು ಹೇಗೆ ಬದಲಾಯಿಸಬಲ್ಲವು ಅಂತಾ ನೋಡೋಣ. ಪೆಟ್ರೋಲ್ ಬೆಲೆ ಕಮ್ಮಿಯಾಗುತ್ತೆ ಅನ್ನೋ ವಿಷಯಗಳೆಲ್ಲಾ ಬೇಡ. ಅಂತಾ ಭವಿಷ್ಯವನ್ನ ಯಾರು ಬೇಕಾದರೂ ಹೇಳಬಲ್ಲರು. ನಾವಿಲ್ಲಿ ಮಾತಾಡ್ತಾ ಇರೋದು ಈ ತಂತ್ರಜ್ಞಾನಗಳಿಂದ ನಮ್ಮ ಜೀವನಶೈಲಿ ಹೇಗೆ ಬದಲಾಗುತ್ತೆ ಅಂತಾ. 2020ರೊಳಗೆ ಭಾರತದಲ್ಲೂ ಎಲೆಕ್ಟ್ರಿಕ್ ಕಾರುಗಳು ಬರಲಾರಂಭಿಸುತ್ತವೆ. ಎಲೆಕ್ಟ್ರಿಕ್ ಕಾರುಗಳು ಹೆಚ್ಚಾದಷ್ಟೂ ರಸ್ತೆಗಳು, ನಗರಗಳು ಹೆಚ್ಚೆಚ್ಚು ಶಾಂತವಾಗುತ್ತವೆ. ವಿದ್ಯುದ್ಶಕ್ತಿ ಇನ್ನೂ ಅಗ್ಗವಾಗುತ್ತದೆ, ಇನ್ನೂ ಹೆಚ್ಚು ಶುದ್ಧವಾಗುತ್ತದೆ. ಸೌರಶಕ್ತಿಯಿಂದ ಉತ್ಪಾದಿಸಲಾಗುತ್ತಿರುವ ವಿದ್ಯುತ್ತಿನ ಪ್ರಮಾಣ ಕಳೆದ 30ವರ್ಷಗಳಿಂದ ಊರ್ಧ್ವಮುಖದಲ್ಲೇ ಇದೆಯಾದರೂ, ಅದರ ಪರಿಣಾಮ ನಮಗೆ ಈಗಷ್ಟೇ ಅರಿವಾಗ್ತಾ ಇದೆ. 2016 ಹಾಗೂ 2017ರಲ್ಲಿ ನಾವು ಸೌರಮೂಲದಿಂದ ಉತ್ಪಾದಿಸಿದ ವಿದ್ಯುತ್ತಿನ ಪ್ರಮಾಣ, ಬೇರೆ ಇಂಧನಮೂಲಗಳಿಂದ ತಯಾರಿಸಿದ ವಿದ್ಯುತ್ತಿಗಿಂತಾ ಹೆಚ್ಚು. ಹಾಗೂ, ಮುಂದಿನ ವರ್ಷಗಳಲ್ಲಿ ಈ ಪ್ರಮಾಣ ಹೆಚ್ಚಾಗುತ್ತಲೇ ಹೋಗಲಿದೆ. ಸೌರವಿದ್ಯುತ್ ಅದೆಷ್ಟು ಗಮನಾರ್ಹ ಪ್ರಮಾಣದಲ್ಲಿ ಉತ್ಪಾದನೆಯಾಗಲಿದೆ ಹಾಗೂ ಅಗ್ಗವಾಗಲಿದೆ ಎಂದರೆ, 2028ರ ವೇಳೆಗೆ ಕಲ್ಲಿದ್ದಲಿನ ಸ್ಥಾವರಗಳನ್ನಿಟ್ಟ ಕಂಪನಿಗಳು ದಿವಾಳಿಯೇಳುವಷ್ಟು!
shutterstock_326698985.0
ವಿದ್ಯುತ್ ಅಗ್ಗವಾದಷ್ಟೂ ನೀರು ಅಗ್ಗ ಹಾಗೂ ಹೇರಳವಾಗಲಿದೆ. ನಮಗೆ ತಿಳಿದಿರಬೇಕಾದ ಇನ್ನೊಂದು ವಿಷಯವೆಂದರೆ ಭೂಮಿಯ ಮೇಲೆ ನೀರಿಗೆ ಕೊರತೆಯಿಲ್ಲ. ಸ್ವಚ್ಚ ಕುಡಿಯುವ ನೀರಿಗಷ್ಟೇ ಕೊರತೆಯಿರೋದು. ಇವತ್ತು ಉಪ್ಪುನೀರಿನ ಅಲವಣೀಕರಣ ತಂತ್ರಜ್ಞಾನ (desalination technology) ಅದಾಗಲೇ ಅಭಿವೃದ್ಧಿಗೊಂಡು ಪ್ರತಿ ಘನ ಅಡಿ ನೀರಿಗೆ 2 ಕಿಲೋವ್ಯಾಟ್ ಅಷ್ಟೇ ವಿದ್ಯುತ್ ಬಳಸುವಷ್ಟು ಸಮರ್ಥವಾಗಿದೆ. ಇದಕ್ಕೆ ಜೊತೆಯಾಗಿ ವಿದ್ಯುತ್ತಿನ ಬೆಲೆಯೂ ಇಳಿದರೆ ಎಷ್ಟೂ ಸುಲಭವಾಗಿ ಖರ್ಚೇ ಇಲ್ಲದಂತೆ, ಅಥವಾ ಅತೀ ಕಡಿಮೆ ಖರ್ಚಿನಲ್ಲಿ, ಪ್ರತಿಮನುಷ್ಯನಿಗೂ ಸ್ವಚ್ಚ ಹಾಗೂ ಅನಿಯಮಿತ ನೀರು ಒದಗಿಸಬಹುದು, ಯೋಚಿಸಿ!
(ಭಾಗ – ೨…..ಸಧ್ಯದಲ್ಲೇ)

 

ಅಗಣಿತ ತಾರಾಗಣಗಳ ನಡುವೆ, ತೇಲುತ್ತಿದೆ ಒಂದು ನಿರ್ಜನ ಒಂಟಿಮನೆ

ನನಗೆ ಸಣ್ಣವನಿದ್ದಾಗಲಿಂದಲೂ ಆಕಾಶ ಅಂದ್ರೆ ಪಂಚಪ್ರಾಣ. ನಾನು ಬಾಲ್ಯಕಳೆದ ಸಿದ್ದರಮಠದಲ್ಲಿ ಕರೆಂಟೇ ಇಲ್ಲವಾದರಿಂದ, ಅಲ್ಲಿ ಬೆಳಕಿನ ಮಾಲಿನ್ಯ ಇರಲೇ ಇಲ್ಲ. ಹಂಗಾಗಿ ಆಕಾಶ ತನ್ನೆಲ್ಲಾ ಬೆರಗುಗಳನ್ನು ಅದೆಷ್ಟು ಚೆನ್ನಾಗಿ ತೆರೆದಿಡ್ತಾ ಇತ್ತು ಅಂತೀರಿ! ನಮ್ಮ ಮನೆ ಸುತ್ತಮುತ್ತ ಕಾಡಿದ್ದರಿಂದ ಬರೀ ಅಂಗೈಯಗಲದಷ್ಟೇ ಆಕಾಶ ಕಾಣ್ತಾ ಇದ್ದದ್ದು. ಆದರೆ, ದೇವಸ್ಥಾನದ ಮುಂದಿದ್ದ ಸ್ಕೂಲ್ ಗ್ರೌಂಡಿನಲ್ಲಿ ನಿಂತರೆ, ಭೂಮಿಯಮೇಲಿದ್ದ ನಾನೇ ಕಳೆದುಹೋಗುವಷ್ಟು ಆಕಾಶ!! ಅದೆಷ್ಟು ಸಾವಿರ ನಕ್ಷತ್ರಗಳೋ! ಒಂದಷ್ಟು ನನ್ನ ಫೇವರಿಟ್ ನಕ್ಷತ್ರಗಳೂ ಇದ್ವು. ಅವಕ್ಕೆಲ್ಲ “ನಮಸ್ಕಾರ ಹೆಂಗಿದ್ದಿರಾ” ಅಂತೆಲ್ಲಾ ಮಾತಾಡ್ಸಿ ಬರ್ತಾ ಇದ್ದೆ. ಅಪ್ಪ ಅದೇನದು ನಕ್ಷತ್ರದ ಹತ್ರ ಮಾತಾಡೋದು, ಅದಕ್ಕೇನು ಬಾಯಿಬರುತ್ತಾ ಉತ್ತರ ಹೇಳೋಕೆ ಅಂತಾ ಕೇಳಿದ್ರೆ, ‘ಮಿನುಗಿ ಮಿನುಗಿ ಉತ್ತರ ಹೇಳುತ್ತೆ. ನಿಮಗ್ಗೊತ್ತಿಲ್ಲ ಸುಮ್ನಿರಿ” ಅಂತಿದ್ದೆ. “ಈ ಹುಚ್ಚುಮುಂಡೇದು ನನ್ನ ಮಗನೇ ಹೌದಾ, ಅಥ್ವಾ ಲಸಿಕೆ ಹಾಕ್ಸೋಕೆ ಹೋದಾಗ ಆಸ್ಪತ್ರೆಯಲ್ಲೇನಾದ್ರೂ ಅದಲುಬದಲಾಯ್ತಾ” ಅಂತಾ ಡೌಟು ಬಂದು ಅಪ್ಪ ಸುಮ್ಮನಾಗ್ತಿದ್ರು ಅನ್ಸುತ್ತೆ.

ಹೈಸ್ಕೂಲಿಗೆ ಬರುವಷ್ಟೊತ್ತಿಗೆ ನಾನು ‘ಇಸ್ರೋಗೆ ಸೇರ್ತೀನಿ. ಬಾಹ್ಯಾಕಾಶಕ್ಕೆ ಹೋಗೋ ಮೊದಲ ಭಾರತೀಯ ನಾನೇ’ ಅಂತಾ ಇಡಿ ಭಾರತಕ್ಕೆ ಸೆಲ್ಫ್-ಡಿಕ್ಲೇರ್ ಮಾಡಿಯಾಗಿತ್ತು. ಆಮೇಲೆ ಇಸ್ರೋದ ಬಜೆಟ್ ಪ್ರಾಬ್ಲಮ್ ಗೊತ್ತಾಗಿದ್ದರಿಂದ, ಜೊತೆಗೇ ರಾಕೇಶ್ ಶರ್ಮಾನ ಹೆಸರು ಕೇಳಿದ್ದರಿಂದ ನನ್ನ ಕನಸನ್ನ ಹಂಗೇ ಸ್ವಲ್ಪ ಲೆಫ್ಟಿಗೆ ಸರಿಸಿ, ಇಸ್ರೋದಿಂದ ನಾಸಾಕ್ಕೆ ಶಿಫ್ಟ್ ಮಾಡಿದ್ದೆ. ಆದರೆ ಪಿಯುಸಿನಲ್ಲಿ ಗಣಿತ ಡುಮ್ಕಿ ಹೊಡೆದಮೇಲೇ ಗೊತ್ತಾಗಿದ್ದು, ಬಾಹ್ಯಾಕಾಶಕ್ಕೆ ಹೋಗಲು ಫಿಸಿಕ್ಸ್ ಮತ್ತು ಮ್ಯಾಥ್ಸ್ ಚೆನ್ನಾಗಿ ಗೊತ್ತಿರಬೇಕು. ಅದೂ ಸಹ ಗಣಿತ ಅಂದ್ರೆ 2+2=4 ಅನ್ನೋ ಗಣಿತವಲ್ಲ, ಅದಕ್ಕಿಂತಲೂ ಹೆಚ್ಚಿನ ಹಾಗೂ ಹೈಸ್ಕೂಲಿನಲ್ಲಿ ನಾನು ನಿರ್ಲಕ್ಷಿಸಿದ “ಆ ಗಣಿತ” ಅಂತಾ ಗೊತ್ತಾದಮೇಲೆ, “ನಂಗೆ ಗಣಿತ ಕಲಿಸಿದ ಟೀಚರ್ರೇ ಸರಿಯಿಲ್ಲ. ಭಾರತಕ್ಕೆ ಒಬ್ಬ ಗಗನಯಾನಿ ಇಲ್ಲದಂಗೆ ಮಾಡಿದ್ರು. ಅವರದ್ದೇ ತಪ್ಪು. ಬಿಗ್ ಲಾಸ್ ಟು ಇಂಡಿಯಾ” ಅಂತಾ ಆಡಳಿತಪಕ್ಷದ ನಾಯಕನಂತೆ ಅವರಮೇಲೆ ಗೂಬೆ ಕೂರಿಸಿ ಕನಸೆಲ್ಲಾ ಕಂಪ್ಯೂಟರ್ ಸೈನ್ ಕಡೆಗೆ ತಿರುಗಿಸಿದೆ. ಇಂಟೆಲ್ಲಿಗೆ ಸೇರಿ ಹೊಸಾದಿಂದ ತಲೆಮಾರಿನ ಪ್ರೊಸೆಸರ್ರನ್ನೇ ಕಂಡುಹಿಡಿದುಬಿಡ್ತೀನಿ ಅನ್ನೋ ಕನಸು ಗೂಡು ಕಟ್ತು. ಅದಕ್ಕೂ ಗಣಿತ ಚೆನ್ನಾಗಿರಬೇಕು ಅಂತಾ ಯಾರೋ ಜಾಪಾಳ ಮಾತ್ರೆ ಕೊಟ್ಟಮೇಲೆ ‘ಯಾಕೋ ನಾನು ಫೇಮಸ್ಸಾಗೋದು ಯಾರಿಗೂ ಇಷ್ಟ ಇಲ್ಲ ಅನ್ಸುತ್ತೆ’ ಅಂತಾ ಸಿಟ್ಟು ಮಾಡ್ಕಂಡು, ಗಣಿತದ ಅಗತ್ಯವೇ ಇಲ್ಲದ ಕೆಮಿಸ್ಟ್ರಿ ಕಡೆ ಗಮನವಿಟ್ಟೆ. ಕೆಮಿಸ್ಟ್ರಿಯಲ್ಲಿ ನೋಬೆಲ್ ಪಡೀಬೇಕು ಅಂತಾ ಹೊಸಾ ಕನಸಿನ ಹಿಂದೆ ಬಿದ್ದೆ. ಎಂಬಿಎಗೆ ಸ್ಕಾಲರ್ಶಿಪ್ ಸಿಗೋವರ್ಗೂ ಅದೇ ಕನಸಲ್ಲೇ ಇದ್ದೆ……

ಅಯ್ಯೋ ಬಿಡಿ ಆ ವಿಷಯ ಯಾಕೆ. ಕಮಿಂಗ್ ಬ್ಯಾಕ್ ಟು ಆಕಾಶ. ಹ್ಮ್ಮ್….. ಆಸ್ಟ್ರೋನಾಟ್ ಆಗದಿದ್ದರೂ, ಈ ಅಕಾಶದ ಮೇಲಿನ ಹುಚ್ಚು ಎಂದಿಗೂ ಕಡಿಮೆಯಾಗಲೇ ಇಲ್ಲ. ಬಿಎಸ್ಸಿಯಲ್ಲಿರುವಾಗ ಬೇರೆ ಬೇರೆ ಪ್ರಾಥಮಿಕ ಶಾಲೆಗಳಿಗೆ ಹೋಗಿ ಸಂಜೆ ಹೊತ್ತು ‘ಬಾಹ್ಯಾಕಾಶ ವೀಕ್ಷಣೆ’ ಕಾರ್ಯಕ್ರಮ ನಡಿಸಿಕೊಡ್ತಾ ಇದ್ದೆ. ಒಂದುಘಂಟೆ ಬೋರ್ಡಿನ ಮೇಲೆ ಥಿಯರಿ, ಆಮೇಲೆ ಒಂದುಗಂಟೆ ಆಕಾಶ ವೀಕ್ಷಣೆ. ಸ್ಕೂಲಲ್ಲಿ ಮಕ್ಕಳ ತಲೆ ತಿಂದದ್ದು ಸಾಕಾಗದೆ, ಟೀಚರ್ರುಗಳ ತಲೆ ತಿನ್ನೋಕೆ ಐಡಿಯಾ ಹಾಕ್ದೆ. ಅಪ್ಪ ಅಮ್ಮ ಆಗ ಹೊಸದಾಗಿ ಕರ್ನಾಟಕಕ್ಕೆ ಕಾಲಿಟ್ಟಿದ್ದ ‘ನಲಿಕಲಿ’ ಶಿಕ್ಷಣ ಪದ್ಧತಿಯ ಸಂಪನ್ಮೂಲ ವ್ಯಕ್ತಿಗಳಾಗಿದ್ದರಿಂದ, ಅವರು ತರಬೇತಿಗೆ ಹೋದಲ್ಲೆಲ್ಲಾ ನನಗೊಂದು ‘ಕೊರೆಯೋ’ ಅವಕಾಶ ಒದಗಿಸಿಕೊಡ್ತಾ ಇದ್ರು. ಬೇರೆ ಬೇರೆ ಆಕಾಶಕಾಯಗಳನ್ನ ತೋರಿಸಿ, ಕೆಲ ನಕ್ಷತ್ರಪುಂಜಗಳನ್ನ ಗುರುತಿಸಿ, ನೆಬ್ಯುಲಾ ಅಂದ್ರೇನು, ಗೆಲಾಕ್ಸಿ ಅಂದ್ರೇನು, ನಕ್ಷತ್ರದ ಜೀವನಹಂತಗಳೇನು, ಅಂತೆಲ್ಲಾ ಡ್ರಿಲ್ಲಿಂಗ್ ಮಾಡಿ ಬರ್ತಿದ್ದೆ. ಇವತ್ತಿಗೂ ಆ ಹುಚ್ಚು ಕಡಿಮೆಯಾಗಿಲ್ಲ.

ಆ ನಕ್ಷತ್ರಗಳ ಹರವು, ವಿಶ್ವದ ಅಗಾದತೆ ತಿಳಿದುಕೊಂಡಷ್ಟೂ ಖಾಲಿಯಾಗದ ಜ್ಞಾನಭಂಡಾರವನ್ನ ನೋಡಿದಷ್ಟೂ ನಾನೆಷ್ಟು ಚಿಕ್ಕವ ಅನ್ನೋ ಭಾವನೆ ದಿನಗಳೆದಷ್ಟೂ ಹೆಚ್ಚುತ್ತೆ. ಇಂತದ್ದೊಂದು ಭಾವನೆ ಬಹುಷಃ ನಡುರಾತ್ರಿಯಲ್ಲಿ ಕೊಡಚಾದ್ರಿಯ ಮೇಲಿಂದಲೋ, ಹಂಪಿಯಲ್ಲಿ ಮಹಾನವಮಿಯ ದಿಬ್ಬದಮೇಲಿಂದಲೋ ಆಕಾಶ ನೋಡಿದವರೆಲ್ಲರಿಗೂ ಬಂದಿರುತ್ತೆ. ಬರಿಗಣ್ಣಿಗೆ ಕಾಣುವ ಆ ಚುಕ್ಕಿಗಳಿಂದಲೇ ಇಂತಾ ತಾತ್ವಿಕ ಅಲೆಹುಟ್ಟಬೇಕಾದರೆ, ಇನ್ನು ಸಣ್ಣದೊಂದು ಟೆಲೆಸ್ಕೋಪ್ ಇಟ್ಟುಕೊಂಡು ಆಕಾಶ ನೋಡಿದರೆ ಏನಾಗಬಹುದು ಗೊತ್ತಾ? ನಿಮ್ಮ ಬಾಯ್ಬಿಡಿಸುವಷ್ಟು ಸುಂದರವಾದ ಗುರುಗ್ರಹದ ಮಚ್ಚೆ, ಶನಿಯ ಸುತ್ತಲಿನ ಉಂಗುರ, ಆಂಡ್ರೋಮಿಡಾ ಗೆಲಾಕ್ಸಿಯ ವಿಹಂಗಮ ದೃಶ್ಯ, M33 ಗೆಲಾಕ್ಸಿ, ‘ಏಡಿ ನೆಬ್ಯುಲಾ’, ‘ಸೃಷ್ಟಿಯ ಕಂಬಗಳು’ (Pillars of creation) ಮುಂತಾದವನ್ನು ನೋಡಿ ಸೌಂದರ್ಯ ಆಸ್ವಾದಕರ ಕಣ್ಣಲ್ಲಿ ನೀರೇ ಬಂದಿಳಿಯುತ್ತದೆ.

ಇಷ್ಟೆಲ್ಲಾ ಯಾಕೆ ಬ(ಕೊ)ರೆದೆ ಅಂದರೆ, ಈ ವಾರದಲ್ಲಿ ಹೊಸದೊಂದು ವಿಷಯ ತಿಳಿಯಿತು. ಅದೇನಂದ್ರೆ, ಇಷ್ಟೊಂದು ಸಾವಿರ ನಕ್ಷತ್ರಗಳು ಆಕಾಶದಲ್ಲಿ ನಮಗೆ ಕಂಡರೂ, ನಿಜ ವಿಚಾರ ಏನಂದ್ರೆ ಈ ತಾರೆಗಳ, ಆಕಾಶಕಾಯಗಳ ನಡುವೆ ಅಗಾಧವಾದ ಖಾಲಿಜಾಗವಿದೆ. ಒಂದು ನಕ್ಷತ್ರಕ್ಕೂ ಇನ್ನೊಂದಕ್ಕೂ ಜ್ಯೋತಿರ್ವರ್ಷಗಳಷ್ಟು ದೂರವಿದೆಯೆಂಬುದು ನಮಗೆಲ್ಲರಿಗೂ ಗೊತ್ತು. ಆದರೆ ನಾವು ಆಕಾಶವನ್ನು 2Dಯಲ್ಲಿ ನೋಡುವುದರಿಂದ ಈ ಅಂತರ ನಮ್ಮ ಗಮನಕ್ಕೆ ಬರುವುದಿಲ್ಲ. ಆದರೆ ಈ ಎಲ್ಲಾ ‘ಅಗಣಿತ ತಾರಾಗಣಗಳ ನಡುವೆ’ ಅಲ್ಲೊಂದು ನಿಜವಾಗಿಯೂ ಒಂದು 60×40 ತರದ್ದು ಸೈಟು ಖಾಲಿ ಇದೆಯಂತೆ. ಅಂದರೆ ಆಕಾಶದ ಅನಂತದಲ್ಲೊಂದುಕಡೆ ದೂರದೂರದೂರದವರೆಗೆ ಏನೂ ಇಲ್ಲ. ಏನೂ ಅಂದ್ರೆ ಏನೂ ಇಲ್ಲ!! ಬೆಳಗಾವಿಯಿಂದ ದಾಂಡೇಲಿ ಕಾಡೊಳಗೆ ಡ್ರೈವ್ ಶುರುಮಾಡಿದರೆ, ಬಹಳ ದೂರದವರೆಗೆ ಗೋವಾ ಬಾರ್ಡರ್ ತನಕ ಹೇಗೆ ಏನೂಸಿಕ್ಕುವುದಿಲ್ಲವೋ, ಹಾಗೆಯೇ ಇಲ್ಲೂ ಸಹ ಏನೇನೂ ಇಲ್ಲ. ದಾಂಡೇಲಿಯ ಕಾಡೂ ಸಹ ಇಲ್ಲ. ಈ ಖಾಲಿ ಸೈಟು, ಬ್ರಹ್ಮಾಂಡದ ದಕ್ಷಿಣ ಖಗೋಳಾರ್ಧದಲ್ಲಿರುವ ‘ಇರಿಡಾನಿಸ್ ನಕ್ಷತ್ರಪುಂಜ”ದಕ್ಕಪಕ್ಕದಲ್ಲಿರುವುದರಿಂದ ಇದಕ್ಕೆ ‘ಇರಿಡಾನಿಸ್ ಸೂಪರ್ವಾಯ್ಡ್’ (Eridanus Supervoid) ಅಂತಾ ಹೆಸರಿಟ್ಟಿದ್ದಾರೆ. ಎರಡು ನಕ್ಷತ್ರಗಳ ನಡುವೆ ಇರುವ “ಏನೂ ಇಲ್ಲದಿರುವುದು” ಬಾಹ್ಯಾಕಾಶದಲ್ಲಿ ಸಾಮಾನ್ಯ. ಆದರೆ ನಕ್ಷತ್ರಗಳ ನಡುವೆ ಇರುವ “ಏನೂ ಇಲ್ಲದಿರುವುದು” ಮತ್ತು ಈ ಘಟೋತ್ಕಚನಂತಾ “ಏನೂ ಇಲ್ಲದಿರುವುದು” ಎರಡಕ್ಕೂ ಅಗಾದ ವ್ಯತ್ಯಾಸವಿದೆ. ನಕ್ಷತ್ರಗಳ ನಡುವೆ ಹೆಚ್ಚೆಂದರೆ 3, 4 ಅಥವಾ 15 ಜ್ಯೋತಿರ್ವರ್ಷಗಳಷ್ಟು ಅಂತರವಿರಬಹುದು. ಉದಾಹರಣೆಗೆ ನಮ್ಮ ಸೂರ್ಯನಿಗೂ ಹಾಗೂ ನಮ್ಮ ಅತ್ಯಂತ ಸಮೀಪದ ನಕ್ಷತ್ರ ಪ್ರಾಕ್ಸಿಮಾ ಸೆಂಟಾರಿಗೂ ಸುಮಾರು 4.2 ಜ್ಯೋತಿರ್ವರ್ಷಗಳಷ್ಟು ಅಂತರವಿದೆ. ಅದರ ನಂತರದ ಸಮೀಪದ ನಕ್ಷತ್ರಗಳಾದ ಆಲ್ಫಾ ಸೆಂಟಾರಿ-ಎ ಮತ್ತು ಬಿ ಸುಮಾರು 4.36 ಜ್ಯೋತಿರ್ವರ್ಷಗಳಷ್ಟು ದೂರದಲ್ಲಿದೆ. ಅದರ ನಂತರದ ಸಮೀಪದ “ಬರ್ನಾರ್ಡನ ನಕ್ಷತ್ರ” ಸುಮಾರು 5.96 ಜ್ಯೋತಿರ್ವರ್ಷಗಳಷ್ಟು ದೂರದಲ್ಲಿದೆ. ಹೀಗೇ ಜಗತ್ತು ಹರಡಿಕೊಂಡಿದೆ. ಆದರೆ ಈ ಇರಿಡಾನಿಸ್ ಸೂಪರ್-ವಾಯ್ಡ್ ಅದೆಷ್ಟು ದೊಡ್ಡದೆಂದರೆ ಒಂದು ಅಂಚಿನಿಂದ ಇನ್ನೊಂದು ಅಂಚು ತಲುಪಲು ಬೆಳಕಿಗೇ 1.8ಶತಕೋಟಿ ವರ್ಷಗಳು ಬೇಕಂತೆ! ಕಲಾವಿದನ ಕುಂಚದಲ್ಲಿ ಈ ಸೂಪರ್ ವಾಯ್ಡ್ ಕೆಳಗಿನಂತೆ ಕಂಡುಬರುತ್ತದೆ.

maxresdefault
Eridanus Srperviod

ನಮ್ಮ ಮಿಲ್ಕಿವೇ ಗೆಲಾಕ್ಸಿಯಿಂದ 3 ಶತಕೋಟಿ ಜ್ಯೋತಿರ್ವರ್ಷಗಳಷ್ಟು ದೂರದಲ್ಲಿರುವ ಈ ಖಾಲಿ ಸೈಟಿನ ಇರುವಿಕೆಯ ಬಗ್ಗೆ ಹಲವಾರು ಊಹಾಪೋಹಗಳಿವೆ. ಯಾಕೆಂದರೆ ಇದನ್ನು ಯಾರೂ ಸಹ ‘ಕಣ್ಣಿಂದ ಕಂಡಿಲ್ಲ’. Cosmic Microwave Backgroundನ ಮೂಲಕ ವಿಶ್ವದ ಉಷ್ಣತೆಯನ್ನು ಅಳೆದಾಗ, ಅಲ್ಲೊಂದಷ್ಟು ಜಾಗದಲ್ಲಿ ವಿಶ್ವದ ಉಳಿದ ಭಾಗಗಳಿಗಿಂತಾ ಉಷ್ಣತೆ ಸ್ವಲ್ಪ “ಹೆಚ್ಚಾಗಿಯೇ” ಕಡಿಮೆಯಿದೆಯೆಂದು ತಿಳಿದುಬಂತು. ಆದ್ದರಿಂದ ಇದಕ್ಕೆ CMB ColdSpot ಅಂತಲೂ ಹೆಸರಿದೆ (ಚಿತ್ರ – 2 ಕೆಳಗಿದೆ). ಅಧ್ಯಯನಗಳು ಮುಂದುವರೆದಂತೆ ಈ ರೀತಿಯ ಕೋಲ್ಡ್-ಸ್ಪಾಟ್’ಗಳು ಅಥವಾ ‘ವಾಯ್ಡ್’ಗಳು ಬಹಳೆಡೆ ಇರುವುದು ಕಂಡು ಬಂತು. ಆದರೆ ಇಷ್ಟು ದೊಡ್ಡದಾದ ಹೊಂಡವೊಂದು ಇರುವುದು ಇದೊಂದೇ. ಗಾತ್ರದ ಪಟ್ಟಿಯಲ್ಲಿ ಇದರ ನಂತರದ ಸ್ಥಾನ ಪಡೆದಿರುವ ವಾಯ್ಡ್, ಇದರ ಕಾಲುಭಾಗದಷ್ಟೂ ಇಲ್ಲ. ಅಷ್ಟೂ ದೊಡ್ಡದು ಈ ಸೂಪರ್ವಾಯ್ಡ್!!

Pic 2
CMB Coldspot

ಇದಕ್ಕೆ ಕಾರಣಗಳು ಹಲವಾರು ಇರಬಹುದೆಂದು ಅಂದಾಜಿಸಲಾಗಿದೆ. ಡಾರ್ಕ್ ಮ್ಯಾಟರ್ ಎಂದು ಕರೆಯಲಾಗುವ ಬಾಹ್ಯಾಕಾಶದ ಇನ್ನೊಂದು ಸೋಜಿಗವೂ ಇದಕ್ಕೊಂದು ಕಾರಣವಿರಬಹುದು ಎಂಬ ಥಿಯರಿಗಳಿವೆ. ಇದು ಕಾಲ-ಸಮಯದ ಹಿಗ್ಗುಕುಗ್ಗುವಿಕೆಯಿಂದ ಬಾಹ್ಯಾಕಾಶದಲ್ಲಿ ಸೃಷ್ಟಿಯಾಗಿರುವ ತೂತು ಹಾಗೂ ಇನ್ನೊಂದು ‘ಸಮಾನಾಂತರ ಬ್ರಹ್ಮಾಂಡ’ಕ್ಕೆ (parallel universe) ಹೆಬ್ಬಾಗಿಲಿದ್ದರೂ ಇರಬಹುದು ಎಂಬ ಇನ್ನೊಂದು ಥಿಯರಿಯೂ ಇದೆ. ಇದರ ಕಾರಣಗಳ ಬಗ್ಗೆ ನಾನು ಬರೆಯುವಿದಕ್ಕಿಂತಾ ನಮ್ಮ ಸ್ನೇಹಿತ ‘ವಿಜ್ಞಾನ ವ್ಯಾಸ’ ರೋಹಿತ್ Chakrathirtha ಬರೆದರೆ ಬಹುಷಃ ಚೆನ್ನಾಗಿರುತ್ತದೆ. ಆತ ಈ ವಿಷಯಕ್ಕೆ ಹೆಚ್ಚು ನ್ಯಾಯ ಒದಗಿಸಬಹುದೇನೋ.

ಒಟ್ಟಿನಲ್ಲಿ ಖಾಲಿ ಖಾಲಿ ಬ್ರಹ್ಮಾಂಡದಲ್ಲಿ ಹೀಗೊಂದು ಅತೀಖಾಲಿ ಪ್ರದೇಶವೂ ಇದೆಯಂತೆ. “ಬೆಂಗಳೂರಿನ ರೆಡ್ಡಿಗಳಿಗೆ ಈ ವಿಷಯ ಹೇಳಬೇಡಿ. ಅಲ್ಲೂ ಒಂದಷ್ಟು ಸೈಟು ಮಾಡಿ ಮಾರಿಯಾರು” ಎಂಬ ಕೆಟ್ಟ ಜೋಕು ಹೊಡೆಯೋದಿಲ್ಲ ಬಿಡಿ 😛 😉

ಇನ್ನೊಂದು ಮಜಾ ಅಂದ್ರೆ, ನಮ್ಮ ಪೂರ್ವಜರು ಬ್ರಹ್ಮಾಂಡ ಅನ್ನೋ ಪದ ಹೆಂಗೆ ಸೃಷ್ಟಿ ಮಾಡಿದರೋ ಗೊತ್ತಿಲ್ಲ. ಆದರೆ ಇವತ್ತಿಗೆ ಸಧ್ಯ ಲಭ್ಯವಿರುವ ಎಲ್ಲಾ ತಂತ್ರಜ್ಞಾನಗಳನ್ನೂ ಬಳಸಿ ಇಡೀ ಗೋಚರ ವಿಶ್ವ (Observable Universe)ವನ್ನು ನಮ್ಮ ವಿಜ್ಞಾನಿಗಳು ಮ್ಯಾಪ್ ಮಾಡಿದ್ದಾರೆ. ಗೋಚರ ವಿಶ್ವದ ಶೇಪೂ ಸಹಾ ಒಂದು ಮೊಟ್ಟೆಯ ಆಕಾರದಲ್ಲೇ ಇದೆ ಮಾರಾಯ್ರೆ!! ಕೆಳಗೆ ನೋಡಿ! 🙂

BrahmaanDa
Observable Universe

ಚಿತ್ರ ಶಕ್ತಿ‬ – ೧೩

“ಉದಯಾಸ್ಥಮಾನ”

ಈ ಶತಮಾನದಲ್ಲಿ ಜಗತ್ತಿನಲ್ಲಿ ಅತ್ಯಂತ ಶಕ್ತಿಶಾಲಿಯಾದ ಶಾಸ್ತ್ರವೆಂದರೆ ಅರ್ಥಶಾಸ್ತ್ರ. ನಾವೇ ಕಂಡುಹಿಡಿದು, ನಮ್ಮ ನಿಯಂತ್ರಣದಲ್ಲೇ ಇದ್ದಿದ್ದು ಈಗ ಭ್ಹಸ್ಮಾಸುರನಂತಾಗಿ ಇಡೀ ಜಗತ್ತನ್ನು ನಿಯಂತ್ರಿಸುತ್ತಿರುವುದು ದುಡ್ಡು. ಅದರಲ್ಲೂ ಬ್ಯಾಂಕು, ಲೇವಾದೇವಿದಾರರು, ಬ್ರೋಕರುಗಳೆಂಬ ದ್ವಾರಪಾಲಕರು ಈ ಭಸ್ಮಾಸುರನ ದೇವಳ ಸೇರಿದಮೇಲೆ, ಇಡೀ ಜಗತ್ತು ಕಮಲದಮೇಲೆ ಮಲಗಿರೋ ವಿಷ್ಣುವಿನಂತೆ ಅತೀ ಸೂಕ್ಷ್ಮವಾಗಿದೆ. ಯಾರೋ ಎಲ್ಲೋ ಮಾಡಿದ ತಪ್ಪು ಲೆಕ್ಕಾಚಾರ ಇಡೀ ಅರ್ಥವ್ಯವಸ್ಥೆಯನ್ನೇ ಬುಡಮೇಲು ಮಾಡಬಲ್ಲುದು. ಅಲಾಸ್ಕದಲ್ಲಿ ಸಹಕಾರೀ ಬ್ಯಾಂಕೊಂದು ದಿವಾಳಿಯಾದರೆ, ಮನಿಲಾದಲ್ಲಿ ಕೆಲಸಗಾರರ ತಲೆಯುರುಳುತ್ತದೆ.

ಇತ್ತೀಚೆಗೆ ನಾವುಕಂಡ ಅತ್ಯಂತ ದೊಡ್ಡ ಆರ್ಥಿಕ ತಳಮಳ ಅಂದರೆ 2008ರದ್ದು. ಅಮೇರಿಕದ ಸಬ್-ಪ್ರೈಮ್ ಕ್ರಂಚ್, ಹಿಮಚೆಂಡಿನಂತೆ ಉರುಳುತ್ತಾ ಉರುಳುತ್ತಾ, ಹಿಗ್ಗಿ, ಲಕ್ಷಾಂತರ ಜನರು ಕೆಲಸಕಳೆದುಕೊಂಡು ಈಗ ಎಂಟುವರ್ಷದ ನಂತರ ಸ್ವಲ್ಪ ಸುಧಾರಿಸಿಕೊಳ್ಳುತ್ತಾ ಇದ್ದಾರೆ. 2008ರ ತಳಮಳ ಅಫೀಷಿಯಲ್ಲಾಗಿ ಶುರುವಾಗಿದ್ದು, ಲೆಹ್ಮನ್ ಬ್ರದರ್ಸ್ ಎಂಬ ಕಂಪನಿ ತಾನು ಆರ್ಥಿಕವಾಗಿ ದಿವಾಳಿಹೊಂದಿದ್ದೇನೆ ಎಂದು ಘೋಷಿಸಿದಾಗ. ಅಮೇರಿಕಾದ ಅರ್ಧಕ್ಕರ್ಧ ರಾಕ್ಷಸ ಕಂಪನಿಗಳ ಹಣೇಬರಹ ಬರೆಯೋದು ಈ ಲೆಹ್ಮನ್ ಬ್ರದರ್ಸ್ ಎಂಬ ಕಂಪನಿಯೇ. ರಾವಣ ಮುಳುಗಿದಾಗ ಇಡೀ ಲಂಕೆಯನ್ನೇ ಮುಳುಗಿಸಿದಂತೆ, ಲೆಕ್ಮನ್ ಬ್ರದರ್ಸ್’ನ ದಿವಾಳಿ ಸುದ್ಧಿ, ಇಡೀ ಆರ್ಥಿಕ ವ್ಯವಸ್ಥೆಯನ್ನೇ ದಿವಾಳಿಯೆಬ್ಬಿಸಿತು.

ಸೆಪ್ಟೆಂಬರ್ 2008ರಂದು ದಿವಾಳಿಘೋಷಣೆಯಾದ ದಿನ, ಕ್ಯಾನರಿ ವಾರ್ಫಿನಲ್ಲಿರುವ ಲೆಹ್ಮನ್ ಬ್ರದರ್ಸಿನ ಆಫೀಸಿನ ಉದ್ಯೋಗಿಗಳಿಗೆ ಮೇಲಧಿಕಾರಿಗಳು ವಿಷಯ ತಿಳಿಸುತ್ತಿರುವಾಗ ತೆಗೆದ ಈ ಚಿತ್ರ, ಪರಿಸ್ಥಿತಿಯ ಗಂಭೀರತೆಗೆ ಕನ್ನಡಿ ಹಿಡಿದಂತಿದೆ.

Staff members stand in a meeting room at Lehman Brothers offices in the financial district of Canary Wharf in London in September, 2008 during the stock market crash and financial crisis.

ಎಂತ ಸೌಂದರ್ಯ ಕಂಡೆ!

ಹನ್ನೆರಡನೇ ಶತಮಾನದ “ಗಣೇಶ ಮತ್ತಿಬ್ಬರು ವಿಧ್ಯಾದರರ” ವಿಗ್ರಹ. ಪಾಲ ಸಾಮ್ರಾಜ್ಯದ ಕುರುಹು.

The bejeweled elephant-headed God of Plenty, dancing on a plinth with his rat vehicle beneath, holding his attributes the battle axe and a bowl of sweets. He lassoes a serpent above his head as two “vidyadharas” look on from either side. The apex of the stele is ornamented with a bunch of ripe mangoes.
A rare gem from 12th Century, Pala period. Last sold by Sotheby’s at $20,000

Ganesha - Sotheby's 20000 USD