ಬುದ್ಧಿಗೊಂದು ಗುದ್ದು – ೩೦

ಬುದ್ಧಿಗೊಂದು ಗುದ್ದು – ೩೦

X ಯಾವಾಗಲೂ ಎಕ್ಸೇ ಯಾಕೆ? (Y ಈಸ್ X ಅಲ್ವೇಸ್ X!?)

 
ಸಣ್ಣವನಿದ್ದಾಗಲಿಂದಲೂ ನನಗೆ ಗಣಿತ ಅಷ್ಟಕ್ಕಷ್ಟೇ. ಅದಕ್ಕೆ ಸರಿಯಾಗಿ ಬೀಜಗಣಿತ ಬಂದಮೇಲಂತೂ, ಅದರ ಹೆಸರಿಂದಲೇ ಸಿಟ್ಟು ಹೆಚ್ಚಾಗಿ ನನಗೆ ನನ್ನಿಷ್ಟದ ತಿನಿಸು ಗೇರುಜೀಜದ ಮೇಲೂ ಮುನಿಸು ಬಂದುಹೋಗಿತ್ತು. ಕಾಲಕಳೆದಂತೆ ಆಲ್ಜೀಬ್ರಾ ಅಂದ್ರೆ ಜೋಕಾಗಿ ಕಾಣಿಸಲಾರಂಭಿಸಿತು. ಎಲ್ಲಾ ಬಾರಿಯೂ ಎಕ್ಸ್ ಹುಡುಕಿಕೊಡಿ, ನನ್ನ ಎಕ್ಸ್ ಹುಡುಕಿಕೊಡಿ ಅಂತಾ ತಲೇ ತಿನ್ನೋ ಈ ಬೀಜಗಣಿತವನ್ನು, ನಾವು ‘ಭಗ್ನಪ್ರೇಮಿ ಗಣಿತ’ ಅಂತಾ ಕರೀತಾ ಇದ್ವಿ. ಕೊನೆಗೆ ಟ್ರಿಗ್ನಾಮೆಟ್ರಿ ಬಂದಮೆಲಂತೂ ಗಣಿತದೊಂದಿಗೆ ನನ್ನ ಸಂಬಂಧ ಹದೆಗೆಡುತ್ತಲೇ ಹೋಯಿತು. ಅಷ್ಟು ಚೆಂದದ ಮೇಡಮ್ಮುಗಳು ಬಂದು ಪ್ರಯತ್ನಿಸಿದರೂ, ಗಣಿತವನ್ನು ದೂರವೇ ಇಡುವಂತಾಯಿತು. ಅಂದಿನಿಂದ ಇಂದಿನವರೆಗೂ ಈ ಎಕ್ಸ್ ಎಂದರೇನು? ಅದ್ಯಾಕೆ ಯಾರಿಗೂ ಗೊತ್ತಿಲ್ಲ? ಎಂಬ ಪ್ರಶ್ನೆಗೆ ಉತ್ತರಗೊತ್ತಿರಲಿಲ್ಲ. ಇತ್ತೀಚೆಗಷ್ಟೇ, ರಾಹುಲ್ಗಾಂಧಿ ಕಣ್ಮರೆಯಾದ ಮೇಲೆ, ಇದರ ಬಗ್ಗೆ ಸ್ವಲ್ಪ ತಲೆಕೆಡಿಸಿಕೊಂಡು ಎಕ್ಸ್ ಯಾಕೆ ಎಕ್ಸೇ ಅಂತಾ ಓದಲು ಪ್ರಯತ್ನಿಸಿದೆ. ನೀವೂ ಓದಿ.

ಬೀಜಗಣಿತ ಜಗತ್ತಿಗೆ ಯಾರ ಕೊಡುಗೆ ಎಂಬುದರ ಬಗ್ಗೆ ಹಲವಾರು ಸಿದ್ಧಾಂತಗಳಿವೆ. ಕೆಲವು ಸಂಶೋಧನೆಗಳ ಪ್ರಕಾರ ಬ್ಯಾಬಿಲೋನಿಯನ್ನರ ಕಾಲದಲ್ಲೇ ಬೀಜಗಣಿತದ ಕಲ್ಪನೆಯ ಬಗ್ಗೆ ಉಲ್ಲೇಖಗಳಿವೆ. ಭಾರತದಲ್ಲಿ ಸುಮಾರು ಆರನೆಯ ಶತಮಾನದಲ್ಲಿಯೇ ಬ್ರಹ್ಮಗುಪ್ತ ತನ್ನ ‘ಬ್ರಹ್ಮಸ್ಪುಟಸಿದ್ಧಾಂತ’ದಲ್ಲಿ ಬೀಜಗಣಿತದ ಮೂಲಸ್ತಂಭಗಳಲ್ಲೊಂದಾದ ರೇಖೀಯ ಸಮೀಕರಣದ ಬಗ್ಗೆ ವಿಸ್ತೃತವಾಗಿ ಬರೆದಿದ್ದಾನೆ.

ಆದರೆ, ಬೀಜಗಣಿತಕ್ಕೆ ಇಂದಿನ ಸ್ವರೂಪ ಕೊಟ್ಟದ್ದು ಅರಬ್ಬೀ ಗಣಿತಜ್ಙರು. ಈ ಲೇಖನಗಳು/ಸಿದ್ಧಾಂತಗಳು ಪುಸ್ತಕರೂಪದಲ್ಲಿ ಯೂರೋಪಿಗೆ ಬಂದದ್ದು, 11/12ನೇ ಶತಮಾನದಲ್ಲಿ ಅರಬ್ಬೀ ವ್ಯಾಪಾರಿಗಳು ಉತ್ತರ ಆಫ್ರಿಕಾವನ್ನು ಕ್ರಮಿಸಿ, ಜಿಬ್ರಾಲ್ಟರ್ ಜಲಸಂಧಿಯ ಮೂಲಕ ಸ್ಪೇನಿನ ಮೂಲಕ ಯೂರೋಪಿನಲ್ಲಿ ಕಾಲಿಟ್ಟಾಗ. ಬೀಜಗಣಿತದ ಇಂಗ್ಳೀಷ್ ಪದವಾದ ಆಲ್ಜೀಬ್ರಾ ಸಹ ಅರಬ್ಬೀ ಪದವಾದ ‘ಅಲ್-ಜಬ್ರ್’ (ಅರ್ಥ: ಪುನಃಸ್ಥಾಪನೆ) ಎಂಬ ಪದದಿಂದಲೇ ಬಂದದ್ದು. [ಅದಕ್ಕಿಂತ ಸ್ವಲ್ಪ ಮುಂಚೆಯೇ, ಹತ್ತನೇ ಶತಮಾನದಲ್ಲೇ, ನಮ್ಮ ಬಿಜಾಪುರದಲ್ಲಿ ಕುಳಿತು ಭಾಸ್ಕರಾಚಾರ್ಯ ತನ್ನ ಲೀಲಾವತಿ ಎಂಬ ಕೃತಿಯಲ್ಲಿ ಗಣಿತವೆಂಬ ಕಬ್ಬಿಣದ ಕಡಲೆಯನ್ನು, ರೋಮಾಂಚಕ ರೀತಿಯಲ್ಲಿ ಕಾವ್ಯರೂಪಕ್ಕಿಳಿಸುತ್ತಿದ್ದ ಎನ್ನುವುದು ಬೇರೆ ವಿಚಾರ. ಏನು ಮಾಡುವುದು ಹೇಳಿ, ಭಾರತೀಯರಿಗೆ ಶ್ರೇಷ್ಟತೆಯ ವ್ಯಸನ. ಅದಕ್ಕೇ ಎಲ್ಲೂ ಹೇಳಿ(ಕೊಚ್ಚಿ)ಕೊಳ್ಳಲಿಲ್ಲ. ಸೂರ್ಯನಂತೆ ಬೆಳಗಬೇಕಿದ್ದ ಭಾಸ್ಕರ ಅಮವಾಸ್ಯೆಯ ಚಂದ್ರನಾಗಿಯೇ ಉಳಿದ 😦 ಇರಲಿ ಬಿಡಿ, ವಿಷಯಾಂತರವಾದೀತು 😦 🙂 ]

ಸ್ಪೇನಿಗೆ ಬಂದಿಳಿದ ಬೀಜಗಣಿತದ ಖಜಾನೆಯನ್ನು ಯೂರೋಪಿಯನ್ ಭಾಷೆಗಳಿಗೆ ಭಾಷಾಂತರಿಸಲು ವಿದ್ವಾಂಸರೇನೋ ಕೂತರು. ಮೊದಲ ದಿನವೇ ತೊಂದರೆ ಆರಂಭವಾಯ್ತು. ಅರಬ್ಬೀ ಲಿಪಿಯಲ್ಲಿದ್ದ ಹಲವಾರು ಅಕ್ಷರಗಳೂ, ಸಂಕೀರ್ಣ ಶಬ್ದ ಪ್ರಕಾರಗಳೂ ಯೂರೋಪಿಯನ್ ಭಾಷೆಗಳಲ್ಲಿ ಇರಲೇ ಇಲ್ಲ. ಹೀಗಿದ್ದಾಗ ತಮಗೆ ಗೊತ್ತಿದ್ದ/ಪ್ರಚಲಿತದಲ್ಲಿದ್ದ ಪದಗುಚ್ಚಗಳನ್ನೇ ಬಳಸಿ, ಯೂರೋಪಿಯನ್ ವಿದ್ವಾಂಸರು ಕೆಲಸ ಪ್ರಾರಂಭಿಸಿದರು. ಈ ವಿದ್ವಾಂಸರ ವಿದ್ವಂಸಕ ಕೃತ್ಯಗಳಲ್ಲೊಂದು ಎಕ್ಸ್ ಕೂಡಾ. ಹೇಗೆ ಅಂತೀರಾ? ಇಲ್ನೋಡಿ.

ಬೀಜಗಣಿತದ ಮೂಲವೇ ವ್ಯತ್ಯಯಕಾರೀ ಪರಿಮಾಣಗಳು ಅಂದರೆ ‘ವೇರಿಯಬಲ್’ಗಳು. ಅರೇಬಿಕ್ ಭಾಷೆಯಲ್ಲಿ ‘ಶೇಲಾನ್’ ಎಂದರೆ ‘ಅಜ್ಞಾತ/ಏನೋ ಒಂದು/ಅಪರಿಚಿತ’ ಎಂದರ್ಥ. ಇದಕ್ಕೆ ಅರೇಬಿಕ್ ಭಾಷೆಯ ‘ಅಲ್’ ಎಂಬ ನಿರ್ಧಿಷ್ಟತೆಯ ವಿಧಿಯನ್ನು ಸೇರಿಸಿ ‘ಅಲ್-ಶೇಲಾನ್’ (ಅರ್ಥ: ಒಂದು ಅಜ್ಞಾತವಾದ) ಎಂಬ ಪದವನ್ನೂ, ಹಾಗೂ ಈ ಪದದ ಮೊದಲಕ್ಷರವಾದ ‘ಶೇ’ ಎಂಬ ಅಕ್ಷರವನ್ನೂ ವೇರಿಯಬಲ್ ಅಥವಾ ವ್ಯತ್ಯಯವನ್ನು ಪ್ರತಿನಿಧಿಸಲು ವ್ಯಾಪಕವಾಗಿ ಬಳಸುತ್ತಿದ್ದರು. ಈ ಅಕ್ಷರ/ಪದಗಳನ್ನು ನೀವು ಚಿತ್ರ-1 ರಲ್ಲಿ ನೋಡಬಹುದು. ಭಾಷಾಂತರಕ್ಕೆ ಕುಳಿತ ಸ್ಪಾನಿಷ್ ವಿದ್ವಾಂಸರಿಗೆ ‘ಶ್’ ಅಥವಾ ‘ಶೇ’ ಎಂಬ ಪದ/ಶಬ್ದವೇ ಗೊತ್ತಿಲ್ಲದ ಕಾರಣ (ಯಾಕೆಂದರೆ ಮಧ್ಯಕಾಲೀನ ಸ್ಪಾನಿಷ್ ಭಾಷೆಯಲ್ಲಿ ಶ್ ಅಥವಾ ಶೇ ಎಂಬ ಶಬ್ದವೇ ಇರಲಿಲ್ಲ!!) ಅದಕ್ಕೆ ಅತ್ಯಂತ ಹತ್ತಿರವಾದ ಸ್ಪಾನಿಷ್ ಭಾಷೆಯ ‘ಕ್’ ಎಂಬ ಶಬ್ದವನ್ನು ಬಳಸಿದರು. ಹಾಗೂ ಈ ‘ಕ್’ ಅನ್ನು ಪ್ರತಿನಿಧಿಸಲು ಅವರು ಗ್ರೀಕ್ ಭಾಷೆಯ ‘ಕಾಯ್’ ಎಂಬ ಅಕ್ಷರವನ್ನು (ಚಿತ್ರ-2) ಬಳಸಿ ತಮ್ಮ ಕೆಲಸವನ್ನು ಮುಗಿಸಿದರು. ಮುಂದೆ ಈ ಕೃತಿಗಳು ಯೂರೋಪಿನಾದ್ಯಂತ ಪ್ರಚಲಿತ ಭಾಷೆಯಾಗಿದ್ದ ಲ್ಯಾಟಿನ್ ಭಾಷೆಗೆ ರೂಪಾಂತರಗೊಂಡಾಗ ಆ ಪುಣ್ಯಾತ್ಮರು ಈ ಗ್ರೀಕ್ ‘ಕಾಯ್’ ಅಕ್ಷರಕ್ಕೆ ಆಕಾರದಲ್ಲಿ ಸಮಾನರೂಪದಲ್ಲಿದ್ದ ‘X’ ಅಕ್ಷರವನ್ನು ಬಳಸಿದರು (ಚಿತ್ರ-3). ಈ ಪ್ರಮಾದ ಆಗಿದ್ದೇ ಆಗಿದ್ದು, ಈ X ಮುಂದಿನ ಆರುನೂರುವರ್ಷಗಳಲ್ಲಿ ಮೂಡಿಬಂದ ಎಲ್ಲಾ ಬೀಜಗಣಿತ ಮೀಮಾಂಸೆಗಳ ತಳಹದಿಯಾಗಿಬಿಟ್ಟಿತು. ಮುಂದೆ ಇದನ್ನೇ ಎರವಲು ಪಡೆದ ಇಂಗ್ಳೀಷ್ ಭಾಷೆ X ಎನ್ನುವ ಒಂದು ಪದವ್ಯುತ್ಪತ್ತಿಯನ್ನೇ ಹುಟ್ಟುಹಾಕಿತು. ಅನೂಹ್ಯವಾದ ವಿಷಯಗಳಿಗೆಲ್ಲಾ X ಸೇರಿಸುವುದು ಅಭ್ಯಾಸವಾಗಿಬಿಟ್ಟಿತು. X-ಫೈಲ್ಸ್, X-ಮೆನ್ ಮುಂತಾದ ಪದಗಳು ಹುಟ್ಟುಪಡೆದವು.

ಹೀಗೆ, ಯಾರೂ ಎಕ್ಸ್ ಯಾಕೆ ಹೀಗೆ ಎಕ್ಸಾಗಿದೆ ಅಂತಾ ತಲೆಕೆಡಿಸಿಕೊಳ್ಳಲೇ ಇಲ್ಲ. ಎಲ್ಲರೂ ಎಕ್ಸ್ ಅನ್ನು ಬಿಡಿಸುವುದರಲ್ಲೇ ಕಾಲಕಳೆದರೇ ಹೊರತು, ‘ಎಲೈ ಎಕ್ಸೇ! ನೀನ್ಯಾಕೆ ಎಕ್ಸು!?’ ಎಂದು ಪ್ರಶ್ನಿಸಲೇ ಇಲ್ಲ. ಯಾರಾದರೂ ಕೇಳಿದ್ದಿದ್ದರೆ ಬಹುಷಃ ಎಕ್ಸು ಅಳುತ್ತಾ, ಆ ಸ್ಪಾನಿಷ್ ವಿದ್ವಾಂಸರಿಗೆ ಹಿಡಿಶಾಪ ಹಾಕುತ್ತಾ ತನ್ನ ಕಥೆಯನ್ನಾದರೂ ಹೇಳುತ್ತಿತ್ತೇನೋ!

ಈಗ ತಿಳಿಯತಲ್ಲವೇ ಮಕ್ಕಳೇ, X ಯಾಕೆ ಎಕ್ಸು ಹೀಗೆ ಅಂತಾ? ನಾಳೆ ಕ್ಲಾಸಿನಲ್ಲಿ ‘ಎಕ್ಸ್ ಯಾಕೆ ಎಕ್ಸ್, ಹೇಳ್ರೋ’ ಅಂತಾ ಕೇಳಿದರೆ, ‘ಅಯ್ಯೋ, ಆ ಸ್ಪಾನಿಷರಿಗೆ ‘ಶ್’ ಎಂದು ಉಚ್ಚರಿಸಲು ಬರದೇ ಇದ್ದಿದ್ದಕ್ಕೇ ಎಕ್ಸು X ಮೇಡಂ’ ಅಂತಾ ಒಕ್ಕೊರಲಿನಲ್ಲಿ ಕೂಗಿ ಹೇಳಿರಿ, ಆಯ್ತಾ?

ಕೊಸರು:
ಈ ಎಕ್ಸಿಗೂ, XXXಗೂ ಏನು ಸಂಬಂಧ ಎನ್ನುವುದು ನನಗೂ X-factor ಆಗಿಯೇ ಉಳಿದಿದೆ 😉 😛

ಬುದ್ಧಿಗೊಂದು ಗುದ್ದು – ೨೯

ಬುದ್ಧಿಗೊಂದು ಗುದ್ದು – ೨೯

ಬ್ಲೂಟೂಥಿನ ದಂತಕಥೆ!

ಈಗಿನ ಹುಡುಗ್ರು ಬಿಡ್ರೀ ತುಂಬಾ ಫಾಸ್ಟು. ಮಾತೆತ್ತಿದ್ರೆ ಮೊಬೈಲು, ಕೈಯೆತ್ತಿದ್ರೆ ಕಿಂಡ್ಲ್. ಆ ಹುಡುಗನ ಹತ್ರಾ ಒಳ್ಳೆ ಹಾಡಿದ್ಯಾ, ಯಾವ್ದೋ ಇಂಟರೆಸ್ಟಿಂಗ್ ಪಿಕ್ಚರ್ರಿದ್ಯಾ? ಲೋ ಮಗಾ ನನ್ಗೂ ಕಳ್ಸೋ, ಟೆಥರಿಂಗ್ ಮಾಡ್ತೀನಿ ಅಂತಾರೆ.

ಈ ಮೊಬೈಲ್ ಇಂಟರ್ನೆಟ್, ವೈಫೈ, ನಿಯರ್ ಫೀಲ್ಡ್ ಕಮ್ಯೂನಿಕೇಷನ್ ಇವೆಲ್ಲಾ ಬರೋಕೆ ಮುಂಚೆ (ಓ…ಅಂದ್ರೆ ನಿನ್ ಕಾಲ್ದಲ್ಲಿ ಅಂತಾ ಹುಬ್ಬೇರಿಸ್ತಾ ಇದ್ದೀರಾ, ಇರ್ಲಿ ಬಿಡಿ ತೊಂದ್ರೆ ಇಲ್ಲ 🙂 ), ನಮಗೆ ಈ ರೀತಿ ಒಂದು ಮೊಬೈಲಿಂದ ಇನ್ನೊಂದು ಮೊಬೈಲಿಗೆ ಏನಾದ್ರೂ ಕಳಿಸಬೇಕಾದ್ರೆ ಇದ್ದದ್ದು ಒಂದೋ ಸೂಪರ್ ಸ್ಲೋ ಇನ್ಫ್ರಾರೆಡ್ ಕನೆಕ್ಷನ್ ಅಥ್ವಾ ಅಂದಿನ ಕಾಲಕ್ಕೆ ಸೂಪರ್ ಅಲ್ಟ್ರಾ ಹೈ-ಫೈಯಾಗಿದ್ದ ಬ್ಲೂಟೂಥ್. ಈಗ್ಲೂ ಇಷ್ಟೆಲ್ಲಾ ತಂತ್ರಜ್ಞಾನ ಮುಂದುವರೆದ ಮೇಲೂ ಬ್ಲೂಟೂಥ್ ಜನಪ್ರಿಯತೆಯೇನೂ ಕಡಿಯಾಗಿಲ್ಲ. ಇವತ್ತಿಗೂ ನಿಮ್ ಫೋನನ್ನು ಕಾರಿನಲ್ಲಿ ಉಪಯೋಗಿಸಬೇಕು ಅಂದ್ರೆ ಬ್ಲೂಟೂಥ್ ಬೇಕು. ಹೆಚ್ಚಿನ ವೈರ್ಲೆಸ್ ಸ್ಪೀಕರುಗಳು, ಧ್ವನಿಪ್ರಸರಣಕ್ಕೆ ಬ್ಲೂಟೂಥ್ ತಂತ್ರಜ್ಞಾನವನ್ನೇ ಉಪಯೋಗಿಸುತ್ತವೆ. ಬ್ಲೂಟೂಥಿನ ಸುಲಭ ಜೋಡಣೆ ಮತ್ತು ಸಂವಹನ ತಂತ್ರಜ್ಞಾನವೇ ಅದರ ಈ ಜನಪ್ರಿಯತೆಗೆ ಮೂಲ ಕಾರಣ. ಇವತ್ತಿನ ಸಣ್ಣ ಲೇಖನದಲ್ಲಿ ಈ ಬ್ಲೂಟೂಥ್ ಚಾಲ್ತಿಗೆ ಬಂದದ್ದು ಹೇಗೆ? ಅದ್ಯಾಕೆ ಬ್ಕೂಟೂಥಿಗೆ ನೀಲಿಬಣ್ಣದ ಹಲ್ಲು? ಅದಕ್ಕೆ ಬ್ಲೂಟೂಥ್ ಅಂತಾ ಯಾಕೆ ಕರೆಯುತ್ತಾರೆ? ಅದರ ಚಿಹ್ನೆಯ ಹಿಂದಿನ ಅರ್ಥ? ಇದನ್ನು ತಿಳಿಸುವ ಸಣ್ಣ ಪ್ರಯತ್ನ.

ನೋಡೀ….ಈ ಎಂಜಿನಿಯರ್ರುಗಳ ಕಥೇನೇ ಇಷ್ಟು. ಮೊಬೈಲ್ ಕಂಡುಹಿಡಿದು ಅಲ್ಲಿಗೇ ಮುಗಿಸಲಿಲ್ಲ. ಮೊಬೈಲುಗಳೇನೋ ಜನರನ್ನು ಜೋಡಿಸುತ್ತವೆ, ಆದರೆ ಮೊಬೈಲುಗಳನ್ನ ಒಂದಕ್ಕೊಂದು ಹೇಗೆ ಸಂಪರ್ಕಿಸುವುದು ಹೇಗೆ ಅನ್ನೋ ತಲೆಬಿಸಿಯನ್ನ ತಲೆಗೆ ಹಚ್ಕೊಂಡ್ರು. ಬರೇ ಮೊಬಲುಗಳೇ ಯಾಕೆ! ಫೋನು, ಟೀವಿ, ರೇಡಿಯೋ ಮುಂತಾದ ಎಲ್ಲಾ ವಿದ್ಯುನ್ಮಾನ ಯಂತ್ರಗಳೂ ಒಂದಕ್ಕೊಂದು ಮಾತನಾಡುವಂತಾದರೆ!? ಎಂಬ ಕನಸುಗಳನ್ನೂ ಕಟ್ಟಿಕೊಂಡರು. ಆಗ ಶುರುವಾಗಿದ್ದೇ ಪರ್ಸನಲ್ ಏರಿಯಾ ನೆಟ್ವರ್ಕ್ (PAN) ಅನ್ನೋ ಪರಿಕಲ್ಪನೆ. ಇದರನ್ವಯ ಎಂಜಿನಿಯರ್ರುಗಳು ಸುಮಾರು ಐದು ಮೀಟರ್ ಸುತ್ತಳತೆಯಲ್ಲಿ ಮೊಬೈಲುಗಳು ಒಂದದ ಜೊತೆಗೊಂದು ಸಂವಹಿಸಬಲ್ಲುದರ ಬಗ್ಗೆ ತಂತ್ರಜ್ಞಾನಗಳನ್ನು ಅಭಿವೃದ್ಧಿಪಡಿಸಲು ತೊಡಗಿದರು. 90ರ ದಶಕದಲ್ಲಿ ಈ ಪರಿಕಲ್ಪನೆಯನ್ನು ಜನಪ್ರಿಯಗೊಳಿಸಿದ್ದು ಹುಟ್ಟು ಹಾಕಿದ್ದು, ಎರಿಕ್ಸನ್ ಅನ್ನೋ ಸ್ವೀಡಿಶ್ ಕಂಪನಿ. ನಂತರ ಎರಿಕ್ಸನ್, ಐಬಿಎಮ್, ನೋಕಿಯಾ, ತೋಷೀಬಾ ಮತ್ತು ಇಂಟೆಲ್ ಕಂಪನಿಗಳು ಒಟ್ಟು ಸೇರಿ 1996ರಲ್ಲಿ ಮೊಬೈಲ್ ತಂತ್ರಜ್ಞಾನ ವಿಶೇಷಾಸಕ್ತಿ (Special Interest Group) ಗುಂಪೊಂದನ್ನು ಪ್ರಾರಂಭಿಸಿದವು. ಈ ಗುಂಪು ಬ್ಲೂಟೂಥ್ ತಂತ್ರಜ್ಞಾನವನ್ನು ಹುಟ್ಟುಹಾಕುವುದರಲ್ಲಿ, ಅದನ್ನು ಏಕರೂಪವಾಗಿಸುವಲ್ಲಿ ಮತ್ತು ಅದನ್ನು ನಾವಿಂದು ಉಪಯೋಗಿಸುತ್ತಿರುವ ಮಟ್ಟಕ್ಕೆ ತಲುಪುವುದರಲ್ಲಿ ಮಹತ್ತರವಾದ ಕೆಲಸಗಳನ್ನು ಮಾಡಿತು.

ಈ ತಂಡದಲ್ಲಿದ್ದ ಬೇರೆ ಬೇರೆ ಕಂಪನಿಗಳ ಮಧ್ಯೆ ಸಂಧಾನಕಾರನ ಪಾತ್ರ ವಹಿಸಿದ್ದ, ಇಂಟೆಲ್ ಉದ್ಯೋಗಿ ಜಿಮ್ ಕರ್ಡಾಷ್, ಈ ಪ್ರಾಜೆಕ್ಟ್ ಪ್ರಾರಂಭವಾದ ಸಮಯದಲ್ಲಿ ‘ವೈಕಿಂಗ್ಸ್’ ಎಂಬ ಸ್ಕ್ಯಾಂಡಿನೇವಿಯನ್ ಯೋಧರ ಬಗ್ಗೆ ಪುಸ್ತಕವೊಂದನ್ನು ಓದುತ್ತಿದ್ದ. ಅದರಲ್ಲಿ ಉಲ್ಲೇಖಿಸಿದ್ದ ಹೆರಾಲ್ಡ್ ಗ್ರಾಮ್ಸನ್ (ಚಿತ್ರ – ೧) ಎಂಬ ರಾಜನ ಬಗ್ಗೆ ಉತ್ಸುಕನಾಗಿ, ಅವನ ಬಗ್ಗೆ ಹೆಚ್ಚಿನ ವಿಷಯ ಓದಿದಾಗ ಜಿಮ್’ಗೆ ತಿಳಿದದ್ದೇನೆಂದರೆ, ಈ ಹೆರಾಲ್ಡ್ ಗ್ರಾಮ್ಸನ್ 958ರಿಂದ 970ರವರೆಗೆ ‘ವೈಕಿಂಗ್’ಗಳ ರಾಜನಾಗಿದ್ದ ಮತ್ತು ಆತ ಸ್ಕ್ಯಾಂಡಿನೇವಿಯನ್ ದೇಶಗಳನ್ನು (ನಾರ್ವೆ, ಸ್ವೀಡನ್ ಮತ್ತು ಡೆನ್ಮಾರ್ಕ್) ಅಹಿಂಸಾತತ್ವದಿಂದ ಒಗ್ಗೂಡಿಸಲು ಬಹಳಷ್ಟು ಪ್ರಯತ್ನಗಳನ್ನು ಮಾಡಿದ. ವೈಕಿಂಗರು ಸದಾ ಯುದ್ಧ ಮತ್ತು ರಕ್ತಪಾತದಲ್ಲೇ ನಿರತರಾಗಿದ್ದರಿಂದ, ಅಹಿಂಸೆಯ ಮಾತನಾಡಿದ ಹೆರಾಲ್ಡ್ ಸಹಜವಾಗಿಯೇ ವಿಶೇಷವಾಗಿ ಪರಿಗಣಿಸಲ್ಪಟ್ಟ ಹಾಗೂ ಚರಿತ್ರಾಕಾರರು ಅವನ ಬಗ್ಗೆ ಹೆಚ್ಚಾಗಿಯೇ ಬರೆದರು.

ಈ ಹೆರಾಲ್ಡನಿಗೆ ಬ್ಲೂಬೆರ್ರಿ ಹಣ್ಣೆಂದರೆ ಬಹಳ ಇಷ್ಟವಿತ್ತಂತೆ. ಎಷ್ಟು ಇಷ್ಟವೆಂದರೆ, ದಿನವಿಡೀ ಬ್ಲೂಬೆರ್ರಿ ಹಣ್ಣನ್ನೇ ತಿಂದು ಅವನ ಹಲ್ಲುಗಳು ನೀಲಿಬಣ್ಣಕ್ಕೆ ತಿರುಗಿದ್ದವಂತೆ! ಇದರಿಂದಾಗಿ, ಒಂದು ದಂತಕಥೆಯ ಪ್ರಕಾರ (pun intended 🙂 ), ಅವನ ಪೂರ್ತಿಹೆಸರಾದ ಹೆರಾಲ್ಡ್ ಗ್ರಾಮ್ಸನ್ ಬ್ಲಾಟಂಡ್ (King Harald Gramson Blatand) ಎನ್ನುವುದು ಹೆರಾಲ್ಡ್ ಗ್ರಾಮ್ಸನ್ ಬ್ಲೂಟೂಥ್ ಎಂದೇ ಅನ್ವರ್ಥವಾಗಿತ್ತಂತೆ.

ಈ ಕಥೆ ಕೇಳಿದ ಜಿಮ್ ಕರ್ಡಾಷ್, ಈ ಮೊಬೈಲುಗಳನ್ನು ತಂತಿರಹಿತವಾಗಿ ‘ಒಗ್ಗೂಡಿಸುವ’ ಪ್ರಾಜೆಕ್ಟಿಗೂ ಬ್ಲೂಟೂಥ್ ಎಂಬ ಹೆಸರೇ ಸೂಕ್ತವಾದದ್ದೆಂದು ನಿರ್ಧರಿಸಿದ. ಈ ಕಾರಣದಿಂದ, ಮೊಬೈಲುಗಳನ್ನು (ಅಹಿಂಸಾರೀತಿಯಲ್ಲಿ) ಜೋಡಿಸುವ ಈ ತಂತ್ರಜ್ಞಾನಕ್ಕೆ ಬ್ಲೂಟೂಥ್ ಎಂಬ ಹೆಸರೇ ಅಂಟಿಕೊಂಡಿತು.

ಇನ್ನು ಬ್ಲೂಟೂಥ್ ತಂತ್ರಜ್ಞಾನದ ಚಿಹ್ನೆಗೆ ಬಂದರೆ, ಚಿತ್ರ-೨ರಲ್ಲಿ ತೋರಿಸಿದಂತೆ, ಹೆರಾಲ್ಡ್ ಬ್ಲಾಟಂಡ್ ಅಥವಾ (ಹೆರಾಲ್ಡ್ ಬ್ಲೂಟೂಥ್) ಎಂಬ ಪದಗಳ ಮೊದಲಕ್ಷರಗಳ ಲ್ಯಾಟಿನ್ ಅವತರಣಿಕೆಗಳಾದ (H(Haglazl) and B(Berkanan) ಮಿಶ್ರಣವಷ್ಟೇ.

ನನಗೆ ಈ ಬ್ಲೂಟೂಥ್ ಕಥೆ ಮೊದಲೇ ಗೊತ್ತಿತ್ತು. ಆದರೆ ಇವತ್ತಷ್ಟೇ ಅದರ ಚೆಹ್ನೆಯ ಬಗೆಗೂ ತಿಳಿದು ಬಂದಿದ್ದು. ಅದಕ್ಕೇ ಬರೆಯೋಣವೆನ್ನಿಸಿತು. ಇಷ್ಟವಾದಲ್ಲಿ, ಬೇರೆಯವರಿಗೂ ತಿಳಿಸಿ.

ಬುದ್ಧಿಗೊಂದು ಗುದ್ದು – ೨೮

ಬುದ್ಧಿಗೊಂದು ಗುದ್ದು – ೨೮

‘ಇತ್ತ ಕಂಪನಿ ಮುಳುಗುತ್ತಿತ್…..ಅತ್ತ ಜೂಜಾಡಿದ ಫ್ರೆಡ್ಡಿ ಸ್ಮಿತ್’

ಈ ಕಥೆ ಶುರುವಾಗೋದೇ ಒಂದೂರಲ್ಲಿ ಒಬ್ಬ ಮನುಷ್ಯ ಇದ್ದ ಎಂಬಲ್ಲಿಂದ. ಆ ಮನುಷ್ಯನ ಹೆಸರು ಫ್ರೆಡ್ ಸ್ಮಿತ್. ಹುಟ್ಟುವಾಗಲೇ ಮೂಳೆಸಂಬಂಧೀ ಖಾಯಿಲೆಯೊಂದರಿಂದ, ಕೈಕಾಲುಗಳು ಸೊಟ್ಟಗಾಗಿ ನಡೆಯಲೂ ಸಾಧ್ಯವಾಗದ ಪರಿಸ್ಥಿತಿ. ಆದರೆ, ಈತ ಸುಲಭಕ್ಕೆ ಮಣಿಯುವವನಾಗಿರಲಿಲ್ಲ. ವಯಸ್ಸು ಹತ್ತಾಗುವಷ್ಟರಲ್ಲಿ ಹೇಗೇಗೋ ಮಾಡಿ ನಡೆಯಲಾರಂಭಿಸಿದ. ಹದಿನೈದಾಗುವಷ್ಟರಲ್ಲಿ ಪ್ರತಿಭಾವಂತ ಫುಟ್ಬಾಲ್ ಆಟಗಾರನಾದ ಹಾಗೂ ವಿಮಾನ ಹಾರಿಸುವುದನ್ನು ಕಲಿತು ಹವ್ಯಾಸಿ ಪೈಲಟ್ ಲೈಸೆನ್ಸ್ ಕೂಡಾ ಪಡೆದ. ಅವನಿಗೆ ವಿಮಾನಗಳ ಬಗ್ಗೆ ಬಹಳ ಆಸಕ್ತಿ. ಸದಾ ಅವುಗಳ ಬಗ್ಗೆ ಯೋಚಿಸುತ್ತಿದ್ದ ಹಾಗೂ ವಿಮಾನಗಳನ್ನು ಉಪಯೋಗಿಸಿ ಮನುಷ್ಯನ ಜೀವನಮಟ್ಟವನ್ನು ಉತ್ತಮಗೊಳಿಸುವುದು ಹೇಗೆ? ಎಂದು ಯೋಚಿಸುತ್ತಿದ್ದ.

ಈ ಸ್ಮಿತ್ ತಾನು 1962ರಲ್ಲಿ ‘ಯೇಲ್ ವಿಶ್ವವಿದ್ಯಾಲಯ’ದಲ್ಲಿ ಓದುತ್ತಿರುವಾಗ, ಅರ್ಥಶಾಸ್ತ್ರದ ಪ್ರಾಜೆಕ್ಟ್ ಪೇಪರೊಂದರಲ್ಲಿ ‘ಕಂಪನಿಯೊಂದು ತನ್ನದೇ ವಿಮಾನಗಳನ್ನು, ಡಿಪೋಗಳನ್ನು, ಡೆಲಿವರಿ ವ್ಯಾನುಗಳನ್ನು ಬಳಸಿ ಹೇಗೆ ೨೪ ಘಂಟೆಗಳಲ್ಲಿ ಅಮೇರಿಕಾದ ಯಾವುದೇ ಸ್ಥಳದಿಂದ, ಯಾವುದೇ ಇನ್ನೊಂದು ಸ್ಥಳಕ್ಕೆ ಪಾರ್ಸೆಲ್ಗಳನ್ನು ಮುಟ್ಟಿಸಬಹುದು?’ ಎಂಬುದರ ಬಗ್ಗೆ ಲೇಖನ ಬರೆದ. ಆ ಪೇಪರನ್ನು ಓದಿದ ಆತನ ಪ್ರೊಫೆಸರ್ ‘ಆಲೋಚನೆಯೇನೋ ಚೆನ್ನಾಗಿದೆ. ಆದರೆ ಇದನ್ನು ಕಾರ್ಯರೂಪಕ್ಕೆ ತರುವುದು ಸಾಧ್ಯವಿಲ್ಲ’ ಎಂದು ಹೇಳಿ ‘C’ ಗ್ರೇಡ್ ಕೊಟ್ಟಿದ್ದ.

1966ರಲ್ಲಿ ಪದವಿ ಮುಗಿದನಂತರ ಸ್ಮಿತ್ ಮೂರುವರ್ಷ ಮಿಲಿಟರಿ ಸೇವೆಗೆ ನಿಯುಕ್ತಿಗೊಂಡ. ವಿಯೆಟ್ನಾಂ ಯುದ್ಧದಲ್ಲಿ ಪಾಲ್ಗೊಂಡು ತನ್ನ ಕೆಲಸಕ್ಕಾಗಿ ಪದಕಗಳನ್ನೂ ಪಡೆದ. ಈ ಸಮಯದಲ್ಲಿ ಆತನಿಗೆ ಸೇನೆಯ ಸಾಮಾನು ಸಂಗ್ರಹಣಾ ಹಾಗೂ ವಿತರಣಾ ಜಾಲ ಹೇಗೆ ಕೆಲಸ ಮಾಡುತ್ತದೆಯೆಂದು ತಿಳಿಯುವ ಅವಕಾಶ ಸಿಕ್ಕಿತು. 1969ರಲ್ಲಿ ಸೈನ್ಯದಿಂದ ಬಿಡುಗಡೆ ಹೊಂದಿದಮೇಲೆ, ಸ್ಮಿತ್ ಒಂದು ವಿಮಾನ ನಿರ್ವಹಣಾ ಕಂಪನಿಯೊಂದನ್ನು ಕೊಂಡುಕೊಂಡ. ಒಂದು ವರ್ಷದಲ್ಲಿ ಆ ಕಂಪನಿಯನ್ನು ವಿಮಾನಗಳನ್ನುಪಯೋಗಿಸಿ ವ್ಯಾಪಾರ ಮಾಡುವ ಕಂಪನಿಯಾಗಿ ಬದಲಾಯಿಸಿದ. ತನ್ನ ಹಳೆಯ ಯೋಚನೆಯಲ್ಲಿ ಸಂಪೂರ್ಣ ಭರವಸೆಯಿಟ್ಟು, ಆಗಷ್ಟೇ ತನ್ನ ಪಾಲಿಗೆ ಪಿತ್ರಾರ್ಜಿತವಾಗಿ ಬಂದಿದ್ದ 40 ಲಕ್ಷ ಡಾಲರ್ ಬಂಡವಾಳ ಹೂಡಿ 1973ರಲ್ಲಿ ಒಂದು ಪಾರ್ಸೆಲ್ ವಿತರಣಾ ಸೇವೆಯ ವ್ಯವಹಾರ ಪ್ರಾರಂಭಿಸಿಯೇಬಿಟ್ಟ. ‘ಅಮೇರಿಕಾದ ಯಾವ ಊರಿಂದ ಯಾವ ಊರಿಗಾದರೂ ರಾತ್ರಿಕಳೆದು ಬೆಳಗಾಗುವಷ್ಟರಲ್ಲಿ ಪಾರ್ಸೆಲ್ ತಲುಪಿಸುತ್ತೇವೆ’ ಎಂಬ ವಾಗ್ದಾದದೊಂದಿಗೆ ಕಂಪನೆ ತನ್ನ ಪುಟ್ಟ ಹೆಜ್ಜೆಯಿಟ್ಟಿತು. 1973ರಲ್ಲಿ 186 ಪಾರ್ಸೆಲ್ಲುಗಳೊಂದಿಗೆ ಮೊದಲ ವಿಮಾನ ಹಾರಿಯೂಬಿಟ್ಟಿತು. ಆದರೆ ಪ್ರಾರಂಭವಾದ ಕೆಲಸಮಯದಲ್ಲೇ ಹಣದ ಅಭಾವ ತೋರತೊಡಗಿತು. ವ್ಯಾನುಗಳು, ಡಿಪೋಗಳನ್ನೇನೋ ಸಂಭಾಳಿಸಬಹುದು. ವಿಮಾನ ಹಾರಿಸುವುದೆಂದರೆ ಅಷ್ಟು ಸುಲಭದ, ಕಡಿಮೆ ಖರ್ಚಿನ ಮಾತೇ? ಅದಕ್ಕೆ ಸರಿಯಾಗಿ ಆಗ ವಿಮಾನ ಇಂಧನದ ಬೆಲೆಯೂ ವಿಮಾನದಂತೆಯೇ ಮೇಲ್ಮುಖಮಾಡಿತ್ತು. ಸ್ಮಿತ್ ತನ್ನ ವಿಮಾನಗಳಿಗೆ ಇಂಧನ ಖರೀದಿಸಲು ಒದ್ದಾಡತೊಡಗಿದ. ಹಳೆಯ ಬಾಕಿ ಕಟ್ಟದೇ ಇಂಧನ ಕೊಡಲಾಗುವುದಿಲ್ಲವೆಂದು ಪೂರೈಕೆದಾರರು ಖಡಾಖಂಡಿತವಾಗಿ ಹೇಳಿದರು. ಕೊನೆಯ ಪ್ರಯತ್ನವೆಂಬಂತೆ ಫ್ರೆಡ್, ಆ ಗುರುವಾರ ‘ಜೆನರಲ್ ಡೈನಾಮಿಕ್ಸ್’ ಕಂಪನಿಯಲ್ಲಿ ಸಾಲಕ್ಕೆ ಅರ್ಜಿ ಹಾಕಿದ. ಇವನ ಬ್ಯಾಲೆನ್ಸ್ ಶೀಟ್ ನೋಡಿದ ‘ಜೆನರಲ್ ಡೈನಾಮಿಕ್ಸ್’, ಕುಡಿಯಲು ಟೀ ಕೂಡಾ ಕೊಡದೇ ಹೊರಕಳಿಸಿತು.

ಸೋಮವಾರಕ್ಕೆ ವಿಮಾನ ಹೊರಡಿಸಲು 24,000 ಡಾಲರ್ ಹಣಬೇಕಾಗಿತ್ತು. ಕಂಪನಿಯ ಅಕೌಂಟಿನಲ್ಲಿ ಬರೇ 5,000 ಡಾಲರ್ ಹಣವಿತ್ತು. ಈಗೇನು ಮಾಡುವುದೆಂದು ಎಲ್ಲರೂ ತಲೆಮೇಲೆ ಕೈಹೊತ್ತು ಕುಳಿತಿದ್ದಾಗ, ಫ್ರೆಡ್ ಸ್ಮಿತ್ ಬ್ಯಾಂಕಿಗೆ ಹೋಗಿ, ಅಕೌಂಟನ್ನೆಲ್ಲಾ ಬಾಚಿ ಬಳಿದು ಪೂರ್ತಿ ದುಡ್ಡನ್ನೂ ತೆಗೆದು, ಬ್ಯಾಗ್ ಹಿಡಿದು ‘ಲಾಸ್-ವೇಗಸ್’ಗೆ ಹೊರಟ!! ಲಾಸ್ ವೇಗಸ್ ಜೂಜಾಟಕ್ಕೆ ಹೆಸರುವಾಸಿಯಾದ ನಗರ. ಕೈಯಲ್ಲಿದ್ದ ಹಣವನ್ನು ಜೂಜಾಡಿಬರುತ್ತೇನೆಂದು ಫ್ರೆಡ್ ನಿರ್ಧರಿಸಿದ್ದ. ಪಾಲುದಾರರು ಹೌಹಾರಿದರು! ಫ್ರೆಡ್ ಸಮಾಧಾನದಿಂದ ‘ನೋಡ್ರಪ್ಪಾ! 5000 ಡಾಲರ್ ಹಣದಿಂದ ಏನೂ ಮಾಡಲು ಸಾಧ್ಯವಿಲ್ಲ. ನಮಗೆ ಬೇಕಾಗಿರುವುದರ ಕಾಲುಭಾಗವೂ ಇದಲ್ಲ. ಹಾಗಿದ್ದ ಮೇಲೆ ಈ ದುಡ್ಡನ್ನು ಹೇಗೆ ಉಪಯೋಗಿಸಿದರೇನು? ಕಷ್ಟಕಾಲದಲ್ಲಿ ಏನು ಮಾಡಿದರೂ ಸರಿತಾನೇ! ಕಡೇಪಕ್ಷ ಜೂಜಾದರೂ ಆಡಿ ನೋಡುತ್ತೇನೆ’ ಎಂದು ಲಾಸ್ ವೇಗಸ್ಸಿನತ್ತ ಕಾರು ಓಡಿಸಿದ.

ಲಾಸ್-ವೇಗಸ್ಸಿಗೆ ಹೊದವನೇ ಕ್ಯಾನಿಸೋ ಒಂದನ್ನು ಹೊಕ್ಕ ಫ್ರೆಡ್ 5000 ಡಾಲರ್ ಹೂಡಿ, ಇಪ್ಪತ್ತೆರಡು ಸುತ್ತು ಬ್ಲಾಕ್-ಜಾಕ್ ಆಟವಾಡಿ (Black Jack – ಕೈಯಲ್ಲಿರುವ ಎಲೆಗಳ ಮೌಲ್ಯ 21ದಾಟದಂತೆ ಆಡುವ ಇಸ್ಪೀಟಿನ ಒಂದು ಆಟ) ಬರೋಬ್ಬರಿ 27000 ಡಾಲರ್ ಗೆದ್ದ!!! ಸ್ವತಃ ಪ್ರೆಡ್ಡಿಗೇ ಆಶ್ಚರ್ಯವಾಗುವಂತೆ, ಸಧ್ಯದ ಸಾಲತೀರಿಸಿ, ಮತ್ತೊಮ್ಮೆ ಇಂಧನ ಪಡೆದು ಕಂಪನಿಯನ್ನು ಇನ್ನೂ ಒಂದು ವಾರ ನಡೆಸಬಹುದಾದಷ್ಟು ಹಣ ಕೈಗೆ ಬಂದಿತ್ತು! ದೊಡ್ಡ ಸಹಾಯವೇನೂ ಅಲ್ಲದಿದ್ದರೂ, ಕಂಪನಿ ಸಾಯದಂತೆ ನೋಡಿಕೊಳ್ಳಬಹುದಾಗಿತ್ತು. ಏನೂ ಮಾಡದಿದ್ದಲ್ಲಿ ಕಂಪನಿ ಮುಚ್ಚುವುದೇ ದಾರಿಯಾಗಿದ್ದಾಗ, ಈ ಹಣ ಖಂಡಿತವಾಗಿಯೂ ಸಹಾಯಕಾರಿಯಾಗಿತ್ತು. ‘If you try you may win or loose. But if you don’t try at all, you will surely loose’ ಎಂಬ ಮಾತಿನಂತೆ ಫ್ರೆಡ್ ತನ್ನ ಕಂಪನಿಯನ್ನು ಸಣ್ಣದೊಂದು ಹುಲ್ಲುಕಡ್ಡಿಯ ಆಸರೆಯಲ್ಲಿ ಇನ್ನೊಂದು ವಾರ ನಡೆಸಿದ. ಆ ವಾರದಲ್ಲಿ ಮತ್ತೊಮ್ಮೆ ಬ್ಯಾಂಕುಗಳನ್ನು ಭೇಟಿಮಾಡಿ, ಹಣಕಾಸು ಸಹಾಯವನ್ನು ಪಡೆದ. ಕಂಪನಿ ಮುಳುಗಲಿಲ್ಲ. ಮುನ್ನಡೆಯಿತು.

ಹೀಗೆ ಇನ್ನೇನು ಮುಳುಗಿಯೇಬಿಟ್ಟಿತು ಎಂಬಂತಿದ್ದ ಕಂಪನಿಯೊಂದು, ಜೂಜಾಟದಿಂದ ಬಂದ ಹಣದಿಂದ ತನ್ನನ್ನು ಉಳಿಸಿಕೊಂಡಿತು. ಆಶ್ಚರ್ಯದ ವಿಷಯವೆಂದರೆ, ಇಂದು ಈ ಕಂಪನಿ ವರ್ಷಕ್ಕೆ 45 ಶತಕೋಟಿ ಡಾಲರ್ ಆದಾಯಗಳಿಸುತ್ತದೆ. ಅದು ಸುಮಾರು ಮೂರುಲಕ್ಷ ಉದ್ಯೋಗಿಗಳ ಮಹಾಸಮೂಹ. ಅವತ್ತು ಒಂದು ವಿಮಾನ ಹಾರಿಸಲೂ ಕಷ್ಟಪಡುತ್ತಿದ್ದ ಕಂಪನಿ ಇವತ್ತು ಒಟ್ಟು 666 ವಿಮಾನಗಳ ಹಾಗೂ 47,500 ವಾಹನಗಳ ದೈತ್ಯಸಂಸ್ಥೆ. ಫ್ರೆಡ್ ಸ್ಮಿತ್ ಒಬ್ಬನ ನಿವ್ವಳ ಬೆಲೆಯೇ(net worth) ಮೂರುವರೆ ಶತಕೋಟಿ ಡಾಲರ್! ಈತನ ಪೂರ್ತಿ ಹೆಸರು ಫ್ರೆಡರಿಕ್ ವಾಲೆಸ್ ‘ಫ್ರೆಡ್’ ಸ್ಮಿತ್.

ಅಂದಹಾಗೆ, ಅಮೇರಿಕಾದ ಸರ್ಕಾರೀ ಅಂಚೆ ಸೇವೆಯನ್ನೂ ಮೀರಿಸಿ, ಗ್ರಾಹಕರ ಮೆಚ್ಚುಗೆಗೆ ಪಾತ್ರವಾದ ಈ ಕಂಪನಿಯ ಹೆಸರು FedEx (Federal Express ಎಂಬ ಮೂಲಹೆಸರಿನ ಹೃಸ್ವರೂಪ). ಇಂತ ಬೃಹತ್ ಸಂಸ್ಥೆ ತನ್ನ ಇತಿಹಾಸದಲ್ಲಿ ಒಮ್ಮೆ ‘ಜೂಜಾಟ’ದಿಂದ ಬಚಾಯಿಸಲ್ಪಟ್ಟಿತು ಎಂದರೆ ನಂಬಲು ಸುಲಭವಲ್ಲ, ಅಲ್ಲವೇ? 🙂

ಬುದ್ಧಿಗೊಂದು ಗುದ್ದು – ೨೬

ಯಾರಪ್ಪನ ಆಸ್ತಿ ಈ ಅಂತರ್ಜಾಲ!?

ದಿನಾ ಬೆಳಗ್ಗೆ ಎದ್ದು ಮಲಗೋ ಮುಂಚಿನ ನಿಮಿಷದವರೆಗೂ ಇಂಟರ್ನೆಟ್ಟು ಅನ್ನೋ ಜೇಡರಬಲೆಯಲ್ಲಿ ಸಿಕ್ಕಾಂಡಿರ್ತೀರಲ್ಲ, ಯಾವತ್ತಾದ್ರೂ ಇಂಟರ್ನೆಟ್ಟು ನಿಂತುಹೋದ್ರೆ ಏನ್ ಕಥೆ ಅಂತಾ ಯೋಚ್ನೆ ಮಾಡಿದ್ದೀರಾ? “ಏನು!! ಇಂಟರ್ನೆಟ್ಟು ನಿಂತುಹೋಗುತ್ತಾ!? ಅದು ಯಾರಪ್ಪನ ಮನೆಯದ್ದು ಹಾಗೆಲ್ಲಾ ನಿಲ್ಸೋಕೆ? ಅದು ಹೇಗೆ ನಿಂತೋಗತ್ತೆ?” ಅಂತಾ ಅವಾಜ್ ಹಾಕ್ತಿದ್ದೀರಾ!? ಸಮಾಧಾನ ಮಾಡ್ಕಳ್ಳಿ. ನಾನು ನೀವು ಅಂದ್ಕೊಂಡಷ್ಟು ಸರ್ವತಂತ್ರ ಸ್ವತಂತ್ರವಾಗೇನಿಲ್ಲ ಇಂಟರ್ನೆಟ್ಟು. ನಿಲ್ಸೋಕೆ ಯಾರಪ್ಪನ ಮನೆಯದ್ದಲ್ಲದಿದ್ದರೂ, ಇದನ್ನ ನಡೆಸೋಕೆ ಕೆಲವು ದೊಣ್ಣೆನಾಯಕರುಗಳಿದ್ದಾರೆ. ಅಷ್ಟೇ ಅಲ್ಲ, ಅಂತರ್ಜಾಲಕ್ಕೊಂದು ಕೀಲಿಕೈ ಕೂಡ ಇದೆ. ಕೀಲಿಕೈಯೆಂದರೆ ಸುಮ್ಮನೆ ಸಾಹಿತ್ಯಿಕವಾಗಿ (literal) ಹೇಳ್ತಾ ಇಲ್ಲ. ನಿಜವಾಗಿಯೂ ಅಂತರ್ಜಾಲಕ್ಕೊಂದು ಕೀಲಿಕೈ (Key) ಇದೆ. ಈ ಕೀಲಿಕೈ ಸಿಗಬೇಕಾದರೆ ಜಗತ್ತಿನಾದ್ಯಂತ ಹರಡಿರುವ 14ಜನ ಸೇರಬೇಕು. ಈ 14ಜನರ ಹತ್ತಿರವಿರುವ ಏಳು ಕೀಲಿಕೈಗಳು ಸೇರಿದರೆ ಮಾತ್ರ ಆ ‘ಮಾಸ್ಟರ್ ಕೀ’ ಸಿಗುವುದು. ಆ ಮಾಸ್ಟರ್ ಕೀ ಸಿಕ್ಕಿದರೆ ಅಂತರ್ಜಾಲಕ್ಕೆ ನೀವೇ ಒಡೆಯ! ಹೇಗೆ ಅಂತೀರಾ? ಮುಂದೆ ಓದಿ.

ಅಂತರ್ಜಾಲ ಅನ್ನುವುದೊಂದು ಒಂಟಿಮನೆಯೇನಲ್ಲ. ಹಾಗಂತ ಇದನ್ನ ಒಂದಷ್ಟು ಮನೆಗಳ ಜಾಲ ಅಂತಾ ತಿಳ್ಕೊಂಡಿದ್ರೆ ಅದು ತಪ್ಪು ತಿಳುವಳಿಕೆ. ಇಂಗ್ಳೀಷಿನ Internet ಹೆಸರು ಇದಕ್ಕೆ ಹೆಚ್ಚು ಸೂಕ್ತ ಅರ್ಥ ಕೊಡುತ್ತದೆ. ಯಾಕೆಂದರೆ, ಇದೊಂದು ಜಾಲಗಳನ್ನು ಸಂಪರ್ಕಿಸುವ ಮಹಾಜಾಲ. It’s a network of networks. ಬೇರೆ ಬೇರೆ ದೇಶದ, ಬೇರೆ ಬೇರೆ ಸಂಸ್ಥೆಗಳ, ಬೇರೆ ಬೇರೆ ಸಂಘಟನೆಗಳ ತಾಣಗಳನ್ನು ಸಂಪರ್ಕಿಸುವ ಒಂದು ಮಹಾಜಾಲ. ಹೀಗಿದ್ದಾಗ ಇದನ್ನು ಯಾರೋ ಒಬ್ಬ ವ್ಯಕ್ತಿ ಅಥವಾ ಒಂದು ಸಂಸ್ಥೆ ನಿರ್ಬಂಧಿಸಲು ಸಾಧ್ಯವಿಲ್ಲ. ಆದರೆ ಕೆಲವೊಂದು ದೇಶಗಳಲ್ಲಿ ಅಂತರಜಾಲದ ಪ್ರವೇಶವನ್ನು ಒಂದೊಂದೇ ಸಂಸ್ಥೆ ಅಥವಾ ವ್ಯಕ್ತಿ ಅಥವಾ ಒಂದು ಗುಂಪು ನಿರ್ಬಂಧಿಸಬಹುದು. ಉದಾಹರಣೆಗೆ ನಾನಿರುವ ಸಂಯುಕ್ತ ಅರಬ್ ಎಮಿರೆಟ್ಸಿನಲ್ಲಿ 2006ಕ್ಕೆ ಮುಂಚೆ ದೇಶದ ಇಂಟರ್ನೆಟ್ ಟ್ರಾಫಿಕ್ಕನ್ನು ‘ಎತಿಸಲಾತ್’ ಎಂಬ ಕಂಪನಿಯೇ ನಿರ್ಧರಿಸುತ್ತಿತ್ತು. ಈಗ ‘ಎತಿಸಲಾತ್’ ಮತ್ತು ‘ಡು’ ಎಂಬ ಎರಡು ಕಂಪನಿಗಳಿವೆ. ನಾಳೆ ಏನಾದರೂ ಇವೆರಡೂ ಕಂಪನಿಗಳ ಸಿ.ಇ.ಒಗಳು ಸೇರಿ ಯು.ಎ.ಇ ಗೆ ಇಂಟರ್ನೆಟ್ ಬೇಡ ಎಂದಾಗಲೀ ಅಥವಾ ಅಂತರ್ಜಾಲದ ಇಂತಿಂತಾ ಪುಟಗಳು ಮಾತ್ರ ಇಲ್ಲಿನ ನಾಗರೀಕರಿಗೆ ಸಿಗುವಂತಾಗಲಿ ಎಂದು ನಿರ್ಧರಿಸಿದರೆ ನನಗೆ ಅವರು ಕೊಟ್ಟಷ್ಟು ಪ್ರಸಾದವೇ ಗತಿ. ಹಾಗೂ ಇದು ನಡೆಯುತ್ತಿದೆ ಕೂಡಾ. ಇಲ್ಲಿನ ಸರ್ಕಾರ ಅಥವಾ ಇಸ್ಲಾಂಗೆ ವಿರುದ್ಧವಾಗಿ ಮಾತನಾಡುವ ಜಾಲಪುಟಗಳನ್ನು ಹಾಗೂ ಅಶ್ಲೀಲತೆ/ನಗ್ನತೆಯನ್ನು ತೋರಿಸುವ ಪುಟಗಳನ್ನು ಈ ಕಂಪನಿಗಳು ನಿರ್ಬಂಧಿಸುತ್ತವೆ. ಇದೇ ರೀತಿ ಚೀನಾ, ಉ.ಕೊರಿಯಾ, ಇರಾನ್ ಮುಂತಾದ ದೇಶಗಳಲ್ಲಿಯೂ ಇದೇ ರೀತಿ ನಡೆಯುತ್ತದೆ. ಪ್ರತಿಯೊಂದು ಸರ್ಕಾರ ಹಾಗೂ ಆಯಾ ದೇಶದ ಟೆಲಿಕಾಂ ಕಂಪನಿಗಳು ಜಾಲವನ್ನು ಸ್ವಲ್ಪಮಟ್ಟಿಗೆ ನಿರ್ಬಂಧಿಸುತ್ತವೆ.

ಆದರೆ, ಜಗತ್ತಿನ ಕೆಲ ಕಂಪನಿಗಳಿಗೆ ಇಡೀ ಇಂಟರ್ನೆಟ್ಟನ್ನೇ ನಿರ್ಬಂಧಿಸುವ ಶಕ್ತಿಯಿದೆಯೆಂದರೆ ನಂಬುತ್ತೀರಾ? ಇಲ್ಲಿ ಕೇಳಿ. ನಮ್ಮ ನಮ್ಮ ದೇಶದ ಟೆಲಿಕಾಂ ಕಂಪನಿಗಳಿಗೆ ನಾವು ISP (Internet Service Providers) ಎಂದು ಕರೆಯುತ್ತೇವೆ. ಈ ISPಗಳು ನೇರವಾಗಿ ತಾವೇ ಅಂತರ್ಜಾಲವನ್ನು ನಿಮಗೆ ಒದಗಿಸುವುದಿಲ್ಲ. ಇವುಗಳಿಗೂ ಸೇವೆ ಒದಗಿಸುವ ಕೆಲ ಸಂಸ್ಥೆಗಳಿವೆ. ಇವನ್ನು upstream ISPಗಳೆನ್ನುತ್ತಾರೆ. ಅಂತರ್ಜಾಲ ಪ್ರಾರಂಭವಾದಾಗಲಿಂದಲೂ ಈ ಸಂಸ್ಥೆಗಳು ಕಾರ್ಯನಿರ್ವಹಿಸುತ್ತಿರುವುದರಿಂದ, ಅಂತರ್ಜಾಲದ ಪರಿಕಲ್ಪನೆಯನ್ನು ನಿಜವಾಗಿಸಿದ್ದೇ ಈ ಕಂಪನಿಗಳಾದ್ದರಿಂದ, ಹಾಗೂ ಇವತ್ತಿನ ಅಂತರ್ಜಾಲದ ಎಲ್ಲಾ ತಂತ್ರಜ್ಞಾನಗಳೂ ಈ ಕಂಪನಿಗಳಿಂದಲೇ ಉಗಮವಾದ್ದರಿಂದ ಇಡೀ ಅಂತರ್ಜಾಲದ ಬೆನ್ನೆಲುಬಾಗಿ ಈ ಕಂಪನಿಗಳು ಕಾರ್ಯನಿರ್ವಹಿಸುತ್ತವೆ. ಇವುಗಳಲ್ಲಿ ಅತ್ಯಂತ ಮುಖ್ಯವಾದವುಗಳು:

(*) UUNET
(*) Verizon
(*) Level3
(*) AT&T
(*) Qwest
(*) Sprint
(*) IBM

ಅಂತರ್ಜಾಲದ ಪ್ರತಿಯೊಂದು ಬೈಟ್ ಮಾಹಿತಿ ಹರಿಯುವುದೇ ಇವುಗಳ ಮೂಲಕ. ಇವು ಯಾವಾಗ ಬೇಕಾದರೂ ನಿಮ್ಮ ಅಂತರ್ಜಾಲದ ಬಾಗಿಲನ್ನು ಮುಚ್ಚಬಲ್ಲವು. ಆದರೆ, ಹಾಗಾಗುವ ಸಾಧ್ಯತೆ ಕಡಿಮೆ. ಯಾಕೆಂದರೆ, ಇವೆಲ್ಲವೂ ಬಂಡವಾಳಶಾಹಿ ಕಂಪನಿಗಳಾದ್ದರಿಂದ, ಇವುಗಳ ಆದಾಯವೂ ಅಂತರ್ಜಾಲದಿಂದಲೇ ಬರುತ್ತಿರುತ್ತದೆ. ಇವುಗಳಲ್ಲಿ ಯಾವ ಕಂಪನಿಯೂ ಅಂತರ್ಜಾಲವನ್ನು ನಿಲ್ಲಿಸಹೋಗಿ ತನ್ನ ಕಾಲಿಗೆ ತಾನೇ ಗುಂಡು ಹೊಡೆದುಕೊಳ್ಳುವ ಕೆಲಸ ಮಾಡಲಾರದು. ಹಾಗೂ ಈ ಕಂಪನಿಗಳು ವ್ಯಾವಹಾರಿಕ ಕಾಯ್ದೆಯಡಿಯಲ್ಲಿ ಬರುವುದರಿಂದ ಸರ್ಕಾರಗಳು ಮತ್ತು ಗ್ರಾಹಕರು ಇವನ್ನು ನಿಯಂತ್ರಿಸಬಹುದು.

ಆದರೆ, ಅಂತರ್ಜಾಲವನ್ನು ನಿಯಂತ್ರಿಸುವಲ್ಲಿ ಇವುಗಳಷ್ಟೇ ಮುಖ್ಯವಾದ ಇನ್ನೂ ಕೆಲವು ಅಂಗಗಳಿವೆ. ಅಂತರ್ಜಾಲದ ಆವಿಷ್ಕಾರವಾದಾಗ (ಅದಿನ್ನೂ ARPANET ಎಂದು ಕರೆಯಲ್ಪಡುತ್ತಿದ್ದಾಗ) ಅದನ್ನು ಒಂದೇ ಸಂಸ್ಥೆ ನಿರ್ವಹಿಸುತ್ತಿತ್ತು. ಆದರೆ, ನಿಧಾನವಾಗಿ ಬೇರೆ ಬೇರೆ ಅಂಗಗಳು ARPANETನೊಂದಿಗೆ ಸೇರಲಾರಂಭಿಸಿದಾಗ, ಇದರ ಕ್ಲಿಷ್ಟತೆ ಹೆಚ್ಚುತ್ತಾ ಹೋಯಿತು. ಹಾಗೂ ಕೆಲವೊಮ್ಮೆ ಈ ಅಂಗಸಂಸ್ಥೆಗಳು ಬೇರೆ ದೇಶಗಳಿಗೆ ಸೇರಿದವುಗಳಾಗಿದ್ದವು. ಅಂತರ್ಜಾಲ ಬೆಳೆಯುತ್ತಿರುವ ವೇಗ ನೋಡಿದ ಕೆಲ ತಜ್ಞರು ಇದನ್ನು ತಹಬಂದಿಯಲ್ಲಿಡಲು ಒಂದಷ್ಟು ನಿಯಮಾವಳಿಗಳನ್ನು ರೂಪಿಸಬೇಕೆಂಬ ಅಭಿಪ್ರಾಯಕ್ಕೆ ಬಂದರು. ಅಷ್ಟೇ ಅಲ್ಲದೆ, ಅಂತರ್ಜಾಲ ಬೆಳೆಯಲಾರಂಭಿಸಿದಂತೆ ಒಂದೇ ಹೆಸರಿನ ಹಲವು ಅಂತರ್ಜಾಲ ಪುಟಗಳು ಬರಲಾರಂಭಿಸಿದವು. ನೆನಪಿರಲಿ, ಕಂಪ್ಯೂಟರುಗಳಿಗೆ ನಾನು ನೀವು ಮಾತನಾಡುವ ಭಾಷೆ ಅರ್ಥವಾಗುವುದಿಲ್ಲ. ಅವಕ್ಕೇನಿದ್ದರೂ ಅಂಕಿಸಂಖ್ಯೆಗಳಷ್ಟೇ ಅರ್ಥವಾಗುವುದು. ನೀವು http://www.businessinsider.com ಎಂದು ಬರೆದದ್ದು ಅವಕ್ಕೆ 64.27.101.155 ಎಂದೇ ಅರ್ಥವಾಗುವುದು. ಹೀಗಿದ್ದಾಗ ಪ್ರತಿಯೊಂದು ಅಂತರ್ಜಾಲ ಪುಟಕ್ಕೆ ಅದರದ್ದೇ ಆದ ಸಂಖ್ಯಾವಿಳಾಸ (numeric address) ಇರಬೇಕಲ್ಲವೇ? ಇದನ್ನು ನಿರ್ಧರಿಸುವುದ್ಯಾರು? ಅದಕ್ಕಾಗಿಯೇ, ಜಗತ್ತಿನಲ್ಲಿ ಕೆಲ ಸಂಸ್ಥೆಗಳಿವೆ. ಇವು ಅಂತರ್ಜಾಲದ ನಿಯಾಮಾವಳಿಗಳನ್ನು (protocols) ರೂಪಿಸುತ್ತವೆ, ಅಂತರ್ಜಾಲದಲ್ಲಿ ಮಾಹಿತಿಗಳು ಹೇಗೆ ಹರಿದಾಡಬೇಕೆಂದು ನಿರ್ಧರಿಸುತ್ತವೆ, ಹಾಗೂ ಪ್ರತಿಯೊಂದು ಅಂತರ್ಜಾಲ ಪುಟಕ್ಕೂ ಸಂಖ್ಯಾನಾಮಕರಣ ಮಾಡುತ್ತವೆ. Internet Engineering Task Force, ICANN, National Science Foundation, InterNIC, Internet Architecture Board ಈ ಸಂಸ್ಥೆಗಳು. ಇವೆಲ್ಲವೂ ಯಾವುದೇ ಲಾಭಕ್ಕಾಗಿ ನಡೆಯುವ ಸಂಸ್ಥೆಗಳಲ್ಲ. ಉತ್ತಮವಾದ ಅಂತರ್ಜಾಲ ಅನುಭವ ನೀಡುವ ನಿಟ್ಟಿನಲ್ಲಿ ಕೆಲಸಮಾಡುವ nonprofit organisationಗಳು. ಯಾರೋ ಪ್ರೋಗ್ರಾಮರ್ ಮೌಟನ್-ವ್ಯೂನಲ್ಲಿ ಕುಳಿತು ತನ್ನ ವಿಂಡೋಸ್ ಕಂಪ್ಯೂಟರಿನಲ್ಲಿ http ನಿಯಮದಡಿ ಬರೆದ ಅರಬ್ಬೀ ಭಾಷೆಯ ಅಂತರ್ಜಾಲ ಪುಟವೊಂದು, ಐಬಿಎಂನ ಡೇಟಾ ಸೆಂಟರುಗಳ ಮೂಲಕ ಹಾದು, AT&Tಯ ಕೇಬಲ್ಲುಗಳಲ್ಲಿ ಹರಿದು, ಕಝಕಿಸ್ಥಾನದ kaznetನ ಕೇಬಲ್ಲು ತಲುಪಿ, ಅಲ್ಲಿನ ಗ್ರಾಹಕನೊಬ್ಬನ ಆಡ್ರಾಯ್ಡ್ ಫೋನಿನಲ್ಲಿ ಒಪೇರಾ ಬೌಸರಿನಲ್ಲಿ ನೋಡಿದರೂ ಮೂಲರೂಪದಲ್ಲೇ ದೊರಕುವ ‘ಅಂತರ್ಜಾಲ ಪಯಣ’ದಲ್ಲಿ ಒಂದೇ ಒಂದು ಬೈಟ್ ದತ್ತಾಂಶ ಕಳೆದುಹೋಗದಂತೆ ಮಾಡುವಲ್ಲಿ ಈ ಸಂಸ್ಥೆಗಳ ಪಾತ್ರ ಬಹು ದೊಡ್ಡದು.

1998ರಲ್ಲಿ ಪ್ರಾರಂಭವಾದ ICANN (Internet Corporation for Assigned Names and Numbers)ದ ಮುಖ್ಯ ಕೆಲಸ ಅಂತರ್ಜಾಲ ಪುಟಗಳಿಗೆ ತನ್ನದೇ ಆದ ವಿಶಿಷ್ಟ ಸಂಖ್ಯಾವಿಳಾಸ ನಿಯೋಜಿಸುವುದು. ಅಂದರೆ http://www.hotmail.com ಹಾಗೂ http://www.hotmale.com ಎರಡಕ್ಕೂ ವ್ಯತ್ಯಾಸ ಇರುವಂತೆ ನೋಡಿಕೊಳ್ಳುವುದು 😉 ಅಂದರೆ, ಯಾವುದೋ ಒಂದು ಫೋನು ಡಯಲ್ ಮಾಡಿದಾಗ ‘ಆ’ ನಂಬರಿಗೇ ಕರೆಹೋಗುವಂತೆ ಹೇಗೆ ಟೆಲಿಫೊನು ಎಕ್ಸ್ಚೇಂಜುಗಳು ನೋಡಿಕೊಳ್ಳುತ್ತವೋ, ಹಾಗೆಯೇ ICANN ಒಂದು ಇಂಟರ್ನೆಟ್ ಡೈರೆಕ್ಟರಿ ಇದ್ದಹಾಗೆ. ಎಲ್ಲ ಅಂತರ್ಜಾಲ ಪುಟಗಳ ನಂಬರುಗಳನ್ನು ಇಟ್ಕೊಂಡಿರುತ್ತೆ, ಹಾಗೂ ಒಂದೇ ಪೋನ್ ನಂಬರ್ ಇಬ್ಬರಿಗೆ ಸಿಗದಿರುವ ಹಾಗೆ ನೋಡಿಕೊಳ್ಳುತ್ತೆ. ಇದೇ ಅಲ್ಲದೆ ಈ ಸಂಸ್ಥೆ ಅಂತರ್ಜಾಲವನ್ನು ಸ್ಥಿರವಾಗಿ ನಿಲ್ಲುವಂತೆ ಮಾಡುವಲ್ಲಿ, ನಮ್ಮ ನಿಮ್ಮ ಮಧ್ಯದ ಕನೆಕ್ಷನ್ ಮುರಿದುಹೋಗದಿರುವಂತೆ ನೋಡಿಕೊಳ್ಳುವಲ್ಲಿ ಕೂಡಾ ಮಹತ್ವದ ಪಾತ್ರವಹಿಸುತ್ತದೆ.

ಈಗ ವಿಷಯಕ್ಕೆ ಬರೋಣ. ಯಾರಾದರೂ ಕಂಪ್ಯೂಟರ್ ಕಿಲಾಡಿ ICANN ಸಂಸ್ಥೆಯ ಡೇಟಾಬೇಸಿಗೆ ಲಗ್ಗೆ ಹಾಕಿ ಇಡೀ ಅಂತರ್ಜಾಲವನ್ನು ನಿಯಂತ್ರಿಸಬಹುದು ಮತ್ತು ಅಂತರ್ಜಾಲ ಕುಸಿದುಬೀಳಲೂ ಕಾರಣನಾಗಬಹುದು. ಹೇಗೆ ಅಂತೀರಾ? ಇದರ ಡೇಟಾಬೇಸಿಗೆ ಹೋಗಿ ನಿಜವಾದ ಬ್ಯಾಂಕ್ ವೆಬ್ಸೈಟಿನ ಬದಲು ನಕಲಿ ವೈಬ್ಸೈಟಿಗೆ ಗ್ರಾಹಕರನ್ನು ಕಳಿಸಿ, ದುಡ್ಡು ಲಪಟಾಯಿಸಬಹುದು. ಗೂಗಲ್ ಅಂತಾ ಟೈಪಿಸಿದವರನ್ನು ಇನ್ಯಾವುದೋ ಅಶ್ಲೀಲ ವೆಬ್ಸೈಟಿಗೆ ಕಳುಹಿಸಿ ಮುಜುಗರವನ್ನುಂಟು ಮಾಡಬಹುದು ಇತ್ಯಾದಿ ಇತ್ಯಾದಿ. ಅಂದರೆ, ಈ ಕಂಪನಿಯ ಡೇಟಾಬೇಸೇ ಅಂತರ್ಜಾಲಕ್ಕೆ ಹೆಬ್ಬಾಗಿಲಿದ್ದಂತೆ!!

ಹೀಗೇನಾದರೂ ಆಗಿ (ಅಥವಾ ಜಗತ್ತಿನಲ್ಲೇದರೂ ಅನಿರೀಕ್ಷಿತ ವಿಪತ್ತು ಘಟಿಸಿ) ಅಂತರ್ಜಾಲವೇ ಕುಸಿದುಬಿದ್ದರೆ, ಮತ್ತೆ ಅದನ್ನು ಕಟ್ಟಲು ಬಹಳಷ್ಟು ಸಮಯ ಬೇಕಾಗುತ್ತದೆ. ಹೀಗಿದ್ದಾಗ, ICANN ತನ್ನಲ್ಲಿರುವ ಮಾಹಿತಿಯನ್ನು ಅತ್ಯಂತ ಗೌಪ್ಯವಾಗಿ ಕಾಯ್ದಿಡಬೇಕು (ಅಂದರೆ ಹೆಚ್ಚು ಜನರಿಗೆ ತಿಳಿಯದಂತೆ) ಆದರೆ ಹಾಗಂತ ಒಬ್ಬರಿಗೇ ಇದರ ಕೀಲಿಕೈ ಕೊಟ್ಟರೆ ಅದೂ ಕಷ್ಟ. ಒಳ್ಳೇ ಪೀಕಲಾಟಕ್ಕೆ ಬಂತಲ್ಲಾಪ್ಪಾ! ಇದಕ್ಕಾಗಿಯೇ ICANN ತನ್ನ ಡೇಟಾಬೇಸ್ ಅನ್ನು ಅತ್ಯಂತ ಸುರಕ್ಷತೆಯಿಂದ ಕಾಯಲು ಹಾಗೂ ಅದರ ನಿಯಂತ್ರಣ ಒಬ್ಬನೇ ವ್ಯಕ್ತಿಯಲ್ಲಿ ಇರದಿರುವಂತೆ ನೋಡಿಕೊಳ್ಳಲು ಅನುಕೂಲವಾಗುವಂತೆ ಒಂದು ಕೆಲಸ ಮಾಡಿದೆ. ಅದೇನೆಂದರೆ ಜಗತ್ತಿನಾದ್ಯಂತ ಬೇರೆ ಬೇರೆ ದೇಶದಲ್ಲಿ ಹರಡಿ ಹೋಗಿರುವ ಏಳುಜನರನ್ನು ಆರಿಸಿ ಅವರಿಗೊಂದೊಂದು ‘ಅಂತರ್ಜಾಲದ ಕೀಲಿಕೈ’ಯನ್ನು ಕೊಟ್ಟಿದೆ. ಕೀಲಿಕೈಯೆಂದರೆ ಪಾಸ್ವರ್ಡ್ ಅಲ್ಲ. ನಿಜವಾದ ಕೀಲಿಕೈ!! ಈ ಏಳು ಜನರಿಗೆ ಒಬ್ಬೊಬ್ಬರು ಬ್ಯಾಕ್-ಅಪ್ ಇದ್ದಾರೆ. ಅಂದರೆ ಈ ಒಟ್ಟು ಹದಿನಾಲ್ಕು ಜನರ ಹತ್ತಿರ ಅಂತರ್ಜಾಲದ ಕೀಲಿಕೈ ಇರುತ್ತದೆ. ವರ್ಷದಲ್ಲಿ ನಾಲ್ಕು ಬಾರಿ ಈ ಹದಿನಾಲ್ಕು ಮಂದಿ ಅಮೇರಿಕಾದ ಪೂರ್ವತೀರ ಮತ್ತು ಪಶ್ಚಿಮ ತೀರದಲ್ಲಿ ಸೇರಿ, ಈ ಕೀಲಿಕೈಯನ್ನು ಬದಲಾಯಿಸುತ್ತಾರೆ. ಅಂತರ್ಜಾಲವನ್ನು ಸುರಕ್ಷಿತವಾಗಿಡಲು ಈ ನಿಯಮವನ್ನು 2010ರಿಂದ ICANN ಪಾಲಿಸಿಕೊಂಡು ಬಂದಿದೆ.

ಈ ಏಳು ಜನ ಯಾರ್ಯಾರೋ ದಾರಿಹೋಕರಲ್ಲ. ಬದಲಿಗೆ ಅಂತರರ್ಜಾಲ ಸುರಕ್ಷತೆಗಾಗಿ ಶ್ರಮಿಸಿ, ಅದರಲ್ಲಿ ಅಪಾರ ಜ್ಞಾನವುಳ್ಳವರೂ ಹಾಗೂ ಬೇರೆ ಬೇರೆ ಅಂತರ್ಜಾಲ ಸಂಬಂಧಿತ ಸಂಸ್ಥೆಗಳಲ್ಲಿ ಸೇವೆ ಸಲ್ಲಿಸಿದವರಾಗಿರುತ್ತಾರೆ. ಇವರ ಆಯ್ಕೆ ಪ್ರಕ್ರಿಯೆ ಹಾಗೂ ಕೀಲಿಕೈ ಮಾರ್ಪಾಡುವಿಕೆಯ ಕೆಲಸ ಅತ್ಯಂತ್ಯ ಗೌಪ್ಯವಾಗಿ ನಡೆಯುತ್ತದೆ. ವರ್ಷಕ್ಕೆ ನಾಲ್ಕುಬಾರಿ ನಡೆಯುವ ಕೀ ಬದಲಾವಣೆಯ ಗೌಪ್ಯ ಕಾರ್ಯಕ್ರಮಕ್ಕೆ ‘key ceremony’ ಎಂದೇ ಹೆಸರು. ಈವರೆಗೆ ಎರಡು ಬಾರಿ ಈ ಕಾರ್ಯಕ್ರಮದ ವೀಕ್ಷಣೆಗೆ ಕೆಲ ಪತ್ರಕರ್ತರನ್ನೂ ಆಹ್ವಾನಿಸಲಾಗಿದೆ ಹಾಗೂ ಇದರ ಬಗ್ಗೆ ಬರೆದಿದ್ದಾರೋ ಅದಷ್ಟೇ ನಮಗೆ ತಿಳಿದಿರುವ ವಿಷಯ.

Key ceremoneyಯ ದಿನ ಒಂದೆಡೆ ಸೇರುವ ಈ ಏಳೂ ಜನರನ್ನು ಒಂದು ಅತೀವ ಸುರಕ್ಷತೆಯ ಕೋಣೆಯಲ್ಲಿ ಸೇರಿಸಲಾಗುತ್ತದೆ. ಆ ಕೋಣೆಗೆ ಹೋಗುವ ಮುನ್ನ ಬಹಳಷ್ಟು ಸುರಕ್ಷತಾ ಬಾಗಿಲುಗಳನ್ನು ದಾಟಿಯೇ ಹೊಗಬೇಕು. ಕೀಗಳು, ಫಿಂಗರ್ ಪ್ರಿಂಟ್, ಆಕ್ಸೆಸ್ ಕಾರ್ಡ್, ಐರಿಸ್ ಸ್ಕ್ಯಾನ್ ಮುಂತಾದ ಹಂತಗಳನ್ನು ದಾಟಿ ಆ ceremony ನಡೆಯುವ ಕೋಣೆಗೆ ತಲುಪುವ ಈ ‘ಅಂತರ್ಜಾಲ ವಾರಸುದಾರರು’ ತಂತಮ್ಮ ಕೀಗಳಿಂದ ಒಂದೊಂದ್ ಲಾಕರ್ ಡಬ್ಬವನ್ನು ತೆರೆಯುತ್ತಾರೆ. ಅದರೊಳಗೆ ಇಟ್ಟಿರುವ ತಂತಮ್ಮ ಸ್ಮಾರ್ಟ್-ಕಾರ್ಡುಗಳನ್ನು ತೆಗೆದುಕೊಳ್ಳುತ್ತಾರೆ. ಅವುಗಳನ್ನು ಉಪಯೋಗಿಸಲೂ ಒಂದೊಂದು ಪಾಸ್ವರ್ಡುಗಳನ್ನು ಆ ಕಾರ್ಡುಗಳ ಬಳಕೆದಾರರೇ ನಿರ್ಧರಿಸುತ್ತಾರೆ. ಈ ಏಳೂ ಸ್ಮಾರ್ಟ್ ಕಾರ್ಡುಗಳನ್ನು ಒಟ್ಟಿಗೆ ಉಪಯೋಗಿಸಿದಾಗ ಅಂತರ್ಜಾಲದ ಮಹಾದ್ವಾರವನ್ನು ತೆಗೆಯುವ ‘ಮಾಸ್ಟರ್ ಕೀ’ ದೊರೆಯುತ್ತದೆ. ಅದನ್ನು ಜನರೇಟ್ ಮಾಡಲೂ ಸುಮಾರು ನೂರಾಏಳು ಹಂತಗಳ ಕ್ರಮಸೂಚಿಯಿದೆ. ಇದೆಲ್ಲಾ ನಡೆಯುವುದು ಸುಮಾರು ಒಂಬತ್ತು ಜನ ನಿಲ್ಲಬಹುದಾದ ಸಣ್ಣ ಪಂಜರದಲ್ಲಿ ಹಾಗೂ ಒಂದಿಪ್ಪತು ಜನ ಕೂರಬಹುದಾದ ಸಣ್ಣ ಕೋಣೆಯಲ್ಲಿ. ಈ ಮಾಸ್ಟರ್ ಕೀ ಒಂದು ಪಾಸ್ವರ್ಡ್ ತರಹದ್ದೇನೋ ಆಗಿರುತ್ತದೆ. ಈ ಪಾಸ್ವರ್ಡ್ ಬಳಸಿದರೆ ಮಾತ್ರ ಮುಖ್ಯ ಡೇಟಾಬೇಸ್ ಅನ್ನು ಉಪಯೋಗಿಸಲು ಸಾಧ್ಯ.

ಓಹೋ ಸರಿ ಸರಿ. ಒಂದುವೇಳೆ ಈ ಮಾಸ್ಟರ್ ಕೀ ಜನರೇಟ್ ಮಾಡುವ ಯಂತ್ರವೇ ಏನಾದರೂ ಕೆಲಸಮಾಡುವುದನ್ನು ನಿಲ್ಲಿಸಿದರೆ ಏನು ಮಾಡುತ್ತಾರೆ ಅಂತಾ ಕೇಳ್ತೀರಾ? ICANN ಅದಕ್ಕೂ ಒಂದು ವ್ಯವಸ್ಥೆ ಮಾಡಿದೆ. ಅದೇನೆಂದರೆ, ಜಗತ್ತಿನಾದ್ಯಂತ ಹರಡಿಹೋಗಿರುವ ಇನ್ನೂ ಏಳು ಜನ ಈ ಇಡೀ ವ್ಯವಸ್ಥೆಗೆ ಸೂಪರ್ ಬ್ಯಾಕ್-ಅಪ್ ಆಗಿ ನಿಲ್ಲುವಂತಹ ವ್ಯವಸ್ಥೆ. ಒಂದು ವೇಳೆ ಈ ಮಾಸ್ಟರ್ ಕೀ ಜನರೇಟ್ ಮಾಡುವ ಯಂತ್ರ ಕೆಲಸಮಾಡುವುದನ್ನು ನಿಲ್ಲಿಸಿದರೆ, ಅಥವಾ ಏನಾದರೂ ಅವಘಡ ಸಂಭವಿಸಿದರೆ, ಅದನ್ನು ಪುನಃ ರಚಿಸಲು ಬೇಕಾಗುವ ಕಂಪೂಟರ್ ಪ್ರೋಗ್ರಾಮ್ ಅನ್ನು ಏಳು ಭಾಗಗಳಾಗಿ ವಿಂಗಡಿಸಿ ಈ ಏಳು ಜನರ ಮಧ್ಯೆ ಹಂಚಲಾಗಿದೆ. ಒಂದುವೇಳೆಯೇನಾದರೂ ICANNನ ಆಫೀಸೇನಾದರೂ ನಿರ್ನಾಮವಾದರೆ ಇನ್ನೊಂದು ಕಡೆ ಈ ಯಂತ್ರವನ್ನು ಪುನರ್ನಿಮಿಸಲು ಈ ಏಳು ಜನ ಒಂದಾಗುತ್ತಾರೆ. ವರ್ಷಕ್ಕೊಮ್ಮೆ ಈ ಏಳು ಜನ ತಾವು ಸುರಕ್ಷಿತವಾಗಿದ್ದೇವೆ ಹಾಗೂ ‘ಎಲ್ಲವೂ ಸರಿಯಿದೆ’ ಎಂದು ನಿರೂಪಿಸಲು, ತಮ್ಮ ಒಂದು ಭಾವಚಿತ್ರ, ಅಂದಿನ ದಿನಪತ್ರಿಕೆ ಮತ್ತು ತಮ್ಮ ಕೀ (ಕೋಡ್) ಅನ್ನು ICANN ಆಫೀಸಿಗೆ ಕಳಿಸುತ್ತಾರೆ. ಹೇಗಿದೆ ವ್ಯವಸ್ಥೆ!?

ಇದರ ಬಗ್ಗೆ ಹೆಚ್ಚಿನ ಆಸಕ್ತಿಯಿದ್ದರೆ, http://bit.ly/1pDUq3g ಇಲ್ಲಿ ಕ್ಲಿಕ್ಕಿಸಿ. ಅಲ್ಲೊಂದು ಸಣ್ಣ ವಿಡಿಯೋ ಕೂಡಾ ಇದೆ. ಇತ್ತೀಚೆಗೆ ನಡೆದ key ceremoneyಯೊಂದರ ದೃಶ್ಯ ತುಣುಕು ಕೂಡಾ ಇದೆ. ಓದಿ….ನೋಡಿ.

ಇಷ್ಟೆಲ್ಲಾ ಸರ್ಕಸ್ಸು ನಡೆಯುವುದು ನಾವು ನೀವು ನಿರಂತರವಾಗಿ ಅವಲಂಬಿತವಾಗಿರುವ ಅಂತರ್ಜಾಲವನ್ನು ಸುರಕ್ಷಿತವಾಗಿಸಲು ಹಾಗೂ ಅದರ ಮೇಲೆ ನಾವಿಟ್ಟಿರುವ ನಂಬಿಕೆಯನ್ನು ಹಾಗೆಯೇ ನಿಲ್ಲಿಸುವುದಕ್ಕಾಗಿ. ಜನರ ಜೀವನಗಳನ್ನು, ದೇಶಗಳ ಸರ್ಕಾರಗಳನ್ನು, ಜಗತ್ತಿನ ಇತಿಹಾಸವನ್ನೇ ಬದಲಾಯಿಸುವಷ್ಟರಮಟ್ಟಿಗೆ ಶಕ್ತಿಶಾಲಿಯಾಗಿರುವ ಅಂತರ್ಜಾಲವನ್ನು ನಂಬಿಕಾರ್ಹ ವೇದಿಕೆಯಾಗಿ ಉಳಿಸುವುದಕ್ಕಾಗಿ. ನಾವು ಇವೆಲ್ಲರ ತಲೆಬಿಸಿಯೇ ಇಲ್ಲದೆ, ಸುಮ್ಮನೆ ಗೂಗಲ್ಲಿಗೆ ಹೋಗಿ ನಮಗೆ ಬೇಕಾದ ವಿಷಯವನ್ನು ಟೈಪಿಸುತ್ತೇವೆ. ಅದು ಉತ್ತರಗಳನ್ನು ಕೊಡುತ್ತದೆ. ನಾವು ಅದನ್ನೇ ನಂಬಿ ಕ್ಲಿಕ್ಕಿಸುತ್ತೇವೆ. ಅಲ್ಲಿ ಏನಿದೆಯೋ ಇಲ್ಲವೋ ಒಂದೂ ಗೊತ್ತಿಲ್ಲದೆ ಗುರುತು ಪರಿಚಯವಿರದ ಹುತ್ತಕ್ಕೆ ಕೈ ಹಾಕುತ್ತೇವೆ. ಅದನ್ನೆಲ್ಲಾ ನಂಬಿಕಾರ್ಹವಾಗಿ ಉಳಿಸುವುದು ICANNನಂತಹ ಕೆಲ ಸಂಸ್ಥೆಗಳು. ಅವರಿಗೊಂದು ಸಣ್ಣ ಥಾಂಕ್ಸ್ ಕೊಡಲೇ ಬೇಕಲ್ಲವೇ?

 

ಚಿತ್ರಕೃಪೆ: ಆರೋನ್ ಟಿಲ್ಲಿ
Image courtesy: Aaron Tilley

ಬುದ್ಧಿಗೊಂದು ಗುದ್ದು – ೨೫

ಆಕಸ್ಮಿಕ ಹಾಗೂ ಸಾಮ್ಯತೆಗಳ ಲೋಕದಲ್ಲಿ ಇನ್ನೊಂದು ಸುತ್ತು, ಹಾಗೂ ಲಿಂಕನ್-ಕೆನಡಿ ಕನೆಕ್ಷನ್ನು!

ಹೋದಸಲ ಅವಳಿಜವಳಿಗಳ ಅದ್ಭುತವೊಂದರ ಬಗ್ಗೆ ಬರೆದಿದ್ದೆ. ಅದರ ಬಗ್ಗೆಯೇ ಹಾಗೆಯೇ ಯೋಚಿಸುತ್ತಿರಬೇಕಾದರೆ ಕೆಲವೊಮ್ಮೆ ಕಾಕತಾಳೀಯಗಳೂ ಎಷ್ಟೊಂದು ಅಶ್ಚರ್ಯಕರವಾಗಿ ಸಂಭವಿಸಬಲ್ಲವಲ್ಲವೇ ಎಂದೆನ್ನಿಸಿತು. ಹಾಗೆಯೇ ಯಾವಾಗಲೋ ಕಾಲೇಜಿನಲ್ಲಿ ಒಂದು ಹುಡುಗಿಯ (ಹಸಿರು ಲಂಗದವಳಲ್ಲ ) ಹಿಂದೆ ಬಿದ್ದಿದ್ದಾಗ ಬರೆದಿದ್ದ

‘ನಿನ್ನ ಭೇಟಿಯಾದ ಮೇಲೆ,
ನಮ್ಮ ಪ್ರೀತಿ ಹುಟ್ಟಿದ ಮೇಲೆ,
ಆಕಸ್ಮಿಕಗಳೂ ಇಷ್ಟು ಅರ್ಥಪೂರ್ಣವಾಗಿರಬಲ್ಲವೇ? ಎಂದೆನ್ನಿಸಿತು.
ನಮ್ಮ ಜೀವನವೇ ಅರ್ಥಪೂರ್ಣ ಆಕಸ್ಮಿಕಗಳ ಸರಮಾಲೆಯೇ?
ಎಂಬ ಪ್ರಶ್ನೆ ಕಾಡಿತು’

ಎಂಬ ಹುಚ್ಚು ಕವಿತೆಯ ಸಾಲೂ ಸಹ ನೆನಪಾಯಿತು. ಇಂತಹ ಆಕಸ್ಮಿಕಗಳ ಬಗ್ಗೆ ಯೋಚಿಸುತ್ತಿದ್ದಾಗ ನನಗೆ ನೆನಪಾಗಿದ್ದು, ಅಮೇರಿಕಾದ ಇಬ್ಬರು ಜನಪ್ರಿಯ ನಾಯಕರುಗಳಾದ ಅಬ್ರಹಾಂ ಲಿಂಕನ್ ಹಾಗು ಜಾನ್ ಕೆನಡಿಯ ಸಾವಿನ ಸುತ್ತಮುತ್ತವಿದ್ದ ಆಕಸ್ಮಿಕಗಳ ಸಾಲುಸಾಲು ಪಟ್ಟಿ! ಹೋದಬಾರಿ ಹುಟ್ಟು ಹಾಗೂ ಜೀವನದ ಸಾಮ್ಯತೆಯ ಬಗ್ಗೆ ಬರೆದಿದ್ದವನಿಗೆ ಇಲ್ಲಿ ಜೀವನದ ಮತ್ತು ಮರಣದ ಸುತ್ತಮುತ್ತಲಿದ್ದ ಸಾಮ್ಯತೆಯ ಬಗ್ಗೆ ಬರೆಯೋಣವೆಂದಿನೆಸಿದ್ದು ಸಹಜವೇ ಅಲ್ಲವೇ?

ಅಬ್ರಹಾಂ ಲಿಂಕನ್ ಮತ್ತು ಜಾನ್ ಕೆನಡಿ ಅಮೇರಿಕಾದ ವರ್ಚಸ್ವೀ ನಾಯಕರುಗಳ ಪಟ್ಟಿಯಲ್ಲಿ ಮೊದಲನೇ ಸ್ಥಾನದಲ್ಲಿ ನಿಲ್ಲುತ್ತಾರೆ. ಅಮೇರಿಕಾ ಸಂಯುಕ್ತ ಸಂಸ್ಥಾನದ ಆಂತರಿಕ ಕಲಹದ ಸಮಯದಲ್ಲಿ ದೇಶವನ್ನು ಮುನ್ನಡೆಸಿ ಒಂದುಗೂಡಿಸಿದ ಖ್ಯಾತಿ ಲಿಂಕನ್’ಗೆ ಸಲ್ಲಿದರೆ, ಕೆನಡಿ ತಮ್ಮ ಬೇ ಆಫ್ ಪಿಗ್ಸ್ ಆಕ್ರಮಣ, ಶೀತಲ ಹಾಗೂ ಅಂತರಿಕ್ಷ ಸಮರ ಹಾಗೂ ಕ್ಯೂಬಾ ಕ್ಷಿಪಣಿ ಬಿಕ್ಕಟ್ಟಿನ ಸಮಯದಲ್ಲಿ ದೇಶವನ್ನು ಮುನ್ನಡೆಸಿದರು. ಇಬ್ಬರೂ ಸಹ ಸಾಮಾಜಿಕ ಸುಧಾರಣೆಗಳಿಗಾಗಿ ಹಾಗೂ ನಾಗರೀಕ ಹಕ್ಕುಗಳಿಗಾಗಿ ಹೋರಾಡಿದರು. ಇವರಿಬ್ಬರ ಜೀವನ, ಸಾಧನೆಗಳು, ಸಾವು ಹಾಗೂ ಅದರ ಸುತ್ತಲಿನ ವಿಷಯಗಳು ಕೂಡ ನನ್ನ ಹಿಂದಿನ ಲೇಖನದಲ್ಲಿದ್ದಂತೆಯೇ ಬಹಳಷ್ಟು ಸಾಮ್ಯತೆಯಿಂದ ಕೂಡಿತ್ತು ಎನ್ನುವುದೇ ವಿಶೇಷ. ಆ ಸಾಮ್ಯತೆಗಳೇನೆಂದರೆ:

(*) ಇಬ್ಬರೂ ’46ರಲ್ಲಿ ‘ಹೌಸ್ ಆಫ್ ರೆಪ್ರೆಸೆಂಟೇಟಿವ್ಸ್’ಗೆ ಚುನಾಯಿತರಾದರು (ಲಿಂಕನ್ 1846ರಲ್ಲಿ ಹಾಗೂ ಕೆನಡಿ 1946ರಲ್ಲಿ). ಸರಿಯಾಗಿ ನೂರು ವರ್ಷಗಳ ಅಂತರದಲ್ಲಿ!

(*) ಇಬ್ಬರೂ ’60ರಲ್ಲಿ ಅಮೇರಿಕಾದ ಅಧ್ಯಕ್ಷರಾಗಿ ಆಯ್ಕೆಯಾದರು! (ಲಿಂಕನ್ 1860ರಲ್ಲಿ ಹಾಗೂ ಕೆನಡಿ 1960ರಲ್ಲಿ ಎಂದು ಇನ್ನೊಮ್ಮೆ ಹೇಳಬೇಕಿಲ್ಲ ತಾನೆ )

(*) ಇಬ್ಬರೂ ಸಹ ತಮ್ಮ ಅಧ್ಯಕ್ಷೀಯ ಚುನಾವಣೆಗೆ ಎದುರಾಳಿಯಾಗಿ ಆಗ ಉಪಾಧ್ಯಕ್ಷರಾಗಿ ಸೇವೆ ಸಲ್ಲಿಸುತ್ತಿದ್ದವರನ್ನೇ ಎದುರಿಸಿದರು. ಲಿಂಕನ್ ತನ್ನ ಪ್ರತಿಸ್ಪರ್ಧಿಯಾಗಿ ಜಾನ್ ಬ್ರೆಕೆನ್ರಿಡ್ಜ್ ಅವರನ್ನು ಎದುರಿಸಿದರೆ, ಕೆನಡಿ ಅಂದಿನ ಉಪಾಧ್ಯಕ್ಷರಾಗಿದ್ದ ರಿಚರ್ಡ್ ನಿಕ್ಸನ್ ಅವರನ್ನು ಎದುರಿಸಿದರು!

(*) ಇವರಿಬ್ಬರ ಪೂರ್ವಾಧಿಕಾರಿಗಳೂ ತಮ್ಮ ಎಪ್ಪತ್ತರ ವಯಸ್ಸಿನಲ್ಲಿ ನಿವೃತ್ತಿಹೊಂದಿ, ಮುಂದಿನ ವಾಸಕ್ಕಾಗಿ ಪೆನ್ಸಿಲ್ವೇನಿಯಾಗೆ ತೆರಳಿದರು. ಲಿಂಕನ್ನರ ಪೂರ್ವಾಧಿಕಾರಿ ಜೇಮ್ಸ್ ಬುಕಾನನ್ ನಿವೃತ್ತಿಯ ನಂತರ ಲಾಂಕಾಸ್ಟರಿನಲ್ಲಿ ವಾಸಮಾಡಲು ತೆರಳಿದರೆ, ಕೆನಡಿಯ ಪೂರ್ವಾಧಿಕಾರಿ ಡ್ವೈಟ್ ಐಸನ್ಹೂವರ್ ನಿವೃತ್ತಿಯ ನಂತರ ಗೆಟ್ಟಿಸ್ಬರ್ಗಿಗೆ ತೆರಳಿದರು.

(*) ಈ ಎರಡೂ ಅಧ್ಯಕ್ಷರುಗಳ ಜೊತೆ ಚುನಾಯಿತರಾದ ಉಪಾಧ್ಯಕ್ಷರುಗಳು, ಡೆಮೋಕ್ರಾಟರಾಗಿದ್ದರು ಹಾಗೂ ಅಮೇರಿಕಾ ಸಂಯುಕ್ತ ಸಂಸ್ಥಾನದ ದಕ್ಷಿಣದ ರಾಜ್ಯಗಳಿಂದ ಬಂದವರಾಗಿದ್ದರು. ಇಬ್ಬರ ಹೆಸರೂ ಜಾನ್ಸನ್ ಎಂದೇ ಆಗಿತ್ತು! ಲಿಂಕನ್ ಕಾಲದ ಉಪಾಧ್ಯಕ್ಷರಾಗಿದ್ದ ಆಂಡ್ರ್ಯೂ ಜಾನ್ಸನ್ ಉತ್ತರ ಕ್ಯಾರೋಲೀನಾದವರಾಗಿದ್ದರೆ, ಕೆನಡಿಯವರ ಉಪಾಧ್ಯಕ್ಷರಾಗಿದ್ದ ಲಿಂಡನ್ ಜಾನ್ಸನ್ ಟೆಕ್ಸಾಸಿನವರಾಗಿದ್ದರು!

(*) ಇಬ್ಬರೂ ಉಪಾಧ್ಯಕ್ಷ ಜಾನ್ಸನ್ನರು ’08ರಲ್ಲಿ ಜನಿಸಿದವರಾಗಿದ್ದರು! (ನೂರು ವರ್ಷಗಳ ಅಂತರದಲ್ಲಿ)

(*) ಎರಡೂ ಜಾನ್ಸನ್ನರ ಹೆಸರುಗಳಲ್ಲಿ 6 ಅಕ್ಷರಗಳಿದ್ದವು!

(*) ಇಬ್ಬರೂ ಉಪಾಧ್ಯಕ್ಷರುಗಳು ಅವರ ಕಾಲದ ಅಧ್ಯಕ್ಷರ ಹತ್ಯೆಯ ನಂತರ ’69ರಲ್ಲಿ ಅಮೇರಿಕಾದ ಅಧ್ಯಕ್ಷರಾದರು! ಹಾಗೂ ಈ ಇಬ್ಬರ ಉತ್ತರಾಧಿಕಾರಿಗಳೂ ರಿಪಬ್ಲಿಕನ್ನರಾಗಿದ್ದರು ಮತ್ತು ಅವರ ತಾಯಿಯ ಹೆಸರು ಹನ್ನಾ ಎಂದಾಗಿತ್ತು!

(*) ಇಬ್ಬರೂ ಅಧ್ಯಕ್ಷರ ಕಾಲದಲ್ಲಿ ಆಫ್ರಿಕನ್ ಅಮೇರಿಕನ್ನರ ಹಕ್ಕುಗಳ ಹೋರಾಟ ಉಚ್ಛ್ರಾಯ ಸ್ಥಿತಿಯಲ್ಲಿತ್ತು ಹಾಗೂ ಇಬ್ಬರೂ ಅಧ್ಯಕ್ಷರು ಸಮಾನ ಹಕ್ಕುಗಳಿಗಾಗಿ ಶ್ರಮಿಸಿದರು. ಇಬ್ಬರೂ ಸಹ ಈ ವಿಷಯಗಳ ಬಗ್ಗೆ ತಮ್ಮ ನಿಲುವನ್ನು ಸ್ಪಷ್ಟಪಡಿಸುತ್ತಾ ’63ರಲ್ಲಿ ಕಾನೂನುಗಳನ್ನ್ನು ಜಾರಿಗೊಳಿಸಿದರು. ಲಿಂಕನ್ 1862ರಲ್ಲಿ ತನ್ನ ‘ಗುಲಾಮಗಿರಿ ವಿಮೋಚನಾ ಘೋಷಣೆ’ಗೆ ಸಹಿ ಹಾಕಿ 1863ರಲ್ಲಿ ಅದನ್ನು ಶಾಸನವಾಗಿ ಜಾರಿಗೆ ತಂದರೆ, ಕೆನಡಿ 1963ರಲ್ಲಿ ‘ಸಮಾನ ನಾಗರೀಕ ಹಕ್ಕುಗಳ’ ಹಕ್ಕುಪತ್ರಕ್ಕೆ ಸಹಿಹಾಕಿ ಶಾಸನಬದ್ದಗೊಳಿಸಿದರು! ಅದೇವರ್ಷ ಪ್ರಖ್ಯಾತ ‘ಉದ್ಯೋಗ ಮತ್ತು ಸ್ವತಂತ್ರಕ್ಕಾಗಿ ವಾಷಿಂಗ್ಟನ್ ನಡಿಗೆ’ ನಡೆಯಿತು

(*) ಇಬ್ಬರೂ ಅಧ್ಯಕ್ಷರ ಕೊನೆಯ ಹೆಸರಿನಲ್ಲಿ 7 ಅಕ್ಷರಗಳಿದ್ದವು!

(*) ಇಬ್ಬರೂ ಅಧ್ಯಕ್ಷರ ಅಧಿಕಾರವಧಿಯಲ್ಲಿ ಅವರ ಗಂಡು ಮಗುವೊಂದು ತೀರಿಕೊಂಡಿತ್ತು!

(*) ಇಬ್ಬರೂ ಅಧ್ಯಕ್ಷರೂ ತಮ್ಮ ಹೆಂಡತಿಯರ ಸಮ್ಮುಖದಲ್ಲಿ ಶುಕ್ರವಾರದಂದೇ ಹತ್ಯೆಗೀಡಾದರು. ಆ ಎರಡೂ ಶುಕ್ರವಾರಗಳಿಗಿಂತ ಮುಂಚೆ ಆ ವಾರದಲ್ಲಿ ಮುಖ್ಯವಾದ ಸಾರ್ವಜನಿಕ ರಜಾದಿನಗಳಿದ್ದವು!

(*) ಹತ್ಯೆಯ ದಿನ ಇಬ್ಬರೂ ಅಧ್ಯಕ್ಷರ ಜೊತೆ, ಇನ್ನೊಬ್ಬ ದಂಪತಿಗಳಿದ್ದರು!

(*) ಎರಡೂ ಹತ್ಯೆಗಳಲ್ಲಿ, ಆ ಇನ್ನೊಬ್ಬ ದಂಪತಿಗಳಲ್ಲಿ, ಪುರುಷನಿಗೆ ಗುಂಡೇಟಿನ ಗಾಯವಾಗಿತ್ತು!

(*) ಲಿಂಕನ್ ಅವರನ್ನು ಜಾನ್ ವಿಲ್ಕ್ಸ್ ಬೂತ್ ಎಂಬಾತ ‘ಫೋರ್ಡ್ ಥಿಯೇಟರ್’ನಲ್ಲಿ ಕೊಂದರೆ, ಕೆನಡಿಯನ್ನು ಲೀ ಹಾರ್ವಿ ಒಸ್ವಾಲ್ಡ್ ಎಂಬಾತ ಫೋರ್ಡ್ ಕಂಪನಿಯಿಂದ ತಯಾರಿಸಲ್ಪಟ್ಟ ‘ಲಿಂಕನ್’ ಕಾರಿನಲ್ಲಿ ಪ್ರಯಾಣಿಸುತ್ತಿದ್ದಾಗ ಕೊಂದ!

(*) ಲಿಂಕನ್’ಗೆ ಒಬ್ಬ ಕೆನಡಿ ಎಂಬ ಹೆಸರಿನ ಸೆಕ್ರೆಟರಿಯಿದ್ದ, ಹಾಗೂ ಆತ ಲಿಂಕನ್ ಅವರನ್ನು ಹತ್ಯೆಯ ದಿನ ಫೋರ್ಡ್ ಥಿಯೇಟರ್’ಗೆ ಹೋಗದಂತೆ ತಡೆದಿದ್ದ. ಕೆನಡಿಗೆ ಎವಿಲಿನ್ ಲಿಂಕನ್ ಎಂಬ ಹೆಸರಿನ ಸೆಕ್ರೆಟರಿಯಿದ್ದಳು, ಹಾಗೂ ಆಕೆ ಹತ್ಯೆಯ ದಿನ ಡಲ್ಲಾಸ್ ನಗರದ ಬೇಟಿಯನ್ನು ರದ್ದುಮಾಡಲು ಸಲಹೆ ನೀಡಿದ್ದಳು!

(*) ಲಿಂಕನ್ ಅವರನ್ನ್ನು ಕೊಂದನಂತರ ಜಾನ್ ಬೂತ್, ಥಿಯೇಟರಿನಿಂದ ಒಂದು ಗೋದಾಮಿನೊಳಗೆ ಓಡಿದ. ಕೆನಡಿಯನ್ನು ಕೊಂದ ನಂತರ ಲೀ ಓಸ್ವಾಲ್ಡ್, ಗೋದಾಮಿನಿಂದ ಥಿಯೇಟರೊಂದರೊಳಗೆ ಓಡಿದ!

(*) ಇಬ್ಬರೂ ಕೊಲೆಗಾರರು ತಮ್ಮಿಂದ ಕೊಲ್ಲಲ್ಪಟ್ಟವರು ಸತ್ತ ತಿಂಗಳಿನಲ್ಲಿಯೇ ಸತ್ತರು. ಆಶ್ಚರ್ಯವೆಂದರೆ ಇಬ್ಬರೂ ತಾವು ಹುಟ್ಟಿದ ರಾಜ್ಯದ ಪಕ್ಕದ ರಾಜ್ಯದಲ್ಲೇ ಸತ್ತರು!

(*) ಇಬ್ಬರೂ ಕೊಲೆಗಾರರು ಅ.ಸಂ.ಸಂ.ದ ದಕ್ಷಿಣದ ರಾಜ್ಯಗಳಿಂದ ಬಂದವರಾಗಿದ್ದರು. ಇಬ್ಬರೂ ಬಿಳಿಯರೇ. ಇಬ್ಬರೂ ’30ರ ದಶಕದ ಕೊನೆಯಲ್ಲಿ ಹುಟ್ಟಿದವರಾಗಿದ್ದರು ಹಾಗೂ ಕೊಲೆನಡೆದಾಗ ಇಬ್ಬರೂ ತಮ್ಮ ಇಪ್ಪತ್ತರ ಹರೆಯದ ಮಧ್ಯದಲ್ಲಿದ್ದರು!

(*) ಜಾನ್ ಬೂತ್ 1838ರಲ್ಲಿ ಜನಿಸಿದ್ದರೆ, ಲೀ ಓಸ್ವಾಲ್ಡ್ 1939ರಲ್ಲಿ ಜನಿಸಿದ!

(*) ಇಬ್ಬರೂ ಕೊಲೆಗಾರರ ಹೆಸರಿನಲ್ಲಿ ಒಟ್ಟು 15 ಅಕ್ಷರಗಳಿದ್ದವು!

(*) ಇಬ್ಬರೂ ಕೊಲೆಗಾರರು ತಮ್ಮ ಕೇಸಿನ ವಿಚಾರಣೆ ಮುಗಿಯುವ ಮುನ್ನವೇ ಕೊಲೆಗೀಡಾದರು. ಇಬ್ಬರಿಗೂ ತಲೆಗೆ ಗುಂಡಿಕ್ಕಿ ಕೊಲ್ಲಲಾಯಿತು!

(*) ಈ ಕೊಲೆಗಾರರನ್ನು ಕೊಂದವರಿಬ್ಬರೂ ಅಮೇರಿಕದ ಉತ್ತರದಲ್ಲಿ ಬೆಳೆದವರಾಗಿದ್ದರು, ಇಬ್ಬರೂ ವಯಸ್ಕರಾದ ಮೇಲೆ ತಮ್ಮ ಹೆಸರನ್ನು ಬದಲಾಯಿಸಿಕೊಂಡಿದ್ದರು ಹಾಗೂ ಇಬ್ಬರೂ ಅವಿವಾಹಿತರಾಗಿದ್ದರು!

ಬಹುಷಃ ಕೂದಲು ಸೀಳುತ್ತಲೇ ಹೋದರೆ ಇನ್ನಷ್ಟು ಸಾಮ್ಯತೆಗಳು ಕಂಡುಬರಬಹುದೇನೋ! ಇಷ್ಟಕ್ಕೇ ಇದನ್ನು ನಿಲ್ಲಿಸುತ್ತಿದ್ದೇನೆ

ಜಗತ್ತು ಅದೆಷ್ಟು ಕುತೂಹಲಭರಿತ ಹಾಗೂ ವಿಚಿತ್ರ ವಿಷಯಗಳಿಂದ ತುಂಬಿದೆಯಲ್ಲವೇ!?

ಕೊಸರು: ವೀರಪ್ಪನ್ ಹುಟ್ಟಿದ್ದೂ ಹಾಗೂ ಅವನನ್ನು ಕೊಂದ ಪೋಲೀಸ್ ದಳದ ಮುಖ್ಯಸ್ಥರಾಗಿದ್ದ ಕೆ. ವಿಜಯ್ ಕುಮಾರ್ ಹುಟ್ಟಿದ್ದೂ 1952ರಲ್ಲಿ!

ಬುದ್ಧಿಗೊಂದು ಗುದ್ದು – ೨೪

ಮೂವತ್ತೊಂಬತ್ತು ವರ್ಷಗಳ ನಂತರ ಅರಳಿದ ಅವಳಿಗಳ ಕಚಗುಳಿ:

ನಿಮ್ಮಲ್ಲಿ ಯಾರಾದರೂ ಜೋಡಿ ಬಾಳೆಹಣ್ಣು ತಿಂದಿದ್ದೀರಾ!? ನಾನು ಸಣ್ಣವನಿದ್ದಾಗ, ನನಗೆ ತಿನ್ನೋಕೇ ಬಿಡ್ತಾ ಇರಲಿಲ್ಲ. ‘ಅದು ತಿಂದ್ರೆ ನಿನಗೆ ಅವಳಿ-ಜವಳಿ ಮಕ್ಳಾಗುತ್ವೆ’ ಅನ್ನೋ ಕಾರಣ ಕೊಡ್ತಾ ಇದ್ರು. ನನಗೆ ಆಶ್ಚರ್ಯವಾಗ್ತಾ ಇತ್ತು. ‘ಅಯ್ಯೋ ಅವಳಿ ಜವಳಿ ಆದ್ರೆ ಇನ್ನೂ ಒಳ್ಳೇದಲ್ವಾ! ನನ್ ಹೆಂಡ್ತಿ ಎರಡೆರಡು ಸಲ ಕಷ್ಟ ಅನುಭವಿಸೋದು ತಪ್ಪುತ್ತೆ’ ಅಂತಾ ಹೇಳಿ, ತಲೆ ಮೇಲೆ ಮೊಟಕಿಸಿಕೊಳ್ತಾ ಇದ್ದೆ. ಅದೂ ಅಲ್ದೆ ‘ಬಾಳೆಹಣ್ಣು ತಿಂದ್ರೆ ಮಕ್ಕಳಾಗುತ್ವಾ? ಜೋಡಿ ತಿಂದ್ರೆ ಎರಡು ಮಕ್ಕಳಾಗೋದಾದ್ರೆ, ಒಂದು ತಿಂದ್ರೆ ಒಂದು ಮಗು ಹುಟ್ಬೇಕಲ್ವಾ? ಮತ್ತೆ ಒಂದೊಂದೇ ತಿನ್ನೋಕೆ ಬಿಡ್ತೀರಾ, ಜೋಡಿ ಯಾಕೆ ತಿನ್ನಬಾರ್ದು!?’ ಅಂತೆಲ್ಲಾ ಕೇಳಿ ಲೆಕ್ಕಿ ಬರಲಿನಲ್ಲಿ ಪೆಟ್ಟು ತಿಂತಾ ಇದ್ದೆ. ಈ ಅವಳಿಗಳು ಅನ್ನೋ ವಿಸ್ಮಯ ನನಗೆ ಮಾತ್ರವಲ್ಲದೇ, ಜೀವವಿಜ್ಞಾನಿಗಳಿಗೂ ಸಹ ಸದಾ ಒಂದು ಕುತೂಹಲದ ವಿಷಯ. ಕೆಲವು ಥಿಯರಿಗಳ ಪ್ರಕಾರ, ಅವಳಿಗಳು ಒಂದೇ ರೀತಿ ಯೋಚಿಸ್ತಾರೆ ಹಾಗೂ ವರ್ತಿಸುತ್ತಾರೆ. ಕೆಲವು ವಾದಗಳ ಪ್ರಕಾರ ಅವಳಿಗಳು ಬೆಳೆಯುವ ಪರಿಸರಕ್ಕೆ ಹೊಂದಿಕೊಂಡಂತೆ ಅವರ ವರ್ತನೆಗಳಲ್ಲಿ, ನಿರ್ಧಾರಶಕ್ತಿಗಳಲ್ಲಿ ಬದಲಾವಣೆಗಳು ಕಂಡುಬರುತ್ತವೆ. ಇನ್ನೂ ಕೆಲವು ವಾದಗಳ ಪ್ರಕಾರ, ಅವಳಿಗಳು ಹುಟ್ಟುವಾಗಲಷ್ಟೇ ಅದು ಕೌತುಕದ ವಿಚಾರ. ಆನಂತರದ್ದೆಲ್ಲಾ ಸಾಮಾನ್ಯ ಆಗುಹೋಗುಗಳೇ. ಅವರು ಬರೇ ‘ಇಬ್ಬರು ಮನುಷ್ಯರು’ ಅಷ್ಟೇ. ಅವರಿಬ್ಬರ ಮಧ್ಯೆ ಸಾಮ್ಯಗಳು ಇರಲೇಬೇಕೆಂದೇನೂ ಇಲ್ಲ ಇತ್ಯಾದಿ ಇತ್ಯಾದಿ. ಇದಕ್ಕೆ ಸೂಕ್ತವಾದ ಉತ್ತರ ಇನ್ನೂ ಸಿಕ್ಕಿಲ್ಲ. ಇದನ್ನು ವಸ್ತುನಿಷ್ಟವಾಗಿ ಅಧ್ಯಯನ ಮಾಡಬೇಕೆಂದರೆ, ಇಬ್ಬರು ಅವಳಿಮಕ್ಕಳನ್ನು ಹುಟ್ಟುವಾಗಲೇ ಬೇರ್ಪಡಿಸಿ, ಅವರನ್ನು ಬೇರೆ ಬೇರೆ ವಲಯಗಳಲ್ಲಿ ಬೆಳೆಸಿ ಪಲಿತಾಂಶವನ್ನು ತಾಳೆ ನೋಡಬೇಕು. ಆದರೆ ಇಂತಹ ಒಂದು ಪ್ರಯೊಗವನ್ನು ಮನುಷ್ಯರ ಮೇಲೆ ನಡೆಸುವುದು ಸಾಧ್ಯವಿಲ್ಲ (ಹಾಗೂ ಸರಿಯಲ್ಲ ಕೂಡ).

ಅವಳಿಗಳಲ್ಲಿ, ಅನನ್ಯ/ತದ್ರೂಪಿ ಅವಳಿಗಳು (Identical twins – ಒಂದೇ ಅಂಡಾಣು ಹಾಗೂ ಒಂದೇ ವೀರ್ಯಾಣುವಿನಿಂದ ಹುಟ್ಟಿ, ಮುಂದೆ ಅಂಡಾಣು ವಿಭಜನೆಯಾಗಿ ಒಂದೇ ಪ್ರಸವದಲ್ಲಿ ಹುಟ್ಟುವ) ಹಾಗೂ ಸಹೋದರ ಅವಳಿಗಳು (Fraternal twins – ಪ್ರತ್ಯೇಕ ಅಂಡಾಣು ಹಾಗೂ ಪ್ರತ್ಯೇಕ ವೀಯಾಣುವಿನಿಂದ ಹುಟ್ಟಿ, ಒಂದೇ ಪ್ರಸವದಲ್ಲಿ ಹೊರಬಂದ) ಎಂಬ ಸ್ಥೂಲ ವಿಂಗಡೆಣೆಗಳಿವೆ. (ಇವಲ್ಲದೇ ಸಯಾಮೀ ಅವಳಿಗಳು, ಮಿಶ್ರ ಅವಳಿಗಳು, ಪರಾವಲಂಬಿ ಅವಳಿಗಳು, ಅಸಾಮಾನ್ಯ ಅವಳಿಗಳು ಮುಂತಾದ ಹಲವಾರು ವಿಂಗಡಣೆಗಳಿವೆ). ಇವುಗಳಲ್ಲಿ ಅನನ್ಯ/ತದ್ರೂಪಿ ಅವಳಿಗಳು ಬೇರೆಲ್ಲಕ್ಕಿಂತ ಹೆಚ್ಚು ಕುತೂಹಲ ಮೂಡಿಸುವಂತಹ ಸೋಜಿಗಗಳು.

ಮಿನ್ನಿಸೋಟಾ ವಿಶ್ವವಿದ್ಯಾನಿಲಯದಲ್ಲಿ ಅಧ್ಯಯನ ಮಾಡುವ ಥಾಮಸ್ ಬೌಚಾರ್ಡ್ ಎಂಬ ಪುಣ್ಯಾತ್ಮ,’ಅವಳಿಗಳು ಒಂದೇ ರೀತಿ ಯೋಚಿಸಲು ಹಾಗು ವರ್ತಿಸಲು ಸಾಧ್ಯವೇ?’ ಎನ್ನುವುದರ ಬಗ್ಗೆ ವರ್ಷಾನುಗಟ್ಟಲೆ ಅವಳಿಮಕ್ಕಳ ಮೇಲೆ, ಮಕ್ಕಳಿಗೆ ತಿಳಿಯದ ರೀತಿಯಲ್ಲೇ ಸಾಧ್ಯವಾದಷ್ಟೂ ನೈಸರ್ಗಿಕ ಪರಿಸರದಲ್ಲೇ ಅಧ್ಯಯನ ನಡೆಸುತ್ತಿದ್ದ. ಹನ್ನೊಂದು ವರ್ಷಗಳ ಸುದೀರ್ಘ ಸಂಶೋಧನೆಯ ನಂತರವೂ ಏನೂ ಹೆಚ್ಚಿನ ಮಾಹಿತಿ ಸಿಗದೇ ಹತಾಶೆಯಿಂದ ಇನ್ನೇನು ಅಧ್ಯಯನ ಕೈಬಿಡಬೇಕೆಂದು ನಿರ್ಧರಿಸಿದ್ದವನಿಗೆ, ಅದೇನು ಅದೃಷ್ಟ ಖುಲಾಯಿಸಿತ್ತೋ ಏನೋ! ಮುಂದಿನ ಐದುವರ್ಷಕ್ಕೆ ಸಾಕಾಗುವಷ್ಟು ಸರಕು ಒಂದೇ ರಾತ್ರಿಯಲ್ಲಿ ಸಿಕ್ಕಿತು. ಅದೇನೆಂದರೆ, 1939ನೇ ಇಸವಿಯಲ್ಲಿ ಅನನ್ಯ ಅವಳಿಗಳಾಗಿ ಹುಟ್ಟಿ, ಹುಟ್ಟಿದ ಮೂರೇ ವಾರಕ್ಕೆ ಬೇರೆ ಬೇರೆ ಪೋಷಕರಿಂದ ದತ್ತುತೆಗೆದುಕೊಳ್ಳಲ್ಪಟ್ಟು, ಸಂಪೂರ್ಣ ಬೇರೆ ಬೇರೆ ಪರಿಸರದಲ್ಲಿ ಬೆಳೆದು, ಮೂವತ್ತೊಂಬತ್ತು ವರ್ಷಗಳ ನಂತರ ಒಂದಾದ ಇಬ್ಬರು ಅಣ್ಣತಮ್ಮಂದಿರ ಜೋಡಿಯೊಂದು ಸಿಕ್ಕಿಬಿಟ್ಟಿತ್ತು. ಅವಳಿಗಳು (ಬೇರೆಲ್ಲಾ ಅನನ್ಯ ಅವಳಿಗಳಂತೆಯೇ) ನೋಡಲು ಒಂದೇ ತೆರನಾಗಿದ್ದರು. ಆಶ್ಚರ್ಯವೆಂದರೆ ಇಬ್ಬರ ಹೆಸರೂ ಜಿಮ್ ಎಂದಾಗಿತ್ತು!! ಆದರೆ ಅವರ ಜೀವನವನ್ನು ಕೆದಕುತ್ತಾ ಹೋದ ಥಾಮಸ್’ಗೆ ಸಿಕ್ಕ ವಿಚಾರಗಳು ಒಂದಕ್ಕಿಂತ ಒಂದು ಬೆಚ್ಚಿಬೀಳಿಸುವಂತಿದ್ದವು. ಒಂದೇ ತಂದೆ ಮತ್ತು ತಾಯಿಗೆ ಹುಟ್ಟಿ, ಒಂದೇ ಪರಿಸರದಲ್ಲಿ ಬೆಳೆದ ಮಕ್ಕಳು ಸಾಮಾನ್ಯವಾಗಿ ಹಲವಾರು ರೀತಿಯಲ್ಲಿ ಒಂದೇ ರೀತಿಯಿದ್ದರೂ ಸಹ, ಈ ಪ್ರಕರಣದಲ್ಲಿ (ಸಂಪೂರ್ಣ ಬೇರೆ ಬೇರೆ ಪರಿಸರದಲ್ಲಿ ಬೆಳೆದಿದ್ದರೂ ಸಹ) ಕೆಲ ಹೋಲಿಕೆಗಳು ನಂಬಲಸಾಧ್ಯವಾದಷ್ಟು ಸಾಮ್ಯತೆಯಿಂದ ಕೂಡಿದ್ದವು.

(*) ಇಬ್ಬರ ದತ್ತು ಪೋಷಕರೂ ಆ ಹುಡುಗರಿಗೆ ಜಿಮ್ ಎಂದೇ ಹೆಸರಿಟ್ಟರು (ಒಬ್ಬ ಜಿಮ್ ಸ್ಪ್ರಿಂಗರ್ (Jim Springer) ಹಾಗೂ ಇನ್ನೊಬ್ಬ ಜಿಮ್ ಲೆವಿಸ್ (Jim Lewis). ಪೋಷಕರಿಗೂ ಸಹ ಇನ್ನೊಂದು ಮಗುವಿನ ಹೆಸರು ಜಿಮ್ ಎಂದು ತಿಳಿದಿರಲಿಲ್ಲ)!
(*) ತನಗೊಬ್ಬ ಸಹೋದರನಿದ್ದಾನೆ ಎಂದು ತಿಳಿಯದೇ ಬೆಳೆದ ಇಬ್ಬರೂ ಜಿಮ್’ಗಳು ರಕ್ಷಣೆಗೆ ಸಂಬಂದಿಸಿದ ಉದ್ಯೋಗಗಳನ್ನೇ ಆಯ್ದುಕೊಂಡರು. ಜಿಮ್ ಲೆವಿಸ್ ಉಕ್ಕಿನ ಕಾರ್ಖಾನೆಯೊಂದರಲ್ಲಿ ರಕ್ಷಣಾ ಸಿಬ್ಬಂದಿಯಾಗಿದ್ದರೆ, ಜಿಮ್ ಸ್ಪ್ರಿಂಗರ್ ಸಹಾಯಕ ಪೋಲೀಸ್ ಅಧಿಕಾರಿಯ ಹುದ್ದೆ ಸೇರಿದ!
(*) ಇಬ್ಬರಿಗೂ ಸಮಾನ ರೂಪದ ಗಣಿತ ಹಾಗೂ ಮರಗೆಲಸದ ಕೌಶಲ್ಯಗಳಿದ್ದವು!
(*) ಇಬ್ಬರಿಗೂ ಕಾಗುಣಿತ(Spelling)ವೆಂದರೆ ಆಗುತ್ತಿರಲಿಲ್ಲ!
(*) ಇಬ್ಬರೂ ತೆಳುನೀಲಿ ಬಣ್ಣದ ಶೆವಿ (Chevy) ಕಾರುಗಳನ್ನೇ ಕೊಂಡರು!
(*) ಇಬ್ಬರೂ ಫ್ಲೋರಿಡಾದ ಪಾಸ್ ಗ್ರಿಲ್ ಬೀಚಿನಲ್ಲಿ ರಜಾದಿನಗಳನ್ನು ಕಳೆಯಲು ಇಷ್ಟಪಡುತ್ತಿದ್ದರು!
(*) ಇಬ್ಬರೂ Miller Lite ಹಾಗೂ Salem ಸಿಗರೇಟುಗಳನ್ನೇ ಸೇದುತ್ತಿದ್ದರು!
(*) ಇಬ್ಬರಿಗೂ ಉಗುರು ಕಚ್ಚುವ ಅಭ್ಯಾಸವಿತ್ತು!
(*) ಇಬ್ಬರಿಗೂ ತಮ್ಮ ಹೆಂಡತಿಯರಿಗಾಗಿ ಮನೆಯಲ್ಲೆಲ್ಲೆಲ್ಲೋ love notes ಇಡುವುದೆಂದರೆ ಇಷ್ಟವಿತ್ತು!
(*) ಇಬ್ಬರಿಗೂ ಮೈಗ್ರೇನ್ ಕಾಡುತ್ತಿತ್ತು!
(*) ಇಬ್ಬರಿಗೂ ಅಧಿಕ ರಕ್ತದೊತ್ತಡವಿತ್ತು!
(*) ಇಬ್ಬರ ಬ್ರೈನ್ ವೇವ್’ಗಳೂ ಒಂದೇ ರೀತಿಯ ಆಕಾರದಲ್ಲಿದ್ದವು!
(*) ಇಬ್ಬರ ಹೆಂಡತಿಯರ ಹೆಸರೂ ಲಿಂಡಾ ಎಂದಾಗಿತ್ತು!
(*) ಇಬ್ಬರೂ ತಂತಮ್ಮ ಮಕ್ಕಳಿಗೆ ಜೇಮ್ಸ್ ಅಲನ್ ಎಂದು ಹೆಸರಿಟ್ಟಿದ್ದರು. ಒಬ್ಬನ ಹೆಸರು James Alan ಎಂದಿದ್ದರೆ ಮತ್ತೊಬ್ಬನ ಹೆಸರು James Allan ಎಂದಾಗಿತ್ತು!
(*) ಇಬ್ಬರೂ ವಿವಾಹ ವಿಚ್ಚೇದನಕ್ಕೊಳಗಾದರು!
(*) ಇಬ್ಬರ ಎರಡನೆಯ ಹೆಂಡತಿಯರ ಹೆಸರೂ ಬೆಟ್ಟಿ (Betty) ಎಂದಾಗಿತ್ತು!
(*) ಇಬ್ಬರೂ ತಮ್ಮ ನಾಯಿಗಳಿಗೆ ಟಾಯ್ (Toy) ಎಂದು ಹೆಸರಿಟ್ಟಿದ್ದರು!

ಇವಿಷ್ಟೇ ಅಲ್ಲದೆ, ಆಗಾಗ ಇಬ್ಬರಿಗೂ ‘ಏಕೋ ನಾನು ಖಾಲಿ ಖಾಲಿ. ನಾನು ಪೂರ್ತಿಯಲ್ಲ’ ಎಂಬ ಭಾವನೆ ಕಾರಣವೇ ಇಲ್ಲದೆ ಆಗಾಗ ಕಾಡುತ್ತಿತ್ತಂತೆ. ಇಬ್ಬರು ಜಿಮ್’ಗಳ ಪೋಷಕರೂ ಈ ಅವಳಿಗಳ ಹೆತ್ತಮ್ಮನನ್ನು ನೋಡಿರಲಿಲ್ಲ. ಆ ಪುಣ್ಯಾತಿಗಿತ್ತಿ 15ನೇ ವಯಸ್ಸಿನಲ್ಲಿಯೇ, ಮದುವೆಯಾಗದೆ ಗರ್ಭವತಿಯಾಗಿದ್ದರಿಂದ, ಪ್ರಸೂತಿಯ ನಂತರ, ಮಕ್ಕಳನ್ನು, ಚರ್ಚೊಂದು ನಡೆಸುವ ಅನಾಥಾಲಯದಲ್ಲಿ ಬಿಟ್ಟು ಹೋಗಿದ್ದಳು. ಇಬ್ಬರು ಪೋಷಕರೂ ಈ ಮಕ್ಕಳನ್ನು 3 ವಾರಗಳ ವ್ಯತ್ಯಾಸದಲ್ಲಿ ಅಲ್ಲಿಂದ ದತ್ತುತೆಗೆದುಕೊಂಡರು. ದತ್ತುತೆಗೆದುಕೊಳ್ಳುವಾಗ ಎರಡೂ ಪೋಷಕರಿಗೆ ‘ಈ ಮಗುವಿಗೆ ಇನ್ನೊಂದು ಅವಳಿ ತಮ್ಮ ಹುಟ್ಟಿದ್ದ. ಆದರೆ ಹುಟ್ಟಿದ ಕೆಲಗಂಟೆಗಳಲ್ಲೇ ಆ ಮಗು ತೀರಿಕೊಂಡಿತು’ ಎಂದು ಹೇಳಲಾಗಿತ್ತು. ಜಿಮ್ ಲೆವಿಸ್ಸನ ಅಮ್ಮ ಆತ ಹದಿನಾರು ತಿಂಗಳ ಮಗುವಾಗಿದ್ದಾಗ, ಕೋರ್ಟಿನಲ್ಲಿ ದತ್ತಿನ ಕಾಗದ ಪತ್ರಗಳಿಗೆ ಸಂಬಂಧಿಸಿದಂತೆ ಏನೋ ಕೆಲಸಕ್ಕೆ ಹೋಗಿದ್ದಾಗ, ಅಲ್ಲಿದ್ದ ಕ್ಲರ್ಕ್ ಯಾರೊಂದಿಗೋ ಮಾತಾನಾಡುತ್ತ ‘ಹೇಯ್! ನಿನಗ್ಗೊತ್ತಾ. ಆ ಇನ್ನೊಂದು ಮಗುವಿಗೂ ಜಿಮ್ ಎಂದೇ ಹೆಸರಿಟ್ಟಿದ್ದಾರೆ’ ಎಂದು ಪಿಸುಗುಟ್ಟಿದ್ದ. ಜಿಮ್’ನ ಅಮ್ಮ, ಅದನ್ನು ಕೇಳಿಸಿಕೊಂಡರೂ ಅದರ ಬೆಗ್ಗೆ ಹೆಚ್ಚಿನ ಗಮನವನ್ನೇ ಕೊಡಲಿಲ್ಲ. ‘ಆ ಮಾತಿಗೆ ಗಮನ ಕೊಟ್ಟು, ಇನ್ನೂ ಕೆದಕಿ ಆ ಮಗುವನ್ನು ಹುಡುಕಿದ್ದರೂ ಸಹ ನಮ್ಮ ಕೈಲಿ ಎರಡು ಮಕ್ಕಳನ್ನು ಸಾಕಲು ಸಾಧ್ಯವಾಗುತ್ತಿರಲಿಲ್ಲ ಬಿಡಿ. ಆದರೆ ಜಿಮ್ ಖುಷಿಯಾಗಿ ತನ್ನ ತಮ್ಮನೊಂದಿಗೇ ಬೆಳೆಯುವ ಅವಕಾಶ ಮಿಸ್ ಮಾಡ್ಕೊಂಡ್ಬಿಟ್ಟ ಪಾಪ’ ಎಂದು ಸಂದರ್ಶನವೊಂದರಲ್ಲಿ ಆಕೆ ಹೇಳಿದಳು.

ಮೂವತ್ತೇಳು ವರ್ಷಗಳ ನಂತರ ಇದ್ದಕ್ಕಿದ್ದಂತೆ ಜಿಮ್ ಲೆವಿಸ್’ನ ಅಮ್ಮನಿಗೆ ಆ ಕ್ಲರ್ಕಿನ ಮಾತು ಯಾಕೋ ನೆನಪಾಯಿತು. ಅದೇನಾದರೂ ನಿಜವಿರಬಹುದೇ ಎಂದು ತಿಳಿಯುವ ಕುತೂಹಲ ಆಕೆಗೆ ಕೊರೆಯಲು ಪ್ರಾರಂಭವಾಯಿತು (ಯಾಕೆ ಆ ಯೋಚನೆ ಬಂತು, ಅದೇಕೆ ಕಾಡಲು ಪ್ರಾರಂಭಿಸಿತು ಎಂದು ನನಗೇ ಗೊತ್ತಿಲ್ಲ ಎಂದು ಆಕೆ ಹೇಳುತ್ತಾಳೆ!). ಮಗನಿಗೆ ಈ ಕಥೆಯನ್ನು ಹೇಳಿ, ತನ್ನ ಸಹೋದರನನ್ನು ಹುಡುಕುವಂತೆ ಪ್ರೇರೇಪಿಸಿದಳು. ಮೊದಲಿಗೆ ನಿರಾಕರಿಸಿದ, ಬಹಳಷ್ಟು ಬಾರಿ, ಮತ್ತೆ ಮತ್ತೆ ಹೇಳಿದ ನಂತರ, 1978ರ ಥ್ಯಾಂಕ್ಸ್-ಗಿವಿಂಗ್ ಹಬ್ಬದ ದಿನ ಅಮ್ಮನ ಮಾತು ಕೇಳಲು ನಿರ್ಧರಿಸಿದ ಜಿಮ್ ಲೆವಿಸ್ ತನ್ನ ಪ್ರಯತ್ನವನ್ನು ಪ್ರಾರಂಭಿಸಿದ. ಎಲ್ಲಿಂದ ಹುಡುಕುವುದು!? ತನ್ನನ್ನು ದತ್ತುಕೊಟ್ಟ ಅನಾಥಾಲಯಕ್ಕೆ ಹೋಗಿ ಹೇಳಿದರೆ, ಅವರು ‘ಕಾನೂನಿನ ಪ್ರಕಾರ ನಾವು ಆ ವಿವರಗಳನ್ನು ನೀಡುವಂತಿಲ್ಲ. ಕೋರ್ಟ್ ಆದೇಶ ಬೇಕು’ ಎಂದರು. ದೃತಿಗೆಡದ ಜಿಮ್ ತನ್ನ ದತ್ತು ಕಾಗದಗಳನ್ನು ನಿರ್ಧರಿಸಿದ ಪ್ರೊಬೇಟ್ ನ್ಯಾಯಾಲಯದ ಮೊರೆಹೋದ. ಆ ಕೋರ್ಟ್, ಅನಾಥಾಲಯವನ್ನು ಸಂಪರ್ಕಿಸಿ, ಆ ಇನ್ನೊಬ್ಬ ಜಿಮ್’ನ ವಿಳಾಸ ಹುಡುಕಿಕೊಡುವಂತೆ ಹೇಳಿತು. ಜಿಮ್ ಲೆವಿಸ್’ನ ಮಾತಿನಲ್ಲೇ ಹೇಳುವುದಾದರೆ ‘ಒಂದು ದಿನ ನಾನು ಕೆಲಸ ಮುಗಿಸಿ ಮನೆಗೆ ಬಂದೆ. ಊಟದ ಟೇಬಲ್ ಮೇಲೆ ಒಂದು ಕಾಗದದಲ್ಲಿ “ಜಿಮ್ ಸ್ಪ್ರಿಂಗರ್’ನನ್ನು ಸಂಪರ್ಕಿಸಿ” ಎಂಬ ಬರಹದಡಿ ಒಂದು ಫೋನ್ ನಂಬರ್ ಇತ್ತು. ತಕ್ಷಣ ಫೋನಾಯಿಸಿದೆ. ನನಗೆ ಹಲೋ ಹೇಳುವಷ್ಟೂ ಉಸಿರು ಹೊರಡಲಿಲ್ಲ. ಏನು ಹೇಳಬೇಕೆಂದೇ ತಿಳಿಯದೇ ‘ನೀನೇನಾ ನನ್ನ ತಮ್ಮ?’ಎಂದಷ್ಟೇ ಕೇಳಿದೆ. ಆ ಕಡೆಯಿಂದ ‘ಹೌದು’ ಎಂದಷ್ಟೇ ಉತ್ತರಬಂತು. ಇಬ್ಬರೂ ತುಂಬಾ ಹೊತ್ತು ಏನೂ ಮಾತನಾಡದೇ, ಫೋನ್-ಲೈನು ನಿಶಬ್ದವಾಗಿತ್ತು. ನಾನು ಹಲ್ಲು ಕಚ್ಚಿಹಿಡಿದು ಅಳುತ್ತಿದ್ದೆ. ಹೆಚ್ಚೇನೂ ಮಾತನಾಡದೇ ಉಕ್ಕಿಬರುತ್ತಿದ್ದ ಅಳು ತಡೆಹಿಡಿದು ಆತನ ಆಡ್ರೆಸ್ ಕೇಳಿ ಬರೆದುಕೊಂಡೆ. ನಾನಿದ್ದ ಜಾಗಕ್ಕೆ ಪಶ್ಚಿಮದಲ್ಲಿ ನಾಲ್ಕುನೂರಮೂವತ್ತೈದು ಕಿಲೋಮೀಟರ್ ದೂರದಲ್ಲಿದ್ದ ಊರಿಗೆ ಕಾರು ಓಡಿಸಿಕೊಂಡೇ ಹೋದೆ. ಫೆಬ್ರವರಿ 9, 1978ರಂದು ಅಲ್ಲಿ ತಲುಪಿದಾಗ ಸಿಕ್ಕ ಸ್ವಾಗತ ಮರೆಯಲಾರದ್ದು. ಅವತ್ತು ಫೋನ್ ಕೆಳಗಿಟ್ಟಾಗ ಅಳಲು ಶುರುಮಾಡಿದ ಜಿಮ್ ಸ್ಪ್ರಿಂಗರ್, ಅದನ್ನು ಇನ್ನೂ ಜಾರಿಯಲ್ಲಿಟ್ಟಿದ್ದ. ತುಂಬಾ ಭಾವನಾತ್ಮಕವಾದ ಭೇಟಿಯಾಗಿತ್ತು ಅದು. ಅವನೊಂದಿಗೆ ಮಾತನಾಡುತ್ತಾ ಹೊರಟಾಗ, ಇಷ್ಟು ದಿನ ನಾನೊಬ್ಬ ಸಾಮಾನ್ಯ ಮನುಷ್ಯನೆಂದುಕೊಂಡಿದ್ದ ನನಗೆ ಇಂತಾ ಅಸಾಮಾನ್ಯ ಗತಕಾಲವೊಂದಿರಬಹುದೆಂದು ನಂಬಲೂ ಸಾಧ್ಯವಾಗಲಿಲ್ಲ!’

ಈ ವಿಷಯ ತಿಳಿದ ಥಾಮಸ್ ಬೌಚಾರ್ಡ್, ಒಂದು ವಾರದ ಕಾಲಕ್ಕೆ ಮಿನಿಯಾಪೊಲೀಸ್’ಗೆ ಬರಲು ಹಾಗೂ ಅಲ್ಲಿ ತಂಗಲು ಬೇಕಾಗುವ ಎಲ್ಲಾ ಖರ್ಚನ್ನು ವಹಿಸಿಕೊಂಡು, ಇಬ್ಬರೂ ಸಹೋದರರನ್ನು ತನ್ನ ಪ್ರಯೋಗಾಲಕ್ಕೆ ಕರೆಸಿಕೊಂಡು, ವ್ಯಾಪಕವಾದ ದೈಹಿಕ ಹಾಗೂ ಮಾನಸಿಕ ಪರೀಕ್ಷೆಗಳನ್ನು ನಡೆಸಿದ. ವಿಷಯ ಮಾಧ್ಯಮಗಳಿಗೆ ತಿಳಿದು, ಇವರಿಬ್ಬರೂ ಮಾಧ್ಯಮಪ್ರಚಾರಗಳಿಂದ ಗಾಬರಿಗೊಂಡು ಅವರ ಹೇಳಿಕೆಗಳೆಲ್ಲಾ ‘ಕಲುಷಿತ’ಗೊಳ್ಳುವ ಮೊದಲೇ ಥಾಮಸ್ ಸಾಧ್ಯವಾದಷ್ಟು ವಸ್ತುನಿಷ್ಟ ಹಾಗೂ ವೈಜ್ಞಾನಿಕ ಅಧ್ಯಯನಗಳನ್ನು ನಡೆಸಬಯಸಿದ್ದ. ಇದೇನೂ ಜಗತ್ತಿನ ಮೊದಲ ಅವಳಿಗಳ ಪುನರ್ಮಿಲನದ ಪ್ರಕರಣವೇನೂ ಆಗಿರಲಿಲ್ಲ. ವಿಶ್ವಾದ್ಯಂತ ಸುಮಾರು 75 ಹಾಗೂ ಅಮೇರಿಕಾದಲ್ಲೇ 19 ಇಂತಹ ಪ್ರಕರಣಗಳು ಬೆಳಕಿಗೆ ಬಂದಿದ್ದವು. ಆದರೆ, ಆ ಎಲ್ಲಾ ಪ್ರಕರಣಗಳಿಗಿಂತ ಹೆಚ್ಚು ಕಾಲ ಈ ಅವಳಿಗಳು ಬೇರ್ಪಟ್ಟಿದ್ದರು ಹಾಗೂ ಇಬ್ಬರಲ್ಲೂ ಅಷ್ಟೂ ವರ್ಷದ ಪ್ರತ್ಯೇಕತೆ ಹಾಗೂ ಬೆಳೆದ ಪರಿಸರದ ವ್ಯತ್ಯಾಸದ ನಡುವೆಯೂ ಅಸಾಮನ್ಯ ಸಾಮ್ಯತೆಗಳಿದ್ದವು.

ಮೇಲೆ ಹೇಳಿದ ವಿವರಣೆಗಳಿಗೆ ವಿರುದ್ದವಾಗಿ ಘಟಿಸಿದ ಒಂದೇ ವ್ಯತ್ಯಾಸವೆಂದರೆ, ಫೆಬ್ರವರಿ 28, 1979ರಂದು ಜಿಮ್ ಲೆವಿಸ್, ತನ್ನ ಎರಡನೇ ಪತ್ನಿ, ಬೆಟ್ಟಿಯಿಂದ ವಿಚ್ಛೇದನ ಪಡೆದು, ಸ್ಯಾಂಡಿ ಜೇಕಬ್ಸ್ ಎಂಬ ಮಹಿಳೆಯನ್ನು ಮದುವೆಯಾದ. ಜಿಮ್ ಸ್ಪ್ರಿಂಗರ್ ಮಾತ್ರ ತನ್ನ ಎರಡನೇ ಹೆಂಡತಿ ಬೆಟ್ಟಿಯೊಂದಿಗೇ ಉಳಿದ ಜೀವನವನ್ನು (ಸುಖವಾಗಿ ಕಳೆದ ಎಂದು ಹೇಳಲು ಯಾವ ದಾಖಲೆಯೂ ಇಲ್ಲದಿದ್ದರೂ 😛 ) ಕಳೆದ. ಜಿಮ್ ಸ್ಪ್ರಿಂಗರ್ ಮತ್ತವನ ಬೆಟ್ಟಿ ಇಬ್ಬರೂ ತನ್ನ ಹೊಸದಾಗಿ ಸಿಕ್ಕ ಸಹೋದರನ ಮದುವೆಯಲ್ಲಿ ಉಪಸ್ಥಿತರಿದ್ದರು ಹಾಗೂ ಜಿಮ್ (ಸ್ಪ್ರಿಂಗರ್) ಜಿಮ್ (ಲೆವಿಸ್)ನ ‘ಬೆಸ್ಟ್ ಮ್ಯಾನ್’ ಆಗಿ ಸೇವೆ ಸಲ್ಲಿಸಿದ.

ಕೊಸರು:
“ಅವಳಿಗಳಲ್ಲಿ ಎಷ್ಟೇ ಸಾಮ್ಯತೆಯಿರಲಿ, ನಮ್ಮ ಮುಂದೆ ಅವೆಲ್ಲಾ ಗೌಣ. ನಮ್ಮನ್ನು ನೋಡಿ!! ಬೇರೆ ಬೇರೆ ಪೋಷಕರಿಗೆ ಹುಟ್ಟಿದರೂ, ಎಷ್ಟೇ ಬೇರೆ ಬೇರೆ ವಾತಾವರಣದಲ್ಲಿ ಬೆಳೆದರೂ, ಯಾವ ಪಕ್ಷಕ್ಕಾಗಿ ಕೆಲಸ ಮಾಡಿದರೂ, ಹೊಟ್ಟೆಗೇ ಏನೇ ತಿಂದರೂ, ಜಗತ್ತಿನಾದ್ಯಂತ ನಮ್ಮವರ ವರ್ತನೆ ಒಂದೇ ರೀತಿ ಇರುತ್ತದೆ” ಅಂತಾ ರಾಜಕಾರಣಿಗಳು ಶಾಸಕರ ಭವನದಲ್ಲಿ ಪ್ರಕಟಣೆ ಹೊರಡಿಸಿದ್ದಾರಂತೆ.

ದಿನಕ್ಕೊಂದು ವಿಷಯ – ೨೦

ದಿನಕ್ಕೊಂದು ವಿಷಯ – ೨೦

ಹೆಸರಲ್ಲೇನಿದೆ ಬಿಡಿ ಸ್ವಾಮಿ

ನಿಜವಾಗಿಯೂ…..ಹೆಸರಲ್ಲೇನಿದೆ!? ಬರೀ ಅಕ್ಷರಗಳು ಅಂತಾ ಜೋಕ್ ಮಾಡ್ಬೇಡಿ. ಎಷ್ಟೋ ಸಲ ಮನುಷ್ಯನಿಗಿಂತಾ ಅವನ ಹೆಸರೇ ಮುಖ್ಯವಾಗುತ್ತೆ. ಅದಕ್ಕೇ ಅಲ್ವೇ, ಮನುಷ್ಯ ಸತ್ತಮೇಲೂ ಅವನ ಕೆಲಸಗಳಿಂದಾಗಿ ಹೆಸರು ಮಾತ್ರ ಉಳಿಯುವುದು? ಕೆಲವೊಮ್ಮೆ ಮಾಡಿದ ಕೆಲಸ ಕೂಡ ಅಳಿದು ಹೋದಮೇಲೂ ಹೆಸರು ಮಾತ್ರ ಹಾಗೇ ಉಳಿಯುತ್ತೆ (ಉದಾ: ಅಲೆಕ್ಸಾಂಡರ್). ಎಲ್ಲಾ ನಾಯಿಗಳೂ ಒಂದೇ ಆದ್ರೂ ಸಹ ಕೆಲವರು ಟೈಗರ್ ಅಂತಲೂ ಕೆಲವರು ಪಿಂಕಿ ಅಂತಲೂ ಹೆಸರಿಡ್ತಾರೆ. ಯಾಕೆಂದರೆ ಒಂದು ಜೀವಿಗೆ ಅಸ್ಮಿತೆ ಕೊಡುವುದರಲ್ಲಿ ಹೆಸರಿನ ಪಾತ್ರ ಬಹುಮುಖ್ಯ.

ಹೆಸರು ಎನ್ನುವ ಕಲ್ಪನೆ ಯಾವಾಗಲಿಂದ ಪ್ರಾರಂಭವಾಯ್ತು ಎನ್ನುವುದು ಇಂದಿಗೂ ಒಂದು ಕುತೂಹಲಭರಿತ ವಿಷಯ. ನಮ್ಮೆಲ್ಲಾ ದಾಖಲೀಕೃತ ಚರಿತ್ರೆ ಹಾಗೂ ದಾಖಾಲಾಗದ ಪುರಾಣಗಳು ಬರುವ ಕಾಲಕ್ಕಾಗಲೇ ಹೆಸರಿಡುವ ಸಂಪ್ರದಾಯ ಪ್ರಾರಂಭವಾಗಿತ್ತು. ಮಾನವಶಾಸ್ತ್ರಜ್ಞರ ಪ್ರಕಾರ ಭೂಮಿಯ ಮೇಲೆ ಜನಿಸಿದ ಮೊದಲ ಮನುಷ್ಯರು ಒಬ್ಬರನ್ನೊಬ್ಬರು ಬೇಟಿಯಾದಾಗ, ಒಬ್ಬರನ್ನೊಬ್ಬರು ಗುರುತಿಸಲು ಹೆಸರು, ಹಚ್ಚೆ, ಸಂಖ್ಯೆ ಇವೆಲ್ಲವನ್ನೂ ಕಂಡುಹಿಡಿದರು ಎಂದು ಹೇಳುತ್ತಾರೆ.

ಸಾವಿರಾರು ವರ್ಷದ ನಂತರ ನಾವೀಗ ಎಲ್ಲಿಗೆ ಬಂದು ನಿಂತಿದ್ದೇವೆ ಎಂದರೆ, ಹೆಸರೇ ಎಲ್ಲವೂ ಆಗಿದೆ. ಮಾಡುವ ಕೆಲಸ ಏನು ಬೇಕಾದರೂ ಆಗಲಿ ಇನ್ಫೋಸಿಸ್, ವಿಪ್ರೋ, ಟಾಟಾ, ಕಿಂಗ್ಫಿಷರ್ ಎಂಬ ಹೆಸರಿನ ಕಂಪನಿಗಳಲ್ಲಿ ಕೆಲಸ ಬೇಕಾಗಿದೆ. ಕುಡಿಯುವುದು ವಿಸ್ಕಿಯೇ ಆಗಿದ್ದರೂ ಜಾಕ್ ಡೇನಿಯಲ್ಲೇ ಬೇಕು, ಜಾನಿ ವಾಕರ್ರೇ ಬೇಕು. ಸೇದುವುದು ಅದೇ ಅನಿಷ್ಟ ಹೊಗೆಯಾದರೂ ಗೋಲ್ಡ್ ಫ್ಲೇಕ್, ವಿಲ್ಸ್ ಎನ್ನುವ ಹೆಸರಿನದ್ದೇ ಆಗಬೇಕು. ನಮ್ಮ ಅಜ್ಜಿಯಂತೂ ತಿನ್ನೋದು ಅದೇ ಕಾಂಪೋಸಿಶನ್ ಮಾತ್ರೆಯಾದರೂ ಅವರಿಗೆ ಬಿ.ಪಿ ಇಳಿಸಲು Diamox ಮಾತ್ರೇನೇ ಆಗ್ಬೇಕು. ಅವರಿಗೆ ಎಷ್ಟು ಅರ್ಥ ಮಾಡಿಸಿದ್ರೂ ಬೇರೆ ಮಾತ್ರೆ ತಿನ್ನೊಲ್ಲ. ಹಾಗಾಗಿ ಹೆಸರಲ್ಲೇನಿದೆ ಸ್ವಾಮಿ ಅನ್ಬೇಡಿ. ತುಂಬಾನೇ ಇದೆ

ಆದರೆ ಮನುಷ್ಯರ ವಿಷಯಕ್ಕೆ ಬಂದ್ರೆ ಇಲ್ಲಿ ತಮಾಷೆಯ ದೊಡ್ಡ ಪಟ್ಟಿಯೇ ಇದೆ. ನಮ್ಮಜ್ಜಿ ಹೆಸರು ಶಾರದ ಅಂತಾ, ಆದ್ರೆ ಓದೋಕೆ ಒಂದಕ್ಷರಾನೂ ಬರಲ್ಲ! ನುಡ್ಸೋದು ಹೋಗ್ಲಿ, ವೀಣೇನ ಕೈಯಲ್ಲಿ ಹಿಡಿಯೋಕೂ ಬರಲ್ಲ! ಅಜೇಯ ಅಂತಾ ಹೆಸರಿಟ್ಟುಕೊಂಡು ಓಡೋ ರೇಸಿನಲ್ಲೆಲ್ಲಾ ಸೋಲುವ ನನ್ನ ದೋಸ್ತ್ ಒಬ್ಬ ಇದ್ದಾನೆ. ಹೆಸರು ಸಿದ್ರಾಮ, ಕೆಲಸಕ್ಕೆ ಕರೆದ್ರೆ….ಏಯ್ ಹೋಗಪ್ಪಾ ಅನ್ನೋ ಜನರನ್ನ ನಾವು ನೋಡಿಲ್ವಾ? ಶಕ್ತಿ ಅಂತಾ ಹೆಸರಿಟ್ಟುಕೊಂಡು, ಐದು ಕೇಜಿ ಅಕ್ಕಿ ಮೂಟೆ ಎತ್ತುವಷ್ಟರಲ್ಲಿ ಸುಸ್ತು ಆಗೋರನ್ನ ನಾವು ನೊಡಿಲ್ವಾ!?

ಆದರೆ ಇವತ್ತಿನ ವಿಷಯ, ಊರಿನ ಹೆಸರುಗಳು. ಆದರೆ ಅಂತಿಂತಾ ಹೆಸರುಗಳಲ್ಲ. ತಮಾಷೆಯ ಹೆಸರುಗಳು. ನಮ್ಮಲ್ಲೇನೋ ‘ಮರಿದುಂಬಿಯಾಗಿ ಮೇಣ್ ಕೋಗಿಲೆಯಾಗಿ ಪುಟ್ಟುವುದು ನಂದನದೊಳ್ ಬನವಾಸಿ ದೇಶದೊಳ್’ ಎಂದು ನಮ್ಮ ಆದಿಕವಿ ಪಂಪ ಹೆಮ್ಮೆಯಿಂದ ಹೇಳಿಕೊಂಡ. ಆದರೆ ಎಲ್ಲರೂ ಹಾಗಿರೋಲ್ಲ. ಅವರ ದೇಶವೂ ಬಹುಷಃ ಹಾಗಿರೊಲ್ಲ ಅನ್ಸುತ್ತೆ. ಅದಕ್ಕೇ ನೋಡಿ ಯು.ಎಸ್.ಎ.ನಲ್ಲಿ ಓರೆಗಾಂವ್ ಎಂಬ ರಾಜ್ಯದಲ್ಲಿ ಒಂದು ಊರಿನ ಹೆಸರು ‘ಡಲ್ (Dull)’ (ಚಿತ್ರ 1) ಅಂತಾ ಇಟ್ಟುಬಿಟ್ಟಿದ್ದಾರೆ. ಇದಕ್ಕೆ ಸರಿಯಾಗಿ, ಇವರ ಪಕ್ಕದ ಊರಿನವರೂ ಸಹ ನಾವೀನೂ ಕಮ್ಮಿ ಇಲ್ಲ, ಅಂತಾ ತೋರಿಸೋಕೆ ಅವರ ಊರಿಗೆ ‘ಬೋರಿಂಗ್ (Boring)’ (ಚಿತ್ರ 2) ಅಂತಾ ಹೆಸರಿಟ್ಟಿದ್ದಾರೆ. ಜೀವನದಲ್ಲಿ ಅದೇನೋ ಜಿಗುಪ್ಸೆಯೋ ಈ ಜನರಿಗೆ, ಇವರಿಬ್ರೂ ಸೇರ್ಕೋಂಡು ಪ್ರತೀವರ್ಷದ ಆಗಸ್ಟ್ 9ರಂದು ‘ಡಲ್ ಹಾಗೂ ಬೋರಿಂಗ್ ದಿನ (Dull & Boring Day)’ ಅಂತಾ ಆಚರಿಸುತ್ತಾರಂತೆ!! ಅವತ್ತು ನಡೆಯುವ ಕಾರ್ಯಕ್ರಮಗಳು ಅಷ್ಟೇನೂ ಆಸಕ್ತಿದಾಯಕವಾಗಿರಲಿಕ್ಕಿಲ್ಲ UKಯಲ್ಲಿ ಸಹಾ ಡಲ್ ಎನ್ನುವ ಇನ್ನೊಂದು ಸಣ್ಣ ಊರಿದೆ! ಈ ಡಲ್ ಮತ್ತು ಬೋರಿಂಗಿಗೆ ಸ್ಪರ್ಧೆಯೊಡ್ದಲು ನಿರ್ಧರಿಸಿದ ಆಸ್ಟ್ರೇಲಿಯನ್ನರು ತಮ್ಮದೊಂದು ಊರಿಗೆ ‘ಬ್ಲಾಂಡ್(Bland = ಸಪ್ಪೆ)’ (ಚಿತ್ರ 3) ಎಂದು ಹೆಸರಿಟ್ಟಿದ್ದಾರೆ!!

ಅಮೇರಿಕಾದಲ್ಲಿ ಮತ್ತು ಯೂರೋಪಿನ ಬಹಳಷ್ಟು ದೇಶಗಳಲ್ಲಿ ಇಂತಹುದೇ ತಮಾಷೆಯ ಹೆಸರಿಗೇನೋ ಕಮ್ಮಿಯಿಲ್ಲ. ಯಾರೋ ಪುಣ್ಯಾತ್ಮ ‘ಸ್ವರ್ಗ ಮತ್ತು ನರಕ ಮೇಲೆಲ್ಲೋ ಇಲ್ಲ….ಇಲ್ಲೇ ಇವೆ..ಈ ಭೂಮಿಯಲ್ಲಿಯೇ ಇವೆ’ ಅಂತಾ ಹೇಳಿದ್ದನ್ನ ಸೀರಿಯಸ್ಸಾಗಿ ತಗೊಂಡ್ರೋ ಏನೋ, ಒಂದೂರಿಗೆ ‘ಹೆಲ್ (Hell)’ (ಚಿತ್ರ 4a ಮತ್ತು 4b) ಅಂತಾನೇ ಹೆಸರಿಟ್ಟಿದ್ದಾರೆ. ‘ಹೆವನ್ (Heaven)’ ಎನ್ನುವ ನಗರ ಇದೆ ಎಂದು ಕೇಳಲ್ಪಟ್ಟಿದ್ದೇನಾದರೂ, ಇದುವರೆಗೂ ಅದನ್ನು ನಿರೂಪಿಸುವ ಚಿತ್ರಗಳ್ಯಾವುದೂ ಇನ್ನೂ ಕಂಡುಬಂದಿಲ್ಲ. ಅಲ್ಲಿಯವರೆಗೆ ಸ್ವರ್ಗವನ್ನು ಹುಡುಕುತ್ತಲೇ ಇರಬೇಕು.

ಇಲ್ಲೊಂದು ತಮಾಷೆ ನೋಡಿ. ಇಲ್ಲದೇ ಇರುವುದು ಇರಲು ಸಾಧ್ಯವಿದೆಯೇ!? ಹೌದು ಸ್ವಾಮಿ, ಊರಿನ ಹೆಸರಿನಲ್ಲಿ ಸಾಧ್ಯವಿದೆ ಬ್ರಿಟೀಷರು ಈ ವಿಚಿತ್ರದ ಹಿಂದೆ ತಮ್ಮ ಕೈವಾಡ ತೋರಿಸಿದ್ದಾರೆ. ಡರ್ಹಮ್ (Durham) ಇಂಗ್ಲೆಂಡಿನ ಒಂದು ಕಂಟಿ. ಅಲ್ಲೊಂದು ಊರಿನ ಹೆಸರು ‘ನೋ ಪ್ಲ್ಲೇಸ್ (No Place)’!!!! (ಚಿತ್ರ 5). ಒಮ್ಮೆ ಬೀಚಿಯವರ ಒಂದು ಲಲಿತಪ್ರಬಂಧದಲ್ಲಿ, ಅವರು ಮಲ್ಲೇಶ್ವರಂನಲ್ಲಿ ನಡೆಯುತ್ತಿರುವಾಗ ‘ಸೌಂದರ್ಯ ವಿಲ್ಲಾ (Soundarya Villa)’ ಎಂಬ ಮನೆಯ ಹೆಸರಿನಲ್ಲಿ, ಮಧ್ಯದ ಖಾಲಿಜಾಗ ತುಂಬಾ ಸಣ್ಣಗಿದ್ದರಿಂದ ಅದು ‘ಸೌಂದರ್ಯವಿಲ್ಲಾ’ ಎಂದು ಕಂಡಿದಕ್ಕೂ, ಅಷ್ಟೇನೂ ಸುಂದರವಿಲ್ಲದ ಆ ಮನೆಯೊಡತಿ, ಅಲ್ಲೇ ಮನೆಯ ಮುಂದೆ ನಿಂತಿದ್ದಕ್ಕೂ ಸಂಬಂದಕಲ್ಪಿಸಿದ ಬೀಚಿಯವರು ‘ಸೌಂದರ್ಯವಿಲ್ಲದಿದ್ದರೆ ಪರವಾಗಿಲ್ಲ. ಆದರೆ ಅದನ್ನು ಬೋರ್ಡು ಹಾಕಿ ಇಷ್ಟು ರಾಜಾರೋಷವಾಗಿ ಹೇಳಿಕೊಳ್ಳುವುದ್ಯಾಕೆ?’ ಎಂದು ಹೇಳಿದ್ದು ನೆನಪಾಯ್ತು. ಬಹುಷಃ ಈ ಊರಿನಲ್ಲೂ ಹೊಸಬರಿಗೆ ಮನೆ ಕಟ್ಟಲು ಜಾಗವಿಲ್ಲವೆಂದು ತಿಳಿಸಲು ‘No Place=ಜಾಗವಿಲ್ಲಾ’ ಅಂತೇನಾದ್ರೂ ಹೆಸರಿಟ್ಟಬಹುದೇ!?

ಬ್ರಿಟೀಷರು ಇಂತಾ ಕೆಲಸ ಮಾಡಿದ ಮೇಲೆ ಅಮೇರಿಕನ್ನರು ಏನಾದರೂ ಕಿತಾಪತಿ ಮಾಡಲೇಬೇಕಲ್ಲ!! ಮಾಡಿದ್ದಾರೆ ಇಲ್ಲಿ ನೋಡಿ. ಅಮೇರಿಕೆಯಲ್ಲೊಂದು ಜಾಗದ ಹೆಸರು ‘ನೋ ನೇಮ್ (No Name)’!! (ಚಿತ್ರ 6) ಅಂದರೆ ಊರಿನ ಹೆಸರೇ ‘ಹೆಸರಿಲ್ಲ’ ಅನ್ನುವಂತಾಗಿದೆ!!! ಈ ಊರಿನ ಸುತ್ತಮುತ್ತ ಓಡಾಡೋ ಬಸ್ಸಿನ ಕಂಡಕ್ಟರುಗಳಿಗೆ ಭಯಂಕರ ತಲೆಬಿಸಿ ಅಲ್ವಾ!? ಯಾರಾದ್ರೂ ಪ್ಯಾಸೆಂಜರ್ ‘ಹೆಸರಿಲ್ಲದ ಜಾಗಕ್ಕೆ ಒಂದು ಟಿಕೇಟ್ ಕೊಡಪ್ಪಾ’ ಎಂದರೆ, ಎಂತಾ ಕನ್ಫ್ಯೂಷನ್ ನೋಡಿ!

ಪೋಲೆಂಡಿನ ಒಂದು ಸಣ್ಣ ಊರಿಗೆ ‘ಪೋಲೀಸ್ (Police)’ (ಚಿತ್ರ 7) ಅಂತಾ ಹೆಸರಿಟ್ಟುಬಿಟ್ಟಿದ್ದಾರೆ! ಅದೇನು ಪೋಲೀಸರೇ ಇರೋ ಊರೋ, ಅಥವಾ ಕಳ್ಳರು ಬರಬಾರದೆಂಬ ಕಾರಣಕ್ಕೆ ಆ ಊರಿಗೆ ಪೋಲೀಸ್ ಅಂತಾ ಹೆಸರಿಟ್ಟಿದ್ದಾರೋ, ಇನ್ನೂ ಗೊತ್ತಾಗಿಲ್ಲ.

ನಮ್ಮ ಮಹಿಳಾವಾದಿಗಳಿಗೆಲ್ಲಾ ಸಿಟ್ಟುಬರುವಂತಹ ಕೆಲಸವನ್ನು ಅಮೇರಿಕಾದ ವರ್ಜೀನಿಯಾ ರಾಜ್ಯದ ಪುಣ್ಯಾತ್ಮರು ಮಾಡಿದ್ದಾರೆ. ಅಲ್ಲೊಂದು ಊರಿನ ಹೆಸರು ‘ಕ್ರೇಜಿ ವುಮನ್ ಕ್ರೀಕ್ (Crazy Woman Creek)’ (ಚಿತ್ರ 8). ವಿಕ್ರಮಾಧಿತ್ಯನ ಕತೆಗಳಲ್ಲಿ ಬರುವ ‘ಪ್ರಮೀಳಾ ಸಾಮ್ರಾಜ್ಯ’ ಇದೇ ಇರಬಹುದೆಂದು ನನ್ನ ಹಾಗೂ ಎಲ್ಲಾ ಪುರುಷವಾದಿಗಳ ಅನಿಸಿಕೆ.

ಇಷ್ಟೆಲ್ಲಾ Dull ಹಾಗೂ Boring ಹೆಸರುಗಳ ನಡುವೆ, ಅಲ್ಲೆಲ್ಲೋ ಒಂದು ಕಡೆ (ಅಮೇರಿಕೆಯಲ್ಲಿ) ‘ಬ್ರಿಲಿಯಂಟ್ (Brilliant)’ (ಚಿತ್ರ 9) ಎಂಬ ಸಣ್ಣ ಊರೂ ಇದೆ. ಊರಿನಲ್ಲಿರುವವರು ನಿಜವಾಗಿಯೂ ಬ್ರಿಲಿಯಂಟ್ ಹೌದೋ ಅಲ್ಲವೋ, ಆದರೆ ಊರಿಗೆ ಈ ಹೆಸರಿಟ್ಟವನಂತೂ ನಿಜವಾಗಿಯೂ ಬ್ರಿಲಿಯಂಟ್ ಅಲ್ಲವೇ!?

‘ಅಪಘಾತ ವಲಯ, ನಿಧಾನವಾಗಿ ಚಲಿಸಿ’ ಎಂಬ ಫಲಕವನ್ನು ನೀವು ನಮ್ಮ ರಸ್ತೆಗಳಲ್ಲಿ ನೋಡಿರುತ್ತೀರಿ. ಆದರೆ ಇಡೀ ಊರಿನ ಹೆಸರೇ ‘ಅಪಘಾತ’ ಅಂತಿದ್ದರೆ!! ಚಿತ್ರ 10ನ್ನು ನೋಡಿ. ಮೇರಿಲ್ಯಾಂಡಿನ ಈ ಊರಿನ ಅಕ್ಕಪಕ್ಕದಲ್ಲಿ ಕಾರು ಚಲಾಯಿಸುವಾಗ ಸ್ವಲ್ಪ ಜಾಗ್ರತೆ ಮಾರಾಯ್ರೆ

ಹಾರ್ವಡ್ ವಿದ್ಯಾಲಯದಲ್ಲಿ ಒಮ್ಮೆ ತತ್ವಶಾಸ್ತ್ರದ ಪರೀಕ್ಷೆಯಲ್ಲಿ, ನೂರು ಅಂಕಕ್ಕೆ ಒಂದೇ ಒಂದು ಪ್ರಶ್ನೆಯನ್ನು ಒಮ್ಮೆ ಕೇಳಿದ್ದರಂತೆ. ಪ್ರಶ್ನೆ ಇದ್ದದ್ದು ‘Why?’ ಎಂದಷ್ಟೇ! ಅದರಲ್ಲಿ ನೂರಕ್ಕೆ ನೂರು ಅಂಕಗಳಿಸಿದ ವಿದ್ಯಾರ್ಥಿ ಒಬ್ಬನೇ ಒಬ್ಬ. ಅವನ ಉತ್ತರ ಇದ್ದದ್ದು ಇಷ್ಟೇ ‘Why not?’ ಆ ಕಥೆ ಎಷ್ಟು ನಿಜವೋ ಗೊತ್ತಿಲ್ಲ. ಆದರೆ ‘Why’ ಮತ್ತು ‘Why Not’ ಎಂಬ ಎರಡು ಊರುಗಳಿರುವುದಂತೂ ಸತ್ಯ (ಚಿತ್ರ 11 ಮತ್ತು 12).

ಇಷ್ಟೇ ಅಲ್ಲದೆ ‘Peculiar’, ‘Wair-a-bit’, ‘Truth of consequences’, ‘Happy’, ‘Climax’ ಮುಂತಾದ ವಿಚಿತ್ರ ಹೆಸರಿನ ಊರುಗಳಿಗೆ ಈ ವಿಚಿತ್ರ ಜಗತ್ತಿನಲ್ಲೇನೂ ಬರವಿಲ್ಲ. ಪಾಶ್ಚಿಮಾತ್ಯ ದೇಶದ ನಗರಗಳಿಗೆ ಪೂರ್ವದ ದೇಶಗಳಷ್ಟು ಚರಿತ್ರೆಯಾಗಲೀ, ಪೌರಣಿಕ ಮಹತ್ವವಾಗಲೀ ಇಲ್ಲವಾದ್ದರಿಂದ, ಬಹುಷಃ ಅವರಿಗೆ ಊರಿನ ಹೆಸರಿಗೂ ಅದರ ಇತಿಹಾಸಕ್ಕೂ ಸಂಬಂಧಕಲ್ಪಿಸುವ ಅಗತ್ಯ ಕಂಡುಬರುವುದಿಲ್ಲವೆಂದೆನಿಸುತ್ತದೆ.

ಈ ಲೇಖನ, ಕೆಲ ವಿಚಿತ್ರ ಹೆಸರುಗಳನ್ನು ಪರಿಚಯಿಸುವ ಪ್ರಯತ್ನವಷ್ಟೇ. ಇಲ್ಲಿ ಬರೆಯಲಾಗದಷ್ಟು ಚಿತ್ರವಿಚಿತ್ರವಾದ ಊರಿನ ಹೆಸರುಗಳೂ ಇವೆ. ಎಲ್ಲವನ್ನೂ ಬರೆದು ಹೇಳಲು ಸಾಧ್ಯವಿಲ್ಲವಾದ್ದರಿಂದ, ಅಂತಹ ವಿಚಿತ್ರ ಊರುಗಳ ಹೆಸರುಗಳ ದೊಡ್ಡ ಪಟ್ಟಿಯೇ ಸಿಗುವ ಈ ಕೊಂಡಿಯನ್ನು ಕ್ಲಿಕ್ಕಿಸಿ ನೋಡಿhttp://bit.ly/1rONdj1

ಕೊಸರು:

ವೇಲ್ಸ್ ನಲ್ಲಿ ‘Llanfairpwllgwyngyllgogerychwyrndrobwllllantysiliogogogoch’ ಎಂಬ ‘ಸಣ್ಣ ಹೆಸರಿನ’ ಒಂದು ಸಣ್ಣ ಊರಿದೆ. ನಮ್ಮಲ್ಲಿ ಪಂಚಾಯ್ತಿ ಮೆಂಬರುಗಳು ಜಗಳಮಾಡುವಂತೆ ಅಲ್ಲಿಯೂ 2007ರಲ್ಲಿ ಅಕ್ಕಪಕ್ಕದವರು ಕಚ್ಚಾಡಿಕೊಂಡು, ಈ ಊರಿನ ಪಕ್ಕದ ಊರಿನವರು ತಮ್ಮ ಊರನ್ನು ಪ್ರಚಾರಪಡಿಸಲು ಆದಾಗಲೇ ಇದ್ದ ತಮ್ಮ ಊರಿನ Golf Halt ಎಂಬ ಚೆಂದದ ಹೆಸರು ತೆಗೆದು ಹಾಕಿ, ‘Gorsafawddachaidraigodanheddogleddollônpenrhynareurdraethceredigion’ ಎಂದು ನಾಮಕಾರಣ ಮಾಡಿದ್ದಾರೆ!!! (ಚಿತ್ರ 13) ಎಂತಾ ಕರ್ಮ ಇದು. ಈ ಊರಿಗೆ ಟಿಕೇಟ್ ತೆಗೆದುಕೊಂಡವರಿಗೆ, ಊರಿನ ಹೆಸರನ್ನು ಉಚ್ಚರಿಸುವುದು ಹೇಗೆ ಎನ್ನುವ ಒಂದು ಪುಸ್ತಕವನ್ನೂ ಕೊಡ್ತಾರೇನೋ! ಅಂದಹಾಗೆ ಯಾರಿಗಾದ್ರೂ ಈ ಊರಿನ ಹೆಸರನ್ನು ಉಚ್ಚರಿಸುವುದು ಸಾಧ್ಯವಾದ್ರೆ ತಿಳಿಸಿಕೊಡುವಂತಾರಾಗಿ.

ಆದ್ರೂ ಸಹ, ಹೆಸರಲ್ಲೇನಿದೆ ಬಿಡಿ ಸ್ವಾಮಿ

‪#‎ದಿನಕ್ಕೊಂದು_ವಿಷಯ‬, ‪#‎ಹೆಸರು‬, ‪#‎Unusual_Place_Names‬

   

ಬುದ್ಧಿಗೊಂದು ಗುದ್ದು‬ – ೨೧

ಮೊದಲನೆಯದಾಗಿ…..ಎಷ್ಟು ಬೇಕಾದ್ರೂ ಉಗೀರಿ. ಯಾಕಂದ್ರೆ ದಿನಾ ಬರೀತೀನಿ ಅಂತಾ ಕೊಚ್ಕೊಂಡು, ಆಮೇಲೆ ಪಕ್ಕಾ ರಾಜಕಾರಣಿ ಥರಾ ಮಾತು ಉಳಿಸಿಕೊಳ್ಳದೇ ಕೈಕೊಟ್ಟು ಎಸ್ಕೇಪ್ ಆಗಿದ್ದೆ. ಕೇಳಿದವರಿಗೆಲ್ಲಾ, ಇದ್ದಿದ್ದು ಇಲ್ಲದ್ದು ಕೆಲ ಸುಳ್ಳುಗಳನ್ನೂ ಹೇಳಿದ್ದೆ, ಬ್ಯುಸಿ ಇದ್ದೀನಿ, ಹುಷಾರಿಲ್ಲ ಅಂತೆಲ್ಲಾ. ನಿಜ ಹೇಳ್ಬೇಕು ಅಂದ್ರೆ ಸೋಂಬೇರಿಯಾಗಿದ್ದೆ. ಮಧ್ಯ ಮಧ್ಯ ಆಗಾಗ (ನಿಜವಾಗ್ಲೂ….ನನ್ನ ನಂಬಿ ಪ್ಲೀಸ್) ಬ್ಯುಸಿನೂ ಇದ್ದೆ ಅನ್ನಿ. ಆದ್ರೂ ಈ ಕೆಲಸದ ಒತ್ತಡ, ಸಂಜೆ ಆರಕ್ಕೆ ಆಫೀಸ್ ಬಿಟ್ಟಮೇಲೆ ಜಿಮ್ಮು, ಕುಕ್ಕಿಂಗೂ, ತಿನ್ನಿಂಗೂ, ಅದರ ಮಧ್ಯ ಟೈಮ್ಸ್-ನೌ ಕಿರಿಚಾಟ ಕೇಳಿಂಗೂ ಅನ್ನುವಷ್ಟರಲ್ಲಿ, ನಿದ್ದೆ ಬರಿಂಗೂ 😦  ಹಾಗಾಗಿ ಬರೆಯೋಕೆ ಸಾಧ್ಯವೇ ನಾಟ್ ಆಗಿಂಗೂ. ಅದೂ ಅಲ್ದೆ, ಯಾವುದರ ಬಗ್ಗೆ ಬರೆದರೂ ಆ ವಿಷಯದ ಬಗ್ಗೆ ಚೆನ್ನಾಗಿ ರೀಸರ್ಚ್ ಮಾಡಿ ಬರೀಬೇಕು, ಜನ ಕೆಮ್ಮಗಿರಬಾರ್ದು ಅನ್ನೋ ನನ್ನ ಪಾಲಿಸಿಯನ್ನ ಪಾಲಿಸಿಕೊಂಡು ಬಂದವನು ನಾನು. ಕೆಲವೊಮ್ಮೆ ಅಂಕಣವನ್ನು ಟೈಪು ಮಾಡೋಕ್ಕಿಂತಾ ಹೆಚ್ಚು ಸಮಯ, ಸಂಶೋಧನೆಯಲ್ಲೇ ಹೊರಟು ಹೋಗುತ್ತೆ.

ನನಗ್ಗೊತ್ತು, ಈಗ ಏನೇ ಸಬೂಬು ಕೊಟ್ರೂ ಅವೆಲ್ಲಾ ಬರೇ ಸಬೂಬು ಮಾತ್ರವೇ ಅಂತಾ. ಅದಕ್ಕೇ ಇನ್ಮೇಲೆ ದಿನಕ್ಕೊಂದು ವಿಷಯ ಅಂತಾ ಹೆಡ್ಡಿಂಗು ಹಾಕ್ಕೊಂಡು, ನನ್ ಕಾಲ್ ಮೇಲೆ ನಾನೇ ಕಲ್ಲು ಎತ್ತಾಕೊಳ್ಳೋದು ಬೇಡ ಅಂತಾ ನಿರ್ಧರಿಸಿ ಇದಕ್ಕೆ “ಬುದ್ಧಿಗೊಂದು ಗುದ್ದು” ಅಂತಾ ಹೆಸರಿಡೋದು ಅಂತಾ, ನನ್ನ ನೇತೃತ್ವದಲ್ಲಿ ನಿಯುಕ್ತಿಗೊಂಡ ಏಕ ವ್ಯಕ್ತಿ ಆಯೋಗ ತೀರ್ಮಾನಿಸಿದೆ. ಆದ್ದರಿಂದ, ದಿನಕ್ಕೊಮ್ಮೆ ಬರೆಯಲಾಗದಿದ್ದರೂ, ಆಗಾಗ ಖಂಡಿತಾ ಬರೆಯುತ್ತಿರುತ್ತೇನೆ. ನಾನು ಬರೆದ ಎಲ್ಲಾ ಬರಹಗಳನ್ನೂ ಓದಿ ಲೈಕಿಸಿದ, ಕಮೆಂಟಿಸಿದ ಎಲ್ಲಾ ಓದುಗರಿಗೆ ಹಾಗೂ ನಿಲುಮೆಯ ನಿರ್ವಾಹಕ ಬಳಗಕ್ಕೆ ಪ್ರೀತಿಯ ನಮನಗಳು.

ಇವತಿನ ಗುದ್ದು ಒಂದು ಸಣ್ಣ ಇಂಗ್ಳೀಷ್ ಪಾಠ. ಈ ವಿಷಯ ಬಹಳಷ್ಟು ಜನರಿಗೆ ತಿಳಿದಿರಬಹುದು. ಆದರೂ, ಇನ್ನೊಮ್ಮೆ ಕೇಳಿಸ್ಕೊಳ್ಳಿ. ಗೊತ್ತಿಲ್ಲದವರಿಗೆ ತಿಳಿಸಿಕೊಡಿ.

ಬಹಳಷ್ಟು ಜನರಿಗೆ ಇಂಗ್ಳೀಷಿನಲ್ಲಿ discovery ಹಾಗೂ invention ಇವೆರಡೂ ಪದದ ಅರ್ಥ ತಿಳಿಯದೆ, ತಪ್ಪಾಗಿ ಬಳಸುವುದುಂಟು. ಕನ್ನಡದಲ್ಲಿ ಕಂಡುಹಿಡಿಯುವುದು ಮತ್ತು ಆವಿಷ್ಕಾರ ಎಂಬೆರಡು ಪದಗಳು ಬಳಕೆಯಲ್ಲಿದ್ದರೂ, ಆ ಪದಗಳು ಡಿಸ್ಕವರಿ ಮತ್ತು ಇನ್ವೆನ್ಶನ್ ಎಂಬ ಪದಗಳಿಗೆ ಎಲ್ಲಾ ಕಾಲದಲ್ಲೂ ಸಮಬಳಕೆಯ ಪದಗಳಾಗಿ ಬಳಕೆಯಾಗುವುದಿಲ್ಲ. ಹಾಗೂ ಇಂಗ್ಳೀಷಿನಲ್ಲಿ ಈ ಎರಡೂ ಪದಗಳಿಗೆ ಸಣ್ಣದೊಂದು ವ್ಯತ್ಯಾಸವಿದೆ. ಅದೇನೆಂದರೆ, Discovery ಎಂದರೆ, ಅದಾಗಲೇ ಅಸ್ತಿತ್ವದಲ್ಲಿದ್ದೂ ಜನರ ಕಣ್ಣಿಗೆ ಕಾಣದಿರದ ವಸ್ತು/ವಿಷಯಗಳನ್ನು ಕಂಡುಹಿಡಿದು ಪ್ರಚುರಪಡಿಸುವುದು. ಉದಾಹರಣೆಗೆ, ಕೊಲಂಬಸ್ ಅಮೇರಿಕಾವನ್ನು ಕಂಡುಹಿಡಿದದ್ದು Discovery. ರುಧರ್ಫೋರ್ಡ್ ನೂಟ್ರಾನ್ ಕಂಡುಹಿಡಿದದ್ದು ಕೂಡಾ ಡಿಸ್ಕವರಿಯೇ. ಎಚ್.ಐ.ವಿ ವೈರಸ್, ನೆಪ್ಚೂನ್ ಮತ್ತು ಪ್ಲೂಟೋ ಗ್ರಹಗಳು ಇವೆಲ್ಲವೂ ಡಿಸ್ಕವರಿಗಳೇ!

Invention ಅಂದರೆ, ಇದುವರೆಗೂ ಅಸ್ತಿತ್ವದಲ್ಲಿಲ್ಲದ ವಸ್ತುವೊಂದನ್ನು ಅಥವಾ ತಂತ್ರಜ್ಞಾನವನ್ನು ಹೊಸದಾಗಿ ಸೃಷ್ಟಿಸುವುದು ಅಥವಾ ಸಂಶ್ಲೇಷಿಸುವುದು. ಉದಾಹರಣೆಗೆ, ಮೊಬೈಲ್ ಫೋನ್ ಅನ್ನು ಡಿಸ್ಕವರ್ ಮಾಡಿದ್ದಲ್ಲ. ಇನ್ವೆನ್ಶನ್ ಮಾಡಿದ್ದು. ಕನ್ನಡದಲ್ಲಿ ಮೊಬೈಲ್ ಫೋನ್ ಅನ್ನು ಆವಿಷ್ಕರಿಸಲಾಯಿತು ಎಂದರೂ ಏನೂ ತಪ್ಪಿಲ್ಲ. ಆದರೆ ಇಂಗ್ಳೀಷಿನಲ್ಲಿ ಮೊಬೈಲ್ ಫೋನ್ ಅನ್ನು ಇನ್ವೆಂಟ್ ಮಾತ್ರ ಮಾಡಲು ಸಾಧ್ಯ 🙂  ನಾವು ಬರೆಯಲು ಉಪಯೋಗಿಸುವ ಪೆನ್, ನೀವು ಇದನ್ನು ಓದ್ತಾ ಇರೋ ಕಂಪ್ಯೂಟರ್, ಇದನ್ನು ನಾನು ಪೋಸ್ಟ್ ಮಾಡಿರೋ ಫೇಸ್ಬುಕ್ ಇವೆಲ್ಲವೂ ಇನ್ವೆನ್ಶನ್ ಗಳು.

ಮುಂದಿನ ಬಾರಿ ನೀವು ಏನನ್ನಾದರೂ ಡಿಸ್ಕವರಿ ಅಥವಾ ಇನ್ವೆನ್ಶನ್ ಮಾಡಿದಾಗ, ಈ ಮಾತು ನೆನಪಿರಲಿ.

ಕೊಸರು:

ಮೊದಲನೆಯದಾಗಿ, ‘ಕ್ರಿಸ್ಟೋಫರ್ ಕೊಲಂಬಸ್ ಅಮೇರಿಕಾವನ್ನು ಕಂಡುಹಿಡಿದನು….’ ಹೀಗಂತ ನಾವು ಆರನೇ ಕ್ಲಾಸಿನ ಸಮಾಜ ಪರಿಚಯದಲ್ಲಿ ಓದಿದ್ವಿ. ಆದರೆ ಕೊಲಂಬಸ್ ಕಂಡುಹಿಡಿದದ್ದು ವೆಸ್ಟ್ ಇಂಡೀಸ್ ಹಾಗೂ ಬಹಾಮಾಸ್ ದ್ವೀಪಗಳನ್ನಷ್ಟೇ. ಅದೂ ಕೂಡ ಪುಣ್ಯಾತ್ಮ ಆ ದ್ವೀಪಗಳು ಭಾರತಕ್ಕೆ ಸೇರಿದ ದ್ವೀಪಗಳು ಅಂತಾ ಸಿಕ್ಕಸಿಕ್ಕವರ ಹತ್ತಿರವೆಲ್ಲಾ ಜಗಳ ಮಾಡಿದ್ದ. ಅಮೇರಿಕಾದ ಮುಖ್ಯ ಭೂಭಾಗವನ್ನು ಕಂಡುಹಿಡಿದದ್ದು ಪ್ಲೋರೆಂಟೈನ್ ಮತ್ತವನ ತಂಡ ಹಾಗೂ ಅವರೆಲ್ಲರಿಗಿಂತಾ ಮುಖ್ಯವಾಗಿ ಅಮೆರಿಗೋ ವೆಸ್ಪುಸ್ಸಿ. ಅದಕ್ಕೆ ಅಮೇರಿಕಾಕ್ಕೆ ಅವನ ಹೆಸರನ್ನೇ ಇಟ್ಟಿದ್ದು! 😛  ಅದಕ್ಕೇ ಹೇಳೋದು ಜಗಳ ಮಾಡಬಾರ್ದು ಅಂತಾ 😉

ಎರಡನೆಯದಾಗಿ, ಆರ್ಯಭಟ ಸೊನ್ನೆಯನ್ನು ಕಂಡುಹಿಡಿದದ್ದು Discoveryಯಾ ಅಥವಾ Inventionನ್ನಾ ಅಂತಾ ಇನ್ನೂ ಗೊತ್ತಿಲ್ವಂತೆ 😉 🙂

ದಿನಕ್ಕೊಂದು ವಿಷಯ – ೧೬

ದಿನಕ್ಕೊಂದು ವಿಷಯ – ೧೬

ಭಾರತ ಬಾಂಗ್ಲಾದೊಳಗೋ…ಬಾಂಗ್ಲಾ ಭಾರತದೊಳಗೋ…ಬಾಂಗ್ಲಾ ಭಾರತವೆರಡೂ #51ರೊಳಗೋ!!?
ಕನಕದಾಸರ ಕೀರ್ತನೆಯಾದ ‘ನೀ ಮಾಯೆಯೊಳಗೋ, ಮಾಯೆ ನಿನ್ನೊಳಗೋ’ ಎಂಬುದು ಎಲ್ಲರಿಗೂ ಗೊತ್ತಿರುವಂತದ್ದೇ. ಈ ಕೀರ್ತನೆಯನ್ನು ಸರಿಯಾಗಿ ಕೇಳಿಸಿಕೊಂಡವರು ಖಂಡಿತಾ ಅದರಲ್ಲಿನ ತತ್ವಕ್ಕೆ ಮಾರುಹೋಗಿರುತ್ತಾರೆ. ಹಾಗೆಯೇ ‘ಚಂದ್ರಮುಖಿ-ಪ್ರಾಣಸಖಿ’ ಚಿತ್ರದ ‘ಮನಸೇ ಓ ಮನಸೇ…’ ಹಾಡು ಕೇಳಿದವರು ಖಂಡಿತಾ ಅದರಲ್ಲಿನ ದ್ವಂದ್ವ ಹಾಗೂ ಗೊಂದಲಕ್ಕೆ ಈಡಾಗಿರುತ್ತಾರೆ. ಈ ಒಂದರೊಳಗೊಂದಿರುವುದರ ಗೊಂದಲ ಎಲ್ಲಾಕಡೆಯೂ ಇರುತ್ತದೆ. ಬಹುಷಃ ಮನುಷ್ಯ ಇದ್ದಲ್ಲಿ ಗೊಂದಲಗಳು ಸಹಜ. ಬುದ್ಧಿ ಇದ್ದಲ್ಲಿ ಕೂಡಾ ಗೊಂದಲ ಸಹಜ. ಗೊಂದಲವೆನ್ನುವುದು ನಮ್ಮ ಬೆಳವಣಿಗೆಯ ಸಂಕೇತ. ಅದಿರಬೇಕು. ಆದರೆ ಅದನ್ನು ಪರಿಹರಿಸಿಕೊಳ್ಳುವ ಪ್ರಯತ್ನವೂ ಇರಬೇಕು. ಪರಿಹಾರವಿಲ್ಲದ ಗೊಂದಲವೆಂಬುದು, ಮನೆಯ ಮುಂದೆ ಬೆಳೆದ ಹಾಸುಂಬೆಯಂತೆ. ಅದರಿಂದಾಗಿ ಜಾರಿಬೀಳುವ ಅವಕಾಶಗಳೇ ಹೆಚ್ಚು.

ಈ ಗೊಂದಲಗಳಲ್ಲಿ ಹೆಚ್ಚಿನವು ಮನುಷ್ಯ ನಿರ್ಮಿತ. ದಿನನಿತ್ಯದ ಜೀವನದಲ್ಲಿ ನಾವು ನಮ್ಮ ಆಸೆ, ದುರಾಸೆಗೆ ಸಂಬಂಧಿಸಿದಂತೆ ಬಹಳಷ್ಟು ಗೊಂದಲಗಳನ್ನು ನೋಡುತ್ತೇವೆ, ಕೇಳುತ್ತೇವೆ. ಭಾರತದೊಂದಿಗೆ ಪಾಕಿಸ್ಥಾನದ, ಚೀನಾದ ಸರಹದ್ದಿನ ಗೊಂದಲ, ನಮ್ಮ ಹಾಗೂ ಪಕ್ಕದ ರಾಜ್ಯಗಳ ನೀರಿನ ಹಂಚಿಕೆ ಗೊಂದಲ, ಕೋಮು ಸೌಹಾರ್ದದವರಿಗೆ, ಮೋದಿ ಒಳ್ಳೆಯವನೋ? ಕೆಟ್ಟವನೋ? ಎಂಬ ಗೊಂದಲ ಇತ್ಯಾದಿ ಇತ್ಯಾದಿ. ಇವತ್ತಿನ ವಿಷಯ ಮನುಷ್ಯನ ದುರಾಸೆಗೆ ಸಂಬಂದಪಟ್ಟ ಇಂತಹುದೇ ಒಂದು ಗೊಂದಲದ ಸಣ್ಣ ಎಳೆ.

ತುಂಡು ಭೂಮಿಗಾಗಿ ಜಗಳಕಾಯುವವರನ್ನು ನಮ್ಮಲ್ಲಿ ಎಷ್ಟು ಜನ ನೋಡಿಲ್ಲ ಹೇಳಿ. ಈ ಭೂಮಿಯ ಜಗಳಗಳು ತಾರಕಕ್ಕೇರಿ, ಅದಕ್ಕೆ ಉತ್ತರಗಳು ಸಿಗದೇ ‘ಹೇಗಿದೆಯೋ ಹಾಗೇ ಇರಲಿ’ ಎಂಬ ಸ್ಟೇ ಆರ್ಡರುಗಳು ಬಂದ ಕಥೆಗಳನ್ನು ನೀವು ಕೇಳಿಯೇ ಇರುತ್ತೀರಿ. ಎರಡು ದೇಶಗಳ ಮಧ್ಯೆ ಇಂತಾ ಜಗಳಗಳಾದಾಗ ಇವು ಬಗೆಹರಿಯುವುದೇ ಇಲ್ಲ. ‘ಇಷ್ಟು ನನ್ನದು, ಇದಿಷ್ಟು ನಿನ್ನದು’ ಎಂದು ಗೆರೆ ಎಳೆದುಕೊಂಡು ಜಗಳಕಾಯುತ್ತಾರೆ. ಆದರೆ, ಒಬ್ಬನ ಭೂಮಿಯೊಳಗೇ, ಇನ್ನೊಬ್ಬನಿಗೆ ಸೇರಿದ ಭೂಮಿಯಿದ್ದರೆ!? ಇನ್ನೊಮ್ಮೆ ಓದಿ, ನಾನು ಒಬ್ಬನ ಭೂಮಿಯ ಪಕ್ಕ ಇನ್ನೊಬ್ಬನ ಭೂಮಿಯಿರುವುದರ ಬಗ್ಗೆ ಹೇಳುತ್ತಿಲ್ಲ. ಒಬ್ಬನ ಭೂಮಿಯ ಒಳಗೆ ಇನ್ನೊಬ್ಬನ ಭೂಮಿ…….ಹೌದು ಈ ರೀತಿಯ ಬಹಳಷ್ಟು ಜಾಗಗಳು ನಾವು ವಾಸಿಸುತ್ತಿರುವ ಈ ಜಗತ್ತಿನಲ್ಲಿ ಇವೆ. ಕನ್ನಡದಲ್ಲಿ ಬಹುಷಃ ಇದನ್ನು ‘ಅಂತಕ್ಷೇತ್ರ’ ಎಂದು ಅನುವಾದಿಸಬಹುದೇನೋ (ಯಾರಿಗಾದರೂ ಸರಿಯಾದ ಕನ್ನಡ ಪದ ಗೊತ್ತಿದ್ದಲ್ಲಿ ತಿಳಿಸಿ ಪುಣ್ಯಕಟ್ಟಿಕೊಳ್ಳಿ). ಇಂಗ್ಳೀಷಿನಲ್ಲಿ ಇವನ್ನು ಎನ್ಕ್ಲೇವ್ (enclave) ಎಂದು ಕರೆಯುತ್ತಾರೆ.

‘ಎನ್ಕ್ಲೇವ್’ನ ಅರ್ಥ ಹೀಗಿದೆ ‘ಒಂದು ರಾಜ್ಯ/ರಾಷ್ಟ್ರದ ಯಾವುದೇ ಭಾಗವನ್ನು, ಇನ್ನೊಂದು ರಾಜ್ಯ/ರಾಷ್ಟ್ರ ಸಂಪೂರ್ಣವಾಗಿ ಆವರಿಸಿಕೊಂಡಿರುವ ಪ್ರದೇಶ’. ಸಂಪೂರ್ಣವಾಗಿ ಆವರಿಸಿಕೊಳ್ಳುವುದು ಎಂದರೆ, ಆ ‘ಎನ್ಕ್ಲೇವ್’ನ ಯಾವುದೇ ಭಾಗದಿಂದ ಹೊರಹೋಗುವಾಗ ನೀವು ಇನ್ನೊಂದು ರಾಜ್ಯ/ರಾಷ್ಟ್ರ ಮೂಲಕವೇ ಹೋಗಬೇಕು. ಈ ಅಂತಕ್ಷೇತ್ರಗಳ ಲೆಕ್ಕಾಚಾರದಲ್ಲಿ ‘ಪ್ರತಿಕೂಲ ಅಂತಕ್ಷೇತ್ರ’ ಎಂಬ ಲೆಕ್ಕಾಚಾರವೂ ಇದೆ. ಪ್ರತಿಕೂಲ ಅಂತಕ್ಷೇತ್ರಎಂದರೆ ‘A ಯ ಒಳಗಿರುವ, B ಎಂಬ ಎನ್ಕ್ಲೇವಿವ ಒಳಗಿರುವ C ಎಂಬ ಎನ್ಕ್ಲೇವ್, ಹಾಗೂ ಈ C ಎನ್ಕ್ಲೇವ್ Aಗೆ ಸೇರಿದ್ದು’. ಹಾಗೆಯೇ ‘ಬಾಹ್ಯಕ್ಷೇತ್ರ’ (exclave) ಎಂಬ ಪದಬಳಕೆಯೂ ಇದೆ. ಎಕ್ಸ್ಕ್ಲೇವ್ ಎಂದರೆ ‘A ಗೆ ಸೇರಿದ, ಆದರೆ A ಯೊಂದಿಗೆ ಯಾವ ಗಡಿಯೂ ಇಲ್ಲದ, B ಎಂಬ ಇನ್ನೊಂದು ಜಾಗದ ಒಳಗಿರುವ ಪ್ರದೇಶ’. ಎನ್ಕ್ಲೇವುಗಳು ಎ‍ಕ್ಲೇವುಗಳಾಗುವುದೂ ಸಾಧ್ಯವಿದೆ. ಪೂರಾ ತಲೆಕೆಡ್ತಾ ಇದೆ ಅನ್ಸುತ್ತಾ? ಕೆಳಗಿರುವ ಚಿತ್ರ 1 ನೋಡಿ, ಎಲ್ಲವೂ ಅರ್ಥವಾಗುತ್ತೆ.

ಈ ಚಿತ್ರದಲ್ಲಿ:
(1) Aಗೆ ಮೂರು excalveಗಳಿವೆ. A1, A2 ಹಾಗೂ A3. ಇವು A ಎಂಬ ತಾಯ್ನಾಡಿನಿಂದ ಬೇರ್ಪಟ್ಟು, ಬೇರೆ ಪ್ರಾಂತ್ಯದ ಒಳಗೆ ಸೇರಿಕೊಂಡಿವೆ. Aಯೊಂದಿಗೆ ಯಾವುದೇ ಗಡಿಬಾಗ ಹೊಂದಿಕೊಂಡಿಲ್ಲ.

(2) A1 ಮತ್ತು A2 ಸಂಪೂರ್ಣವಾಗಿ exclaveಗಳು. ಆದರೆ A3 ಪ್ರದೇಶ Bಯ enclave ಕೂಡಾ ಹೌದು, ಯಾಕೆಂದರೆ ಅದು Bಯಿಂದ ಸಂಪೂರ್ಣವಾಗಿ ಸುತ್ತುವರಿಯಲ್ಪಟ್ಟಿದೆ.

(3) A ಸ್ವತಃ E ಎಂಬ enclave ಅನ್ನೂ, A4 ಮತ್ತು A5 ಎಂಬ counter-enclave ಅನ್ನೂ ಹೊಂದಿದೆ. ಇವನ್ನು ಎರಡನೇ ಕ್ರಮದ ಅಂತಕ್ಷೇತ್ರ (Second order enclave) ಎಂದೂ ಕರೆಯುತ್ತಾರೆ. ಹಾಗೂ E1 ಎಂಬ counter-counter-enclave ಅನ್ನೂ ಹೊಂದಿದೆ. E1 ಅನ್ನು ಮೂರನೇ ಕ್ರಮದ ಅಂತಕ್ಷೇತ್ರ (Third order enclave) ಎಂದು ಕರೆಯುತ್ತಾರೆ.

(4) D ಕೂಡಾ ಎಂದು enclave. D ಪ್ರಾಂತೀಯವಾಗಿ ಯಾವುದೇ ರೀತಿಯಲ್ಲಿ ವಿಭಾಗಿಸಲ್ಪಟ್ಟಿಲ್ಲವಾದ್ದರಿಂದ ಅದನ್ನು enclaved territory ಎಂದು ಕರೆಯುತ್ತಾರೆ.

ಎನ್ಕ್ಲೇವುಗಳು ಸೃಷ್ಟಿಯಾಗಲು ಜಗತ್ತಿನಾದ್ಯಂತ ಹಲವಾರು ಕಾರಣಗಳು ಇವೆ. ಸಾಂಸ್ಕೃತಿಕ, ಜನಾಂಗೀಯ, ತಾತ್ಕಾಲಿಕ ಕಾರಣಗಳಿಗಾಗಿ ಇವು ಸೃಷ್ಟಿಯಾಗಿವೆ. ಕ್ಯಾಥೋಲಿಕರ ಪುಣ್ಯಭೂಮಿ ವ್ಯಾಟಿಕನ್ ಸಹ ಒಂದು ಎನ್ಕ್ಲೇವ್. ಇಟಲಿಯ ರೋಮ್ ಪಟ್ಟಣದೊಳಗಡೆ ಇರುವ ವ್ಯಾಟಿಕನ್, ಒಂದು ಪುಟ್ಟ ದೇಶ ಕೂಡಾ ಹೌದು (ಜಗತ್ತಿನ ಅತೀ ಚಿಕ್ಕದೇಶ). ಇದೊಂದೇ ಅಲ್ಲದೆ, ಇಟಲಿ ದೇಶದ ಒಳಗೇ ಇರುವ ‘ಸ್ಯಾನ್ ಮರೀನೋ’, ಹಾಗೂ ದಕ್ಷಿಣ ಆಪ್ರಿಕಾದ ಒಳಗಿರುವ ‘ಲೆಸೋತೋ’ ಕೂಡಾ ಪ್ರಸಿದ್ಧ ‘ಎನ್ಕ್ಲೇವ್’ಗಳು. ಹಾಗೆಯೇ ಎರಡನೇ ಕ್ರಮದ ಎನ್ಕ್ಲೇವುಗಳಿಗೆ ಪ್ರಸಿದ್ಧ ಉದಾಹರಣೆಗಳು ಡಚ್ ಮುನಿಸಿಪಾಲಿಟಿಯ ಬಾರ್ಲೆ-ನಸ್ಸಾಉ ಪ್ರಾಂತ್ಯದಲ್ಲಿ ಬೆಲ್ಜಿಯಂ ಮುನಿಸಿಪಾಲಿಟಿಗೆ ಸೇರಿದ ಏಳು ಪ್ರಾಂತ್ಯಗಳು. ಎರಡನೇ ಮಹಾಯುದ್ಧದ ನಂತರ ಯೂರೋಪಿನಲ್ಲಿ ಅಸಂಖ್ಯಾತ ಅಂತಕ್ಷೇತ್ರಗಳು ಸೃಷ್ಟಿಯಾಗಿವೆ. ಇಲ್ಲೇ ನಾನಿರುವ ‘ಸಂಯುಕ್ತ ಅರಬ್ ಎಮಿರೇಟ್ಸ್’ನಲ್ಲಿರುವ ಒಮಾನಿಗೆ ಸೇರಿದ ‘ಮಧಾ’ ಪ್ರಾಂತ್ಯದೊಳಗಿರುವ ಸಂ.ಅ.ಎ.ಗೆ ಸೇರಿದ ‘ನಹ್ವಾ’ ಪ್ರಾಂತ್ಯ ಕೂಡಾ ಒಂದು ಎರಡನೇ ದರ್ಜೆಯ ಎನ್ಕ್ಲೇವ್.

ಜಗತ್ತಿನಲ್ಲಿ ಬೇಕಾದಷ್ಟು ಮೊದಲ ಕ್ರಮದ ಹಾಗೂ ಎರಡನೇ ಕ್ರಮದ ‘ಎನ್ಕ್ಲೇವ್’ಗಳಿವೆ. ಆದರೆ ಮೂರನೆ ಕ್ರಮದ ಎನ್ಕ್ಲೇವ್ ಇರುವುದು ಒಂದೇ ಒಂದು. ಅದೂ ಕೂಡಾ ನಮ್ಮ ಭಾರತದಲ್ಲೇ ಇದೆ. ಗೊತ್ತಿದೆಯಾ!!!!

ಜಮೀನ್ದಾರಿ ಪದ್ದತಿಯ ಅಡಿಯಲ್ಲಿದ್ದ ಭೂಮಿ ಹರಿದು ಹಂಚಿ ಹೋಗಿ, ಅದೇ ಸಮಯದಲ್ಲಿ ದೇಶಗಳು ಬೇರೆ ಬೇರೆಯಾದಾಗ ಸೃಷ್ಟಿಯಾಗಿರುವ ಎನ್ಕ್ಲೇವುಗಳ ಸರಮಾಲೆಯೇ ಭಾರತ ಹಾಗು ಬಾಂಗ್ಲಾದೇಶದಲ್ಲಿ ಇವೆ. ಅದರಲ್ಲೂ ಹೆಚ್ಚಿನವುಗಳು ತುಂಬಿರುವುದು ಬಂಗಾಳದ ‘ಕೂಚ್ ಬೆಹಾರ್’ ಜಿಲ್ಲೆಯಲ್ಲಿ. ನೆರೆಯ ಬಾಂಗ್ಲಾದೇಶಕ್ಕೆ ಅಂಟಿಕೊಂಡೇ ಇರುವ ಕೂಚ್ ಬೆಹಾರ್ ತನ್ನ ಪುರಾತನ ಅರಮನೆಗೆ ಹಾಗೂ ಮದನ್ ಮೋಹನ್ ದೇವಾಲಯಕ್ಕೆ ಪ್ರಸಿದ್ಧ. 1947ರಲ್ಲಿ ಬ್ರಿಟೀಷ್ ಭಾರತ ಹಾಗೂ ಬಂಗಾಳದ ವಿಭಜನೆ ನಡೆದಾಗ ಸೃಷ್ಟಿಯಾದ ಎರಡನೇ ಕ್ರಮದ ಎನ್ಕ್ಲೇವುಗಳಿಗೆ ಲೆಕ್ಕವೇ ಇಲ್ಲ. ಅದರೊಟ್ಟಿಗೇ ಇಲ್ಲೊಂದು, ಜಗತ್ತಿನಲ್ಲೇ ಏಕೈಕ ಮೂರನೇ ಕ್ರಮದ ಅಂತಕ್ಷೇತ್ರ ಕೂಡಾ ಸೃಷ್ಟಿಯಾಯಿತು. ಇದೇನೂ ಸಾವಿರಾರು ಎಕರೆಯಷ್ಟು ವಿಸ್ತಾರದ ಭೂಮಿಯಲ್ಲ. ಬರೇ 7000ಚದರ ಮೀಟರ್ನಷ್ಟು ವಿಸ್ತಾರದ ಭೂಮಿಯಷ್ಟೇ. ‘ದಹಾಲ ಖಗ್ರಾಬಾರಿ (ಸಂಖ್ಯೆ 51)’ ಎಂಬ ಭೂಮಿಯ ತುಂಡೇ ಈ ಅಪರೂಪದ third order enclave (ಚಿತ್ರ 2 ಮತ್ತು 3). ಈ ಭೂಮಿಯ ಒಡೆಯ ಒಬ್ಬ ಬಾಂಗ್ಲಾದೇಶೀ ರೈತ. ಆತ ವಾಸವಾಗಿರುವುದು ಇಲ್ಲೇ ಈ ಜಾಗಕ್ಕೇ ಹತ್ತಿರವಿರುವ ಬಾಂಗ್ಲಾದೇಶಕ್ಕೆ ಸೇರಿದ ಎರಡನೇ ಕ್ರಮದ ಎನ್ಕ್ಲೇವಿನ ಒಂದು ಹಳ್ಳಿಯಲ್ಲಿ (ಸ್ವತಃ ಈ ಹಳ್ಳಿ ಕೂಡಾ ಭಾರತದ ಪ್ರದೇಶದೊಳಗಿದೆ 🙂 ) ಅಂದರೆ ಈ ದಹಾಲ ಖಗ್ರಬಾರಿ ಎನ್ನುವ ಜಾಗದಲ್ಲಿ ನೀವು ನಿಂತರೆ, ನೀವು ‘ಭಾರತದೊಳಗಿರುವ ಬಾಂಗ್ಲಾದೇಶದ ಒಳಗಿರುವ ಭಾರತದ ಭೂಮಿಯಲ್ಲಿರುವ ಭಾಗ್ಲಾದೇಶದ ಒಳಗಿರುವ ಭಾರತ’ದಲ್ಲಿ ನಿಂತಂತಾಗುತ್ತದೆ (ಚಿತ್ರ 4).

ಇಲ್ಲಿನ ಜನರಿಗೆ ಆ ಸಂಕೀರ್ಣ ಪರಿಸ್ಥಿತಿಯಿಂದಾಗಿ ಇಲ್ಲದ ತಲೇನೋವು. ವೀಸಾ ನಿಯಮಗಳ ಕ್ಲಿಷ್ಟತೆ ಹಾಗು ಅರ್ಥವಾಗದ ರೂಲ್ಸುಗಳ ಮಧ್ಯೆ ಇಲ್ಲಿರುವ ಜನ ದಿನಾ ಬವಣೆ ಪಡುತ್ತಾರೆ. ಈ ಎನ್ಕ್ಲೇವುಗಳ ಕೀಟಲೆಯಿಂದಾಗಿ ಇವರಿಗೆ ಪಾಸ್ಪೋರ್ಟುಗಳೂ ಲಭ್ಯವಿಲ್ಲ. ಪಾಸ್ಪೋರ್ಟು ಇಲ್ಲದೆ ಮೇಲೆ ವೀಸಾ ಕೂಡ ಇಲ್ಲ. ಆದರೆ ಇಲ್ಲಿರುವ ಜನರಲ್ಲಿ ಹೆಚ್ಚಿನರೆಲ್ಲಾ ರೈತರು ಹಾಗೂ ಬಡತನ ರೇಖೆಗಿಂತಾ ಕೆಳಗಿರುವರು. ಅವರಿಗೆ ವೀಸಾ, ಪಾಸ್ಪೋರ್ಟುಗಳ ಅವಶ್ಯಕತೆಯಾಗಲೀ ಅದರ ಹೆಸರಿನ ಅರ್ಥವಾಗಲೀ ಅರಿಯದೆ ಸಧ್ಯಕ್ಕೆ ಅದ್ಯಾವುದೂ ನಮಗೆ ಬೇಡ ಎಂದು ಆರಾಮಾಗಿದ್ದಾರೆ. ಆದರೆ ಪಾಪ, ಆಗೀಗ ಇಲ್ಲಿ ಗಡಿ ಅತಿಕ್ರಮಣದ ಬಗ್ಗೆ ಕಿರಿಕ್ಕುಗಳು ನಡೆದು, ಪೋಲೀಸು, ಸೈನ್ಯ ಹಾಗೂ ನಾಗರೀಕರ ನಡುವ ಜಟಾಪಟಿಗಳು, ಗಾಳಿಯಲ್ಲಿ ಗುಂಡುಹಾರಿಸುವಿಕೆ ನಡೆಯುತ್ತಲೇ ಇರುತ್ತವೆ.

ಕೊಸರು:

‘ಸರ್ವೇ ಜನಾ ಸುಖಿನೋ ಭವಂತು’ ಅನ್ನೋ ಸಂಸ್ಕೃತ ಶ್ಲೋಕ ಇಲ್ಲೇಕೋ ಅರ್ಥ ತಪ್ಪುತ್ತಾ ಇದೆ. ಈ ಸರ್ವೇ ಡಿಪಾರ್ಟ್ಮೇಂನವರು ಮಾಡಿದ ತರಲೆ ಕೆಲ್ಸಕ್ಕೆ, ಎರಡೂ ಸರ್ಕಾರಗಳು (ಹಾಗೂ ಅಸಂಖ್ಯಾತ ರಾಜ್ಯಸರ್ಕಾರ ಅಧಿಕಾರಿಗಳು, ಜಿಲ್ಲಾ ಪಂಚಾಯ್ತಿ, ತಾಲೂಕು ಪಂಚಾಯ್ತಿ ಹಾಗೂ ಗ್ರಾಮ ಪಂಚಾಯ್ತಿ ಅಧಿಕಾರಿಗಳು) ಈಗಲೂ ಕಾಲು ಕೆರೆದುಕೊಂಡು ಕಾದಾಡ್ತಾ ಇವೆ 🙂 ಹಾಗಾಗಿ ಇಲ್ಲಿ ‘Survey ಜನರಿಂದಾಗಿ ಸುಖೀ No ಭವಂತು’ ಅಂತಾ ಆಗಿದೆ.

#ದಿನಕ್ಕೊಂದು_ವಿಷಯ, #Enclave, #Dahala_Khagrabari_#_51

ದಿನಕ್ಕೊಂದು ವಿಷಯ – ೧೫

ದಿನಕ್ಕೊಂದು ವಿಷಯ – ೧೫

ನಾನೊಂದು ತೀರ, ನೀನೊಂದು ತೀರ…….ನಡುವೆ ಒಂದು ದಿನದ ಅಂತರ 😦 !!

ನಮ್ಮಪ್ಪನಿಗೆ ನಾನು ಫೋನು ಮಾಡಿದಾಗಲೆಲ್ಲಾ ಅವರು ಕೇಳುವುದು ‘ಈಗ ಟೈಮೆಷ್ಟು ಅಲ್ಲಿ?’. ದುಬೈಗೂ ಭಾರತಕ್ಕೂ ಒಂದೂವರೆ ಘಂಟೆ ವ್ಯತ್ಯಾಸವಿರುವುದರಿಂದ, ನಾನು ಸಮಯ ಹೇಳಿದಾಗಲೆಲ್ಲಾ, ಅವರು ‘ಹೌದಾ!? ಇನ್ನೂ ಅಷ್ಟೇನಾ!? ನಮ್ದಿಲ್ಲಿ ಊಟ ಆಯ್ತು’ ಅಂತಾ ಆಶ್ಚರ್ಯ ವ್ಯಕ್ತಪಡಿಸುತ್ತಾರೆ. ಮೂರುವರ್ಷವಾದರೂ ಇದು ಬದಲಾಗಿಲ್ಲ. ಅವರು ಈ ಸಮಯದ ವ್ಯತ್ಯಾಸದ ಹಿಂದಿರುವ ಲಾಜಿಕ್ಕೇ ಅರ್ಥಮಾಡಿಕೊಂಡಿಲ್ಲವಾದ್ದರಿಂದ ಅದು ಅವರಿಗೆ ಸೋಜಿಗವಾಗಿಯೇ ಉಳಿದಿದೆ. ದುಬೈಗೂ ಭಾರತಕ್ಕೂ ಸುಮಾರು ಮೂರುಸಾವಿರ ಕಿಲೋಮೀಟರ್ ದೂರ. ಆದ್ದರಿಂದ ಈ ಒಂದೂವರೆ ಘಂಟೆಯ ವ್ಯತ್ಯಾಸ ಅರ್ಥಮಾಡಿಕೊಳ್ಳಬಹುದೇನೋ. ಆದರೆ ಬರೇ ಎರಡುಮೈಲಿ ಅಂತರದಲ್ಲಿರುವ ಎರಡು ದ್ವೀಪಗಳ ಮಧ್ಯೆ 23 ಘಂಟೆಗಳ ಅಂತರವಿದೆಯೆಂದರೆ ನಂಬುತ್ತಿರಾ!? ನೀವು ಅತೀ ಬುದ್ಧಿವಂತರಾಗಿದ್ದರೆ, ಇಷ್ಟೊತ್ತಿಗೆ ನಿಮಗೆ ವಿಷಯ ಅರ್ಥವಾಗಿರುತ್ತದೆ. ಆದರೆ, ನೀವು ತೀರಾ ಬುದ್ಧಿವಂತರಲ್ಲವೆಂದಾದಲ್ಲಿ ಮುಂದೆ ಓದಿ.

ನಾವು ದಿನನಿತ್ಯ, ಜಗತ್ತಿನ ಭೂಪಟವನ್ನು ಗುಂಡಗಿನ ಗ್ಲೋಬ್(Globe)ಗಿಂತಾ ಹೆಚ್ಚಾಗಿ, ಗೋಡೆಯಲ್ಲಿ ನೇತುಹಾಕಿರುವ ಅಥವಾ ಅಂತರ್ಜಾಲದಲ್ಲಿ ಲಭ್ಯವಿರುವ 2-D ನಕ್ಷೆಗಳಲ್ಲಿ ನೋಡುವುದರಿಂದ, ನಮಗೆ ಆಸ್ಟ್ರೇಲಿಯಾ ಹಾಗೂ ನ್ಯೂಝೀಲ್ಯಾಂಡ್ ಜಗತ್ತಿನ ಪೂರ್ವಭಾಗದಲ್ಲಿಯೂ, ರಷ್ಯಾ ಹಾಗೂ ಜಗತ್ತಿನ ಮಧ್ಯಭಾಗದಲ್ಲಿಯೂ, ಅಮೇರಿಕಾ ಜಗತ್ತಿನ ಪಶ್ಚಿಮಭಾಗದಲ್ಲಿಯೂ ಕಂಡುಬರುತ್ತದೆ. ಆದರೆ, ನಿಜವಾಗಿಯೂ ಜಗತ್ತು ಇರುವುದು ಗುಂಡಗೆ. ಹೀಗಿದ್ದಾಗ ಜಗತ್ತು ಆರಂಭವಾದಲ್ಲೇ ಕೊನೆಯೂ ಆಗುವುದು.

ಈ ನಕ್ಷೆಗಳು ಅಕ್ಷಾಂಶ ಹಾಗೂ ರೇಖಾಂಶದ ಮೇಲೆ ಆಧಾರಿತವಾದವುಗಳು. ಇದರ ಪ್ರಕಾರ, ಗ್ರೀನ್ವಿಚ್ ಮೂಲಕ ಹಾದುಹೋಗುವ ೦ ಡಿಗ್ರೀ ರೇಖಾಂಶವನ್ನು ಭೂಪಟದ ಮಧ್ಯದಲ್ಲಿಟ್ಟು, ಉಳಿದ ದೇಶಗಳನ್ನು ಅದರ ಸುತ್ತಮುತ್ತ ಹರಡಲಾಗಿದೆ. ಈ ನಕ್ಷೆಗಳ ಪ್ರಕಾರ ಗ್ರೀನ್ವಿಚ್ ರೇಖಾಂಶದಿಂದ ಪಶ್ಚಿಮಕ್ಕೆ ಪ್ರತೀ 15ಡಿಗ್ರಿಗಳಿಗೆ, ಸಮಯ ಒಂದು ಘಂಟೆ ಹಿಂದೆಬೀಳುತ್ತದೆ, ಹಾಗೂ ಪೂರ್ವಕ್ಕೆ ಹೋದಂತೆ ಪ್ರತೀ 15ಡಿಗ್ರಿಗಳಿಗೆ ಸಮಯ ಮುಂದೆ ಓಡುತ್ತದೆ. ಈ ಲೆಕ್ಕಾಚಾರವನ್ನು ಸರಿಮಾಡಲು ಹಾಗೂ ಅದಕ್ಕೊಂದು ಪೂರ್ಣ ಅರ್ಥ ನೀಡಲು, ಗ್ರೀನ್ವಿಚ್ ರೇಖಾಂಶದಿಂದ ಸರಿಯಾಗಿ 180ಡಿಗ್ರಿಗಳ ನಂತರ ಬರುವ ರೇಖಾಂಶವನ್ನು ‘ಅಂತರರಾಷ್ಟ್ರೀಯ ದಿನಾಂಕ ರೇಖೆ (International Date Line)’ ಎಂದು ಗುರುತಿಸಲಾಗಿದೆ. ಅಲ್ಲಿಂದ ದಿನದ ಲೆಕ್ಕಾಚಾರ ಆರಂಭ. ಹಾಗಾಗಿ ಟೋಕಿಯೋದಿಂದ ಸ್ಯಾನ್-ಫ್ರಾನ್ಸಿಸ್ಕೋಗೆ ಹೋಗುವ ಪ್ರಯಾಣಿಕರು ಈ ‘ಅಂ.ದಿ.ರೇ’ಯನ್ನು ದಾಟುವಾಗ, ಒಂದುದಿನವನ್ನು ಕಳೆದು ಗಡಿಯಾರವನ್ನು ಹಿಂದಿಡುತ್ತಾರೆ. ಟೋಕಿಯೋದಿಂದ ಇವತ್ತು ಮಧ್ಯರಾತ್ರಿ 1ಘಂಟೆಗೆ ವಿಮಾನ ಹತ್ತಿದರೆ, ಒಂಬತ್ತು ಘಂಟೆಯ ಪ್ರಯಾಣದ ನಂತರ ನೀವು ನಿನ್ನೆ ಸಂಜೆ 6ಘಂಟೆಗೆ ಸ್ಯಾನ್-ಫ್ರಾನ್ಸಿಸ್ಕೋದಲ್ಲಿ ಬಂದಿಳಿಯುತ್ತೀರಿ!! ಕಾಲದಲ್ಲಿ ಹಿಂದೆ ಚಲಿಸುವ ಮ್ಯಾಜಿಕ್ ನೋಡಬಹುದು 🙂

ಎಲ್ಲಾ ಅಕ್ಷಾಂಶ ರೇಖಾಂಶದ ಗೆರೆಗಳು ಬರೀ ಊಹಾತ್ಮಕವಾಗಿದ್ದರೂ, ಅದೂ ಅಲ್ಲದೆ, ಈ 180ಡಿಗ್ರಿಯ ರೇಖಾಂಶ, ಅಲ್ಲೆಲ್ಲೋ ಪೆಸಿಫಿಕ್ ಸಾಗರದ ಮಧ್ಯೆ ಹಾದುಹೋಗಿದ್ದರೂ ಸಹ ಅದನ್ನು ಎಳೆದು ಗುರುತಿಸುವಾಗ ಕೆಲ ರಾಜಕೀಯ ಹಾಗೂ ಆರ್ಥಿಕ ವಿಷಯಗಳನ್ನು ಗಮನದಲ್ಲಿಟ್ಟುಕೊಂಡು, ಸುಖಾಸುಮ್ಮನೆ ನೇರವಾಗಿ ಎಳೆಯದೆ ಕೆಲ ಕಡೆ ಅಡ್ಡಾದಿಡ್ಡಿಯಾಗಿ ಎಳೆದಿದ್ದಾರೆ. [ಚಿತ್ರ 1ನ್ನು ಗಮನಿಸಿ]. ಇಲ್ಲಿ ನೀವು ಗಮನಿಸಬೇಕಾದ ವಿಷಯ ಆ ಚಿತ್ರದ ತಲೆಯ ಹತ್ತಿರ ಇದೆ ನೋಡಿ. ಅದೇನೆಂದರೆ, ಅಮೇರಿಕಾಸಂಯುಕ್ತ ಸಂಸ್ಥಾನ ಹಾಗೂ ರಷ್ಯಾ ಎರಡೂ ಈ ರೇಖೆಯಿಂದ ಬೇರ್ಪಡಿಸಲ್ಪಟ್ಟಿವೆ. ಒಂದು ಕಾಲದಲ್ಲಿ ಬದ್ಧವೈರಿಯಾಗಳಾಗಿದ್ದ ಎರಡೂ ದೇಶಗಳೂ, ‘ಇಷ್ಟೇ’ ದೂರದಿಂದ ಬೇರ್ಪಡಿಸಲ್ಪಟ್ಟಿವೆ. ಆ ಕಡೆ ಕೆನಡಾದಿಂದ ಕೇವಲ ಒಂದು ಡಾಲರ್ಗೆ ಅಮೇರಿಕಾ ಖರೀದಿಸಿದ ‘ಅಲಾಸ್ಕ’, ಈ ಕಡೆ ರಷ್ಯಾದ ಖಾಲಿ-ಖಾಲಿಯಾಗಿರುವ ಉಗೋಲ್ನಿ ಪ್ರಾಂತ್ಯ.

ಆದರೆ ಇವತ್ತಿನ ವಿಷಯ ತಿಳಿಯಬೇಕೆಂದಾದರೆ, ಇನ್ನೂ ‘ಆಳ’ಕ್ಕಿಳಿಯಬೇಕು. ಎರಡೂ ರಾಷ್ಟ್ರಗಳ ಮಧ್ಯೆಯಿರುವುದು ‘ಬೆರಿಂಗ್ ಜಲಸಂಧಿ’. ಇಲ್ಲಿ ಸ್ವಲ್ಪ ಝೂಮ್ ಮಾಡಿ ನೋಡಿದರೆ (http://bit.ly/1ue0oMg), ನಿಮಗೆ ಎರಡು ಪುಟಾಣಿ ದ್ವೀಪಗಳು ಕಾಣಸಿಗುತ್ತದೆ. ಇವುಗಳ ಹೆಸರು ಡಿಯೋಮೇಡ್ ದ್ವೀಪಗಳು. ಅದರಲ್ಲಿ ಒಂದು ದೊಡ್ಡ ಡೀಯೋಮೇಡ್, ಇನ್ನೊಂದು ಸಣ್ಣ ಡಿಯೋಮೇಡ್ (ಚಿತ್ರ 2 ಮತ್ತು 3). ಪ್ರಕೃತಿ ಎರಡನ್ನೂ ಒಟ್ಟಿಗೇ ಸೃಷ್ಟಿಸಿದ್ದರೂ ಸಹ, ಈ ಮನುಷ್ಯನೆನ್ನುವ ಪ್ರಾಣಿ ಅದರಲ್ಲಿ ನಂದಿಷ್ಟು ನಿಂದಿಷ್ಟು ಅಂತಾ ಪಾಲುಮಾಡಿಕೊಂಡಾದ ಮೇಲೆ, ದೊಡ್ಡ ಡಿಯೋಮೇಡ್ ರಷ್ಯಾಕ್ಕೂ, ಸಣ್ಣ ಡಿಯೋಮೇಡ್ ಅಮೇರಿಕಾಕ್ಕೂ ಸೇರಿವೆ. ಎರಡಕ್ಕೂ ಮಧ್ಯೆ 3.8 ಕಿಮೀ ದೂರ, ಅಷ್ಟೇ. ಆದರೆ ಈ ಅಂತರಾಷ್ಟ್ರೀಯ ದಿನಾಂಕ ರೇಖೆ ಇವೆರಡರಮಧ್ಯೆ ಹಾದು ಹೋಗಿ, ಆಗಿರುವ ತರಲೆಗಳು ಒಂದೆರಡಲ್ಲ. ಎರಡಕ್ಕೂ ಮಧ್ಯೆ ಬರೇ ಎರಡೂವರೆ ಮೈಲುಗಳ ಅಂತರವಿದ್ದರೂ, ಎರಡೂ ದ್ವೀಪಗಳ ಮಧ್ಯೆ 23 ಗಂಟೆಗಳ ಅಂತರ!!! ದೊಡ್ಡ ದ್ವೀಪದಿಂದ ಇವತ್ತು ಫೋನು ಮಾಡಿದರೆ, ಸಣ್ಣದ್ವೀಪದವರು ನಿನ್ನೆ ಉತ್ತರಿಸುತ್ತಾರೆ 🙂 🙂 🙂 ಅದೇರೀತಿ ಸಣ್ಣದ್ವೀಪದಿಂದ ದೊಡ್ಡ ದ್ವೀಪಕ್ಕೆ ಫೋನುಮಾಡಿ, ನಾಳೆಯ ಸುದ್ಧಿ ಇವತ್ತೇ ತಿಳಿಯಬಹುದು 🙂 !! ಇದು ಮಾತ್ರವೇ ಅಲ್ಲದೆ, ಒಂದು ಕಾಲದಲ್ಲಿ ದೊಡ್ಡ ಡಿಯೋಮೇಡ್ ದ್ವೀಪವೇ ಜಗತ್ತಿನ ಪೂರ್ವ ತುದಿಯಾಗಿತ್ತು. ಹೊಸವರ್ಷದ ಮೊದಲ ಪಟಾಕಿ ಇಲ್ಲೇ ಸಿಡಿಸಬೇಕಾಗಿತ್ತು. ಆದರೆ ಅಧಿಕೃತವಾಗಿ ರಷ್ಯಾದ ಬಹುತೇಕ ಪೂರ್ವಭಾಗ ಹಾಗೂ ನ್ಯೂಝೀಲ್ಯಾಂಡ್ ಒಂದೇ ಸಮಯವಲಯ ಪಾಲಿಸುವುದರಿಂದ, ಹಾಗೂ ನ್ಯೂಝೀಲ್ಯಾಂಡಿನಲ್ಲಿ ಹಗಲಿನ ಉಳಿಕೆ (Daylight saving)ಯ ಅಭ್ಯಾಸವಿರುವುದರಿಂದ, ರಷ್ಯಾ ಬೇಸಿಗೆಯ ಸಮಯದಲ್ಲಿ ನ್ಯೂಝೀಲ್ಯಾಂಡಿಗಿಂತಾ ಒಂದು ಘಂಟೆ ಹಿಂದೆಬೀಳುತ್ತಿತ್ತು. 1995ರಲ್ಲಿ ಇದರ ಬಗ್ಗೆ ದೊಡ್ಡ ಚರ್ಚೆಯೇ ನಡೆದು, ಈ ತಲೆಬಿಸಿಯೀ ಬೇಡವೆಂದು, ಇಡೀ ಅಂ.ದಿ.ರೇ.ಯನ್ನು ಜಗತ್ತಿನ ದಕ್ಷಿಣಾರ್ದದಲ್ಲಿ ಸುಮಾರು 30ಡಿಗ್ರಿಯಷ್ಟು (ಅಂದರೆ ಸುಮಾರು 2 ಘಂಟೆಯಷ್ಟು!!) ಬಲಕ್ಕೆ ‘ಕಿರಿಬಾತಿ’ ಎಂಬ ದ್ವೀಪದೇಶದವರೆಗೆ ಸರಿಸಿ, ಅದನ್ನು ಜಗತ್ತಿನ ಪೂರ್ವದ ಹೆಬ್ಬಾಗಿಲಾಗಿ ಘೋಷಿಸಲಾಯಿತು. ಚಿತ್ರ 1ರ ಕೆಳಬಾಗದಲ್ಲಿ ನೀವಿದನ್ನು ಗಮನಿಸಬಹುದು.

ದೊಡ್ಡ ಡಿಯೋಮೇಡ್ ದ್ವೀಪದಲ್ಲಿ ವಾಸವಿದ್ದವರನ್ನೆಲ್ಲಾ, ರಷ್ಯಾ ತನ್ನ ಮುಖ್ಯಭೂಮಿಗೆ ಸ್ಥಳಾಂತರಿಸಿರುವುದರಿಂದ, ಇಡೀ ದ್ವೀಪದಲ್ಲಿ ಕೆಲ ಸೇನಾ ತುಕಡಿಗಳನ್ನು ಬಿಟ್ಟರೆ ಬೇರೇನೂ ಇಲ್ಲ. ಸಣ್ಣ ದ್ವೀಪದಲ್ಲಿ ಸ್ಥಳೀಯ ‘ಇನುಯಿಟ್’ ಜನಾಂಗದ ಸುಮಾರು 170 ಜನರು, ದ್ವೀಪದ ಪಶ್ಚಿಮ ಮೂಲೆಯಲ್ಲಿರುವ ‘ಡಿಯೋಮೇಡ್’ ಎಂಬ ಸಣ್ಣ ಪಟ್ಟಣದಲ್ಲಿ (ಚಿತ್ರ 4 ಮತ್ತು 5) ವಾಸವಾಗಿದ್ದಾರೆ. ಇಡೀ ಪಟ್ಟಣಕ್ಕೆ ಒಂದು ಶಾಲೆ, ಒಂದು ಪುಟಾಣಿ ಏರ್ಪೋರ್ಟ್ ಹಾಗೂ ಒಂದೇ ಒಂದು ಅಂಗಡಿಯಿದೆ. ಈ ಜನರು ದಂತಕೆತ್ತನೆಯಲ್ಲಿ ನಿಪುಣರು. ಹವಾಮಾನ ಅವಕಾಶಮಾಡಿಕೊಟ್ಟಾಗಲೆಲ್ಲಾ ಅಲಾಸ್ಕ ಕಡೆಯಿಂದ, ಸರ್ಕಾರದ ಅಧಿಕಾರಿಗಳು ಭೇಟಿಕೊಟ್ಟು ಈ ಜನರ ಬಗ್ಗೆ ವಿಚಾರಿಸಿಕೊಳ್ಳುತ್ತಾರೆ.

ಕೊಸರು:

‘ಅಮೇರಿಕಾದಿಂದ ರಷ್ಯಾಕ್ಕೆ ನಡೆದು ಹೋಗಬಹುದು’ ಎಂದು ನಾನೇನಾದರೂ ಹೇಳಿದರೆ, ನೀವು ‘ಇವನಿಗ್ಯಾಕೋ ದಿನಕ್ಕೊಂದು ವಿಷಯ ಬರೆದು ತಲೆಕೆಟ್ಟಿದೆ’ ಎಂದು ನಗುವ ಸಾಧ್ಯತೆಗಳೇ ಹೆಚ್ಚು,ಅಲ್ಲವೇ. ಆದರೆ, ವರ್ಷದ ಎಂಟುತಿಂಗಳು ಇಲ್ಲಿ ಜಲಸಂಧಿ ಹೆಪ್ಪುಗಟ್ಟುವುದರಿಂದ (ಚಿತ್ರ 6), ಇದರ ಮೇಲೆ ನಡೆದೇ ಅಮೇರಿಕಾದಿಂದ ರಷ್ಯಾದವರೆಗೆ ಕ್ರಮಿಸಬಹುದು!

#ದಿನಕ್ಕೊಂದು_ವಿಷಯ, #Diomede_Islands, #International_Date_Line