ಅಗಣಿತ ತಾರಾಗಣಗಳ ನಡುವೆ, ತೇಲುತ್ತಿದೆ ಒಂದು ನಿರ್ಜನ ಒಂಟಿಮನೆ

ನನಗೆ ಸಣ್ಣವನಿದ್ದಾಗಲಿಂದಲೂ ಆಕಾಶ ಅಂದ್ರೆ ಪಂಚಪ್ರಾಣ. ನಾನು ಬಾಲ್ಯಕಳೆದ ಸಿದ್ದರಮಠದಲ್ಲಿ ಕರೆಂಟೇ ಇಲ್ಲವಾದರಿಂದ, ಅಲ್ಲಿ ಬೆಳಕಿನ ಮಾಲಿನ್ಯ ಇರಲೇ ಇಲ್ಲ. ಹಂಗಾಗಿ ಆಕಾಶ ತನ್ನೆಲ್ಲಾ ಬೆರಗುಗಳನ್ನು ಅದೆಷ್ಟು ಚೆನ್ನಾಗಿ ತೆರೆದಿಡ್ತಾ ಇತ್ತು ಅಂತೀರಿ! ನಮ್ಮ ಮನೆ ಸುತ್ತಮುತ್ತ ಕಾಡಿದ್ದರಿಂದ ಬರೀ ಅಂಗೈಯಗಲದಷ್ಟೇ ಆಕಾಶ ಕಾಣ್ತಾ ಇದ್ದದ್ದು. ಆದರೆ, ದೇವಸ್ಥಾನದ ಮುಂದಿದ್ದ ಸ್ಕೂಲ್ ಗ್ರೌಂಡಿನಲ್ಲಿ ನಿಂತರೆ, ಭೂಮಿಯಮೇಲಿದ್ದ ನಾನೇ ಕಳೆದುಹೋಗುವಷ್ಟು ಆಕಾಶ!! ಅದೆಷ್ಟು ಸಾವಿರ ನಕ್ಷತ್ರಗಳೋ! ಒಂದಷ್ಟು ನನ್ನ ಫೇವರಿಟ್ ನಕ್ಷತ್ರಗಳೂ ಇದ್ವು. ಅವಕ್ಕೆಲ್ಲ “ನಮಸ್ಕಾರ ಹೆಂಗಿದ್ದಿರಾ” ಅಂತೆಲ್ಲಾ ಮಾತಾಡ್ಸಿ ಬರ್ತಾ ಇದ್ದೆ. ಅಪ್ಪ ಅದೇನದು ನಕ್ಷತ್ರದ ಹತ್ರ ಮಾತಾಡೋದು, ಅದಕ್ಕೇನು ಬಾಯಿಬರುತ್ತಾ ಉತ್ತರ ಹೇಳೋಕೆ ಅಂತಾ ಕೇಳಿದ್ರೆ, ‘ಮಿನುಗಿ ಮಿನುಗಿ ಉತ್ತರ ಹೇಳುತ್ತೆ. ನಿಮಗ್ಗೊತ್ತಿಲ್ಲ ಸುಮ್ನಿರಿ” ಅಂತಿದ್ದೆ. “ಈ ಹುಚ್ಚುಮುಂಡೇದು ನನ್ನ ಮಗನೇ ಹೌದಾ, ಅಥ್ವಾ ಲಸಿಕೆ ಹಾಕ್ಸೋಕೆ ಹೋದಾಗ ಆಸ್ಪತ್ರೆಯಲ್ಲೇನಾದ್ರೂ ಅದಲುಬದಲಾಯ್ತಾ” ಅಂತಾ ಡೌಟು ಬಂದು ಅಪ್ಪ ಸುಮ್ಮನಾಗ್ತಿದ್ರು ಅನ್ಸುತ್ತೆ.

ಹೈಸ್ಕೂಲಿಗೆ ಬರುವಷ್ಟೊತ್ತಿಗೆ ನಾನು ‘ಇಸ್ರೋಗೆ ಸೇರ್ತೀನಿ. ಬಾಹ್ಯಾಕಾಶಕ್ಕೆ ಹೋಗೋ ಮೊದಲ ಭಾರತೀಯ ನಾನೇ’ ಅಂತಾ ಇಡಿ ಭಾರತಕ್ಕೆ ಸೆಲ್ಫ್-ಡಿಕ್ಲೇರ್ ಮಾಡಿಯಾಗಿತ್ತು. ಆಮೇಲೆ ಇಸ್ರೋದ ಬಜೆಟ್ ಪ್ರಾಬ್ಲಮ್ ಗೊತ್ತಾಗಿದ್ದರಿಂದ, ಜೊತೆಗೇ ರಾಕೇಶ್ ಶರ್ಮಾನ ಹೆಸರು ಕೇಳಿದ್ದರಿಂದ ನನ್ನ ಕನಸನ್ನ ಹಂಗೇ ಸ್ವಲ್ಪ ಲೆಫ್ಟಿಗೆ ಸರಿಸಿ, ಇಸ್ರೋದಿಂದ ನಾಸಾಕ್ಕೆ ಶಿಫ್ಟ್ ಮಾಡಿದ್ದೆ. ಆದರೆ ಪಿಯುಸಿನಲ್ಲಿ ಗಣಿತ ಡುಮ್ಕಿ ಹೊಡೆದಮೇಲೇ ಗೊತ್ತಾಗಿದ್ದು, ಬಾಹ್ಯಾಕಾಶಕ್ಕೆ ಹೋಗಲು ಫಿಸಿಕ್ಸ್ ಮತ್ತು ಮ್ಯಾಥ್ಸ್ ಚೆನ್ನಾಗಿ ಗೊತ್ತಿರಬೇಕು. ಅದೂ ಸಹ ಗಣಿತ ಅಂದ್ರೆ 2+2=4 ಅನ್ನೋ ಗಣಿತವಲ್ಲ, ಅದಕ್ಕಿಂತಲೂ ಹೆಚ್ಚಿನ ಹಾಗೂ ಹೈಸ್ಕೂಲಿನಲ್ಲಿ ನಾನು ನಿರ್ಲಕ್ಷಿಸಿದ “ಆ ಗಣಿತ” ಅಂತಾ ಗೊತ್ತಾದಮೇಲೆ, “ನಂಗೆ ಗಣಿತ ಕಲಿಸಿದ ಟೀಚರ್ರೇ ಸರಿಯಿಲ್ಲ. ಭಾರತಕ್ಕೆ ಒಬ್ಬ ಗಗನಯಾನಿ ಇಲ್ಲದಂಗೆ ಮಾಡಿದ್ರು. ಅವರದ್ದೇ ತಪ್ಪು. ಬಿಗ್ ಲಾಸ್ ಟು ಇಂಡಿಯಾ” ಅಂತಾ ಆಡಳಿತಪಕ್ಷದ ನಾಯಕನಂತೆ ಅವರಮೇಲೆ ಗೂಬೆ ಕೂರಿಸಿ ಕನಸೆಲ್ಲಾ ಕಂಪ್ಯೂಟರ್ ಸೈನ್ ಕಡೆಗೆ ತಿರುಗಿಸಿದೆ. ಇಂಟೆಲ್ಲಿಗೆ ಸೇರಿ ಹೊಸಾದಿಂದ ತಲೆಮಾರಿನ ಪ್ರೊಸೆಸರ್ರನ್ನೇ ಕಂಡುಹಿಡಿದುಬಿಡ್ತೀನಿ ಅನ್ನೋ ಕನಸು ಗೂಡು ಕಟ್ತು. ಅದಕ್ಕೂ ಗಣಿತ ಚೆನ್ನಾಗಿರಬೇಕು ಅಂತಾ ಯಾರೋ ಜಾಪಾಳ ಮಾತ್ರೆ ಕೊಟ್ಟಮೇಲೆ ‘ಯಾಕೋ ನಾನು ಫೇಮಸ್ಸಾಗೋದು ಯಾರಿಗೂ ಇಷ್ಟ ಇಲ್ಲ ಅನ್ಸುತ್ತೆ’ ಅಂತಾ ಸಿಟ್ಟು ಮಾಡ್ಕಂಡು, ಗಣಿತದ ಅಗತ್ಯವೇ ಇಲ್ಲದ ಕೆಮಿಸ್ಟ್ರಿ ಕಡೆ ಗಮನವಿಟ್ಟೆ. ಕೆಮಿಸ್ಟ್ರಿಯಲ್ಲಿ ನೋಬೆಲ್ ಪಡೀಬೇಕು ಅಂತಾ ಹೊಸಾ ಕನಸಿನ ಹಿಂದೆ ಬಿದ್ದೆ. ಎಂಬಿಎಗೆ ಸ್ಕಾಲರ್ಶಿಪ್ ಸಿಗೋವರ್ಗೂ ಅದೇ ಕನಸಲ್ಲೇ ಇದ್ದೆ……

ಅಯ್ಯೋ ಬಿಡಿ ಆ ವಿಷಯ ಯಾಕೆ. ಕಮಿಂಗ್ ಬ್ಯಾಕ್ ಟು ಆಕಾಶ. ಹ್ಮ್ಮ್….. ಆಸ್ಟ್ರೋನಾಟ್ ಆಗದಿದ್ದರೂ, ಈ ಅಕಾಶದ ಮೇಲಿನ ಹುಚ್ಚು ಎಂದಿಗೂ ಕಡಿಮೆಯಾಗಲೇ ಇಲ್ಲ. ಬಿಎಸ್ಸಿಯಲ್ಲಿರುವಾಗ ಬೇರೆ ಬೇರೆ ಪ್ರಾಥಮಿಕ ಶಾಲೆಗಳಿಗೆ ಹೋಗಿ ಸಂಜೆ ಹೊತ್ತು ‘ಬಾಹ್ಯಾಕಾಶ ವೀಕ್ಷಣೆ’ ಕಾರ್ಯಕ್ರಮ ನಡಿಸಿಕೊಡ್ತಾ ಇದ್ದೆ. ಒಂದುಘಂಟೆ ಬೋರ್ಡಿನ ಮೇಲೆ ಥಿಯರಿ, ಆಮೇಲೆ ಒಂದುಗಂಟೆ ಆಕಾಶ ವೀಕ್ಷಣೆ. ಸ್ಕೂಲಲ್ಲಿ ಮಕ್ಕಳ ತಲೆ ತಿಂದದ್ದು ಸಾಕಾಗದೆ, ಟೀಚರ್ರುಗಳ ತಲೆ ತಿನ್ನೋಕೆ ಐಡಿಯಾ ಹಾಕ್ದೆ. ಅಪ್ಪ ಅಮ್ಮ ಆಗ ಹೊಸದಾಗಿ ಕರ್ನಾಟಕಕ್ಕೆ ಕಾಲಿಟ್ಟಿದ್ದ ‘ನಲಿಕಲಿ’ ಶಿಕ್ಷಣ ಪದ್ಧತಿಯ ಸಂಪನ್ಮೂಲ ವ್ಯಕ್ತಿಗಳಾಗಿದ್ದರಿಂದ, ಅವರು ತರಬೇತಿಗೆ ಹೋದಲ್ಲೆಲ್ಲಾ ನನಗೊಂದು ‘ಕೊರೆಯೋ’ ಅವಕಾಶ ಒದಗಿಸಿಕೊಡ್ತಾ ಇದ್ರು. ಬೇರೆ ಬೇರೆ ಆಕಾಶಕಾಯಗಳನ್ನ ತೋರಿಸಿ, ಕೆಲ ನಕ್ಷತ್ರಪುಂಜಗಳನ್ನ ಗುರುತಿಸಿ, ನೆಬ್ಯುಲಾ ಅಂದ್ರೇನು, ಗೆಲಾಕ್ಸಿ ಅಂದ್ರೇನು, ನಕ್ಷತ್ರದ ಜೀವನಹಂತಗಳೇನು, ಅಂತೆಲ್ಲಾ ಡ್ರಿಲ್ಲಿಂಗ್ ಮಾಡಿ ಬರ್ತಿದ್ದೆ. ಇವತ್ತಿಗೂ ಆ ಹುಚ್ಚು ಕಡಿಮೆಯಾಗಿಲ್ಲ.

ಆ ನಕ್ಷತ್ರಗಳ ಹರವು, ವಿಶ್ವದ ಅಗಾದತೆ ತಿಳಿದುಕೊಂಡಷ್ಟೂ ಖಾಲಿಯಾಗದ ಜ್ಞಾನಭಂಡಾರವನ್ನ ನೋಡಿದಷ್ಟೂ ನಾನೆಷ್ಟು ಚಿಕ್ಕವ ಅನ್ನೋ ಭಾವನೆ ದಿನಗಳೆದಷ್ಟೂ ಹೆಚ್ಚುತ್ತೆ. ಇಂತದ್ದೊಂದು ಭಾವನೆ ಬಹುಷಃ ನಡುರಾತ್ರಿಯಲ್ಲಿ ಕೊಡಚಾದ್ರಿಯ ಮೇಲಿಂದಲೋ, ಹಂಪಿಯಲ್ಲಿ ಮಹಾನವಮಿಯ ದಿಬ್ಬದಮೇಲಿಂದಲೋ ಆಕಾಶ ನೋಡಿದವರೆಲ್ಲರಿಗೂ ಬಂದಿರುತ್ತೆ. ಬರಿಗಣ್ಣಿಗೆ ಕಾಣುವ ಆ ಚುಕ್ಕಿಗಳಿಂದಲೇ ಇಂತಾ ತಾತ್ವಿಕ ಅಲೆಹುಟ್ಟಬೇಕಾದರೆ, ಇನ್ನು ಸಣ್ಣದೊಂದು ಟೆಲೆಸ್ಕೋಪ್ ಇಟ್ಟುಕೊಂಡು ಆಕಾಶ ನೋಡಿದರೆ ಏನಾಗಬಹುದು ಗೊತ್ತಾ? ನಿಮ್ಮ ಬಾಯ್ಬಿಡಿಸುವಷ್ಟು ಸುಂದರವಾದ ಗುರುಗ್ರಹದ ಮಚ್ಚೆ, ಶನಿಯ ಸುತ್ತಲಿನ ಉಂಗುರ, ಆಂಡ್ರೋಮಿಡಾ ಗೆಲಾಕ್ಸಿಯ ವಿಹಂಗಮ ದೃಶ್ಯ, M33 ಗೆಲಾಕ್ಸಿ, ‘ಏಡಿ ನೆಬ್ಯುಲಾ’, ‘ಸೃಷ್ಟಿಯ ಕಂಬಗಳು’ (Pillars of creation) ಮುಂತಾದವನ್ನು ನೋಡಿ ಸೌಂದರ್ಯ ಆಸ್ವಾದಕರ ಕಣ್ಣಲ್ಲಿ ನೀರೇ ಬಂದಿಳಿಯುತ್ತದೆ.

ಇಷ್ಟೆಲ್ಲಾ ಯಾಕೆ ಬ(ಕೊ)ರೆದೆ ಅಂದರೆ, ಈ ವಾರದಲ್ಲಿ ಹೊಸದೊಂದು ವಿಷಯ ತಿಳಿಯಿತು. ಅದೇನಂದ್ರೆ, ಇಷ್ಟೊಂದು ಸಾವಿರ ನಕ್ಷತ್ರಗಳು ಆಕಾಶದಲ್ಲಿ ನಮಗೆ ಕಂಡರೂ, ನಿಜ ವಿಚಾರ ಏನಂದ್ರೆ ಈ ತಾರೆಗಳ, ಆಕಾಶಕಾಯಗಳ ನಡುವೆ ಅಗಾಧವಾದ ಖಾಲಿಜಾಗವಿದೆ. ಒಂದು ನಕ್ಷತ್ರಕ್ಕೂ ಇನ್ನೊಂದಕ್ಕೂ ಜ್ಯೋತಿರ್ವರ್ಷಗಳಷ್ಟು ದೂರವಿದೆಯೆಂಬುದು ನಮಗೆಲ್ಲರಿಗೂ ಗೊತ್ತು. ಆದರೆ ನಾವು ಆಕಾಶವನ್ನು 2Dಯಲ್ಲಿ ನೋಡುವುದರಿಂದ ಈ ಅಂತರ ನಮ್ಮ ಗಮನಕ್ಕೆ ಬರುವುದಿಲ್ಲ. ಆದರೆ ಈ ಎಲ್ಲಾ ‘ಅಗಣಿತ ತಾರಾಗಣಗಳ ನಡುವೆ’ ಅಲ್ಲೊಂದು ನಿಜವಾಗಿಯೂ ಒಂದು 60×40 ತರದ್ದು ಸೈಟು ಖಾಲಿ ಇದೆಯಂತೆ. ಅಂದರೆ ಆಕಾಶದ ಅನಂತದಲ್ಲೊಂದುಕಡೆ ದೂರದೂರದೂರದವರೆಗೆ ಏನೂ ಇಲ್ಲ. ಏನೂ ಅಂದ್ರೆ ಏನೂ ಇಲ್ಲ!! ಬೆಳಗಾವಿಯಿಂದ ದಾಂಡೇಲಿ ಕಾಡೊಳಗೆ ಡ್ರೈವ್ ಶುರುಮಾಡಿದರೆ, ಬಹಳ ದೂರದವರೆಗೆ ಗೋವಾ ಬಾರ್ಡರ್ ತನಕ ಹೇಗೆ ಏನೂಸಿಕ್ಕುವುದಿಲ್ಲವೋ, ಹಾಗೆಯೇ ಇಲ್ಲೂ ಸಹ ಏನೇನೂ ಇಲ್ಲ. ದಾಂಡೇಲಿಯ ಕಾಡೂ ಸಹ ಇಲ್ಲ. ಈ ಖಾಲಿ ಸೈಟು, ಬ್ರಹ್ಮಾಂಡದ ದಕ್ಷಿಣ ಖಗೋಳಾರ್ಧದಲ್ಲಿರುವ ‘ಇರಿಡಾನಿಸ್ ನಕ್ಷತ್ರಪುಂಜ”ದಕ್ಕಪಕ್ಕದಲ್ಲಿರುವುದರಿಂದ ಇದಕ್ಕೆ ‘ಇರಿಡಾನಿಸ್ ಸೂಪರ್ವಾಯ್ಡ್’ (Eridanus Supervoid) ಅಂತಾ ಹೆಸರಿಟ್ಟಿದ್ದಾರೆ. ಎರಡು ನಕ್ಷತ್ರಗಳ ನಡುವೆ ಇರುವ “ಏನೂ ಇಲ್ಲದಿರುವುದು” ಬಾಹ್ಯಾಕಾಶದಲ್ಲಿ ಸಾಮಾನ್ಯ. ಆದರೆ ನಕ್ಷತ್ರಗಳ ನಡುವೆ ಇರುವ “ಏನೂ ಇಲ್ಲದಿರುವುದು” ಮತ್ತು ಈ ಘಟೋತ್ಕಚನಂತಾ “ಏನೂ ಇಲ್ಲದಿರುವುದು” ಎರಡಕ್ಕೂ ಅಗಾದ ವ್ಯತ್ಯಾಸವಿದೆ. ನಕ್ಷತ್ರಗಳ ನಡುವೆ ಹೆಚ್ಚೆಂದರೆ 3, 4 ಅಥವಾ 15 ಜ್ಯೋತಿರ್ವರ್ಷಗಳಷ್ಟು ಅಂತರವಿರಬಹುದು. ಉದಾಹರಣೆಗೆ ನಮ್ಮ ಸೂರ್ಯನಿಗೂ ಹಾಗೂ ನಮ್ಮ ಅತ್ಯಂತ ಸಮೀಪದ ನಕ್ಷತ್ರ ಪ್ರಾಕ್ಸಿಮಾ ಸೆಂಟಾರಿಗೂ ಸುಮಾರು 4.2 ಜ್ಯೋತಿರ್ವರ್ಷಗಳಷ್ಟು ಅಂತರವಿದೆ. ಅದರ ನಂತರದ ಸಮೀಪದ ನಕ್ಷತ್ರಗಳಾದ ಆಲ್ಫಾ ಸೆಂಟಾರಿ-ಎ ಮತ್ತು ಬಿ ಸುಮಾರು 4.36 ಜ್ಯೋತಿರ್ವರ್ಷಗಳಷ್ಟು ದೂರದಲ್ಲಿದೆ. ಅದರ ನಂತರದ ಸಮೀಪದ “ಬರ್ನಾರ್ಡನ ನಕ್ಷತ್ರ” ಸುಮಾರು 5.96 ಜ್ಯೋತಿರ್ವರ್ಷಗಳಷ್ಟು ದೂರದಲ್ಲಿದೆ. ಹೀಗೇ ಜಗತ್ತು ಹರಡಿಕೊಂಡಿದೆ. ಆದರೆ ಈ ಇರಿಡಾನಿಸ್ ಸೂಪರ್-ವಾಯ್ಡ್ ಅದೆಷ್ಟು ದೊಡ್ಡದೆಂದರೆ ಒಂದು ಅಂಚಿನಿಂದ ಇನ್ನೊಂದು ಅಂಚು ತಲುಪಲು ಬೆಳಕಿಗೇ 1.8ಶತಕೋಟಿ ವರ್ಷಗಳು ಬೇಕಂತೆ! ಕಲಾವಿದನ ಕುಂಚದಲ್ಲಿ ಈ ಸೂಪರ್ ವಾಯ್ಡ್ ಕೆಳಗಿನಂತೆ ಕಂಡುಬರುತ್ತದೆ.

maxresdefault
Eridanus Srperviod

ನಮ್ಮ ಮಿಲ್ಕಿವೇ ಗೆಲಾಕ್ಸಿಯಿಂದ 3 ಶತಕೋಟಿ ಜ್ಯೋತಿರ್ವರ್ಷಗಳಷ್ಟು ದೂರದಲ್ಲಿರುವ ಈ ಖಾಲಿ ಸೈಟಿನ ಇರುವಿಕೆಯ ಬಗ್ಗೆ ಹಲವಾರು ಊಹಾಪೋಹಗಳಿವೆ. ಯಾಕೆಂದರೆ ಇದನ್ನು ಯಾರೂ ಸಹ ‘ಕಣ್ಣಿಂದ ಕಂಡಿಲ್ಲ’. Cosmic Microwave Backgroundನ ಮೂಲಕ ವಿಶ್ವದ ಉಷ್ಣತೆಯನ್ನು ಅಳೆದಾಗ, ಅಲ್ಲೊಂದಷ್ಟು ಜಾಗದಲ್ಲಿ ವಿಶ್ವದ ಉಳಿದ ಭಾಗಗಳಿಗಿಂತಾ ಉಷ್ಣತೆ ಸ್ವಲ್ಪ “ಹೆಚ್ಚಾಗಿಯೇ” ಕಡಿಮೆಯಿದೆಯೆಂದು ತಿಳಿದುಬಂತು. ಆದ್ದರಿಂದ ಇದಕ್ಕೆ CMB ColdSpot ಅಂತಲೂ ಹೆಸರಿದೆ (ಚಿತ್ರ – 2 ಕೆಳಗಿದೆ). ಅಧ್ಯಯನಗಳು ಮುಂದುವರೆದಂತೆ ಈ ರೀತಿಯ ಕೋಲ್ಡ್-ಸ್ಪಾಟ್’ಗಳು ಅಥವಾ ‘ವಾಯ್ಡ್’ಗಳು ಬಹಳೆಡೆ ಇರುವುದು ಕಂಡು ಬಂತು. ಆದರೆ ಇಷ್ಟು ದೊಡ್ಡದಾದ ಹೊಂಡವೊಂದು ಇರುವುದು ಇದೊಂದೇ. ಗಾತ್ರದ ಪಟ್ಟಿಯಲ್ಲಿ ಇದರ ನಂತರದ ಸ್ಥಾನ ಪಡೆದಿರುವ ವಾಯ್ಡ್, ಇದರ ಕಾಲುಭಾಗದಷ್ಟೂ ಇಲ್ಲ. ಅಷ್ಟೂ ದೊಡ್ಡದು ಈ ಸೂಪರ್ವಾಯ್ಡ್!!

Pic 2
CMB Coldspot

ಇದಕ್ಕೆ ಕಾರಣಗಳು ಹಲವಾರು ಇರಬಹುದೆಂದು ಅಂದಾಜಿಸಲಾಗಿದೆ. ಡಾರ್ಕ್ ಮ್ಯಾಟರ್ ಎಂದು ಕರೆಯಲಾಗುವ ಬಾಹ್ಯಾಕಾಶದ ಇನ್ನೊಂದು ಸೋಜಿಗವೂ ಇದಕ್ಕೊಂದು ಕಾರಣವಿರಬಹುದು ಎಂಬ ಥಿಯರಿಗಳಿವೆ. ಇದು ಕಾಲ-ಸಮಯದ ಹಿಗ್ಗುಕುಗ್ಗುವಿಕೆಯಿಂದ ಬಾಹ್ಯಾಕಾಶದಲ್ಲಿ ಸೃಷ್ಟಿಯಾಗಿರುವ ತೂತು ಹಾಗೂ ಇನ್ನೊಂದು ‘ಸಮಾನಾಂತರ ಬ್ರಹ್ಮಾಂಡ’ಕ್ಕೆ (parallel universe) ಹೆಬ್ಬಾಗಿಲಿದ್ದರೂ ಇರಬಹುದು ಎಂಬ ಇನ್ನೊಂದು ಥಿಯರಿಯೂ ಇದೆ. ಇದರ ಕಾರಣಗಳ ಬಗ್ಗೆ ನಾನು ಬರೆಯುವಿದಕ್ಕಿಂತಾ ನಮ್ಮ ಸ್ನೇಹಿತ ‘ವಿಜ್ಞಾನ ವ್ಯಾಸ’ ರೋಹಿತ್ Chakrathirtha ಬರೆದರೆ ಬಹುಷಃ ಚೆನ್ನಾಗಿರುತ್ತದೆ. ಆತ ಈ ವಿಷಯಕ್ಕೆ ಹೆಚ್ಚು ನ್ಯಾಯ ಒದಗಿಸಬಹುದೇನೋ.

ಒಟ್ಟಿನಲ್ಲಿ ಖಾಲಿ ಖಾಲಿ ಬ್ರಹ್ಮಾಂಡದಲ್ಲಿ ಹೀಗೊಂದು ಅತೀಖಾಲಿ ಪ್ರದೇಶವೂ ಇದೆಯಂತೆ. “ಬೆಂಗಳೂರಿನ ರೆಡ್ಡಿಗಳಿಗೆ ಈ ವಿಷಯ ಹೇಳಬೇಡಿ. ಅಲ್ಲೂ ಒಂದಷ್ಟು ಸೈಟು ಮಾಡಿ ಮಾರಿಯಾರು” ಎಂಬ ಕೆಟ್ಟ ಜೋಕು ಹೊಡೆಯೋದಿಲ್ಲ ಬಿಡಿ 😛 😉

ಇನ್ನೊಂದು ಮಜಾ ಅಂದ್ರೆ, ನಮ್ಮ ಪೂರ್ವಜರು ಬ್ರಹ್ಮಾಂಡ ಅನ್ನೋ ಪದ ಹೆಂಗೆ ಸೃಷ್ಟಿ ಮಾಡಿದರೋ ಗೊತ್ತಿಲ್ಲ. ಆದರೆ ಇವತ್ತಿಗೆ ಸಧ್ಯ ಲಭ್ಯವಿರುವ ಎಲ್ಲಾ ತಂತ್ರಜ್ಞಾನಗಳನ್ನೂ ಬಳಸಿ ಇಡೀ ಗೋಚರ ವಿಶ್ವ (Observable Universe)ವನ್ನು ನಮ್ಮ ವಿಜ್ಞಾನಿಗಳು ಮ್ಯಾಪ್ ಮಾಡಿದ್ದಾರೆ. ಗೋಚರ ವಿಶ್ವದ ಶೇಪೂ ಸಹಾ ಒಂದು ಮೊಟ್ಟೆಯ ಆಕಾರದಲ್ಲೇ ಇದೆ ಮಾರಾಯ್ರೆ!! ಕೆಳಗೆ ನೋಡಿ! 🙂

BrahmaanDa
Observable Universe
Advertisements

ಚಿತ್ರ ಶಕ್ತಿ‬ – ೧೩

“ಉದಯಾಸ್ಥಮಾನ”

ಈ ಶತಮಾನದಲ್ಲಿ ಜಗತ್ತಿನಲ್ಲಿ ಅತ್ಯಂತ ಶಕ್ತಿಶಾಲಿಯಾದ ಶಾಸ್ತ್ರವೆಂದರೆ ಅರ್ಥಶಾಸ್ತ್ರ. ನಾವೇ ಕಂಡುಹಿಡಿದು, ನಮ್ಮ ನಿಯಂತ್ರಣದಲ್ಲೇ ಇದ್ದಿದ್ದು ಈಗ ಭ್ಹಸ್ಮಾಸುರನಂತಾಗಿ ಇಡೀ ಜಗತ್ತನ್ನು ನಿಯಂತ್ರಿಸುತ್ತಿರುವುದು ದುಡ್ಡು. ಅದರಲ್ಲೂ ಬ್ಯಾಂಕು, ಲೇವಾದೇವಿದಾರರು, ಬ್ರೋಕರುಗಳೆಂಬ ದ್ವಾರಪಾಲಕರು ಈ ಭಸ್ಮಾಸುರನ ದೇವಳ ಸೇರಿದಮೇಲೆ, ಇಡೀ ಜಗತ್ತು ಕಮಲದಮೇಲೆ ಮಲಗಿರೋ ವಿಷ್ಣುವಿನಂತೆ ಅತೀ ಸೂಕ್ಷ್ಮವಾಗಿದೆ. ಯಾರೋ ಎಲ್ಲೋ ಮಾಡಿದ ತಪ್ಪು ಲೆಕ್ಕಾಚಾರ ಇಡೀ ಅರ್ಥವ್ಯವಸ್ಥೆಯನ್ನೇ ಬುಡಮೇಲು ಮಾಡಬಲ್ಲುದು. ಅಲಾಸ್ಕದಲ್ಲಿ ಸಹಕಾರೀ ಬ್ಯಾಂಕೊಂದು ದಿವಾಳಿಯಾದರೆ, ಮನಿಲಾದಲ್ಲಿ ಕೆಲಸಗಾರರ ತಲೆಯುರುಳುತ್ತದೆ.

ಇತ್ತೀಚೆಗೆ ನಾವುಕಂಡ ಅತ್ಯಂತ ದೊಡ್ಡ ಆರ್ಥಿಕ ತಳಮಳ ಅಂದರೆ 2008ರದ್ದು. ಅಮೇರಿಕದ ಸಬ್-ಪ್ರೈಮ್ ಕ್ರಂಚ್, ಹಿಮಚೆಂಡಿನಂತೆ ಉರುಳುತ್ತಾ ಉರುಳುತ್ತಾ, ಹಿಗ್ಗಿ, ಲಕ್ಷಾಂತರ ಜನರು ಕೆಲಸಕಳೆದುಕೊಂಡು ಈಗ ಎಂಟುವರ್ಷದ ನಂತರ ಸ್ವಲ್ಪ ಸುಧಾರಿಸಿಕೊಳ್ಳುತ್ತಾ ಇದ್ದಾರೆ. 2008ರ ತಳಮಳ ಅಫೀಷಿಯಲ್ಲಾಗಿ ಶುರುವಾಗಿದ್ದು, ಲೆಹ್ಮನ್ ಬ್ರದರ್ಸ್ ಎಂಬ ಕಂಪನಿ ತಾನು ಆರ್ಥಿಕವಾಗಿ ದಿವಾಳಿಹೊಂದಿದ್ದೇನೆ ಎಂದು ಘೋಷಿಸಿದಾಗ. ಅಮೇರಿಕಾದ ಅರ್ಧಕ್ಕರ್ಧ ರಾಕ್ಷಸ ಕಂಪನಿಗಳ ಹಣೇಬರಹ ಬರೆಯೋದು ಈ ಲೆಹ್ಮನ್ ಬ್ರದರ್ಸ್ ಎಂಬ ಕಂಪನಿಯೇ. ರಾವಣ ಮುಳುಗಿದಾಗ ಇಡೀ ಲಂಕೆಯನ್ನೇ ಮುಳುಗಿಸಿದಂತೆ, ಲೆಕ್ಮನ್ ಬ್ರದರ್ಸ್’ನ ದಿವಾಳಿ ಸುದ್ಧಿ, ಇಡೀ ಆರ್ಥಿಕ ವ್ಯವಸ್ಥೆಯನ್ನೇ ದಿವಾಳಿಯೆಬ್ಬಿಸಿತು.

ಸೆಪ್ಟೆಂಬರ್ 2008ರಂದು ದಿವಾಳಿಘೋಷಣೆಯಾದ ದಿನ, ಕ್ಯಾನರಿ ವಾರ್ಫಿನಲ್ಲಿರುವ ಲೆಹ್ಮನ್ ಬ್ರದರ್ಸಿನ ಆಫೀಸಿನ ಉದ್ಯೋಗಿಗಳಿಗೆ ಮೇಲಧಿಕಾರಿಗಳು ವಿಷಯ ತಿಳಿಸುತ್ತಿರುವಾಗ ತೆಗೆದ ಈ ಚಿತ್ರ, ಪರಿಸ್ಥಿತಿಯ ಗಂಭೀರತೆಗೆ ಕನ್ನಡಿ ಹಿಡಿದಂತಿದೆ.

Staff members stand in a meeting room at Lehman Brothers offices in the financial district of Canary Wharf in London in September, 2008 during the stock market crash and financial crisis.

ಎಂತ ಸೌಂದರ್ಯ ಕಂಡೆ!

ಹನ್ನೆರಡನೇ ಶತಮಾನದ “ಗಣೇಶ ಮತ್ತಿಬ್ಬರು ವಿಧ್ಯಾದರರ” ವಿಗ್ರಹ. ಪಾಲ ಸಾಮ್ರಾಜ್ಯದ ಕುರುಹು.

The bejeweled elephant-headed God of Plenty, dancing on a plinth with his rat vehicle beneath, holding his attributes the battle axe and a bowl of sweets. He lassoes a serpent above his head as two “vidyadharas” look on from either side. The apex of the stele is ornamented with a bunch of ripe mangoes.
A rare gem from 12th Century, Pala period. Last sold by Sotheby’s at $20,000

Ganesha - Sotheby's 20000 USD

ದಾಸರು, ಸರ್ವಜ್ಞ, ಶರೀಫಜ್ಜ ಮತ್ತು ಟೇಪ್ ರೆಕಾರ್ಡರು

ನಂಗಂತೂ ವಿದ್ಯಾಭೂಷಣರ ಮೇಲೆ ಹಾಗೂ ಪುತ್ತೂರು ನರಸಿಂಹ ನಾಯಕರ ಮೇಲೆ ಭಯಂಕರ ಕೋಪವುಂಟು. ಚಿಕ್ಕವನಿದ್ದಾಗಲಿಂದಲೂ ಮನೆಯಲ್ಲಿ ಬೆಳಿಗ್ಗೆ ಭಕ್ತಿಗೀತೆ ಕ್ಯಾಸೆಟ್ ಹಾಕಿದಾಗ, ವಾರಕ್ಕೆರಡು ಸಾರಿ ಇವರ ಹಾಡುಗಳು ಕೇಳುಬರ್ತಾ ಇದ್ವು. ಅವರ ಹಾಡುಗಳನ್ನ ಕೇಳಿ ಕೇಳಿ, ನನಗಂತಲ್ಲ, I am sure, ನಿಮಗೂ ಸಹ ‘ದಾಸನಾಗು ವಿಶೇಷನಾಗು’ ಅನ್ನೋ ಸಾಲುಗಳು ಎಲ್ಲಾದ್ರೂ ಬರೆದಿದ್ದು ಕಂಡ್ರೂ, ಅವರದೇ ಹಾಡಿನ ಟ್ಯೂನ್ ಮನಸಲ್ಲಿ ಓಡುತ್ತೇ ಹೊರತು ಆ ಸಾಲುಗಳು ಬರೀ ಸಾಲುಗಳಾಗಿ ಹೊಳೆಯುತ್ತವೆಯೇ? ಅಂದರೆ, ಕನಕದಾಸರ ಆ ಇಡೀ ರಚನೆಯನ್ನು ಬೇರೆ ಯಾವ ರೀತಿಯಲ್ಲೂ ನಿಮಗೆ ಗ್ರಹಿಸಲು ಸಾಧ್ಯವೇ ಇಲ್ಲ. ಎಲ್ಲೋ ಅಲ್ಪ ಸ್ವಲ್ಪ ಸಾದ್ಯವಾದರೂ, ಅಲ್ಲೆಲ್ಲೋ ಹಿಂದೆ ನಿಮ್ಮ ಮನಸ್ಸಿನಲ್ಲಿ ಆ ಆಲಾಪ ಕೇಳಿಬರುತ್ತಾ ಇರುತ್ತೆ.

ನನಗೆ ಇವರಿಬ್ಬರ ಮೇಲೆ ಸಿಟ್ಟು ಇದಕ್ಕೇ. ಕನಕ, ಪುರಂದರ, ಸರ್ವಜ್ಞ ಮಾತು ಶರೀಫರು, ಈ ನಾಲ್ಕು ಜನರ ರಚನೆಗಳನ್ನ ಅರ್ಥೈಸಿಕೊಳ್ಳಲಿಕ್ಕೆ ಒಂದು ಬಾರಿಯ ಕೇಳುವಿಕೆ ಯಾವ ಮೂಲೆಗೂ ಸಾಲಲ್ಲ. ಮತ್ತೆ ಮತ್ತೆ ಕೇಳ್ಬೇಕು. ಒಂದೈದು ಸಲ ಕೇಳಿದ್ಮೇಲೆ “ಓಹ್!!!! ಇದು ಹಿಂಗೆ” ಅನ್ಸುತ್ತೆ. ಇನ್ನೊಂದೆರಡು ಸಲ ಕೇಳಿ “ಓಹೋ!! ಇಹು ಹಿಂಗೂ ಇದೆ” ಅನ್ಸುತ್ತೆ. ಓದಿ ಅರ್ಥ ಮಾಡ್ಕೊಳ್ಳೋದೇ ಇಷ್ಟು ಕಷ್ಟ. ಇನ್ನು ಇವರ ರಚನೆಗಳಿಗೆ ತಮ್ಮ ಜೇನಿನಂತ ಧ್ವನಿ ಸೇರಿಸಿ ಅದನ್ನು ಪೂರ್ತಿ ಕರ್ಣಾನಂದಕರ ಗೀತೆಯನ್ನಾಗಿ ಮಾಡ್ತಾರಲ್ಲ…..ಸರಿಯಿಲ್ಲ ರೀ ಇವ್ರು. ನಾನು ನೀವು ಓಕೆ ಹೆಂಗೋ ಸ್ವಲ್ಪ ಓದ್ತೀವಿ. ಆದರೆ ಉಳಿದ 95% ಜನ ಇದನ್ನೊಂದು ಭಕ್ತಿಗೀತೆ ಅಂತಾ ‘ಕೇಳಿ’ ಮುಂದೆ ಹೋಗ್ತಾರೆ, ಅಷ್ಟೇ ಹೊರತು ಅದರ ನಿಜವಾದ ತಿರುಳನ್ನು ಯಾವತ್ತಿಗೂ ಅರ್ಥೈಸಿಕೊಳ್ಳಲ್ಲ.

ಅಡಿಗರದ್ದೋ, ಕೆ.ಎಸ್.ನ ಅವರದ್ದೋ ಹಾಡುಗಳಿಗೂ ಇದೇ ಗತಿಯಾಗುತ್ತೆ ಅಂತಿಲ್ಲ. ಸಿ.ಅಶ್ವತ್ಥ್ ಸರ್ ಸ್ವಲ್ಪ ಲೋ ಪಿಚ್ಚಿನಲ್ಲಿ ‘ನೀ ಹಿಂಗs ನೋಡಬ್ಯಾಡ ನನ್ನ’ ಅಂದ್ರೆ ಗೊತ್ತಾಗಿಬಿಡುತ್ತೆ ಅದೊಂದು ಶೋಕಗೀತೆ ಅಂತಾ. ಒಂದ್ಸಲ ಅದು ಗೊತ್ತಾದ ಮೇಲೆ, ಎರಡನೇ ಸಲಕ್ಕೆ ಜನ ಅದರ ಲಿರಿಕ್ಸಿಗೆ ಗಮನ ಕೊಡ್ತಾರೆ. ಎಂಡಿ ಪಲ್ಲವಿ ಮೃದುವಾಗಿ ‘ನನ್ನ ಇನಿಯನ ನೆಲೆಯ ಬಲ್ಲೆಯೇನೇ…’ ಅಂದಕೂಡ್ಲೇ ಗೊತ್ತಾಗುತ್ತೆ ಲಕ್ಷ್ಮೀನಾರಾಯಣ ಭಟ್ರು ಈ ಹಾಡಿನಲ್ಲಿ ಹೆಣ್ಣಿನ ಅಳಲನ್ನು ವಿಶದವಾಗಿ ಹೇಳಿದ್ದಾರೆ ಅಂತಾ.

ದಾಸರದ್ದು ಹಂಗಲ್ಲ. ಅದು ಕೃಷ್ಣನ ನೆನೆಯುವ ಪ್ರೇಮಗೀತೆಯೂ ಹೌದು, ಜೀವನಾನುಭವವೂ ಹೌದು, ತತ್ವವೂ ಹೌದು, ಪ್ರತಿಸಾಮಾನ್ಯನನ್ನು ತಲುಪಬಲ್ಲ ರಸಾಮೃತವೂ ಹೌದು. ಅದನ್ನು ಕೇಳಿ ಅರ್ಥಸಿಕೊಳ್ಳದಿದ್ದರೆ, ಅದೆಂತಾ ನಷ್ಟ ಅಲ್ವೇ!
“ದಾರದಿ ಕಟ್ಟಿಲ್ಲ ಮಾರು ಹಾಕುವುದಲ್ಲ
ಕೇರಿ ಕೇರಿಗಳಲ್ಲಿ ಮಾರುವುದಲ್ಲ
ಭೂರಿ ಭಕುತಿಯೆಂಬ ಭಾರಿಯ ಬೆಳಗಿದ
ಮಾರೆಂದು ಪೇಳಿದ ಶೌರಿಯ ಸೊಬಗಿನ…..ಹೂ ಬೇಕೇ ಪರಿಮಳದ
ಪರಮ ಪುರುಷ ನಮ್ಮ ಕೃಷ್ಣನ ತೋಟದ
ಹೂ ಬೇಕೇ” ಅನ್ನೋ ಈ ಹಾಡಿನ ಪದಗಳನ್ನ ಯಾರಾದ್ರೂ ಗಮನಿಸಿರ್ತಾರಾ!? ಅದನ್ನದೆಷ್ಟು ಜನ ಅರ್ಥೈಸಿಕೊಂಡಿರಬಹುದು? ಗಮನಿಸದೇ ಈ ಅನರ್ಘ್ಯಪದಗಳನ್ನ ಕಳಕೊಂಡವರೆಷ್ಟು ಜನ!

ಇಲ್ಲೊಂದು ಪುರಂದರದಾಸರ ರಚನೆ ನೋಡಿ. ಇದನ್ನೆಲ್ಲಾ ಟೇಪ್ ರೆಕಾರ್ಡರಿನಲ್ಲಿ ಇಂಪಾದ ಹಾಡಿನ ಮೂಲಕ ಕೇಳಿ ಅರ್ಥೈಸ್ಕೊಳ್ಳೋ ಭಾಗ್ಯ ಎಷ್ಟು ಜನಕ್ಕಿರುತ್ತೆ ಹೇಳಿ 🙂 ಇದಕ್ಕೇ ನಂಗೆ ವಿದ್ಯಾಭೂಷಣರ ಮೇಲೆ ನರಸಿಂಹನಾಯಕರ ಮೇಲೆ ಸಿಟ್ಟು 🙂 ನಿಮಗೆ!?

12743827_986740784749200_2581252490178379716_n

ಚಿತ್ರ ಶಕ್ತಿ‬ – ೧೨

“ಕರ್ಣಾನಂದ”

ಜಗತ್ತನ್ನು ಪಂಚೇಂದ್ರಿಯಗಳಿಂದ ಆನಂದಿಸೋ ನಮಗೆ ಐದರಲ್ಲಿ ಒಂದೇ ಒಂದು ಇಂದ್ರಿಯ ಕೈ ಕೊಟ್ರೂ, ಜಗತ್ತೇ ಅರ್ಧ ಮುಳುಗಿ ಹೋದಂತೆ ಅನ್ನಿಸುತ್ತೆ. ಅಂತಾದ್ರಲ್ಲಿ, ನಿಮ್ಮ ಸುತ್ತಲಿನಲ್ಲೇ ಸಂಪೂರ್ಣ ಕಿವಿಯೇ ಕೇಳದೇ ಇರುವವರು ಅಥವಾ ಎರಡೂ ಕಣ್ಣು ಕಾಣದೇ ಇರುವವರೋ ಇದ್ದರೆ ಅವರ ಪರಿಸ್ಥಿತಿಯನ್ನೊಮ್ಮೆ ಊಹಿಸಿಕೊಳ್ಳಿ. ನಿಜವಾಗ್ಯೂ ಹೇಳಬೇಕೆಂದರೆ ಅವರ ನೋವನ್ನು ಅರ್ಥೈಸಿಕೊಳ್ಳುವುದು ಯಾರಿಗೂ ಸಾಧ್ಯವಿಲ್ಲ. ಯಾಕೆಂದರೆ ಸಂಪೂರ್ಣ ಕಿವುಡಾಗಿರುವುದು ಅಥವಾ ಕುರುಡಾಗಿರುವುದೇನೆಂದರೆ ನಮಗ್ಯಾರಿಗೂ ಗೊತ್ತಿಲ್ಲ. ಅದನ್ನು ಅರ್ಥೈಸಿಕೊಳ್ಳಬೇಕಾದರೆ ಬಹಳ ಆಳವಾದ ಸಹಾನುಭೂತಿ ಬೇಕಾಗುತ್ತದೆ.

ಹತ್ತೊಂಬತ್ತನೆಯ ಶತಮಾನದ ಅಂಚಿನವರೆಗೂ ಕಿವುಡು ಹಾಗೂ ಕುರುಡು ಸ್ಥಿತಿಗಳು ಗುಣಪಡಿಸಲೇ ಆಗದವು ಎಂಬ ಸ್ಥಿತಿಯಿತ್ತು. ತಂತ್ರಜ್ಞಾನದ ಬೆಳವಣಿಗೆಯೊಂದಿಗೆ ನಿಧಾನವಾಗಿ ಇದು ಸುಧಾರಿಸಿತು. ಜಗತ್ತಿನ ಒಂದಂಶದ ಅನುಭೂತಿಯನ್ನೇ ಕಳೆದುಕೊಂಡವರಿಗೆ ಈ ಸುಂದರ ಜಗತ್ತನ್ನು ನೋಡುವ, ಅನುಭವಿಸುವ ಅವಕಾಶಗಳು ಸಿಗಲಾರಂಭಿಸಿದವು. ನೇತ್ರಶಸ್ತ್ರಚಿಕಿತ್ಸೆಗಳು ಕುರುಡಾಗಿದ್ದರಿಗೆ ಈ ವರ್ಣಮಯ ಜಗತ್ತನ್ನು ನೋಡುವ ಭಾಗ್ಯ ಒದಗಿಸಿದರೆ, “ಕಾಕ್ಲಿಯರ್ ಇಂಪ್ಲಾಟ್” ಎಂಬ ತಂತ್ರಜ್ಞಾನ ಸಂಪೂರ್ಣ ಕಿವುಡಾದವರಿಗೆ ಮೊತ್ತಮೊದಲ ಬಾರಿಗೆ ಜಗತ್ತಿನ ಶಬ್ಧಗಳನ್ನು ಆನಂದಿಸುವ ಅವಕಾಶ ಒದಗಿಸಿತು. ಈ ಕಾಕ್ಲಿಯರ್ ಇಂಪ್ಲಾಂಟುಗಳು ಆಗಿನ್ನೂ ಬಾಲ್ಯಾವಸ್ಥೆಯಲ್ಲಿದ್ದಾಗ, ಹುಟ್ಟುಗಿವುಡನಾಗಿದ್ದ ಹೆರಲ್ಡ್ ವಿಟ್ಲ್ಸ್ (Harold Whittles) ಎಂಬ ಬಾಲಕನಿಗೆ ಮೊತ್ತಮೊದಲ ಬಾರಿಗೆ ಶಬ್ದವೊಂದನ್ನು ಕೇಳಿಸಿದಾಗ, ಜಾಕ್ ಬ್ರಾಡ್ಲೀ ತೆಗೆದ ಈ ಚಿತ್ರ, ಆ ಬಾಲಕನಲ್ಲಿ ಒಮ್ಮೆಗೇ ಸಿಡಿದ ಸಹಸ್ರ ಸಂತಸದ ಬುಗ್ಗೆಗಳನ್ನು ಅದೆಷ್ಟು ಚೆನ್ನಾಗಿ ಸೆರೆಹಿಡಿದಿದೆ ನೋಡಿ!

Harold Whittles hears for the first time ever after a doctor places an earpiece in his left ear

ಹೆರಾಲ್ಡನ ಕಣ್ಣಿನ ಪ್ರತಿ ಇಂಚೂ ಸಹ, ಅವನ ಅವರ್ಣನೀಯ ಆನಂದವನ್ನು ಹನಿಹನಿಯಾಗಿ ವಿವರಿಸುವ ಪ್ರಯತ್ನವನ್ನು ಮಾಡುತ್ತಿದೆ.

ಜೀವನವಿಡೀ ಮೌನದೊಂದಿಗೇ ಸಂಸಾರ ಮಾಡಿದವರು, ಶಬ್ದವನ್ನು ಮೊದಲ ಬಾರಿಗೆ ಅನುಭವಿಸಿದಾಗ ಅವರ ಪ್ರತಿಕ್ರಿಯೆ ನೋಡಬೇಕೆಂದರೆ ಈ ಕೆಳಗಿನ ಕೊಂಡಿಯನ್ನು ನೋಡಿ. (ಶಾಸನ ವಿಧಿಸಿದ ಎಚ್ಚರಿಕೆ: ಕೈಯಲ್ಲಿ ಕರ್ಚೀಫು, ಟಿಶ್ಯೂ ಪೇಪರ್ ಹಿಡ್ಕಂಡಿರಿ)

ಚಿತ್ರ ಶಕ್ತಿ‬ – ೧೧

“ಅಮ್ಮ ಬಂದ್ಲು”

ಮೊನ್ನೆ ಸೂಪರ್ ಮಾರ್ಕೆಟ್ಟಿನಲ್ಲಿ ಎರಡು ವರ್ಷದ ಒಂದು ಮಗು ಅಮ್ಮನ ಕೈಯಿಂದ ತಪ್ಪಿಸಿಕೊಂಡು, ಮಮ್ಮೀsss ಅಂತಾ ಅಳ್ತಾ ಓಡಾಡ್ತಾ ಇತ್ತು. ಒಂದು ನಿಮಿಷ ಪಕ್ಕದಲ್ಲಿ ಅಮ್ಮ ಇಲ್ಲ ಅಂದ್ರೆ ಹೆಂಗೆ ನೀರಿನಿಂದ ಹೊರಗೆ ತೆಗೆದ ಮೀನಿನಂತಾಗಿ ಬಿಡ್ತೀವಲ್ವಾ ನಾವು?

ಮೇಜರ್ ಟೆರ್ರಿ ಗುರ್ರೊಲಾ ಇರಾಕಿನಲ್ಲಿ ಏಳು ತಿಂಗಳು ಪೋಸ್ಟಿಂಗ್ ಮುಗಿಸಿ ವಾಪಾಸುಬಂದಾಗ, ಅಕೆಯ ಗಂಡ ಜಾರ್ಜ್ ಮತ್ತು ಮಗಳು ಗ್ಯಾಬಿ ಏರ್ರ್ಪೋಟಿನಲ್ಲಿ ಕಾಯುತ್ತಿದ್ದರು. ಎರಡು ವರ್ಷದ ಮಗಳನ್ನು ಬಿಟ್ಟು ಯುದ್ಧಭೂಮಿಗೆ ಹೋಗುವುದು ತಾಯಿಯೊಬ್ಬಳಿಗೆ ಅದೆಷ್ಟು ನೋವಿನ ಕೆಲಸ ಎಂಬುದು, 11 ಸೆಪ್ಟೆಂಬರ್ 2007ರ ಆ ದಿನ ಅಟ್ಲಾಂಟದ ಏರ್ಪೋರ್ಟಿನಲ್ಲಿರುವ ಪ್ರತಿಯೊಬ್ಬ ವ್ಯಕ್ತಿಗೂ ತಿಳಿಯಿತು. ಅಮ್ಮನ ನೋಡಿದ ಕೂಡಲೇ ಗ್ಯಾಬಿ, “ಮಮ್ಮೀ….ಐ ಮಿಸ್ಡ್ ಯೂ” ಅಂತಾ ಓಡಿಬಂದಳು. ಎರಡು ವರ್ಷದ ಕೂಸದು. ಏಳು ತಿಂಗಳು ತನ್ನನ್ನು ಅಮ್ಮ ಬಿಟ್ಟು ಹೋಗಿದ್ದರೂ, ತನ್ನನ್ನು ಸ್ವಲ್ಪವೂ ಮರೆಯದೇ, ಒಂದೇ ಕ್ಷಣದಲ್ಲೇ ಗುರುತಿಸಿದ ಮಗಳನ್ನು ನೋಡಿ ಟೆರ್ರಿ ನೆಲಕ್ಕೆ ಕುಸಿದು, ಗ್ಯಾಬಿಯನ್ನು ತಬ್ಬಿ ಹಿಡಿದು, ಒಂದೇಸಮನೆ ಅತ್ತು, ನಾಲ್ಕು ನಿಮಿಷದ ನಂತರ ಸುಧಾರಿಸಿಕೊಂಡು ಎದ್ದುನಿಂತಾಗ, ಆಕೆಗೆ ಕಂಡದ್ದು ತೇವಗೊಂಡ ಸಾವಿರಾರು ಕಣ್ಣುಗಳು. “ಇಡೀ ಏರ್ಪೋರ್ಟಿನಲ್ಲಿರುವ ಪ್ರತಿಯೊಬ್ಬ ವ್ಯಕ್ತಿ….ನಾನು ತಮಾಷೆಗೆ ಹೇಳುತ್ತಿಲ್ಲಾ….ಪ್ರತಿಯೊಬ್ಬ ಗಂಡಸು, ಹೆಂಗಸು, ಮಗುವಿನ ಕಣ್ಣುಗಳು ತೇವಗೊಂಡಿದ್ದವು” ಅಂತಾರೆ ಟೆರ್ರಿ.

ಯುದ್ಧದ ದುಃಖತಪ್ತ ಮುಖವನ್ನು ತೋರಿಸುವ ಈ ಚಿತ್ರ, ತಾಯಿಮಗುವಿನ ಬಾಂಧವ್ಯವನ್ನೂ ಮಾತಿಲ್ಲದೇ ಸಾರುತ್ತದೆ. ತಾಯಿ ಮಗಳು ಇಬ್ಬರೂ ಜಗತ್ತನ್ನು ಮರೆತ ಒಂದು ಕ್ಷಣ, ಇತಿಹಾಸದ ಶಕ್ತಿಶಾಲಿ ಚಿತ್ರಗಳಲ್ಲೊಂದಾಯ್ತು.

10329048_984236591666286_2402200037685426014_n

ಚಿತ್ರ ಶಕ್ತಿ‬ – ೧೦

“ಬಾನದಾರಿಯಲ್ಲಿ ಭೂಮಿ ಮೇಲೆ ಬಂದ್ಳು….”

ನನಗೆ “ಸತ್ಯ”ಗಳನ್ನು ಪ್ರಶ್ನಿಸಿ, ಅದನ್ನು ಹಿಂದೆ ಮುಂದೆ ಮೇಲೆ ಕೆಳಗೆ ತಿರುಗಿಸಿ ಎಲ್ಲಾ ಕೋನಗಳಿಂದ ನೋಡಿ, ಕೆಲವೊಮ್ಮೆ ಅಸಾಧ್ಯದಿಕ್ಕಿನಿಂದಲೂ ನೋಡಲು ಪ್ರಯತ್ನಿಸುವುದೆಂದರೆ ಏನೋ ಒಂತರಾ ವಿಕೃತ ಆನಂದ. ಕಾಲೇಜಿನಲ್ಲಿ ಕೆಮಿಸ್ಟ್ರಿ ಲೆಕ್ಚರರ್ರು “ಸಲ್ಫ್ಯೂರಿಕ್ ಆಸಿಡ್ ಅನ್ನು ನೀರಿಗೆ ಬೆರೆಸಬೇಕು. ನೀರನ್ನು ಆಸಿಡ್ಡಿಗೆ ಬೆರೆಸಬಾರದು” ಅಂತಾ ಹೇಳಿದ್ರೂ ಸಹ, “ಅಯ್ಯೋ ಮಿಕ್ಸಿಂಗ್ ಅಂದಮೇಲೆ ಮಿಕ್ಸಿಂಗಪ್ಪಾ. ಅದರಲ್ಲೇನು ಅಸಿಡ್ ಅನ್ನು ನೀರಿಗೆ ಹಾಕಬೇಕು, ನೀರನ್ನು ಆಸಿಡ್ಡಿಗೆ ಹಾಕಬಾರದು ಅಂತೆಲ್ಲಾ ವಿಂಗಡಣೆ!! ಈ ಮೇಸ್ಟ್ರು ಸುಮ್ನೆ ಏನೇನೋ ಹೇಳ್ತಾರೆ” ಅಂತಾ ಮನಸ್ಸಲ್ಲೇ ಬೈದು, ಟೆಸ್ಟ್-ಟ್ಯೂಬಲ್ಲಿ ಸಲ್ಫ್ಯೂರಿಕ್ ಆಸಿಡ್ ತಗಂಡು, ಅದಕ್ಕೆ ಎರಡು ಹನಿ ನೀರು ಹಾಕಿದ್ದೆ. ಮುಂದಿನ ಕಥೆ ನೀವು ಕೇಳಬಾರ್ದು ನಾನು ಹೇಳಬಾರ್ದು. ಒಟ್ನಲ್ಲಿ ಕಣ್ಣು 2ಮಿಲೀಮೀಟರ್ ದೂರದಲ್ಲಿ ಬಚಾವಾಯ್ತು ಅಂತ ಹೇಳಬಲ್ಲೆ ಅಷ್ಟೇ. ಆಮೇಲೆ ಯಾಕೆ ಆಸಿಡ್ಡನ್ನ ನೀರಿಗೆ ಬೆರೆಸಬೇಕು ಅಂತಾ ತಿಳ್ಕಂಡು ಅರ್ಥಮಾಡ್ಕಂಡೆ ಬಿಡಿ, ಅದು ಬೇರೆ ಕಥೆ.

ವಿಷಯಗಳನ್ನು ಅವುಗಳ ಚೌಕಟ್ಟಿನಿಂದ ಹೊರಬಂದು ನೋಡುವುದರಲ್ಲಿರುವ ಆನಂದ, ಬೇರೆಲ್ಲೂ ಸಿಗುವುದಿಲ್ಲ. ದಿನಾ ನಾವು ಸೂರ್ಯೋದಯ ನೋಡ್ತೀವಿ, ಸೂರ್ಯಾಸ್ತ ನೋಡ್ತೀವಿ. ಅದೇ ಸೂರ್ಯನ ಮೇಲೆ ಹೋದ್ರೆ ಭೂಮ್ಯೋದಯ, ಭೂಮ್ಯಾಸ್ತ ಹೆಂಗಿರಬಹುದು ಅಂತಾ ಯೋಚಿಸಿದ್ದೀರಾ? ಸೂರ್ಯನ ಮೇಲೆ ಹೋಗೋದು ತುಂಬಾ ಕಷ್ಟ ಅಂತೀರಾ? ನೀವು ಹೇಳೋದೂ ಸರೀನೇ. ಅದೂ ಅಲ್ದೆ ಸೂರ್ಯನ ಮೇಲೆ ತುಂಬಾ ಬೆಳಕಿನಮಾಲಿನ್ಯ ಇರೋದ್ರಿಂದ ಭೂಮಿ ಸರಿಯಾಗಿ ಕಾಣೋದೂ ಇಲ್ಲ. ಅದಕ್ಕೆ ಸರಿಯಾಗಿ ನಮ್ ಭೂಮಿ ಅಲ್ಲಿಂದ ಸಣ್ಣದೊಂದು ಪುಟಾಣಿ ಬಟಾಣಿ ತರಹ ಕಾಣುತ್ತೆ. ಅದಕ್ಕೇ ನಮ್ ಕಲ್ಪನೆಯನ್ನ ಸೂರ್ಯನ ಮೇಲ್ಮೈನಿಂದ ಚಂದ್ರನಲ್ಲಿಗೆ ಬದಲಾಯಿಸೋಣ, ಏನಂತೀರಿ! ಅಲ್ಲಿಂದಾ ನಮ್ಮ ಭೂಮಿ ದಿಗಂತದಿಂದ ಮೇಲೇರೋದು ಅದೆಂತಾ ಭವ್ಯ ನೋಟ ಗೊತ್ತಾ. ಅಂಧಕಾರ ತುಂಬಿದ ಭಾಹ್ಯಾಕಾಶದಲ್ಲಿ ನೀಲಮಣಿಯಂತೆ ತೇಲುವ ನಮ್ಮೀ ಭೂಮಿ ಅದೆಂತಾ ರಮಣಿ ಅಂತೀರಾ!!

ವಿಲಿಯಂ ಆಂಡರ್ಸ್ ಎಂಬ ಗಗನಯಾತ್ರಿ 1968ರಲ್ಲಿ ಅಪೋಲೋ-8ರಲ್ಲಿ ಚಂದ್ರನಲ್ಲಿಗೆ ಟ್ರಿಪ್ ಹೋಗಿದ್ದಾಗ ತೆಗೆದ “ಭೂಮ್ಯೋದಯ”ದ (Earthrise) ಮೊದಲ ಹಾಗೂ ಅತ್ಯದ್ಭುತ ಚಿತ್ರ. ನೋಡಿ, ಆನಂದಿಸಿ.

12670608_983078311782114_8504068124396079406_n

ಚಿತ್ರ ಶಕ್ತಿ – ೯

“ಎತ್ತರೆತ್ತರದಲ್ಲೊಂದು ಫಲಾಹಾರ”

ಮನುಷ್ಯನೆನ್ನುವ ಈ ಪ್ರಾಣಿ ಎಂತಾ ವಿಚಿತ್ರ ಅಲ್ವಾ!? ಸರಿಯಾಗಿ ಹತ್ತುಸುತ್ತು ಜೋರಾಗಿ ಸುತ್ತಿ ನಿಂತರೆ, ಕಾಲೇ ಕಂಟ್ರೋಲಿಗೆ ಸಿಗಲ್ಲ. ಆದರೂ ಅದೇನಾಗುತ್ತೆ ನೋಡೇ ಬಿಡೋಣ ಅಂತಾ ಹೊರಡ್ತಾನೆ. ಸುತ್ತು ಹೊಡೆದು ಬೀಳ್ತಾನೆ. ಮತ್ತೆ ಎದ್ದು ನಿಲ್ತಾನೆ. ಇನೊಮ್ಮೆ ಮಾಡ್ತಾನೆ. ಬೀಳದಿರೋದು ಹೆಂಗೆ ಅಂತಾ ಕಲೀತಾನೆ. ಒಟ್ನಲ್ಲಿ ಸೋಲೊಪ್ಪಲ್ಲ. ಮನುಷ್ಯನ ಈ ಛಲ, ನನ್ನ ಅತೀ ಇಷ್ಟದ ಗುಣಗಳಲ್ಲೊಂದು. ಈ ಛಲದ ಹಿಂದಿನ ಪ್ರೇರಕಶಕ್ತಿ ಅಷ್ಟೇ ಕುತೂಹಲಕಾರಿ ಸಹ.

ಇವತ್ತಿನ ಚಿತ್ರ ಮನುಷ್ಯನ ಇಂತಹದ್ದೇ ಛಲದ ಬಗ್ಗೆ. ಮುಂದೆಬರಬಹುದಾದ ಆಪತ್ತಿನ ಬಗ್ಗೆ ತನ್ನ ಹೆದರಿಕೆಯನ್ನೂ ತುಳಿದುನಿಂತು, ಮನುಷ್ಯನ ಸಾಧಿಸಿದ ಬಗ್ಗೆ. 1932 ಸೆಪ್ಟೆಂಬರ್ 20ರಂದು ತೆಗೆದ ಈ ಚಿತ್ರದಲ್ಲಿ ಹನ್ನೊಂದು ಜನ, ಉಕ್ಕಿನಗುಂಡಿಗೆಯ ಕೆಲಸಗಾರರು ನ್ಯೂಯಾರ್ಕಿನ ಬೀದಿಗಳಿಂದ 256ಮೀಟರ್ (ಸುಮಾರು 840 ಅಡಿ) ಎತ್ತರದ ಗರ್ಡರ್ (girder) ಒಂದರ ಮೇಲೆ ಕೂತು, ಮಧ್ಯಾಹ್ನದ ಊಟಕ್ಕೆ ತಯಾರಾಗುತ್ತಿದ್ದಾರೆ! ರಾಕರ್ಫೆಲ್ಲರ್ ಸೆಂಟರಿನ ಆರ್.ಸಿ.ಎ ಕಟ್ಟಡ ಕಟ್ಟುವಾಗ, ಚಾರ್ಲ್ಶ್ ಎಬ್ಬೆಟ್ಸ್ ಎಂಬ ಛಾಯಾಗ್ರಾಹಕ ಕ್ಲಿಕ್ಕಿಸಿದ ಚಿತ್ರವಿದು. ಈ ಚಿತ್ರ ಅಚಾನಕ್ಕಾಗಿ ತೆಗೆದದ್ದೇನಲ್ಲ. ರಾಕರ್ಫೆಲ್ಲರ್ ಸೆಂಟರ್ ಹೊಸದಾಗಿ ಕಟ್ಟಲ್ಪಡುತ್ತಿದ್ದ ತನ್ನ ಗಗನಚುಂಬಿಕಟ್ಟಡಕ್ಕೆ ಸ್ವಲ್ಪ ಪ್ರಚಾರ ಕೊಡಲೆಂದೇ, ತೆಗೆಸಿದ ಚಿತ್ರ. ಈ ಫೋಟೋ ಅಕ್ಟೋಬರ್ 2ರ “ನ್ಯೂಯಾರ್ಕ್ ಹೆರಾಲ್ಡ್ ಟ್ರಿಬ್ಯೂನ್”ನ ಭಾನುವಾರದ ಪುರವಣಿಯಲ್ಲಿ ಕಾಣಿಸಿಕೊಂಡಿತ್ತು. ಹಾಗಂತ ಇದೇನೂ ಮಾಡೆಲ್ಲುಗಳನ್ನು ಕೆಲಸಗಾರರ ವೇಷದಲ್ಲಿ ಕೂರಿಸಿ ತೆಗೆಸಿದ, ಅಥವಾ ಎಲ್ಲೋ ತೆಗೆದು ಆಮೇಲೆ ಎಡಿಟ್ ಮಾಡಿದ ಚಿತ್ರವಲ್ಲ. ನಿಜವಾದ ಕೆಲಸಗಾರರೇ ಊಟಕ್ಕೆ ತಯಾರಾಗುತ್ತಿದ್ದಾಗ ತೆಗೆಸಿದ ಚಿತ್ರ.

ಮ್ಯಾಂಚೆಸ್ಟರ್ ಯುನೈಟೆಡ್ ಎಂಬ ಪ್ರಖ್ಯಾತ ಫುಟ್ಬಾಲ್ ಕ್ಲಬ್ಬಿನ ಮ್ಯಾನೇಜರ್ ಆಗಿದ್ದ ಸರ್ ಅಲೆಕ್ಸ್ ಫರ್ಗುಸನ್ ಈ ಚಿತ್ರವನ್ನು ಸದಾ ತನ್ನ ಆಟಗಾರರಿಗೆ ತೋರಿಸಿ ಅವರನ್ನು ಹುರಿದುಂಬಿಸುತ್ತಿದ್ದನಂತೆ. ಫುಟ್ಬಾಲ್ ಟೀಮಿನಲ್ಲಿದ್ದಂತೆ ಈ ಚಿತ್ರದಲ್ಲೂ ಹನ್ನೊಂದು ಜನರಿದ್ದುದರಿಂದ, ಈ ಚಿತ್ರವನ್ನು “ಒಂದು ತಂಡವಾಗಿ ಆಡುವುದು ಹೇಗೆ ಎಂಬುದನ್ನು, ಕೂತರೇ ಒಟ್ಟಿಗೆ, ಬಿದ್ದರೂ ಒಟ್ಟಿಗೆ ಎಂಬಂತೆ ಕೂತಿರುವ ಈ ಕೆಲಸಗಾರರನ್ನು ನೋಡಿ ಕಲಿಯಿರಿ. ನೀವೂ ಸಹ ಆಟದ ಮೈದಾನದಲ್ಲಿ ಇವರಂತೆಯೇ ಒಟ್ಟಿಗೆ ಅಪಾಯದಲ್ಲಿ ಸಿಲುಕಿಕೊಂಡಿರುವ ಒಂದು ಗುಂಪು. ಒಬ್ಬನ ತಪ್ಪು ಎಲ್ಲರಿಗೂ ಮುಳುವಾಗಬಹುದು. ಹಾಗೆಯೇ ಒಬ್ಬ ಬಿದ್ದರೆ, ಇನ್ನಿಬ್ಬರು ಅವನ ಸಹಾಯಕ್ಕೆ ಧಾವಿಸಲೂಬಹುದು” ಅಂತಾ ಹೇಳಿ ಆಟದಲ್ಲಿ ಗೆಲ್ಲಲು ಪ್ರೇರೇಪಿಸುತ್ತಿದ್ದನಂತೆ.

ವಿ.ಸೂ: ಹೌದು, ಮನುಷ್ಯ ಭೂಮಿಯನ್ನು ಹಾಳುಗೆಡವಿದ್ದಾನೆ. ಪ್ರಕೃತಿಯನ್ನು ತುಳಿದು ಅಲ್ಲಲ್ಲಿ ಆಕಾಶದೆತ್ತರಕ್ಕೆ ಕಾಂಕ್ರೀಟಿನ ಕಾಡುಗಳನ್ನು ಬೆಳೆಸಿದ್ದಾನೆ. ಅವೆಲ್ಲಾ ನಿಜವೇ. ಆದರೆ ಅದರಿಂದ ಉತ್ಪತ್ತಿಯಾದ ಕೆಟ್ಟಪರಿಣಾಮಗಳಿಗೆ ಪರಿಹಾರ ಕಂಡುಹಿಡಿಯುತ್ತಿರುವುದೂ ಸಹ ಇದೇ ಮನುಷ್ಯನೇ. ಅದ್ದರಿಂದ, ಮನುಷ್ಯನ ಕೆಟ್ಟಕೆಲಸಗಳಿಗೆ ಮಾತ್ರ ಹೀಗಳೆಯುವ ಕೆಲಸ ಮಾಡುವುದು ಬೇಡ. ಇವತ್ತಿನ ನನ್ನ ಮಾತುಗಳು ಮನುಷ್ಯನ ಛಲದ ಬಗ್ಗೆಯಷ್ಟೇ.

12743482_982474821842463_576430764579129947_n

ಚಿತ್ರ ಶಕ್ತಿ – ೮

“ಯಾವುದಾದರೇನು ನಿನ್ನ ಬಣ್ಣ…. ಎಂದೆಂದಿಗೂ ನೀನೆ ನನ್ನ ಅಣ್ಣ”

ಮೈಬಣ್ಣದ ಆಧಾರದ ಮೇಲೆ ಜನರನ್ನು ವಿಂಗಡಿಸುವ ಕೆಟ್ಟಚಾಳಿಗೆ ಸುಮಾರು ಒಂಬೈನೂರು ವರ್ಷಕ್ಕೂ ಹೆಚ್ಚಿನ ಇತಿಹಾಸವಿದೆ. ಇದನ್ನು ಪ್ರಾರಂಭಿಸಿದ ಹಾಗೂ ಪ್ರಸಿದ್ಧಿಗೊಳಿಸಿದ ಕೀರ್ತಿ ಬಹುಷಃ ಅರಬ್ ವ್ಯಾಪಾರಿಗಳಿಗೆ ಸೇರಬೇಕು. ಇದಕ್ಕೆ ತಡೆ ಬೀಳಲು ಅದೆಷ್ಟೋ ದೇಶಗಳ ಅದೆಷ್ಟೋ ಜನರ ಜೀವ ಸವೆಯಬೇಕಾಯ್ತು.

ಅಷ್ಟೆಲ್ಲಾ ಹೋರಾಟಗಳು ನಡೆದ ಮೇಲೂ, ಕರಿಯರಿಗೆ ಬಹಳಷ್ಟು ಸಾಮಾಜಿಕ ಸ್ಥರಗಳಲ್ಲಿ ಸಮಾನಅವಕಾಶಗಳೇ ಸಿಗುತ್ತಿರಲಿಲ್ಲ. ಜಗತ್ತಿನ ಅತ್ಯಂತ ಜನಪ್ರಿಯ ಕ್ರೀಡೆಯಾದ ಫುಟ್ಬಾಲ್ ಕೂಡಾ ಇದಕ್ಕೆ ಹೊರತಾಗಿರಲಿಲ್ಲ. ಕರಿಯರು ರಾಷ್ಟ್ರೀಯ ತಂಡಗಳಲ್ಲಿ ಸ್ಥಾನ ಪಡೆಯಲು ಹರಸಾಹಸ ಪಡಬೇಕಾಗಿತ್ತು. ಇದೇ ಅಲ್ಲದೆ, ಕರಿಯರೇ ತುಂಬಿದ್ದ ದೇಶಗಳ ತಂಡಗಳು ಸಹ ಫುಟ್ಬಾಲ್ ವಿಶ್ವಕಪ್’ನಲ್ಲಿ ಕಾಲ ಸ್ಥಾನವೇ ಸಿಗದೇ ಕೆಲವರ್ಷಗಳ ಕಾಲ ನಿರಾಶೆಗೊಳಗಾಗಬೇಕಿತ್ತು. (ಕ್ರಿಕೆಟ್ಟಿನಲ್ಲಿ, ಇದಕ್ಕೆ ತದ್ವಿರುದ್ಧವಾಗಿ, ದಕ್ಷಿಣ ಆಫ್ರಿಕಾ ತಂಡಕ್ಕೆ ಐಸಿಸಿ 1995ರವರೆಗೆ ನಿಷೇಧ ಹೇರಿದ್ದನ್ನು ಇಲ್ಲಿ ನೆನಪಿಸಿಕೊಳ್ಳಬಹುದು).

ಕ್ರೀಡಾಸಂಸ್ಥೆಗಳು ಇಂತಹ ಕೆಟ್ಟಪದ್ದತಿಯನ್ನು ಜೀವಂತವಾಗಿಟ್ಟರೂ ಸಹ, ಕ್ರೀಡಾಳುಗಳು ಸದಾ ಇಂತಹ ಕ್ಷುಲ್ಲಕ ವಿಷಯಗಳನ್ನು ಬದಿಗೆ ತಳ್ಳಿ ಸಹೋದರತೆಯನ್ನು ಪ್ರದರ್ಶಿಸಿದ್ದಾರೆ. 1970ರ ವಿಶ್ವಕಪ್ ಪಂದ್ಯವೊಂದರಲ್ಲಿ ಬ್ರಜೀಲ್ ತಂಡ ಇಂಗ್ಲೆಂಡ್ ವಿರುದ್ಧ 1-0ರ ಜಯ ಸಾಧಿಸಿದಾಗ, ಬ್ರಝೀಲ್’ನ ಫುಟ್ಬಾಲ್ ತಾರೆ ಪಿಲೇ ಹಾಗೂ ಇಂಗ್ಲೆಂಡ್ ತಂಡದ ನಾಯಕ ಬಾಬ್ಬೀ ಮೂರ್ ತಮ್ಮ ಜೆರ್ಸಿಗಳನ್ನು ಬದಲಾಯಿಸಿಕೊಂಡ ಅಪೂರ್ವ ಕ್ಷಣವೊಂದು ದಾಖಲಾಗಿದ್ದು ಹೀಗೆ.

ಬಾಬ್ಬಿ ಹಾಗೂ ಪಿಲೇ, ಆಟದ ಮೈದಾನದ ಹೊರಗೆ ಬಹಳ ಒಳ್ಳೆಯ ಸ್ನೇಹಿತರಾಗಿದ್ದವರು. ಈ ಫೋಟೋ ತೆಗೆಯುವಾಗ ಇಬ್ಬರೂ ಹೆಚ್ಚುಕಮ್ಮಿ ತಮ್ಮ ಕ್ರೀಡಾಜೀವನದ ನಿವೃತ್ತಿಯ ಅಂಚಿನಲ್ಲಿದ್ದರು. ಈ ಚಿತ್ರ ಬಹಳ ವರ್ಷಗಳವರೆಗೆ ಸಾಂಸ್ಕೃತಿಕ, ಜನಾಂಗೀಯ ಹಾಗೂ ಪ್ರಾಂತೀಯ ಒಗ್ಗಟ್ಟಿನ ಪ್ರತೀಕವಾಗಿ ನಿಂತಿತು. ತೊಟ್ಟ ಅಂಗಿಯ ಅಡಿಯಲ್ಲಿ, ಬಣ್ಣದ ಚರ್ಮವೊಂದನ್ನು ಬಿಟ್ಟರೆ ನಾವೆಲ್ಲರೂ ಒಂದೇ ಎಂಬುದನ್ನು ಈ ದಿಗ್ಗಜರ ಈ ಚಿತ್ರ ಬಹಳ ಸೂಕ್ಷ್ಮವಾಗಿ ಹಾಗೂ ಸೂಚ್ಯವಾಗಿ ಸಾರುತ್ತದೆ.

12670848_980678155355463_6457564588448921655_n