ಬುದ್ಧಿಗೊಂದು ಗುದ್ದು – ೩೦

ಬುದ್ಧಿಗೊಂದು ಗುದ್ದು – ೩೦

X ಯಾವಾಗಲೂ ಎಕ್ಸೇ ಯಾಕೆ? (Y ಈಸ್ X ಅಲ್ವೇಸ್ X!?)

 
ಸಣ್ಣವನಿದ್ದಾಗಲಿಂದಲೂ ನನಗೆ ಗಣಿತ ಅಷ್ಟಕ್ಕಷ್ಟೇ. ಅದಕ್ಕೆ ಸರಿಯಾಗಿ ಬೀಜಗಣಿತ ಬಂದಮೇಲಂತೂ, ಅದರ ಹೆಸರಿಂದಲೇ ಸಿಟ್ಟು ಹೆಚ್ಚಾಗಿ ನನಗೆ ನನ್ನಿಷ್ಟದ ತಿನಿಸು ಗೇರುಜೀಜದ ಮೇಲೂ ಮುನಿಸು ಬಂದುಹೋಗಿತ್ತು. ಕಾಲಕಳೆದಂತೆ ಆಲ್ಜೀಬ್ರಾ ಅಂದ್ರೆ ಜೋಕಾಗಿ ಕಾಣಿಸಲಾರಂಭಿಸಿತು. ಎಲ್ಲಾ ಬಾರಿಯೂ ಎಕ್ಸ್ ಹುಡುಕಿಕೊಡಿ, ನನ್ನ ಎಕ್ಸ್ ಹುಡುಕಿಕೊಡಿ ಅಂತಾ ತಲೇ ತಿನ್ನೋ ಈ ಬೀಜಗಣಿತವನ್ನು, ನಾವು ‘ಭಗ್ನಪ್ರೇಮಿ ಗಣಿತ’ ಅಂತಾ ಕರೀತಾ ಇದ್ವಿ. ಕೊನೆಗೆ ಟ್ರಿಗ್ನಾಮೆಟ್ರಿ ಬಂದಮೆಲಂತೂ ಗಣಿತದೊಂದಿಗೆ ನನ್ನ ಸಂಬಂಧ ಹದೆಗೆಡುತ್ತಲೇ ಹೋಯಿತು. ಅಷ್ಟು ಚೆಂದದ ಮೇಡಮ್ಮುಗಳು ಬಂದು ಪ್ರಯತ್ನಿಸಿದರೂ, ಗಣಿತವನ್ನು ದೂರವೇ ಇಡುವಂತಾಯಿತು. ಅಂದಿನಿಂದ ಇಂದಿನವರೆಗೂ ಈ ಎಕ್ಸ್ ಎಂದರೇನು? ಅದ್ಯಾಕೆ ಯಾರಿಗೂ ಗೊತ್ತಿಲ್ಲ? ಎಂಬ ಪ್ರಶ್ನೆಗೆ ಉತ್ತರಗೊತ್ತಿರಲಿಲ್ಲ. ಇತ್ತೀಚೆಗಷ್ಟೇ, ರಾಹುಲ್ಗಾಂಧಿ ಕಣ್ಮರೆಯಾದ ಮೇಲೆ, ಇದರ ಬಗ್ಗೆ ಸ್ವಲ್ಪ ತಲೆಕೆಡಿಸಿಕೊಂಡು ಎಕ್ಸ್ ಯಾಕೆ ಎಕ್ಸೇ ಅಂತಾ ಓದಲು ಪ್ರಯತ್ನಿಸಿದೆ. ನೀವೂ ಓದಿ.

ಬೀಜಗಣಿತ ಜಗತ್ತಿಗೆ ಯಾರ ಕೊಡುಗೆ ಎಂಬುದರ ಬಗ್ಗೆ ಹಲವಾರು ಸಿದ್ಧಾಂತಗಳಿವೆ. ಕೆಲವು ಸಂಶೋಧನೆಗಳ ಪ್ರಕಾರ ಬ್ಯಾಬಿಲೋನಿಯನ್ನರ ಕಾಲದಲ್ಲೇ ಬೀಜಗಣಿತದ ಕಲ್ಪನೆಯ ಬಗ್ಗೆ ಉಲ್ಲೇಖಗಳಿವೆ. ಭಾರತದಲ್ಲಿ ಸುಮಾರು ಆರನೆಯ ಶತಮಾನದಲ್ಲಿಯೇ ಬ್ರಹ್ಮಗುಪ್ತ ತನ್ನ ‘ಬ್ರಹ್ಮಸ್ಪುಟಸಿದ್ಧಾಂತ’ದಲ್ಲಿ ಬೀಜಗಣಿತದ ಮೂಲಸ್ತಂಭಗಳಲ್ಲೊಂದಾದ ರೇಖೀಯ ಸಮೀಕರಣದ ಬಗ್ಗೆ ವಿಸ್ತೃತವಾಗಿ ಬರೆದಿದ್ದಾನೆ.

ಆದರೆ, ಬೀಜಗಣಿತಕ್ಕೆ ಇಂದಿನ ಸ್ವರೂಪ ಕೊಟ್ಟದ್ದು ಅರಬ್ಬೀ ಗಣಿತಜ್ಙರು. ಈ ಲೇಖನಗಳು/ಸಿದ್ಧಾಂತಗಳು ಪುಸ್ತಕರೂಪದಲ್ಲಿ ಯೂರೋಪಿಗೆ ಬಂದದ್ದು, 11/12ನೇ ಶತಮಾನದಲ್ಲಿ ಅರಬ್ಬೀ ವ್ಯಾಪಾರಿಗಳು ಉತ್ತರ ಆಫ್ರಿಕಾವನ್ನು ಕ್ರಮಿಸಿ, ಜಿಬ್ರಾಲ್ಟರ್ ಜಲಸಂಧಿಯ ಮೂಲಕ ಸ್ಪೇನಿನ ಮೂಲಕ ಯೂರೋಪಿನಲ್ಲಿ ಕಾಲಿಟ್ಟಾಗ. ಬೀಜಗಣಿತದ ಇಂಗ್ಳೀಷ್ ಪದವಾದ ಆಲ್ಜೀಬ್ರಾ ಸಹ ಅರಬ್ಬೀ ಪದವಾದ ‘ಅಲ್-ಜಬ್ರ್’ (ಅರ್ಥ: ಪುನಃಸ್ಥಾಪನೆ) ಎಂಬ ಪದದಿಂದಲೇ ಬಂದದ್ದು. [ಅದಕ್ಕಿಂತ ಸ್ವಲ್ಪ ಮುಂಚೆಯೇ, ಹತ್ತನೇ ಶತಮಾನದಲ್ಲೇ, ನಮ್ಮ ಬಿಜಾಪುರದಲ್ಲಿ ಕುಳಿತು ಭಾಸ್ಕರಾಚಾರ್ಯ ತನ್ನ ಲೀಲಾವತಿ ಎಂಬ ಕೃತಿಯಲ್ಲಿ ಗಣಿತವೆಂಬ ಕಬ್ಬಿಣದ ಕಡಲೆಯನ್ನು, ರೋಮಾಂಚಕ ರೀತಿಯಲ್ಲಿ ಕಾವ್ಯರೂಪಕ್ಕಿಳಿಸುತ್ತಿದ್ದ ಎನ್ನುವುದು ಬೇರೆ ವಿಚಾರ. ಏನು ಮಾಡುವುದು ಹೇಳಿ, ಭಾರತೀಯರಿಗೆ ಶ್ರೇಷ್ಟತೆಯ ವ್ಯಸನ. ಅದಕ್ಕೇ ಎಲ್ಲೂ ಹೇಳಿ(ಕೊಚ್ಚಿ)ಕೊಳ್ಳಲಿಲ್ಲ. ಸೂರ್ಯನಂತೆ ಬೆಳಗಬೇಕಿದ್ದ ಭಾಸ್ಕರ ಅಮವಾಸ್ಯೆಯ ಚಂದ್ರನಾಗಿಯೇ ಉಳಿದ 😦 ಇರಲಿ ಬಿಡಿ, ವಿಷಯಾಂತರವಾದೀತು 😦 🙂 ]

ಸ್ಪೇನಿಗೆ ಬಂದಿಳಿದ ಬೀಜಗಣಿತದ ಖಜಾನೆಯನ್ನು ಯೂರೋಪಿಯನ್ ಭಾಷೆಗಳಿಗೆ ಭಾಷಾಂತರಿಸಲು ವಿದ್ವಾಂಸರೇನೋ ಕೂತರು. ಮೊದಲ ದಿನವೇ ತೊಂದರೆ ಆರಂಭವಾಯ್ತು. ಅರಬ್ಬೀ ಲಿಪಿಯಲ್ಲಿದ್ದ ಹಲವಾರು ಅಕ್ಷರಗಳೂ, ಸಂಕೀರ್ಣ ಶಬ್ದ ಪ್ರಕಾರಗಳೂ ಯೂರೋಪಿಯನ್ ಭಾಷೆಗಳಲ್ಲಿ ಇರಲೇ ಇಲ್ಲ. ಹೀಗಿದ್ದಾಗ ತಮಗೆ ಗೊತ್ತಿದ್ದ/ಪ್ರಚಲಿತದಲ್ಲಿದ್ದ ಪದಗುಚ್ಚಗಳನ್ನೇ ಬಳಸಿ, ಯೂರೋಪಿಯನ್ ವಿದ್ವಾಂಸರು ಕೆಲಸ ಪ್ರಾರಂಭಿಸಿದರು. ಈ ವಿದ್ವಾಂಸರ ವಿದ್ವಂಸಕ ಕೃತ್ಯಗಳಲ್ಲೊಂದು ಎಕ್ಸ್ ಕೂಡಾ. ಹೇಗೆ ಅಂತೀರಾ? ಇಲ್ನೋಡಿ.

ಬೀಜಗಣಿತದ ಮೂಲವೇ ವ್ಯತ್ಯಯಕಾರೀ ಪರಿಮಾಣಗಳು ಅಂದರೆ ‘ವೇರಿಯಬಲ್’ಗಳು. ಅರೇಬಿಕ್ ಭಾಷೆಯಲ್ಲಿ ‘ಶೇಲಾನ್’ ಎಂದರೆ ‘ಅಜ್ಞಾತ/ಏನೋ ಒಂದು/ಅಪರಿಚಿತ’ ಎಂದರ್ಥ. ಇದಕ್ಕೆ ಅರೇಬಿಕ್ ಭಾಷೆಯ ‘ಅಲ್’ ಎಂಬ ನಿರ್ಧಿಷ್ಟತೆಯ ವಿಧಿಯನ್ನು ಸೇರಿಸಿ ‘ಅಲ್-ಶೇಲಾನ್’ (ಅರ್ಥ: ಒಂದು ಅಜ್ಞಾತವಾದ) ಎಂಬ ಪದವನ್ನೂ, ಹಾಗೂ ಈ ಪದದ ಮೊದಲಕ್ಷರವಾದ ‘ಶೇ’ ಎಂಬ ಅಕ್ಷರವನ್ನೂ ವೇರಿಯಬಲ್ ಅಥವಾ ವ್ಯತ್ಯಯವನ್ನು ಪ್ರತಿನಿಧಿಸಲು ವ್ಯಾಪಕವಾಗಿ ಬಳಸುತ್ತಿದ್ದರು. ಈ ಅಕ್ಷರ/ಪದಗಳನ್ನು ನೀವು ಚಿತ್ರ-1 ರಲ್ಲಿ ನೋಡಬಹುದು. ಭಾಷಾಂತರಕ್ಕೆ ಕುಳಿತ ಸ್ಪಾನಿಷ್ ವಿದ್ವಾಂಸರಿಗೆ ‘ಶ್’ ಅಥವಾ ‘ಶೇ’ ಎಂಬ ಪದ/ಶಬ್ದವೇ ಗೊತ್ತಿಲ್ಲದ ಕಾರಣ (ಯಾಕೆಂದರೆ ಮಧ್ಯಕಾಲೀನ ಸ್ಪಾನಿಷ್ ಭಾಷೆಯಲ್ಲಿ ಶ್ ಅಥವಾ ಶೇ ಎಂಬ ಶಬ್ದವೇ ಇರಲಿಲ್ಲ!!) ಅದಕ್ಕೆ ಅತ್ಯಂತ ಹತ್ತಿರವಾದ ಸ್ಪಾನಿಷ್ ಭಾಷೆಯ ‘ಕ್’ ಎಂಬ ಶಬ್ದವನ್ನು ಬಳಸಿದರು. ಹಾಗೂ ಈ ‘ಕ್’ ಅನ್ನು ಪ್ರತಿನಿಧಿಸಲು ಅವರು ಗ್ರೀಕ್ ಭಾಷೆಯ ‘ಕಾಯ್’ ಎಂಬ ಅಕ್ಷರವನ್ನು (ಚಿತ್ರ-2) ಬಳಸಿ ತಮ್ಮ ಕೆಲಸವನ್ನು ಮುಗಿಸಿದರು. ಮುಂದೆ ಈ ಕೃತಿಗಳು ಯೂರೋಪಿನಾದ್ಯಂತ ಪ್ರಚಲಿತ ಭಾಷೆಯಾಗಿದ್ದ ಲ್ಯಾಟಿನ್ ಭಾಷೆಗೆ ರೂಪಾಂತರಗೊಂಡಾಗ ಆ ಪುಣ್ಯಾತ್ಮರು ಈ ಗ್ರೀಕ್ ‘ಕಾಯ್’ ಅಕ್ಷರಕ್ಕೆ ಆಕಾರದಲ್ಲಿ ಸಮಾನರೂಪದಲ್ಲಿದ್ದ ‘X’ ಅಕ್ಷರವನ್ನು ಬಳಸಿದರು (ಚಿತ್ರ-3). ಈ ಪ್ರಮಾದ ಆಗಿದ್ದೇ ಆಗಿದ್ದು, ಈ X ಮುಂದಿನ ಆರುನೂರುವರ್ಷಗಳಲ್ಲಿ ಮೂಡಿಬಂದ ಎಲ್ಲಾ ಬೀಜಗಣಿತ ಮೀಮಾಂಸೆಗಳ ತಳಹದಿಯಾಗಿಬಿಟ್ಟಿತು. ಮುಂದೆ ಇದನ್ನೇ ಎರವಲು ಪಡೆದ ಇಂಗ್ಳೀಷ್ ಭಾಷೆ X ಎನ್ನುವ ಒಂದು ಪದವ್ಯುತ್ಪತ್ತಿಯನ್ನೇ ಹುಟ್ಟುಹಾಕಿತು. ಅನೂಹ್ಯವಾದ ವಿಷಯಗಳಿಗೆಲ್ಲಾ X ಸೇರಿಸುವುದು ಅಭ್ಯಾಸವಾಗಿಬಿಟ್ಟಿತು. X-ಫೈಲ್ಸ್, X-ಮೆನ್ ಮುಂತಾದ ಪದಗಳು ಹುಟ್ಟುಪಡೆದವು.

FotorCreated 120px-Greek_KaiKai to X

ಹೀಗೆ, ಯಾರೂ ಎಕ್ಸ್ ಯಾಕೆ ಹೀಗೆ ಎಕ್ಸಾಗಿದೆ ಅಂತಾ ತಲೆಕೆಡಿಸಿಕೊಳ್ಳಲೇ ಇಲ್ಲ. ಎಲ್ಲರೂ ಎಕ್ಸ್ ಅನ್ನು ಬಿಡಿಸುವುದರಲ್ಲೇ ಕಾಲಕಳೆದರೇ ಹೊರತು, ‘ಎಲೈ ಎಕ್ಸೇ! ನೀನ್ಯಾಕೆ ಎಕ್ಸು!?’ ಎಂದು ಪ್ರಶ್ನಿಸಲೇ ಇಲ್ಲ. ಯಾರಾದರೂ ಕೇಳಿದ್ದಿದ್ದರೆ ಬಹುಷಃ ಎಕ್ಸು ಅಳುತ್ತಾ, ಆ ಸ್ಪಾನಿಷ್ ವಿದ್ವಾಂಸರಿಗೆ ಹಿಡಿಶಾಪ ಹಾಕುತ್ತಾ ತನ್ನ ಕಥೆಯನ್ನಾದರೂ ಹೇಳುತ್ತಿತ್ತೇನೋ!

ಈಗ ತಿಳಿಯತಲ್ಲವೇ ಮಕ್ಕಳೇ, X ಯಾಕೆ ಎಕ್ಸು ಹೀಗೆ ಅಂತಾ? ನಾಳೆ ಕ್ಲಾಸಿನಲ್ಲಿ ‘ಎಕ್ಸ್ ಯಾಕೆ ಎಕ್ಸ್, ಹೇಳ್ರೋ’ ಅಂತಾ ಕೇಳಿದರೆ, ‘ಅಯ್ಯೋ, ಆ ಸ್ಪಾನಿಷರಿಗೆ ‘ಶ್’ ಎಂದು ಉಚ್ಚರಿಸಲು ಬರದೇ ಇದ್ದಿದ್ದಕ್ಕೇ ಎಕ್ಸು X ಮೇಡಂ’ ಅಂತಾ ಒಕ್ಕೊರಲಿನಲ್ಲಿ ಕೂಗಿ ಹೇಳಿರಿ, ಆಯ್ತಾ?

ಕೊಸರು:
ಈ ಎಕ್ಸಿಗೂ, XXXಗೂ ಏನು ಸಂಬಂಧ ಎನ್ನುವುದು ನನಗೂ X-factor ಆಗಿಯೇ ಉಳಿದಿದೆ 😉 😛

ಬುದ್ಧಿಗೊಂದು ಗುದ್ದು – ೨೯

ಬುದ್ಧಿಗೊಂದು ಗುದ್ದು – ೨೯

ಬ್ಲೂಟೂಥಿನ ದಂತಕಥೆ!

ಈಗಿನ ಹುಡುಗ್ರು ಬಿಡ್ರೀ ತುಂಬಾ ಫಾಸ್ಟು. ಮಾತೆತ್ತಿದ್ರೆ ಮೊಬೈಲು, ಕೈಯೆತ್ತಿದ್ರೆ ಕಿಂಡ್ಲ್. ಆ ಹುಡುಗನ ಹತ್ರಾ ಒಳ್ಳೆ ಹಾಡಿದ್ಯಾ, ಯಾವ್ದೋ ಇಂಟರೆಸ್ಟಿಂಗ್ ಪಿಕ್ಚರ್ರಿದ್ಯಾ? ಲೋ ಮಗಾ ನನ್ಗೂ ಕಳ್ಸೋ, ಟೆಥರಿಂಗ್ ಮಾಡ್ತೀನಿ ಅಂತಾರೆ.

ಈ ಮೊಬೈಲ್ ಇಂಟರ್ನೆಟ್, ವೈಫೈ, ನಿಯರ್ ಫೀಲ್ಡ್ ಕಮ್ಯೂನಿಕೇಷನ್ ಇವೆಲ್ಲಾ ಬರೋಕೆ ಮುಂಚೆ (ಓ…ಅಂದ್ರೆ ನಿನ್ ಕಾಲ್ದಲ್ಲಿ ಅಂತಾ ಹುಬ್ಬೇರಿಸ್ತಾ ಇದ್ದೀರಾ, ಇರ್ಲಿ ಬಿಡಿ ತೊಂದ್ರೆ ಇಲ್ಲ 🙂 ), ನಮಗೆ ಈ ರೀತಿ ಒಂದು ಮೊಬೈಲಿಂದ ಇನ್ನೊಂದು ಮೊಬೈಲಿಗೆ ಏನಾದ್ರೂ ಕಳಿಸಬೇಕಾದ್ರೆ ಇದ್ದದ್ದು ಒಂದೋ ಸೂಪರ್ ಸ್ಲೋ ಇನ್ಫ್ರಾರೆಡ್ ಕನೆಕ್ಷನ್ ಅಥ್ವಾ ಅಂದಿನ ಕಾಲಕ್ಕೆ ಸೂಪರ್ ಅಲ್ಟ್ರಾ ಹೈ-ಫೈಯಾಗಿದ್ದ ಬ್ಲೂಟೂಥ್. ಈಗ್ಲೂ ಇಷ್ಟೆಲ್ಲಾ ತಂತ್ರಜ್ಞಾನ ಮುಂದುವರೆದ ಮೇಲೂ ಬ್ಲೂಟೂಥ್ ಜನಪ್ರಿಯತೆಯೇನೂ ಕಡಿಯಾಗಿಲ್ಲ. ಇವತ್ತಿಗೂ ನಿಮ್ ಫೋನನ್ನು ಕಾರಿನಲ್ಲಿ ಉಪಯೋಗಿಸಬೇಕು ಅಂದ್ರೆ ಬ್ಲೂಟೂಥ್ ಬೇಕು. ಹೆಚ್ಚಿನ ವೈರ್ಲೆಸ್ ಸ್ಪೀಕರುಗಳು, ಧ್ವನಿಪ್ರಸರಣಕ್ಕೆ ಬ್ಲೂಟೂಥ್ ತಂತ್ರಜ್ಞಾನವನ್ನೇ ಉಪಯೋಗಿಸುತ್ತವೆ. ಬ್ಲೂಟೂಥಿನ ಸುಲಭ ಜೋಡಣೆ ಮತ್ತು ಸಂವಹನ ತಂತ್ರಜ್ಞಾನವೇ ಅದರ ಈ ಜನಪ್ರಿಯತೆಗೆ ಮೂಲ ಕಾರಣ. ಇವತ್ತಿನ ಸಣ್ಣ ಲೇಖನದಲ್ಲಿ ಈ ಬ್ಲೂಟೂಥ್ ಚಾಲ್ತಿಗೆ ಬಂದದ್ದು ಹೇಗೆ? ಅದ್ಯಾಕೆ ಬ್ಕೂಟೂಥಿಗೆ ನೀಲಿಬಣ್ಣದ ಹಲ್ಲು? ಅದಕ್ಕೆ ಬ್ಲೂಟೂಥ್ ಅಂತಾ ಯಾಕೆ ಕರೆಯುತ್ತಾರೆ? ಅದರ ಚಿಹ್ನೆಯ ಹಿಂದಿನ ಅರ್ಥ? ಇದನ್ನು ತಿಳಿಸುವ ಸಣ್ಣ ಪ್ರಯತ್ನ.

ನೋಡೀ….ಈ ಎಂಜಿನಿಯರ್ರುಗಳ ಕಥೇನೇ ಇಷ್ಟು. ಮೊಬೈಲ್ ಕಂಡುಹಿಡಿದು ಅಲ್ಲಿಗೇ ಮುಗಿಸಲಿಲ್ಲ. ಮೊಬೈಲುಗಳೇನೋ ಜನರನ್ನು ಜೋಡಿಸುತ್ತವೆ, ಆದರೆ ಮೊಬೈಲುಗಳನ್ನ ಒಂದಕ್ಕೊಂದು ಹೇಗೆ ಸಂಪರ್ಕಿಸುವುದು ಹೇಗೆ ಅನ್ನೋ ತಲೆಬಿಸಿಯನ್ನ ತಲೆಗೆ ಹಚ್ಕೊಂಡ್ರು. ಬರೇ ಮೊಬಲುಗಳೇ ಯಾಕೆ! ಫೋನು, ಟೀವಿ, ರೇಡಿಯೋ ಮುಂತಾದ ಎಲ್ಲಾ ವಿದ್ಯುನ್ಮಾನ ಯಂತ್ರಗಳೂ ಒಂದಕ್ಕೊಂದು ಮಾತನಾಡುವಂತಾದರೆ!? ಎಂಬ ಕನಸುಗಳನ್ನೂ ಕಟ್ಟಿಕೊಂಡರು. ಆಗ ಶುರುವಾಗಿದ್ದೇ ಪರ್ಸನಲ್ ಏರಿಯಾ ನೆಟ್ವರ್ಕ್ (PAN) ಅನ್ನೋ ಪರಿಕಲ್ಪನೆ. ಇದರನ್ವಯ ಎಂಜಿನಿಯರ್ರುಗಳು ಸುಮಾರು ಐದು ಮೀಟರ್ ಸುತ್ತಳತೆಯಲ್ಲಿ ಮೊಬೈಲುಗಳು ಒಂದದ ಜೊತೆಗೊಂದು ಸಂವಹಿಸಬಲ್ಲುದರ ಬಗ್ಗೆ ತಂತ್ರಜ್ಞಾನಗಳನ್ನು ಅಭಿವೃದ್ಧಿಪಡಿಸಲು ತೊಡಗಿದರು. 90ರ ದಶಕದಲ್ಲಿ ಈ ಪರಿಕಲ್ಪನೆಯನ್ನು ಜನಪ್ರಿಯಗೊಳಿಸಿದ್ದು ಹುಟ್ಟು ಹಾಕಿದ್ದು, ಎರಿಕ್ಸನ್ ಅನ್ನೋ ಸ್ವೀಡಿಶ್ ಕಂಪನಿ. ನಂತರ ಎರಿಕ್ಸನ್, ಐಬಿಎಮ್, ನೋಕಿಯಾ, ತೋಷೀಬಾ ಮತ್ತು ಇಂಟೆಲ್ ಕಂಪನಿಗಳು ಒಟ್ಟು ಸೇರಿ 1996ರಲ್ಲಿ ಮೊಬೈಲ್ ತಂತ್ರಜ್ಞಾನ ವಿಶೇಷಾಸಕ್ತಿ (Special Interest Group) ಗುಂಪೊಂದನ್ನು ಪ್ರಾರಂಭಿಸಿದವು. ಈ ಗುಂಪು ಬ್ಲೂಟೂಥ್ ತಂತ್ರಜ್ಞಾನವನ್ನು ಹುಟ್ಟುಹಾಕುವುದರಲ್ಲಿ, ಅದನ್ನು ಏಕರೂಪವಾಗಿಸುವಲ್ಲಿ ಮತ್ತು ಅದನ್ನು ನಾವಿಂದು ಉಪಯೋಗಿಸುತ್ತಿರುವ ಮಟ್ಟಕ್ಕೆ ತಲುಪುವುದರಲ್ಲಿ ಮಹತ್ತರವಾದ ಕೆಲಸಗಳನ್ನು ಮಾಡಿತು.

ಈ ತಂಡದಲ್ಲಿದ್ದ ಬೇರೆ ಬೇರೆ ಕಂಪನಿಗಳ ಮಧ್ಯೆ ಸಂಧಾನಕಾರನ ಪಾತ್ರ ವಹಿಸಿದ್ದ, ಇಂಟೆಲ್ ಉದ್ಯೋಗಿ ಜಿಮ್ ಕರ್ಡಾಷ್, ಈ ಪ್ರಾಜೆಕ್ಟ್ ಪ್ರಾರಂಭವಾದ ಸಮಯದಲ್ಲಿ ‘ವೈಕಿಂಗ್ಸ್’ ಎಂಬ ಸ್ಕ್ಯಾಂಡಿನೇವಿಯನ್ ಯೋಧರ ಬಗ್ಗೆ ಪುಸ್ತಕವೊಂದನ್ನು ಓದುತ್ತಿದ್ದ. ಅದರಲ್ಲಿ ಉಲ್ಲೇಖಿಸಿದ್ದ ಹೆರಾಲ್ಡ್ ಗ್ರಾಮ್ಸನ್ (ಚಿತ್ರ – ೧) ಎಂಬ ರಾಜನ ಬಗ್ಗೆ ಉತ್ಸುಕನಾಗಿ, ಅವನ ಬಗ್ಗೆ ಹೆಚ್ಚಿನ ವಿಷಯ ಓದಿದಾಗ ಜಿಮ್’ಗೆ ತಿಳಿದದ್ದೇನೆಂದರೆ, ಈ ಹೆರಾಲ್ಡ್ ಗ್ರಾಮ್ಸನ್ 958ರಿಂದ 970ರವರೆಗೆ ‘ವೈಕಿಂಗ್’ಗಳ ರಾಜನಾಗಿದ್ದ ಮತ್ತು ಆತ ಸ್ಕ್ಯಾಂಡಿನೇವಿಯನ್ ದೇಶಗಳನ್ನು (ನಾರ್ವೆ, ಸ್ವೀಡನ್ ಮತ್ತು ಡೆನ್ಮಾರ್ಕ್) ಅಹಿಂಸಾತತ್ವದಿಂದ ಒಗ್ಗೂಡಿಸಲು ಬಹಳಷ್ಟು ಪ್ರಯತ್ನಗಳನ್ನು ಮಾಡಿದ. ವೈಕಿಂಗರು ಸದಾ ಯುದ್ಧ ಮತ್ತು ರಕ್ತಪಾತದಲ್ಲೇ ನಿರತರಾಗಿದ್ದರಿಂದ, ಅಹಿಂಸೆಯ ಮಾತನಾಡಿದ ಹೆರಾಲ್ಡ್ ಸಹಜವಾಗಿಯೇ ವಿಶೇಷವಾಗಿ ಪರಿಗಣಿಸಲ್ಪಟ್ಟ ಹಾಗೂ ಚರಿತ್ರಾಕಾರರು ಅವನ ಬಗ್ಗೆ ಹೆಚ್ಚಾಗಿಯೇ ಬರೆದರು.

kingbluetooth

ಈ ಹೆರಾಲ್ಡನಿಗೆ ಬ್ಲೂಬೆರ್ರಿ ಹಣ್ಣೆಂದರೆ ಬಹಳ ಇಷ್ಟವಿತ್ತಂತೆ. ಎಷ್ಟು ಇಷ್ಟವೆಂದರೆ, ದಿನವಿಡೀ ಬ್ಲೂಬೆರ್ರಿ ಹಣ್ಣನ್ನೇ ತಿಂದು ಅವನ ಹಲ್ಲುಗಳು ನೀಲಿಬಣ್ಣಕ್ಕೆ ತಿರುಗಿದ್ದವಂತೆ! ಇದರಿಂದಾಗಿ, ಒಂದು ದಂತಕಥೆಯ ಪ್ರಕಾರ (pun intended 🙂 ), ಅವನ ಪೂರ್ತಿಹೆಸರಾದ ಹೆರಾಲ್ಡ್ ಗ್ರಾಮ್ಸನ್ ಬ್ಲಾಟಂಡ್ (King Harald Gramson Blatand) ಎನ್ನುವುದು ಹೆರಾಲ್ಡ್ ಗ್ರಾಮ್ಸನ್ ಬ್ಲೂಟೂಥ್ ಎಂದೇ ಅನ್ವರ್ಥವಾಗಿತ್ತಂತೆ.

ಈ ಕಥೆ ಕೇಳಿದ ಜಿಮ್ ಕರ್ಡಾಷ್, ಈ ಮೊಬೈಲುಗಳನ್ನು ತಂತಿರಹಿತವಾಗಿ ‘ಒಗ್ಗೂಡಿಸುವ’ ಪ್ರಾಜೆಕ್ಟಿಗೂ ಬ್ಲೂಟೂಥ್ ಎಂಬ ಹೆಸರೇ ಸೂಕ್ತವಾದದ್ದೆಂದು ನಿರ್ಧರಿಸಿದ. ಈ ಕಾರಣದಿಂದ, ಮೊಬೈಲುಗಳನ್ನು (ಅಹಿಂಸಾರೀತಿಯಲ್ಲಿ) ಜೋಡಿಸುವ ಈ ತಂತ್ರಜ್ಞಾನಕ್ಕೆ ಬ್ಲೂಟೂಥ್ ಎಂಬ ಹೆಸರೇ ಅಂಟಿಕೊಂಡಿತು.

ಇನ್ನು ಬ್ಲೂಟೂಥ್ ತಂತ್ರಜ್ಞಾನದ ಚಿಹ್ನೆಗೆ ಬಂದರೆ, ಚಿತ್ರ-೨ರಲ್ಲಿ ತೋರಿಸಿದಂತೆ, ಹೆರಾಲ್ಡ್ ಬ್ಲಾಟಂಡ್ ಅಥವಾ (ಹೆರಾಲ್ಡ್ ಬ್ಲೂಟೂಥ್) ಎಂಬ ಪದಗಳ ಮೊದಲಕ್ಷರಗಳ ಲ್ಯಾಟಿನ್ ಅವತರಣಿಕೆಗಳಾದ (H(Haglazl) and B(Berkanan) ಮಿಶ್ರಣವಷ್ಟೇ.

unnamed

ನನಗೆ ಈ ಬ್ಲೂಟೂಥ್ ಕಥೆ ಮೊದಲೇ ಗೊತ್ತಿತ್ತು. ಆದರೆ ಇವತ್ತಷ್ಟೇ ಅದರ ಚೆಹ್ನೆಯ ಬಗೆಗೂ ತಿಳಿದು ಬಂದಿದ್ದು. ಅದಕ್ಕೇ ಬರೆಯೋಣವೆನ್ನಿಸಿತು. ಇಷ್ಟವಾದಲ್ಲಿ, ಬೇರೆಯವರಿಗೂ ತಿಳಿಸಿ.

ಬುದ್ಧಿಗೊಂದು ಗುದ್ದು – ೨೮

ಬುದ್ಧಿಗೊಂದು ಗುದ್ದು – ೨೮

‘ಇತ್ತ ಕಂಪನಿ ಮುಳುಗುತ್ತಿತ್…..ಅತ್ತ ಜೂಜಾಡಿದ ಫ್ರೆಡ್ಡಿ ಸ್ಮಿತ್’

ಈ ಕಥೆ ಶುರುವಾಗೋದೇ ಒಂದೂರಲ್ಲಿ ಒಬ್ಬ ಮನುಷ್ಯ ಇದ್ದ ಎಂಬಲ್ಲಿಂದ. ಆ ಮನುಷ್ಯನ ಹೆಸರು ಫ್ರೆಡ್ ಸ್ಮಿತ್. ಹುಟ್ಟುವಾಗಲೇ ಮೂಳೆಸಂಬಂಧೀ ಖಾಯಿಲೆಯೊಂದರಿಂದ, ಕೈಕಾಲುಗಳು ಸೊಟ್ಟಗಾಗಿ ನಡೆಯಲೂ ಸಾಧ್ಯವಾಗದ ಪರಿಸ್ಥಿತಿ. ಆದರೆ, ಈತ ಸುಲಭಕ್ಕೆ ಮಣಿಯುವವನಾಗಿರಲಿಲ್ಲ. ವಯಸ್ಸು ಹತ್ತಾಗುವಷ್ಟರಲ್ಲಿ ಹೇಗೇಗೋ ಮಾಡಿ ನಡೆಯಲಾರಂಭಿಸಿದ. ಹದಿನೈದಾಗುವಷ್ಟರಲ್ಲಿ ಪ್ರತಿಭಾವಂತ ಫುಟ್ಬಾಲ್ ಆಟಗಾರನಾದ ಹಾಗೂ ವಿಮಾನ ಹಾರಿಸುವುದನ್ನು ಕಲಿತು ಹವ್ಯಾಸಿ ಪೈಲಟ್ ಲೈಸೆನ್ಸ್ ಕೂಡಾ ಪಡೆದ. ಅವನಿಗೆ ವಿಮಾನಗಳ ಬಗ್ಗೆ ಬಹಳ ಆಸಕ್ತಿ. ಸದಾ ಅವುಗಳ ಬಗ್ಗೆ ಯೋಚಿಸುತ್ತಿದ್ದ ಹಾಗೂ ವಿಮಾನಗಳನ್ನು ಉಪಯೋಗಿಸಿ ಮನುಷ್ಯನ ಜೀವನಮಟ್ಟವನ್ನು ಉತ್ತಮಗೊಳಿಸುವುದು ಹೇಗೆ? ಎಂದು ಯೋಚಿಸುತ್ತಿದ್ದ.

ಈ ಸ್ಮಿತ್ ತಾನು 1962ರಲ್ಲಿ ‘ಯೇಲ್ ವಿಶ್ವವಿದ್ಯಾಲಯ’ದಲ್ಲಿ ಓದುತ್ತಿರುವಾಗ, ಅರ್ಥಶಾಸ್ತ್ರದ ಪ್ರಾಜೆಕ್ಟ್ ಪೇಪರೊಂದರಲ್ಲಿ ‘ಕಂಪನಿಯೊಂದು ತನ್ನದೇ ವಿಮಾನಗಳನ್ನು, ಡಿಪೋಗಳನ್ನು, ಡೆಲಿವರಿ ವ್ಯಾನುಗಳನ್ನು ಬಳಸಿ ಹೇಗೆ ೨೪ ಘಂಟೆಗಳಲ್ಲಿ ಅಮೇರಿಕಾದ ಯಾವುದೇ ಸ್ಥಳದಿಂದ, ಯಾವುದೇ ಇನ್ನೊಂದು ಸ್ಥಳಕ್ಕೆ ಪಾರ್ಸೆಲ್ಗಳನ್ನು ಮುಟ್ಟಿಸಬಹುದು?’ ಎಂಬುದರ ಬಗ್ಗೆ ಲೇಖನ ಬರೆದ. ಆ ಪೇಪರನ್ನು ಓದಿದ ಆತನ ಪ್ರೊಫೆಸರ್ ‘ಆಲೋಚನೆಯೇನೋ ಚೆನ್ನಾಗಿದೆ. ಆದರೆ ಇದನ್ನು ಕಾರ್ಯರೂಪಕ್ಕೆ ತರುವುದು ಸಾಧ್ಯವಿಲ್ಲ’ ಎಂದು ಹೇಳಿ ‘C’ ಗ್ರೇಡ್ ಕೊಟ್ಟಿದ್ದ.

1966ರಲ್ಲಿ ಪದವಿ ಮುಗಿದನಂತರ ಸ್ಮಿತ್ ಮೂರುವರ್ಷ ಮಿಲಿಟರಿ ಸೇವೆಗೆ ನಿಯುಕ್ತಿಗೊಂಡ. ವಿಯೆಟ್ನಾಂ ಯುದ್ಧದಲ್ಲಿ ಪಾಲ್ಗೊಂಡು ತನ್ನ ಕೆಲಸಕ್ಕಾಗಿ ಪದಕಗಳನ್ನೂ ಪಡೆದ. ಈ ಸಮಯದಲ್ಲಿ ಆತನಿಗೆ ಸೇನೆಯ ಸಾಮಾನು ಸಂಗ್ರಹಣಾ ಹಾಗೂ ವಿತರಣಾ ಜಾಲ ಹೇಗೆ ಕೆಲಸ ಮಾಡುತ್ತದೆಯೆಂದು ತಿಳಿಯುವ ಅವಕಾಶ ಸಿಕ್ಕಿತು. 1969ರಲ್ಲಿ ಸೈನ್ಯದಿಂದ ಬಿಡುಗಡೆ ಹೊಂದಿದಮೇಲೆ, ಸ್ಮಿತ್ ಒಂದು ವಿಮಾನ ನಿರ್ವಹಣಾ ಕಂಪನಿಯೊಂದನ್ನು ಕೊಂಡುಕೊಂಡ. ಒಂದು ವರ್ಷದಲ್ಲಿ ಆ ಕಂಪನಿಯನ್ನು ವಿಮಾನಗಳನ್ನುಪಯೋಗಿಸಿ ವ್ಯಾಪಾರ ಮಾಡುವ ಕಂಪನಿಯಾಗಿ ಬದಲಾಯಿಸಿದ. ತನ್ನ ಹಳೆಯ ಯೋಚನೆಯಲ್ಲಿ ಸಂಪೂರ್ಣ ಭರವಸೆಯಿಟ್ಟು, ಆಗಷ್ಟೇ ತನ್ನ ಪಾಲಿಗೆ ಪಿತ್ರಾರ್ಜಿತವಾಗಿ ಬಂದಿದ್ದ 40 ಲಕ್ಷ ಡಾಲರ್ ಬಂಡವಾಳ ಹೂಡಿ 1973ರಲ್ಲಿ ಒಂದು ಪಾರ್ಸೆಲ್ ವಿತರಣಾ ಸೇವೆಯ ವ್ಯವಹಾರ ಪ್ರಾರಂಭಿಸಿಯೇಬಿಟ್ಟ. ‘ಅಮೇರಿಕಾದ ಯಾವ ಊರಿಂದ ಯಾವ ಊರಿಗಾದರೂ ರಾತ್ರಿಕಳೆದು ಬೆಳಗಾಗುವಷ್ಟರಲ್ಲಿ ಪಾರ್ಸೆಲ್ ತಲುಪಿಸುತ್ತೇವೆ’ ಎಂಬ ವಾಗ್ದಾದದೊಂದಿಗೆ ಕಂಪನೆ ತನ್ನ ಪುಟ್ಟ ಹೆಜ್ಜೆಯಿಟ್ಟಿತು. 1973ರಲ್ಲಿ 186 ಪಾರ್ಸೆಲ್ಲುಗಳೊಂದಿಗೆ ಮೊದಲ ವಿಮಾನ ಹಾರಿಯೂಬಿಟ್ಟಿತು. ಆದರೆ ಪ್ರಾರಂಭವಾದ ಕೆಲಸಮಯದಲ್ಲೇ ಹಣದ ಅಭಾವ ತೋರತೊಡಗಿತು. ವ್ಯಾನುಗಳು, ಡಿಪೋಗಳನ್ನೇನೋ ಸಂಭಾಳಿಸಬಹುದು. ವಿಮಾನ ಹಾರಿಸುವುದೆಂದರೆ ಅಷ್ಟು ಸುಲಭದ, ಕಡಿಮೆ ಖರ್ಚಿನ ಮಾತೇ? ಅದಕ್ಕೆ ಸರಿಯಾಗಿ ಆಗ ವಿಮಾನ ಇಂಧನದ ಬೆಲೆಯೂ ವಿಮಾನದಂತೆಯೇ ಮೇಲ್ಮುಖಮಾಡಿತ್ತು. ಸ್ಮಿತ್ ತನ್ನ ವಿಮಾನಗಳಿಗೆ ಇಂಧನ ಖರೀದಿಸಲು ಒದ್ದಾಡತೊಡಗಿದ. ಹಳೆಯ ಬಾಕಿ ಕಟ್ಟದೇ ಇಂಧನ ಕೊಡಲಾಗುವುದಿಲ್ಲವೆಂದು ಪೂರೈಕೆದಾರರು ಖಡಾಖಂಡಿತವಾಗಿ ಹೇಳಿದರು. ಕೊನೆಯ ಪ್ರಯತ್ನವೆಂಬಂತೆ ಫ್ರೆಡ್, ಆ ಗುರುವಾರ ‘ಜೆನರಲ್ ಡೈನಾಮಿಕ್ಸ್’ ಕಂಪನಿಯಲ್ಲಿ ಸಾಲಕ್ಕೆ ಅರ್ಜಿ ಹಾಕಿದ. ಇವನ ಬ್ಯಾಲೆನ್ಸ್ ಶೀಟ್ ನೋಡಿದ ‘ಜೆನರಲ್ ಡೈನಾಮಿಕ್ಸ್’, ಕುಡಿಯಲು ಟೀ ಕೂಡಾ ಕೊಡದೇ ಹೊರಕಳಿಸಿತು.

ಸೋಮವಾರಕ್ಕೆ ವಿಮಾನ ಹೊರಡಿಸಲು 24,000 ಡಾಲರ್ ಹಣಬೇಕಾಗಿತ್ತು. ಕಂಪನಿಯ ಅಕೌಂಟಿನಲ್ಲಿ ಬರೇ 5,000 ಡಾಲರ್ ಹಣವಿತ್ತು. ಈಗೇನು ಮಾಡುವುದೆಂದು ಎಲ್ಲರೂ ತಲೆಮೇಲೆ ಕೈಹೊತ್ತು ಕುಳಿತಿದ್ದಾಗ, ಫ್ರೆಡ್ ಸ್ಮಿತ್ ಬ್ಯಾಂಕಿಗೆ ಹೋಗಿ, ಅಕೌಂಟನ್ನೆಲ್ಲಾ ಬಾಚಿ ಬಳಿದು ಪೂರ್ತಿ ದುಡ್ಡನ್ನೂ ತೆಗೆದು, ಬ್ಯಾಗ್ ಹಿಡಿದು ‘ಲಾಸ್-ವೇಗಸ್’ಗೆ ಹೊರಟ!! ಲಾಸ್ ವೇಗಸ್ ಜೂಜಾಟಕ್ಕೆ ಹೆಸರುವಾಸಿಯಾದ ನಗರ. ಕೈಯಲ್ಲಿದ್ದ ಹಣವನ್ನು ಜೂಜಾಡಿಬರುತ್ತೇನೆಂದು ಫ್ರೆಡ್ ನಿರ್ಧರಿಸಿದ್ದ. ಪಾಲುದಾರರು ಹೌಹಾರಿದರು! ಫ್ರೆಡ್ ಸಮಾಧಾನದಿಂದ ‘ನೋಡ್ರಪ್ಪಾ! 5000 ಡಾಲರ್ ಹಣದಿಂದ ಏನೂ ಮಾಡಲು ಸಾಧ್ಯವಿಲ್ಲ. ನಮಗೆ ಬೇಕಾಗಿರುವುದರ ಕಾಲುಭಾಗವೂ ಇದಲ್ಲ. ಹಾಗಿದ್ದ ಮೇಲೆ ಈ ದುಡ್ಡನ್ನು ಹೇಗೆ ಉಪಯೋಗಿಸಿದರೇನು? ಕಷ್ಟಕಾಲದಲ್ಲಿ ಏನು ಮಾಡಿದರೂ ಸರಿತಾನೇ! ಕಡೇಪಕ್ಷ ಜೂಜಾದರೂ ಆಡಿ ನೋಡುತ್ತೇನೆ’ ಎಂದು ಲಾಸ್ ವೇಗಸ್ಸಿನತ್ತ ಕಾರು ಓಡಿಸಿದ.

ಲಾಸ್-ವೇಗಸ್ಸಿಗೆ ಹೊದವನೇ ಕ್ಯಾನಿಸೋ ಒಂದನ್ನು ಹೊಕ್ಕ ಫ್ರೆಡ್ 5000 ಡಾಲರ್ ಹೂಡಿ, ಇಪ್ಪತ್ತೆರಡು ಸುತ್ತು ಬ್ಲಾಕ್-ಜಾಕ್ ಆಟವಾಡಿ (Black Jack – ಕೈಯಲ್ಲಿರುವ ಎಲೆಗಳ ಮೌಲ್ಯ 21ದಾಟದಂತೆ ಆಡುವ ಇಸ್ಪೀಟಿನ ಒಂದು ಆಟ) ಬರೋಬ್ಬರಿ 27000 ಡಾಲರ್ ಗೆದ್ದ!!! ಸ್ವತಃ ಪ್ರೆಡ್ಡಿಗೇ ಆಶ್ಚರ್ಯವಾಗುವಂತೆ, ಸಧ್ಯದ ಸಾಲತೀರಿಸಿ, ಮತ್ತೊಮ್ಮೆ ಇಂಧನ ಪಡೆದು ಕಂಪನಿಯನ್ನು ಇನ್ನೂ ಒಂದು ವಾರ ನಡೆಸಬಹುದಾದಷ್ಟು ಹಣ ಕೈಗೆ ಬಂದಿತ್ತು! ದೊಡ್ಡ ಸಹಾಯವೇನೂ ಅಲ್ಲದಿದ್ದರೂ, ಕಂಪನಿ ಸಾಯದಂತೆ ನೋಡಿಕೊಳ್ಳಬಹುದಾಗಿತ್ತು. ಏನೂ ಮಾಡದಿದ್ದಲ್ಲಿ ಕಂಪನಿ ಮುಚ್ಚುವುದೇ ದಾರಿಯಾಗಿದ್ದಾಗ, ಈ ಹಣ ಖಂಡಿತವಾಗಿಯೂ ಸಹಾಯಕಾರಿಯಾಗಿತ್ತು. ‘If you try you may win or loose. But if you don’t try at all, you will surely loose’ ಎಂಬ ಮಾತಿನಂತೆ ಫ್ರೆಡ್ ತನ್ನ ಕಂಪನಿಯನ್ನು ಸಣ್ಣದೊಂದು ಹುಲ್ಲುಕಡ್ಡಿಯ ಆಸರೆಯಲ್ಲಿ ಇನ್ನೊಂದು ವಾರ ನಡೆಸಿದ. ಆ ವಾರದಲ್ಲಿ ಮತ್ತೊಮ್ಮೆ ಬ್ಯಾಂಕುಗಳನ್ನು ಭೇಟಿಮಾಡಿ, ಹಣಕಾಸು ಸಹಾಯವನ್ನು ಪಡೆದ. ಕಂಪನಿ ಮುಳುಗಲಿಲ್ಲ. ಮುನ್ನಡೆಯಿತು.

Fred_Smith-2

ಹೀಗೆ ಇನ್ನೇನು ಮುಳುಗಿಯೇಬಿಟ್ಟಿತು ಎಂಬಂತಿದ್ದ ಕಂಪನಿಯೊಂದು, ಜೂಜಾಟದಿಂದ ಬಂದ ಹಣದಿಂದ ತನ್ನನ್ನು ಉಳಿಸಿಕೊಂಡಿತು. ಆಶ್ಚರ್ಯದ ವಿಷಯವೆಂದರೆ, ಇಂದು ಈ ಕಂಪನಿ ವರ್ಷಕ್ಕೆ 45 ಶತಕೋಟಿ ಡಾಲರ್ ಆದಾಯಗಳಿಸುತ್ತದೆ. ಅದು ಸುಮಾರು ಮೂರುಲಕ್ಷ ಉದ್ಯೋಗಿಗಳ ಮಹಾಸಮೂಹ. ಅವತ್ತು ಒಂದು ವಿಮಾನ ಹಾರಿಸಲೂ ಕಷ್ಟಪಡುತ್ತಿದ್ದ ಕಂಪನಿ ಇವತ್ತು ಒಟ್ಟು 666 ವಿಮಾನಗಳ ಹಾಗೂ 47,500 ವಾಹನಗಳ ದೈತ್ಯಸಂಸ್ಥೆ. ಫ್ರೆಡ್ ಸ್ಮಿತ್ ಒಬ್ಬನ ನಿವ್ವಳ ಬೆಲೆಯೇ(net worth) ಮೂರುವರೆ ಶತಕೋಟಿ ಡಾಲರ್! ಈತನ ಪೂರ್ತಿ ಹೆಸರು ಫ್ರೆಡರಿಕ್ ವಾಲೆಸ್ ‘ಫ್ರೆಡ್’ ಸ್ಮಿತ್.

ಅಂದಹಾಗೆ, ಅಮೇರಿಕಾದ ಸರ್ಕಾರೀ ಅಂಚೆ ಸೇವೆಯನ್ನೂ ಮೀರಿಸಿ, ಗ್ರಾಹಕರ ಮೆಚ್ಚುಗೆಗೆ ಪಾತ್ರವಾದ ಈ ಕಂಪನಿಯ ಹೆಸರು FedEx (Federal Express ಎಂಬ ಮೂಲಹೆಸರಿನ ಹೃಸ್ವರೂಪ). ಇಂತ ಬೃಹತ್ ಸಂಸ್ಥೆ ತನ್ನ ಇತಿಹಾಸದಲ್ಲಿ ಒಮ್ಮೆ ‘ಜೂಜಾಟ’ದಿಂದ ಬಚಾಯಿಸಲ್ಪಟ್ಟಿತು ಎಂದರೆ ನಂಬಲು ಸುಲಭವಲ್ಲ, ಅಲ್ಲವೇ? 🙂

ಬುದ್ಧಿಗೊಂದು ಗುದ್ದು – ೨೭

ಬುದ್ಧಿಗೊಂದು ಗುದ್ದು – ೨೭

ಪೆಟ್ರೋಲಿನ ಬೆಲೆಯ ಪಪ್ಪಾ…..ಯಾರಪ್ಪಾ!?

ಹಿಂದಿನ ಅಂಕಣದಲ್ಲಿ ಅಂತರ್ಜಾಲವನ್ನು ನಿಯಂತ್ರಿಸುವ ಕೆಲ ಸಂಸ್ಥೆಗಳ ಬಗ್ಗೆಬರೆದಿದ್ದೆ. ಈ ವಾರ ಇನ್ನೂ ಹೆಚ್ಚು ಪ್ರಸ್ತುತವಾದ ವಿಷಯವೊಂದನ್ನು ಕೈಗೆತ್ತಿಕೊಂಡಿದ್ದೇನೆ. ನಾನು, ನೀವು, ಅವರು, ಎಲ್ಲರೂ ಹೆಚ್ಚು ಕಡಿಮೆ ಇಡೀ ಜಗತ್ತೇ ಒಂದಲ್ಲಾ ಒಂದು ರೀತಿಯಲ್ಲಿ ಅವಲಂಬಿತವಾಗಿರುವ ಪೆಟ್ರೋಲಿನ ದರ ಹೇಗೆ ನಿರ್ಧರಿಸಲ್ಪಡುತ್ತಿದೆ ಎಂಬುದನ್ನು ತಿಳಿಯೋಣ! ಏನಂತೀರಿ?

ಮೋದಿ ವಿರೋಧಿಗಳಿಗೂ ಬೆಂಬಲಿಗರಿಗೂ ಸಧ್ಯಕ್ಕೆ ಕೆಲಸ ಕೊಟ್ಟಿರುವ ಎರಡನೇ ಅತೀಮುಖ್ಯ ವಿಷಯವೆಂದರೆ ಪೆಟ್ರೋಲ್ ಬೆಲೆ ಇಳಿಕೆ (ಹಾಗೂ ಸಧ್ಯದಲ್ಲೇ ಕಾದಿರುವ ಏರಿಕೆ 😉 ). ಮೊದಲನೇ ವಿಷಯ ನಮ್ಮ ದೇಶದಲ್ಲಿ ಯಾವತ್ತಿದ್ರೂ ಜಾತಿ ಹಾಗೂ ಮತ ತಾನೇ? ಹಾಗಾಗಿ ಮೊದಲನೇ ಮುಖ್ಯ ವಿಷಯ ಮತಾಂತರ ಹಾಗೂ ಅದರ ನಿಷೇದ ಕಾಯ್ದೆ. ಬ್ಯಾಕ್ ಟು ಟಾಪಿಕ್….ಜನರನ್ನು ದಿನವಿಡೀ ಎಲ್ಲಾ ಮಗ್ಗುಲಲ್ಲೂ ಮುಟ್ಟುವ ವಿಷಯಗಳಲ್ಲಿ ಸೂರ್ಯನನ್ನು ಬಿಟ್ಟರೆ ಮುಂದಿನ ಸ್ಥಾನ ಪೆಟ್ರೋಲಿಗೇ ಅಲ್ಲವೇ. ಬೆಳಗ್ಗೆದ್ದು ಸ್ನಾನದ ಬಿಸಿನೀರಿಗೆ ಹಾಕುವ ಸ್ವಿಚ್ಚಿನಿಂದ ಹಿಡಿದು ರಾತ್ರಿ ಮಲಗುವಾಗ ತಲೆಯಿಡುವ ದಿಂಬಿನ ಒಳಗಿರುವ ಪೈಬರ್ ಹತ್ತಿಯವರೆಗೆ ಎಲ್ಲವೂ ಪೆಟ್ರೋಲ್ ಅಥವಾ ಕಚ್ಚಾತೈಲದ ಮೇಲೆ ಅವಲಂಬಿತವಾಗಿವೆ. ಹೀಗಿದ್ದಾಗ ಅದರ ಬೆಲೆಯೇರಿಕೆ ಇಳಿಕೆ ನಮ್ಮ ಜೀವನದ ಮೇಲೆ ಬೇರೆ ಬೇರೆ ರೀತಿಯಲ್ಲಿ ಪರಿಣಾಮ ಬೀರಬಲ್ಲುದು. ಇದರ ಬಗ್ಗೆ ಇವತ್ತು ಸ್ವಲ್ಪ ತಿಳಿಯುವ ಪ್ರಯತ್ನ ಮಾಡೋಣ.

ಈ ಬೆಲೆಯೇರಿಕೆ ಇಳಿಕೆಯ ತಲೆಬಿಸಿ ಇವತ್ತು ನಿನ್ನೆಯದಲ್ಲ. ವಾಣಿಜ್ಯ ಉದ್ದೇಶಕ್ಕಾಗಿ ಮೊತ್ತಮೊದಲ ತೈಲಬಾವಿಯನ್ನು 1857ರಲ್ಲಿ ರೊಮೇನಿಯಾದಲ್ಲಿ ಕೊರೆದಾಗಲಿಂದಲೂ ಇದೆ. ಪೆಟ್ರೋಲ್ ಬೆಲೆ ನಿರ್ಧಾರವಾಗುವುದು ಹಲವಾರು ಅಂಶಗಳ ಮೇಲೆ. ಕಚ್ಚಾತೈಲದ ಬೇಡಿಕೆ ಹಾಗೂ ಲಭ್ಯತೆ, ಯಾವ ದೇಶದಿಂದ ಆಮದು ಮಾಡಲಾಗುತ್ತಿದೆ, ಅಂತರಾಷ್ಟ್ರೀಯ ಆಗುಹೋಗುಗಳು, ವಿದೇಶಿ ವಿನಿಮಯದ ಏರುಪೇರು, ಸರ್ಕಾರಿ ತೆರಿಗೆ ನಿಯಮಾವಳಿ ಹಾಗೂ ತಂತ್ರಜ್ಞಾನದ ಸುಧಾರಣೆ ಮುಂತಾದ ಹಲವಾರು ಅಂಶಗಳನ್ನೊಳಗೊಂಡ ಕ್ಲಿಷ್ಟ ಸಮೀಕರಣ. ನೈಜೀರಿಯಾದಲ್ಲಿ ಸರ್ಕಾರ ಬಿದ್ದು ಹೋದರೆ ಆಸ್ಟ್ರೇಲಿಯಾದಲ್ಲಿ ಪೆಟ್ರೋಲ್ ಬೆಲೆ ಹೆಚ್ಚಾಗುತ್ತದೆ. ಕತಾರಿನಲ್ಲಿ ರಾಜ ಬದಲಾದರೆ ಪಾಕಿಸ್ಥಾನ ಗ್ಯಾಸ್ ಸಿಲಿಂಡರಿಗೆ ಹೆಚ್ಚಿನ ಬೆಲೆ ಕಟ್ಟಬೇಕಾಗುತ್ತದೆ. ಅಮೇರಿಕಾದಲ್ಲಿ ವಿತ್ತೀಯ ಕೊರತೆಯುಂಟಾದರೆ, ಸೌದಿ ಅರೇಬಿಯಾದಿಂದ ತೈಲ ಅಮದು ಮಾಡುವ ಎಲ್ಲಾ ದೇಶಗಳಲ್ಲಿ ಪೆಟ್ರೋಲ್ ಬೆಲೆ ಮೇಲೇರುತ್ತದೆ, ಇರಾನಿನ ಅಣುಶಕ್ತಿ ಯೋಜನೆಗಳ ಮೇಲೆ ವಿಶ್ವಸಂಸ್ಥೆಯ ನಿರ್ಬಂಧ ಹೆಚ್ಚಾದರೆ ಭಾರತದಲ್ಲಿ ನಮಗೆ ಬಿಸಿ ತಾಗುತ್ತದೆ, ಅಂಗೋಲಾದಲ್ಲಿ ಮಾರಣಹೋಮವೇನಾದರೂ ನಡೆದರೆ ಯೂರೋಪಿಯನ್ನರಿಗೆ ಪೆಟ್ರೋಲಿನ ಕಮಟು ಮೂಗಿಗೆಬಡಿಯುತ್ತದೆ. ಹೀಗೆ ಹಲವಾರು ಅಂಶಗಳ ಮಿಲನ ಈ ತೈಲಬೆಲೆ.

ತೈಲಮಾರಾಟಗಾರನ ಬದಿಯ ನೋಟ:

ಎಲ್ಲದಕ್ಕಿಂತಾ ಮೊದಲನೆಯದಾಗಿ ಪೆಟ್ರೋಲಿನ ಬೆಲೆ ನಿಗದಿಯಾಗುವುದು ಅರ್ಥಶಾಸ್ತ್ರದ ಮೂಲನಿಯಮಗಳಲ್ಲೊಂದಾದ ಬೇಡಿಕೆ-ಪೂರೈಕೆ ಅಂಕೆ ಸಂಖ್ಯೆಗಳ ಮೇಲೆ. ಕಚ್ಚಾತೈಲವೆಂಬುದು ಒಂದು ದಿನ ಮುಗಿದುಹೋಗಬಹುದಾದ ಸಂಪನ್ಮೂಲವಾದ್ದರಿಂದ, ಅದು ಇರುವಷ್ಟು ವರ್ಷಗಳಲ್ಲಿ ಸಾಧ್ಯವಾದಷ್ಟು ಹಣಗಳಿಸುವುದು ತೈಲಮಾರಾಟವೇ ಮೂಲಆದಾಯವಾದ ಕೆಲ ರಾಷ್ಟ್ರಗಳ ಉದ್ದೇಶ. ಚೀನಾ ಸಧ್ಯಕ್ಕೆ ಜಗತ್ತಿನಲ್ಲಿ ವೇಗವಾಗಿ ಆರ್ಥಿಕಬಲಗಳಿಸುತ್ತಿರುವ ದೇಶ. ಅಲ್ಲಿನ ಪ್ರಜೆಯ ಆದಾಯ ಕಳೆದ ಇಪ್ಪತ್ತು ವರ್ಷಗಳಲ್ಲಿ 4 ಪಟ್ಟು ಹೆಚ್ಚಿದೆ. ಈ ಮೊದಲು ಸೈಕಲ್ ಮತ್ತು ಸಾರ್ವಜನಿಕ ಸಾರಿಗೆ ಬಳಸುತ್ತಿದ್ದ ಚೀನಾದ 34.5% ನಾಗರೀಕರು ಕಳೆದ ಐದು ವರ್ಷಗಳಲ್ಲಿ ಕಾರುಗಳನ್ನು ಕೊಂಡಿದ್ದಾರೆ. ವೇಗವಾಗಿ ಬೆಳೆಯುತ್ತಿರುವ ಈ ಕಾರು ಮಾರಾಟವನ್ನು ಬೆಂಬಲಿಸಲು ಚೀನಾ ಸರ್ಕಾರ 2020ರೊಳಗೆ ತನ್ನೆಲ್ಲಾ ಪ್ರಾಂತಗಳನ್ನು ಸೇರಿಸುವ 42,000 ಮೈಲಿ ಉದ್ದದ ಹೊಸಾ ಎಕ್ಸ್ಪ್ರೆಸ್ ಹೆದ್ದಾರಿಗಳನ್ನು ನಿರ್ಮಿಸುತ್ತಿದೆ. ಭಾರತ 2022ರ ಒಳಗೆ ತನ್ನ ಹೆದ್ದಾರಿಜಾಲಕ್ಕೆ ಇನ್ನೂ 12,000 ಮೈಲಿಗಳನ್ನು ಸೇರಿಸಲಿದೆ ಹಾಗೂ ಒಳನಾಡು ಜಲಸಾರಿಗೆಯ ಬಲವನ್ನು ಹೆಚ್ಚಿಸುತ್ತಿದೆ. ರಸ್ತೆಗಳು ಹಾಗೂ ಸಂಪರ್ಕಜಾಲ ಚೆನ್ನಾಗಿದ್ದಾಗ ಸಹಜವಾಗಿಯೇ ವ್ಯವಹಾರವಲಯ ಬಲಗೊಳ್ಳುತ್ತದೆ. ಅಂದರೆ ಹೆಚ್ಚೆಚ್ಚು ಲಾರಿ ಕಾರು ಬಸ್ಸುಗಳು ರಸ್ತೆಗಿಳಿಯಲಿವೆ, ಮೋಟಾರುಬೋಟುಗಳು ನೀರಿಗಿಳಿಯಲಿವೆ. ಅಂದರೆ ಪೆಟ್ರೋಲ್ ಮತ್ತು ಡೀಸೆಲ್ ಬೇಡಿಕೆ ಹೆಚ್ಚಾಗಲಿದೆ. ಅಂದಮೇಲೆ ಪೂರೈಕೆದಾರರೂ ತಮ್ಮ ವ್ಯವಹಾರ ಜಾಣ್ಮೆಯನ್ನು ಪ್ರದರ್ಶನಕ್ಕಿಟ್ಟು, ಪೆಟ್ರೋಲ್ ಬೆಲೆಯೊಂದಿಗೆ ಆಟವಾಡುತ್ತಾರೆ.

ಎರಡನೆಯದಾಗಿ, ಮಾರುಕಟ್ಟೆಯ ತಲ್ಲಣಗಳು. ಯಾವ ಕೊಳ್ಳುಗನೂ/ದೇಶವೂ ಮಾರಾಟಗಾರನ ಬಳಿ ಹೋಗಿ ‘ಇವತ್ತಿನ ರೇಟ್ ಎಷ್ಟು? ಎರಡು ಮಿಲಿಯನ್ ಲೀಟರ್ ಪೆಟ್ರೋಲ್ ಕೊಡಿ’ ಎಂದು ಕೇಳುವುದಿಲ್ಲ. ಈ ಬೆಲೆಗಳು ಪೂರ್ವನಿರ್ಧಾರಿತವಾಗಿರುತ್ತವೆ ಅಥವಾ ನಿರ್ಧರಿಸಲಾಗುವಂತೆ ಕೆಲ ಕುಳಗಳು ನಿರ್ದೇಶಿಸುತ್ತಾರೆ. ಅಂತರಾಷ್ಟ್ರೀಯ ಮಟ್ಟದಲ್ಲಿ ತೈಲಬೆಲೆ ನಿರ್ಧಾರವಾಗುವುದು ಫ್ಯೂಚರ್ಸ್ ಮಾರುಕಟ್ಟೆಯಲ್ಲಿ. ಅಂದರೆ ಮುಂದೊಂದು ದಿನ ಮಾರಾಟವಾಗುವ ತೈಲಕ್ಕೆ ಇಂದೇ ಬೆಲೆ ನಿಗದಿಮಾಡಿ ಭವಿಷ್ಯದಲ್ಲಿ ಕಾರ್ಯಗತಗೊಳಿಸಲಾಗುವಂತೆ ಒಂದು ಒಪ್ಪಂದವನ್ನೂ ಕೊಳ್ಳುಗ ಮತ್ತು ಮಾರಾಟಗಾರ ಮಾಡಿಕೊಳ್ಳುತ್ತಾರೆ. ವ್ಯವಹಾರ ಭಾಷೆಯಲ್ಲಿ ಇದನ್ನು ಫಾರ್ವರ್ಡ್ ಕಾಂಟ್ರಾಕ್ಟ್ ಎನ್ನಲಾಗುತ್ತದೆ.

ಈ ಫ್ಯೂಚರ್ಸ್ ಮಾರುಕಟ್ಟೆಯಲ್ಲಿ ಎರಡು ರೀತಿಯ ಜನರು ಸಿಗುತ್ತಾರೆ. ಮೊದಲನೆಯವರು ‘ಹೆಡ್ಜಿಂಗ್ (hedging)’ ಮಾಡುವವರು. ಮಾರುಕಟ್ಟೆಯ ಏರಿಳಿತದಿಂದಾಗಿ ತಮ್ಮ ಸಂಸ್ಥೆಗಾಗುವ ನಷ್ಟಗಳಿಂದ ತಪ್ಪಿಸಿಕೊಳ್ಳಲು ಇವರು ಇವತ್ತೇ ಮುಂದ್ಯಾವುದೋ ದಿನಕ್ಕೆ ಬೇಕಾಗುವ ತೈಲವನ್ನು ಖರೀದಿಸುತ್ತಾರೆ. ಉದಾಹರಣೆಗೆ ವಿಮಾನಕಂಪನಿಗಳು. ಈ ಹೆಡ್ಜಿಂಗಿನಿಂದಾಗಿ ಇವರು ತಮ್ಮ ವ್ಯವಹಾರವನ್ನು ಸಂಭಾಳಿಸುವುದು ಸುಲಭವಾಗುತ್ತದೆ. ಯಾಕೆಂದರೆ, ಯಾವತ್ತು ಯಾರಿಗೆ ಎಷ್ಟು ದುಡ್ಡು ಕೊಡಬೇಕೆಂಬುದು ಇವರಿಗೆ ಮೊದಲೇ ತಿಳಿದಿರುವುದರಿಂದ ಉಳಿದ ಖರ್ಚುವೆಚ್ಚಗಳನ್ನು ನಿರ್ವಹಿಸುವುದು ಸುಲಭ. ಮಾರಾಟಗಾರನಿಗೂ ತನ್ನ ಉತ್ಪನ್ನಕ್ಕೆ ಒಬ್ಬ ಕೊಳ್ಳುಗ ಹಾಗೂ ವ್ಯಾಪಾರದ ಭರವಸೆ ದೊರೆತಿರುವುದರಿಂದ ಆತ ತನ್ನ ಉತ್ಪಾದನೆಯನ್ನು ಅದಕ್ಕನುಗುಣವಾಗಿ ಹೊಂದಿಸಿಕೊಳ್ಳಬಹುದು. ಒಪ್ಪಂದ ನಡೆದ ದಿನದಿಂದ, ನಿಜವಾಗಿಯೂ ಉತ್ಪನ್ನ ಕೈಗೆ ಬರುವ ದಿನದಂದು ತೈಲಬೆಲೆ ಹೆಚ್ಚಾಗಿದ್ದರೆ ಕೊಳ್ಳುಗನಿಗೆ ಲಾಭ. ಕಡಿಮೆಯಾಗಿದ್ದರೆ ಮಾರಾಟಗಾರನಿಗೆ ಲಾಭ. ಆದರೆ ಆ ಮಟ್ಟದ ರಿಸ್ಕ್ ಅನ್ನು ಅರಿತೇ ಬೆಲೆ ನಿಗದಿಯಾಗುತ್ತದೆ.

ಇನ್ನೊಂದು ತರಹದವರು ‘ಸ್ಪೆಕ್ಯುಲೇಟರ್’. ಇವರು ಕೊಳ್ಳುಗರೇ ಆಗಬೇಕೆಂದಿಲ್ಲ. ಸುಮ್ಮನೇ ಬೆಲೆಯನ್ನು ಊಹಿಸುವುದರ ಮೂಲಕ ಶೇರು ಮಾರುಕಟ್ಟೆಯನ್ನು ಚಾಲನೆಯಲ್ಲಿಡುವವರು. ಒಂದು ಅಂದಾಜಿನ ಪ್ರಕಾರ ಕೇವಲ 3%ದಷ್ಟು ಸ್ಪೆಕ್ಯುಲೇಟರುಗಳು ಮಾತ್ರ ಕೊನೆಗೆ ಉತ್ಪನ್ನವನ್ನು ಕೊಳ್ಳುತ್ತಾರೆ, ಉಳಿದವರದ್ದು ಬರೀ ತೆರೆಮರೆಯ ಆಟವಷ್ಟೇ. ಆದರೆ ಇವರೆಲ್ಲಾ ಆಳವಾದ ಜೇಬಿರುವ ಭಾರೀ ಪಾರ್ಟಿಗಳು. ಈ ಕುಳಗಳು ಮಾರುಕಟ್ಟೆ ಮತ್ತು ಅಂತರರಾಷ್ಟ್ರೀಯ ವಿದ್ಯಮಾನಗಳನ್ನು ಗಮನಿಸುತ್ತಾ, ಮಾರುಕಟ್ಟೆಯಲ್ಲಿ ತೈಲ ಬೆಲೆಯೊಂದಿಗೆ ಆಟವಾಡುತ್ತಾರೆ. ಬಹಳಷ್ಟು ಬಾರಿ ತೈಲಕಂಪನಿಗಳೇ ಈ ಸ್ಪೆಕ್ಯುಲೇಟರುಗಳಿಗೆ ಕುಮ್ಮಕ್ಕು ನೀಡಿ ಮಾರುಕಟ್ಟೆಯಲ್ಲಿ ತೈಲಬೆಲಯಬಗ್ಗೆ ಅಭದ್ರತಾ ಭಾವನೆ ಮೂಡಿಸುತ್ತಾರೆ. ಬೆಲೆಯನ್ನು ಹೆಚ್ಚಾಗುವಂತೆ ಮಾಡುತ್ತಾರೆ. ಯುಕ್ರೇನಿನಲ್ಲಿ ಸರ್ಕಾರ ಬೀಳುವುದಕ್ಕೂ ತೈಲಬೆಲೆಗೂ ಸಂಬಂಧವೇ ಇರದಿದ್ದರೂ ಈ ಸ್ಪೆಕ್ಯುಲೇಟರುಗಳು ಅದಕ್ಕೊಂದು ಕಥೆಹೆಣೆದು market sentiments ಜೊತೆ ಆಟವಾಡುತ್ತಾರೆ.

ಮೂರನೆಯದಾಗಿ ಮಾರಾಟಗಾರನ ನಿರ್ಧಾರಗಳು. ಅಂತರರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ಕಚ್ಚಾ ತೈಲದ ಬೆಲೆ ನಿರ್ಧಾರ ಮಾಡುವಲ್ಲಿ OPEC ಎಂಬ ಸಂಸ್ಥೆಯ ಪಾತ್ರ ಬಹಳ ದೊಡ್ಡದು. ಜಗತ್ತಿನ ಅತೀ ಹೆಚ್ಚು ತೈಲವಿರುವ ಮೊದಲ ಇಪ್ಪತ್ತು ದೇಶಗಳಲ್ಲಿ ಹನ್ನೆರಡು ದೇಶಗಳು (ಅಲ್ಜೀರಿಯ, ಅಂಗೋಲಾ, ಈಕ್ವೆಡಾರ್, ಇರಾನ್, ಇರಾಕ್, ಕುವೈತ್, ಲಿಬಿಯಾ, ನೈಜೀರಿಯಾ, ಕತಾರ್, ಸೌದಿ ಅರೀಬಿಯಾ, ಸಂಯುಕ್ತ ಅರಬ್ ಎಮಿರೇಟ್ಸ್ ಹಾಗೂ ವೆನಿಜೂವೆಲಾ) ಒಟ್ಟಾಗಿ ಈ ಸಂಸ್ಥೆಯನ್ನು ರಚಿಸಿಕೊಂಡಿವೆ. ಪ್ರತೀವರ್ಷ OPEC ತನ್ನ ಸದಸ್ಯ ರಾಷ್ಟ್ರಗಳಿಗೆ ಉತ್ಪಾದನಾ ಗುರಿಯನ್ನು ನಿಗದಿಪಡಿಸುತ್ತದೆ. ಜಗತ್ತಿನ ತೈಲವೆಲ್ಲಾ ಹತ್ತೇ ವರ್ಷದಲ್ಲಿ ಮುಗಿದು ಹೋಗದಂತೆ ನೋಡಿಕೊಳ್ಳುವಲ್ಲಿ ಈ ಗುರಿನಿಗದಿಪ್ರಕ್ರಿಯೆ ಮಹತ್ವದ್ದು. ಈ ಗುರಿ ಹೆಚ್ಚುಕಡಿಮೆಯಾದಾಗ ಮಾರುಕಟ್ಟೆಯಲ್ಲಿ ತೈಲಬೆಲೆಯೂ ಏರಿಳಿಕೆಯಾಗುತ್ತದೆ. ಯಾವಯಾವ ದೇಶಗಳು ತೈಲಾವಲಂಬಿತ ಪ್ರಾಜೆಕ್ಟುಗಳನ್ನು ಕಮ್ಮಿಕೊಂಡಿವೆಯೋ ಅಲ್ಲಿ ಬೆಲೆ ಹೆಚ್ಚಾಗುತ್ತದೆ. OPEC ತರಹದ್ದೇ ಇನ್ನೂ ಎರಡು ಸಂಸ್ಥೆಗಳಿವೆ (OAPEC, GECF). ಆದರೆ OPECಗೆ ಹೋಲಿಸಿದರೆ ಇವುಗಳ ಪಾತ್ರ ತೀರಾ ಕಡಿಮೆ.

ಕೊನೆಯದಾಗಿ, ತೈಲಮಾರುಕಟ್ಟೆ ಬರೀ ಒಂದು ದೇಶಕ್ಕೆ ಸೀಮಿತವಾದದ್ದಲ್ಲ. ಇದೊಂದು ಜಾಗತಿಕ ಮಾರುಕಟ್ಟೆ. ಬೇರೆ ಬೇರೆ ದೇಶಗಳಿಂದ ಬೇರೆ ಬೇರೆ ದೇಶಗಳು ತೈಲವನ್ನು ಖರೀದಿಸುತ್ತವೆ. ಅಂದಮೇಲೆ ಯಾವುದೇ ಒಂದು ದೇಶಕ್ಕೆ ಹೆಚ್ಚು ಲಾಭವಾಗದಂತೆ ನೋಡಿಕೊಳ್ಳಲು, ಬಾಕಿ ಎಲ್ಲಾ ವ್ಯವಹಾರಗಳಂತೆಯೇ ತೈಲ ಮಾರುಕಟ್ಟೆ ಕೂಡಾ ಡಾಲರ್ ಅನ್ನು ತನ್ನ ವ್ಯವಹಾರಕ್ಕೆ ಮೊದಲಿನಿಂದಲೂ ಲಂಗರನ್ನಾಗಿ ಬಳಸಿಕೊಳ್ಳುತ್ತಾ ಬಂದಿದೆ. ಹಾಗಾಗಿ ಅಮೇರಿಕದ ಆರ್ಥಿಕತೆಗನುಗುಣವಾಗಿ ತೈಲಬೆಲೆ ನಿರ್ಧರಿಸಲ್ಪಡುತ್ತದೆ. ಅಮೇರಿಕಾದಲ್ಲಿ ವಿತ್ತೀಯ ಕೊರತೆಯುಂತಾಗಿ, ಹಣದುಬ್ಬರ ಹೆಚ್ಚಾಗಿ ಡಾಲರ್ ಬೆಲೆ ಕುಸಿದರೆ, ತೈಲಬೆಲೆಯೂ ಹೆಚ್ಚಾಗುತ್ತದೆ.

ಕೊಳ್ಳುಗನ ಬದಿಯ ನೋಟ:

ಬೇರೆ ಬೇರೆ ದೇಶಗಳು ಈ ಬೆಲೆ ನಿರ್ಧಾರದಲ್ಲಿ ಬೇರೆ ಬೇರೆ ನೀತಿಯನ್ನರಿಸುತ್ತವೆ ಹಾಗೂ ಬೆಲೆನಿರ್ಧಾರಕ್ಕೆ ಬೇರೆ ಬೇರೆ ನಿಯಮಾವಳಿಗಳು ಹಾಗೂ ವೈಪರೀತ್ಯಗಳ ಮೇಲೆ ಅವಲಂಬಿತವಾಗಿರುತ್ತದೆ. ಉದಾಹರಣೆಗೆ ಜಗತ್ತಿನ ಎರಡನೇ ಅತಿಹೆಚ್ಚು ತೈಲ ಉತ್ಪಾದಿಸುವ ದೇಶವಾದ ಸೌದಿಯಲ್ಲಿ ಯಾವುದೇ ಹೆಚ್ಚಿನ ತೆರಿಗೆ ಇಲ್ಲದಿರುವುದರಿಂದ ಹಾಗೂ ತೈಲಬಾವಿಯಿಂದ ಕಾರಿನ ಟ್ಯಾಂಕಿನವರೆಗಿನ ದೂರ ಕಡಿಮೆಇರುವುದರಿಂದ ಅಲ್ಲಿ ಪೆಟ್ರೋಲ್ ಸಹಜವಾಗಿಯೇ ಕಡಿಮೆ ಬೆಲೆಯಲ್ಲಿ ದೊರೆಯುತ್ತದೆ. ಆದರೆ ಜಗತ್ತಿನ ಅತೀ ದೊಡ್ಡ ಉತ್ಪಾದಕ ದೇಶ ರಷ್ಯಾದಲ್ಲಿ ಅಲ್ಲಿಯ ಬೆಲೆನಿಯಂತ್ರಣಾ ಕಾಯ್ದೆ ಬೇರೆ ಸೇವಾಶುಲ್ಕ, ತೆರಿಗೆಗಳನ್ನು ಹೇರುವುದರಿಂದ ಇಡೀ ಚಿತ್ರವೇ ಬದಲಾಗುತ್ತದೆ. ಅದೂ ಅಲ್ಲದೆ ಯಾವ ದೇಶ ತೈಲ ಅಥವಾ ಪೆಟ್ರೋಲನ್ನು ಖರೀದಿಸುತ್ತಿದೆಯೋ ಅದರ ತೆರಿಗೆ ನಿಯಮಾವಳಿ ಹಾಗೂ ಯಾರಿಂದ ತೈಲವನ್ನು ಕೊಳ್ಳಲಾಗುತ್ತಿದೆ ಎಂಬ ಅಂಶಗಳು ಆಯಾ ದೇಶದಲ್ಲಿ ತೈಲ ಬೆಲೆಯ ಏರಿಳಿತಕ್ಕೆ ಕಾರಣವಾಗುತ್ತದೆ.

ಎಲ್ಲಾ ದೇಶಗಳ ಬಗ್ಗೆ ಓದುತ್ತಾ ಕೂತರೆ ಈ ಅಂಕಣ ಇವತ್ತಿಗೆ ಮುಗಿಯುವುದಿಲ್ಲ. ಆದ್ದರಿಂದ ಈ ಮಾತುಕತೆಯನ್ನು ಭಾರತಕ್ಕೆ ಸೀಮಿತಗೊಳಿಸೋಣ. ದೇಶಕ್ಕೆ ಸ್ವಾತಂತ್ರ್ಯ ಬರುವ ಮುಂಚೆ ಪೆಟ್ರೋಲ್ ಅಮದು ಮಾಡುತ್ತಿದ್ದವರು ಬ್ರಿಟೀಷರಾದ್ದರಿಂದ ಅದರ ಬೆಲೆಯನ್ನೂ ಅವರೇ ನಿರ್ಧರಿಸುತ್ತಿದ್ದರು. ದೇಶಕ್ಕೆ ಸ್ವಾತಂತ್ರ್ಯ ಬಂದಮೇಲೆ ನಮ್ಮ ಪಾಲಿಗೆ ಬಂದ ತೈಲಕಂಪನಿಗಳು ಮೌಲ್ಯಾಧಾರಿತ ಬೆಲೆ ನಿಗದಿಸುವಿಕೆ (VSP – Value Stock Pricing)ಯನ್ನು ಪಾಲಿಸತೊಡಗಿದವು. ಇದರಲ್ಲಿ ಹೆಚ್ಚಿನ ತಲೆಬಿಸಿಯೇನೂ ಇರಲಿಲ್ಲ. ಇದೊಂದು ಕಚ್ಚಾ ತೈಲಬೆಲೆ+ಇತರೆ ಖರ್ಚುಗಳು (ಸಾಗಣೆವೆಚ್ಚ+ವಿಮೆ+ಸಾರಿಗೆ ನಷ್ಟ+ಆಮದು ಸುಂಕ+ತೆರಿಗೆ+ಇನ್ಯಾವುದೇ ಶುಲ್ಕಗಳು). ಆದರೆ ನೆಹರೂ ತನ್ನ ಎರಡನೇ ಅವಧಿಯಲ್ಲಿ ಕಾಲದಲ್ಲಿ ‘ಆಡಳಿತ ದರ ಪದ್ಧತಿ (APM – Administered Price Mechanism)’ ಎನ್ನುವ ಹೊಸಾ ಪದ್ಧತಿಯನ್ನು ಪ್ರಾರಂಭಿಸಿದರು.

APMನ್ನು ನೆಹರೂ ‘ಅಂತರರಾಷ್ಟ್ರೀಯ ಬೆಲೆಯೇರಿಕೆ ಹಾಗೂ ಇಳಿಕೆಯಿಂದ ಗ್ರಾಹಕರನ್ನು ರಕ್ಷಿಸುವ ನಿಯಮ’ ಎಂಬುದಾಗಿ ಬೆಣ್ಣೆಹಚ್ಚಿ ಜನರಿಗೆ ಹಂಚಿದರು. ಆದರೆ ಆಳದಲ್ಲಿ ಇದೊಂದು ರಾಜಕೀಯ ದಾಳವಾಗಿತ್ತು. ತೈಲಕಂಪನಿಗಳು ಸರ್ಕಾರದ ಅಧೀನದಲ್ಲೇ ಇದ್ದಿದ್ದರಿಂದ ಹಾಗೂ ಅವುಗಳ ಬ್ಯಾಲೆನ್ಸ್ ಶೀಟಿನ ಬಗ್ಗೆ ಸಾಮಾನ್ಯ ನಾಗರೀಕ ತಲೆಕೆಡಿಸಿಕೊಳ್ಳುವುದಿಲ್ಲವೆಂದ ನೆಹರೂ ಮನಗಂಡಿದ್ದರಿಂದ, ಸರ್ಕಾರದ ಖಜಾನೆಯಿಂದ ಹಣವನ್ನು ಈ ತೈಲಕಂಪನಿಗಳಿಗೆ ಸಹಾಯಧನ (ಸಬ್ಸಿಡಿ)ದ ಹೆಸರಲ್ಲಿ ವರ್ಗಾಯಿಸಿ, ಬಹುಪಯೋಗಿ ತೈಲಉತ್ಪನ್ನಗಳಾದ ಪೆಟ್ರೋಲ್, ಸೀಮೆಯೆಣ್ಣೆಯನ್ನು ಜನರಿಗೆ ಕಡಿಮೆದರದಲ್ಲಿ ದೊರಕುವಂತೆ ಮಾಡಿದರು. ಮೊದಲೆರಡು ಪಂಚವಾರ್ಷಿಕಯೋಜನೆಗಳಡಿಯಲ್ಲಿ ಇದರಿಂದ ದೇಶಕ್ಕೆ ಉಪಯೋಗವಾಯಿತಾಯಿದರೂ, ನೆಹರೂ ಸಬ್ಸಿಡಿಯ ಅಮಲೇರಿಸಿ ದೇಶವನ್ನು ಅಪಾಯದಂಚಿಗೆ ದೂಡಿಯಾಗಿತ್ತು. 62ರ ಯುದ್ಧದನಂತರ ಸರ್ಕಾರದ ಖಜಾನೆ ಬರಿದಾದಾಗ ನೆಹರೂ ಸಬ್ಸಿಡಿಯನ್ನು ಹಿಂತೆಗೆಯಲೇ ಬೇಕಾಯಿತು. ಪೆಟ್ರೋಲು ದುಬಾರಿಯಾಯಿತು. ಖಜಾನೆಯನ್ನು ತುಂಬಿಸಲು ಜನರಿಗೆ ‘ಒಂದುಹೊತ್ತು ಊಟ ಬಿಡಿ’ ಎಂಬ ಕರೆಕೊಟ್ಟ ಶಾಸ್ತ್ರೀಜಿಯೇ ಬರಬೇಕಾಯಿತು. ಆದರೆ ನಂತರ ಅಧಿಕಾರಕ್ಕೆ ಬಂದ ಇಂದಿರಾ, ಅದಾಗಲೇ ಜನರನ್ನು ಹಾಗೂ ಮತಗಳನ್ನು ಸಬ್ಸಿಡಿಯ ಮೂಲಕೆ ಹೇಗೆ ಆಟವಾಡಿಸಬಹುದೆಂದು ಕಲಿತಾಗಿತ್ತು. ಆಕೆ ಅದನ್ನು ತನ್ನ ರಾಜಕೀಯ ಲಾಭಕ್ಕೆ ಅದನ್ನು ಉಪಯೋಗಿಸಿಕೊಂಡರು ಕೂಡಾ. ಮುಂದೆ ಬಂದ ಸರ್ಕಾರಗಳೂ ಇದರ ಲಾಭವನ್ನರಿತು ತೈಲಬೆಲೆಗಳ ಸತ್ಯದ ಬಗ್ಗೆ ಜನರನ್ನು ಕತ್ತಲಲ್ಲೇ ಇಟ್ಟರು. ಸರ್ಕಾರಗಳು ಕಡಿಮೆ ಬೆಲೆಯಲ್ಲಿ ಡೀಸೆಲ್, ಸೀಮೆಯೆಣ್ಣೆ ಹಾಗೂ ಗ್ಯಾಸ್ ಸಿಲಿಂಡರುಗಳನ್ನು ಕೊಡುತ್ತಾ ದೇಶದ ಮತಬ್ಯಾಂಕುಗಳೊಂದಿಗೆ ಚೆಲ್ಲಾಡಿದರು. 2002ರಲ್ಲಿ ಭಾರತ ಸರ್ಕಾರ ಈ APMನಿಂದ ಹೊರಬಂದು ಅಂತರರಾಷ್ಟ್ರೀಯ ಬೆಲೆ ಏರುಪೇರಿನಿಂದ ಸ್ವಲ್ಪಮಟ್ಟಿಗೆ ಸಹಾಯಕವಾಗಬಲ್ಲ ಸೂತ್ರವನ್ನೇನೋ ಜಾರಿಗೆ ತಂದಿತು. ಆದರೆ ಡೀಸೆಲ್, ಸೀಮೆಯೆಣ್ಣೆ ಮತ್ತು ಗ್ಯಾಸ್ ಮೇಲಿನ ಸಬ್ಸಿಡಿಯನ್ನೇನೂ ನಿಲ್ಲಿಸಲಿಲ್ಲ. ಗ್ರಾಹಕ ತೆರೆಬೇಕಾದ ಬೆಲೆಯೇನೂ ಕಡಿಮೆಯಾಗಲಿಲ್ಲ. ಮತ್ತು ಈ ಸೂತ್ರ ಸರಳವಾಗೇನೂ ಇರಲಿಲ್ಲ.

ಭಾರತದಲ್ಲಿ ಪೆಟ್ರೋಲ್ ಬೆಲೆ ಹೇಗೆ ನಿರ್ಧಾರವಾಗುತ್ತದೆ?

ಭಾರತದ ಹೆಚ್ಚಿನ ಪೆಟ್ರೋಲ್ ಬೇಡಿಕೆ ಬೇರೆ ದೇಶಗಳಿಂದ ಅಮದುಮಾಡುವ ತೈಲದಿಂದಲೇ ಪೂರೈಸಲಾಗುತ್ತದೆ. ನಮ್ಮದೇ ಆದ ತೈಲಭಾವಿಗಳಿವೆಯಾದರೂ ಅವುಗಳಿಂದ ನಮ್ಮ ದೇಶಕ್ಕೆ ಪೂರೈಕೆಯಾಗುತ್ತಿರುವುದು ನಮ್ಮ ಬೇಡಿಕೆಯ 30%ರಷ್ಟು ಮಾತ್ರ. ಇಷ್ಟೇ ಅಲ್ಲದೆ ಭಾರತ ಜಗತ್ತಿನಲ್ಲೇ ಅತ್ಯಂತ ಮೊದಲ 10 ದೊಡ್ಡ ತೈಲ ಗ್ರಾಹಕರಲ್ಲೊಂದು. ಹಾಗಾಗಿ ತೈಲಬೆಲೆಯ ಬಗ್ಗೆ ಇಲ್ಲಿ ಏನೇ ಸಣ್ಣ ನಿರ್ಧಾರ ತೆಗೆದುಕೊಂಡರೂ ದೊಡ್ಡ ಪರಿಣಾಮಗಳಾಗುತ್ತವೆ. ಹಾಗಾಗಿ ಪೆಟ್ರೋಲ್ ಬೆಲೆ ಹೇಗೆ ನಿರ್ಧಾರವಾಗುತ್ತದೆಯೆಂಬುದೊಂದು ಹತ್ತಾರು ‘ವೇರಿಯಬಲ್’ಗಳ ಒಂದು ಸಂಕೀರ್ಣ ಸಮೀಕರಣ.

“ನಮ್ಮ ದೇಶ ಪೆಟ್ರೋಲ್ ಅನ್ನು ಆಮದು ಮಾಡಿಕೊಳ್ಳುವುದಿಲ್ಲ. ಕಚ್ಚಾತೈಲವನ್ನು ಆಮದುಮಾಡಿಕೊಳ್ಳುತ್ತದೆ” ಎಂಬಲ್ಲಿಂದ ಪ್ರಾರಂಭಿಸೋಣ:

ಇಡೀ ತೈಲಬೆಲೆ ಸಮೀಕರಣಕ್ಕೆ ನಾಲ್ಕು ಮಂದಿ ಪಾಲುದಾರರು. ತೈಲ ಉತ್ಪಾದಕ, ಆಮದು ಕಂಪನಿ, ಸಂಸ್ಕರಣಾ ಕಂಪನಿ ಹಾಗೂ ಮಾರಾಟಗಾರ.

(*) ಉತ್ಪಾದಕ ಕಚ್ಚಾತೈಲವನ್ನು ಭೂಮಿಯಡಿಯಿಂದ ಹೊರತೆಗೆದು ಬ್ಯಾರಲ್ಲುಗಳಲ್ಲಿ ತುಂಬಿ ಮಾರುತ್ತಾನೆ. ಈ ಕಚ್ಚಾತೈಲ ತನ್ನಲ್ಲಿರುವ ಅಶುದ್ಧಿ(impurity) ಗಳಿಗನುಸಾರವಾಗಿ ‘ಸಿಹಿ’ಯಿಂದ ‘ಹುಳಿ’ಯೆಂಬ (sweet -> sour) ಶ್ರೇಣಿಯೆಡೆಗೂ, ಸ್ನಿಗ್ದತೆ(viscosity) ಗನುಗುಣವಾಗಿ ‘ಹಗುರ’ದಿಂದ ‘ಭಾರ’ವೆಂಬ (light -> heavy) ಶ್ರೇಣಿಯೆಡೆಗೂ ವರ್ಗೀಕರಿಸಲ್ಪಡುತ್ತದೆ. ‘ಸಿಹಿ ಮತ್ತು ಹಗುರ’ವಾದ ತೈಲವನ್ನು, ಉತ್ಪಾದಕ ಹೆಚ್ಚಿನ ಬೆಲೆಯಲ್ಲಿ ಮಾರುತ್ತಾನೆ. ಯಾಕೆಂದರೆ ಇದರಿಂದ ಪೆಟ್ರೋಲ್ ಸಂಸ್ಕರಿಸುವುದು ಕಡಿಮೆ ಖರ್ಚಿನ ವ್ಯವಹಾರ. ಆದರೆ ಈ ಶ್ರೇಣಿಯ ತೈಲ ಜಗತ್ತಿನಲ್ಲಿ ಸಿಗುವುದು ಬಹಳ ಕಡಿಮೆ. ಹೆಚ್ಚಿನವೆಲ್ಲಾ ಹುಳಿ-ಹಗುರ ಅಥವಾ ಹುಳಿ-ಭಾರ ವರ್ಗದವೇ. ಇದನ್ನು ಉತ್ಪಾದಕ Free On Board (FOB) ಬೆಲೆಗೆ ಭಾರತದ ಆಮದು ಕಂಪನಿಗೆ (ಉದಾಹರಣೆಗೆ IOC – ಇಂಡಿಯನ್ ಆಯಿಲ್ ಕಂಪನಿ) ಮಾರುತ್ತಾನೆ. ಈ ತೈಲ ಭಾರತದ ಹತ್ತಿರದ ಅಂತರರಾಷ್ಟ್ರೀಯ ಬಂದರಿಗೆ ಬಂದು ಸೇರುತ್ತದೆ. ಉದಾಹರಣೆಗೆ ಒಮಾನ್ ದೇಶದ ಮಸ್ಕತ್ ಬಂದರು.

(*) ಇಂಡಿಯನ್ ಆಯಿಲ್ ಕಂಪನಿ ಈಗ ಈ ತೈಲವನ್ನು ತನ್ನ ರಿಫೈನರಿಗಳಿಗೆ ಹತ್ತಿರವಾಗಿರುವ ಬಂದರುಗಳಿಗೆ ಸಾಗಿಸುತ್ತದೆ. ಉದಾಹರಣೆ ಮುಂಬೈ, ಮಂಗಳೂರು, ಕೋಲ್ಕತ್ತಾ. ಇದಕ್ಕಾಗಿ IOC ಸಾಗಾಣಿಕಾದಾರನನ್ನು ನಿಯಮಿಸುತ್ತದೆ. ಸಾಗಾಣಿಕೆದಾರನ ಶುಲ್ಕವೂ (Ocean Freight) ಸೇರಿ ಈಗ ತೈಲದಬೆಲೆ Cost&Freight ಬೆಲೆಯಾಗುತ್ತದೆ. C&F Price = FOB Price + Ocean Freight

(*) ಈಗ ಹೀಗೆ ಭಾರತದ ಬಂದರು ಸೇರಿದ ಈ ತೈಲಕ್ಕೆ ಈಗ ಆಮದು ಶುಲ್ಕವನ್ನು ವಿಧಿಸಲಾಗುತ್ತದೆ. ಈ ಶುಲ್ಕದಲ್ಲಿ ಮೂರು ಭಾಗಗಳು: ವಿಮಾ ವೆಚ್ಚ+ಬಂದರು ಶುಲ್ಕ+ಸಾಗಾಣಿಕಾ ನಷ್ಟದ ವೆಚ್ಚ. ಇದಿಷ್ಟೇ ಅಲ್ಲದೆ ಭಾರತ ಸರ್ಕಾರ ಈ ತೈಲದಮೇಲೆ C&F ಬೆಲೆಯ 2.5%ರಷ್ಟು ಕಸ್ಟಮ್ಸ್ ಸುಂಕವನ್ನು ವಿಧಿಸುತ್ತದೆ. ಇಲ್ಲಿಗೆ ತೈಲದ ಬೆಲೆ “ಆಮದು ಸಮಾನತೆ ಬೆಲೆ” – Import Parity Price (IPP) ಎಂಬಲ್ಲಿಗೆ ಬಂದು ನಿಲ್ಲುತ್ತದೆ. ದೇಶದಲ್ಲಿ ಪೆಟ್ರೋಲ್ ಬೆಲೆ ನಿಗದಿಯಾಗಲು IPPಮೂಲ. ಈಗ ಸಮೀಕರಣ “IPP = C&F ಬೆಲೆ + ಆಮದು ಶುಲ್ಕ + ಕಸ್ಟಮ್ಸ್ ಸುಂಕ” ಎನ್ನುವಲ್ಲಿಗೆ ಬಂದು ನಿಂತಂತಾಯಿತು.

(*) ಇಲ್ಲೊಂದು ಸಣ್ಣ ಮ್ಯಾಜಿಕ್ ನಡೆಯುತ್ತದೆ. ಅದೇನೆಂದರೆ, ಭಾರತ ತೈಲದ ಒಂದು ಹನಿಯನ್ನೂ ರಫ್ತು ಮಾಡುವುದಿಲ್ಲವಾದರೂ “ರಫ್ತು ಸಮಾನತೆ ಬೆಲೆ” – Export Parity Price (EPP) ಎಂಬುದೊಂದು ಪರಿಕಲ್ಪನೆಯನ್ನು ಇಲ್ಲಿಗೆ ಎಳೆತರಲಾಗುತ್ತದೆ. ‘ಮುಂದೆಂದಾದರೂ’ IOC ತೈಲವನ್ನು ಜಾಗತಿಕ ಮಾರುಕಟ್ಟೆಯಲ್ಲಿ ಮಾರುವಂ’ತಾದರೆ’ ಎಂಬ ಊಹೆಯ ಮೇಲೆ ಈ ಬೆಲೆ ನಿಂತಿದೆ. ಇದನ್ಯಾಕೆ ಹೇಳಿದೆ ಎಂದರೆ, ನಮ್ಮ ದೇಶದಲ್ಲಿ ಈ EPP ಮತ್ತು IPPಯ ಸರಾಸರಿಯ ಮೇಲೆ ತೈಲದ ಬೆಲೆ ನಿಗದಿಯಾಗಿತ್ತದೆ. ಇಲ್ಲೀಗ ನಮಗೆ “ಮಾರಾಟ ಸಮಾನ ಬೆಲೆ” – Trade Parity Price (TPP) ಎಂಬುದೊಂದು ಹೊಸಾ ಪದ ಸಿಗುತ್ತದೆ. TPP = 0.8*IPP + 0.2*EPP. ಈ TPP ದೇಶದ ಯಾವುದೇ ಕಂಪನಿ ತೈಲವನ್ನು ಆಮದು ಮಾಡಿದರೂ, ಬೆಲೆ ಹೆಚ್ಚುಕಮ್ಮಿ ಒಂದೇ ಇರುವಂತೆ ನೋಡಿಕೊಳ್ಳುತ್ತದೆ.

(*) ಈಗ ಈ ತೈಲ ಸಂಸ್ಕರಣಾಘಟಕದೆಡೆಗೆ ಪ್ರಯಾಣ ಬೆಳೆಸುತ್ತದೆ. ಇಲ್ಲಿ ಇನ್ನೊಂದು ಪದಪ್ರಯೋಗ. Refinery Transfer Price (RTP), ಅಂದರೆ ರಿಫೈನರಿ ವರ್ಗಾವಣಾ ಬೆಲೆ. ಭಾರತದಲ್ಲಿ ಅತೀದೊಡ್ಡ ಮೂರು ಅಮದು ಮತ್ತು ಮಾರಾಟ ಕಂಪನಿಗಳಾದ IOCL, HPCL, BPCL ತಮ್ಮದೇ ರಿಫೈನರಿಗಳನ್ನು ಹೊಂದಿರುವುದರಿಂದ TPP ಹಾಗೂ RTP ಯಲ್ಲಿ ಏನೂ ಬದಲಾವಣೆಯಾಗುವುದಿಲ್ಲ. ಆದ್ದರಿಂದ RTP=TPP

(*) ರಿಫೈನರಿಗೆ ಹೋದ ಕಚ್ಚಾತೈಲ ಪೆಟ್ರೋಲ್, ಡೀಸೆಲ್, ಸೀಮೆಯೆಣ್ಣೆ, ವಿಮಾನಇಂಧನ, ಅನಿಲ, ತುಟಿಗೆ ಹಚ್ಚುವ ಪೆಟ್ರೋಲಿಯಂ ಜೆಲ್ಲಿ ಹಾಗೂ ಇನ್ನಿತರ ಉತ್ಪಾದನೆಗಳಾಗಿ ಹೊರಬರುತ್ತದೆ. ನಮ್ಮ ಮಾತುಕತೆಯನ್ನು ನಾವು ಪೆಟ್ರೋಲಿಗೆ ಸೀಮಿತಗೊಳಿಸೋಣ. ಈ ರಿಫೈನರಿಯಿಂದ ಹೊರಬಂದ ಪೆಟ್ರೋಲ್ ರಸ್ತೆಯ ಮೂಲಕ ಚಿಲ್ಲರೆ ಮಾರಾಟಮಳಿಗೆಗಳನ್ನು ತಲುಪುತ್ತದೆ. ಅದಲ್ಲದೆ ಮಾರಾಟಕಂಪನಿಗಳು ತಮ್ಮ ಬ್ರಾಂಡುಗಳನ್ನು ಮಾರ್ಕೆಟಿಂಗ್ ಮಾಡಲು ಖರ್ಚನ್ನೂ ಮಾಡುತ್ತವೆ. ಈ ಖರ್ಚುಗಳೆಲ್ಲಾ ಸೇರಿ ‘ಒಟ್ಟು ಬಯಸಿದ ಬೆಲೆ’ Total Desired Price – TDP ಎಂಬುದೊಂದು ಸಿಗುತ್ತದೆ. TDP = RTP+ರಸ್ತೆ ಸಾಗಣೆ ವೆಚ್ಚ್ಚ+ಮಾರ್ಕೆಟಿಂಗ್ ವೆಚ್ಚ

(*) ಈ ಪೆಟ್ರೋಲ್ ನಮ್ಮ ನಿಮ್ಮ ಹತ್ತಿರದ ಬಂಕ್ ಒಂದಕ್ಕೆ ಬಂದಿಳಿಯುತ್ತದೆ. ಈಗ ರಿಫೈನರಿ ಎಲ್ಲೇ ಇರಲಿ, ಬಂಕ್ ಎಲ್ಲಿದೆ ಎಂಬುದರ ಮೇಲೆ ಪೆಟ್ರೋಲಿನ ಚಿಲ್ಲರೆ ಬೆಲೆ Retail Price ನಿರ್ಧಾರಿತವಾಗುತ್ತದೆ. ಯಾಕೆಂದರೆ ಬೇರೆ ಬೇರೆ ರಾಜ್ಯಗಳು ಬೇರೆ ರೀತಿಯ ಮೌಲ್ಯಾಧಾರಿತ ತೆರಿಗೆ ನಿಯಾಮಾವಳಿಗಳನ್ನು ಪಾಲಿಸುತ್ತವೆ. ಇದಲ್ಲದೆ ಕೇಂಡ್ರ ಸರ್ಕಾರ ಈ ಸರಪಳಿಯ ಕೊನೆಯ

ಉತ್ಪನ್ನದ ಮೇಲೆ ಅಬಕಾರಿ ಸುಂಕ ವಿಧಿಸುತ್ತದೆ. ಕಟ್ಟಕೊನೆಯದಾಗಿ ಚಿಲ್ಲರೆ ಮಾರಾಟಗಾರ ತನ್ನ ಲಾಭಾಂಶವನ್ನು ಸೇರಿಸಿ ಮಾರಾಟದರ ನಿರ್ಧಾರವಾಗುತ್ತದೆ. ಅಂದರೆ Retail Price (RP) = TDP + ಅಬಕಾರಿ ಸುಂಕ + ಮೌಲ್ಯಾಧಾರಿತ ತೆರಿಗೆ (VAT) + ಸೆಸ್+ ಮಾರಾಟಗಾರನ ಲಾಭಾಂಶ (ಸುಮಾರು 0.9% – 1.5%)

ಆದರೆ ರಾಜ್ಯಗಳು ತಮ್ಮದೇ ತೆರಿಗೆ ನಿಯಮಾವಳಿಗಳನ್ನು ಪಾಲಿಸುವುದರಿಂದ (ಉದಾ: ಗೋವಾದಲ್ಲಿ VAT ಬರೀ 0.1%, ದೆಹಲಿಯಲ್ಲಿ 20%, ಕರ್ನಾಟಕದಲ್ಲಿ 25% VAT) ಪೆಟ್ರೋಲಿನ ಬೆಲೆ ಏರುಪೇರಾಗುತ್ತದೆ. ಇದರ ಮೇಲೆ ಕರ್ನಾಟಕ 5% ಪ್ರವೇಶ ತೆರಿಗೆಯನ್ನೂ ಮತ್ತೊಂದಷ್ಟು ಸೆಸ್ ಅನ್ನೂ ವಿಧಿಸುತ್ತದೆ. ಹಾಗಾಗಿ ಕರ್ನಾಟಕದ ಗ್ರಾಹಕರು ದೇಶದ ಸರಾಸರಿಗಿಂತ ಹೆಚ್ಚು ಬೆಲೆ ತೆರುತ್ತಾರೆ. ಭಾರತ ಹಾಗೂ ಅಮೇರಿಕಾದ ಗ್ರಾಹಕ ಹೆಚ್ಚುಕಡಿಮೆ ಒಂದೇ ಬೆಲೆತೆತ್ತು ಪೆಟ್ರೋಲ್ ಕೊಳ್ಳುತ್ತಾರೆ. ಆದರೆ ನಮ್ಮದೇಶದ ಹಾಗೂ ಅಮೇರಿಕಾದ ಪೆಟ್ರೋಲ್ ಬೆಲೆಯ ಬನಾವಣೆ ಹೇಗಿದೆಯೆಂದು ಚಿತ್ರ ೧ ಹಾಗೂ ಚಿತ್ರ ೨ ರದಲ್ಲಿ ನೋಡಬಹುದು.

gas-prices-breakdown-Indiagas-prices-breakdown-US

ತಮಾಷೆಯ ವಿಷಯವೆಂದರೆ, ಈ ಪೆಟ್ರೋಲ್ ಮಾರಾಟಕಂಪನಿಗಳಿಂದ ಇಷ್ಟೆಲ್ಲಾ ತೆರಿಗೆ ಪೀಕುವ ರಾಜ್ಯಸರ್ಕಾರಗಳು ಅದಕ್ಕೆ ಪ್ರತಿಯಾಗಿ ತೈಲಕಂಪನಿಗಳಿಗೇನನ್ನೂ ಕೊಡುವುದಿಲ್ಲ. ಆ ಕಂಪನಿಗಳಿಗೆ ಬರುವ ಸಹಾಯಧನವೆಲ್ಲಾ ಕೇಂದ್ರ ಸರ್ಕಾರದಿಂದಲೇ ಬರುವುದು. ಇದರಿಂದಾಗಿ ತೈಲಮಾರಾಟದಲ್ಲಿ ಅಂತಿಮ ನಷ್ಟ ಕೇಂದ್ರಸರ್ಕಾರಕ್ಕೇನೇ. ಅದೂ ಅಲ್ಲದೆ ಈ ಸಹಾಯಧನ, ಕೇಂದ್ರ ಸರ್ಕಾರದ ಬೇರೆ ಬಹುಮುಖ್ಯ ಯೋಜನೆಗಳಿಗೆ (ಉದಾ: ದೇಶ ರಕ್ಷಣೆ, ವಿಜ್ಞಾನ ಅಭಿವೃದ್ಧಿ, ರಸ್ತೆ ಸಾರಿಗೆ ವ್ಯವಸ್ಥೆ) ಅಗತ್ಯವಾದ ಹಣವನ್ನು ನುಂಗಿಹಾಕುತ್ತದೆ. ಅಂದಹಾಗೆ ಕಳೆದ ವರ್ಷದ 2013-14ರ ಬಜೆಟ್ಟಿನಲ್ಲಿ ಈ ಸಬ್ಸಿಡಿಗಾಗಿ ಮೀಸಲಿಟ್ಟಿದ್ದ ಹಣವೆಷ್ಟು ಗೊತ್ತೇ? 65ಸಾವಿರ ಕೋಟಿ!! ಈ ಸಬ್ಸಿಡಿಯ ಅಗತ್ಯವೇನಿತ್ತು ಗೊತ್ತೇ? ಇದಿಲ್ಲದ್ದಿದ್ದಿದ್ದರೆ ಪೆಟ್ರೋಲ್ ಬೆಲೆ ಲೀಟರಿಗೆ ಕನಿಷ್ಟ 17ರೂ ಹೆಚ್ಚಾಗುತ್ತಿತ್ತು, ಡೀಸೆಲ್ ಬೆಲೆ 19ರೂ ಹೆಚ್ಚಾಗುತ್ತಿತ್ತು, ಸೀಮೆಯೆಣ್ಣೆ 7ರೂ ಹೆಚ್ಚಾಗುತ್ತಿತ್ತು. ಇಷ್ಟೆಲ್ಲಾ ಹೆಚ್ಚಾದ ಮೇಲೆ ಆ ಪಕ್ಷ ಅಧಿಕಾರಕ್ಕೆ ಬರುತ್ತಿತ್ತೇ!? ಇಲ್ಲ. ಆದ್ದರಿಂದ ಸರ್ಕಾರ ಮಾಡಿದ ಘನಕಾರ್ಯವೆಂದರೆ ‘ಪ್ರಜೆಗಳ ತೆರಿಗೆ ದುಡ್ಡನ್ನೇ ಸರ್ಕಾರಿಕಂಪನಿಗಳಿಗೆ ಸಬ್ಸಿಡಿಯಾಗಿ ಕೊಟ್ಟು ಪ್ರಜೆಗಳಿಗೆ ಕಡಿಮೆ ದರದಲ್ಲಿ ತೈಲ ಒದಗಿಸಿ ವೋಟು ಗಳಿಸಿಕೊಂಡಿದ್ದು’. ಅಂದರೆ ನಮ್ಮ ಜೇಬಿನಿಂದಲೇ ದುಡ್ಡು ತೆಗೆದುಕೊಂಡು ‘ಇಗೋ ಕಡಿಮೆಬೆಲೆಯ ಪೆಟ್ರೋಲ್’ ಎಂದು ಆಸೆತೋರಿಸಿ ತಾನು ವರ್ಷಾನುಗಟ್ಟಲೆ ಆಡಳಿತ ಮಾಡಿದ್ದು.

ಕೊನೆಯದಾಗಿ, ಇತ್ತೀಚಿನ ದಿನಗಳಲ್ಲಿ ನಮ್ಮಲ್ಲಿ ಪೆಟ್ರೋಲೆ ಬೆಲೆ ಇಳಿದಿದ್ದಕ್ಕೆ ನೇರ ಕಾರಣ ಮೋದಿ ಸರ್ಕಾರವಲ್ಲ ಎಂದು ನಾನು ಈ ಮೊದಲೇ ಒಂದು ಬಾರಿ ಹೇಳಿದ್ದೆ. OPECನ ಉತ್ಪಾದನಾ ಗುರಿ ಹೆಚ್ಚಾಗಿರುವುದು, ಯೂರೋಪಿಯನ್ ದೇಶಗಳಲ್ಲಿ ತೈಲಾಧಾರಿತವಲ್ಲದ ಶಕ್ತಿಮೂಲಗಳ ಜನಪ್ರಿಯತೆ ಹೆಚ್ಚಿರುವುದು, ಕಚ್ಚಾತೈಲದ ಉತ್ಪಾದನೆಯಲ್ಲಿ ಸುಧಾರಿತ ಶೇಲ್ ತಂತ್ರಜ್ಞಾನದ (shale technology) ಬಳಕೆ, ಜಪಾನ್ ಸೇರಿದಂತೆ ಜಗತ್ತಿನ ಕೆಲ ಮುಖ್ಯ ಮಾರುಕಟ್ಟೆಗಳು ಮಂದವಾಗಿರುವುದೂ ಕಾರಣಗಳು ಸೇರಿ ಜಾಗತಿಕ ಮಾರುಕಟ್ಟೆಯಲ್ಲಿ ಅಗತ್ಯಕ್ಕಿಂತ ಹೆಚ್ಚಾದ ತೈಲ ಲಭ್ಯವಾಗುತ್ತಿದೆ. ಇದರಿಂದಾಗಿ ಕಚ್ಚಾತೈಲದ ಬೆಲೆ ಕಡಿಮೆಯಾಗಿದೆ.

ಆದರೆ ಸಧ್ಯದ ಸರ್ಕಾರ ಇರಾನಿನಿಂದ ಹೆಚ್ಚಿನ ಆಮದಿಗೆ ಇಂಬುಕೊಟ್ಟಿರುವುದೂ, ತೈಲ ಬೆಲೆಗಳನ್ನು ಅನಿಯಂತ್ರಿತ ವ್ಯವಸ್ಥೆಯೆಡೆಗೆ ತಿರುಗಿಸಿದ್ದು ನಿಜವಾಗಿಯೂ ಒಳ್ಳೆಯ ಯೋಜನೆ. ಈಗ ಜಾಗತಿಕ ಮಾರುಕಟ್ಟೆಯ ಏರಿಳಿತಗಳಿಗನುಗುಣವಾಗಿ ತೈಲಕಂಪನಿಗಳು ಬೆಲೆ ನಿರ್ಧರಿಸುವುದರಿಂದ ಸರ್ಕಾರದ ಸಬ್ಸಿಡಿಯ ಅಗತ್ಯ ಇಳಿಮುಖವಾಗುತ್ತದೆ ಹಾಗೂ ಈ ಹಣವನ್ನು ಸರ್ಕಾರ ಸಮರ್ಪಕವಾದ ರೀತಿಯಲ್ಲಿ ಬೇರೆ ಯೋಜನೆಗಳಿಗಾಗಿ ಬಳಸಿಕೊಳ್ಳಬಹುದು. ಅದೂ ಅಲ್ಲದೆ ಎಲ್ಲಾಬಾರಿಯೂ ಪೆಟ್ರೋಲ್ ಬೆಲೆ ಬರೇ ಕಚ್ಚಾತೈಲದ ಬೆಲೆಯ ಮೇಲೆ ಅವಲಂಬಿತವಲ್ಲ. ಡಾಲರಿನೆದುರು ರೂಪಾಯಿಯ ಶಕ್ತಿಯನ್ನೂ ಗಮನಿಸಬೇಕು. ಕಳೆದ ನವೆಂಬರಿನಲ್ಲಿ ಕಚ್ಚಾತೈಲದ ಬೆಲೆ 18.3% ಇಳಿಕೆಯಾಯಿತು. ಆದರೆ ದುರ್ಬಲ ರೂಪಾಯಿಯಿಂದಾಗಿ ಭಾರತಕ್ಕೆ ಬರೇ 12.3%ರಷ್ಟು ಕಡಿಮೆ ಬೆಲೆಯಲ್ಲಿ ದೊರಕುವಂತಾಯಿತು. ತೈಲಬೆಲೆ ಇಳಿಕೆಯಿಂದಾಗಿ ಯಾವ ರೀತಿ ಆರ್ಥಿಕಸ್ಥಿತಿ ಸುಧಾರಿಸಬಹುದು ಎಂಬುದರ ಬಗ್ಗೆ ತಿಳಿಯಲು ಆಸಕ್ತಿ ಇರುವವರು, ಇನ್ನೊಂದು ಲೇಖನವನ್ನು http://on.fb.me/14E1Tt6 ಇಲ್ಲಿ ಓದಬಹುದು.

ಕೊಸರು:

ತೈಲಬೆಲೆ ಕಡಿಮೆಯಾದಷ್ಟೂ ರಸ್ತೆಗಳು ಹೆಚ್ಚೆಚ್ಚು ಅಸುರಕ್ಷಿತ ಹಾಗೂ ಅಪಾಯಕಾರಿಯಾಗಿರುತ್ತವೆ ಎಂಬ ಹೊಸ ಸಂಶೋಧನಾ ವರದಿಯೊಂದು ಹೊರಬಂದಿದೆ (http://bit.ly/1xNgq0n) 🙂 ವಿಚಿತ್ರ ಆದರೂ ಸತ್ಯ!!

#ಬುದ್ಧಿಗೊಂದು_ಗುದ್ದು, #ಪೆಟ್ರೋಲ್_ಬೆಲೆ, #PetrolPrice

ಉಳಿದ ‘ಬುದ್ಧಿಗೊಂದು ಗುದ್ದು’ ಲೇಖನಗಳಿಗೆ https://loadstotalk.wordpress.com/ ಗೆ ಭೇಟಿ ಕೊಡಿ

ಬುದ್ಧಿಗೊಂದು ಗುದ್ದು – ೨೬

ಯಾರಪ್ಪನ ಆಸ್ತಿ ಈ ಅಂತರ್ಜಾಲ!?

99991395150064

ದಿನಾ ಬೆಳಗ್ಗೆ ಎದ್ದು ಮಲಗೋ ಮುಂಚಿನ ನಿಮಿಷದವರೆಗೂ ಇಂಟರ್ನೆಟ್ಟು ಅನ್ನೋ ಜೇಡರಬಲೆಯಲ್ಲಿ ಸಿಕ್ಕಾಂಡಿರ್ತೀರಲ್ಲ, ಯಾವತ್ತಾದ್ರೂ ಇಂಟರ್ನೆಟ್ಟು ನಿಂತುಹೋದ್ರೆ ಏನ್ ಕಥೆ ಅಂತಾ ಯೋಚ್ನೆ ಮಾಡಿದ್ದೀರಾ? “ಏನು!! ಇಂಟರ್ನೆಟ್ಟು ನಿಂತುಹೋಗುತ್ತಾ!? ಅದು ಯಾರಪ್ಪನ ಮನೆಯದ್ದು ಹಾಗೆಲ್ಲಾ ನಿಲ್ಸೋಕೆ? ಅದು ಹೇಗೆ ನಿಂತೋಗತ್ತೆ?” ಅಂತಾ ಅವಾಜ್ ಹಾಕ್ತಿದ್ದೀರಾ!? ಸಮಾಧಾನ ಮಾಡ್ಕಳ್ಳಿ. ನಾನು ನೀವು ಅಂದ್ಕೊಂಡಷ್ಟು ಸರ್ವತಂತ್ರ ಸ್ವತಂತ್ರವಾಗೇನಿಲ್ಲ ಇಂಟರ್ನೆಟ್ಟು. ನಿಲ್ಸೋಕೆ ಯಾರಪ್ಪನ ಮನೆಯದ್ದಲ್ಲದಿದ್ದರೂ, ಇದನ್ನ ನಡೆಸೋಕೆ ಕೆಲವು ದೊಣ್ಣೆನಾಯಕರುಗಳಿದ್ದಾರೆ. ಅಷ್ಟೇ ಅಲ್ಲ, ಅಂತರ್ಜಾಲಕ್ಕೊಂದು ಕೀಲಿಕೈ ಕೂಡ ಇದೆ. ಕೀಲಿಕೈಯೆಂದರೆ ಸುಮ್ಮನೆ ಸಾಹಿತ್ಯಿಕವಾಗಿ (literal) ಹೇಳ್ತಾ ಇಲ್ಲ. ನಿಜವಾಗಿಯೂ ಅಂತರ್ಜಾಲಕ್ಕೊಂದು ಕೀಲಿಕೈ (Key) ಇದೆ. ಈ ಕೀಲಿಕೈ ಸಿಗಬೇಕಾದರೆ ಜಗತ್ತಿನಾದ್ಯಂತ ಹರಡಿರುವ 14ಜನ ಸೇರಬೇಕು. ಈ 14ಜನರ ಹತ್ತಿರವಿರುವ ಏಳು ಕೀಲಿಕೈಗಳು ಸೇರಿದರೆ ಮಾತ್ರ ಆ ‘ಮಾಸ್ಟರ್ ಕೀ’ ಸಿಗುವುದು. ಆ ಮಾಸ್ಟರ್ ಕೀ ಸಿಕ್ಕಿದರೆ ಅಂತರ್ಜಾಲಕ್ಕೆ ನೀವೇ ಒಡೆಯ! ಹೇಗೆ ಅಂತೀರಾ? ಮುಂದೆ ಓದಿ.

ಅಂತರ್ಜಾಲ ಅನ್ನುವುದೊಂದು ಒಂಟಿಮನೆಯೇನಲ್ಲ. ಹಾಗಂತ ಇದನ್ನ ಒಂದಷ್ಟು ಮನೆಗಳ ಜಾಲ ಅಂತಾ ತಿಳ್ಕೊಂಡಿದ್ರೆ ಅದು ತಪ್ಪು ತಿಳುವಳಿಕೆ. ಇಂಗ್ಳೀಷಿನ Internet ಹೆಸರು ಇದಕ್ಕೆ ಹೆಚ್ಚು ಸೂಕ್ತ ಅರ್ಥ ಕೊಡುತ್ತದೆ. ಯಾಕೆಂದರೆ, ಇದೊಂದು ಜಾಲಗಳನ್ನು ಸಂಪರ್ಕಿಸುವ ಮಹಾಜಾಲ. It’s a network of networks. ಬೇರೆ ಬೇರೆ ದೇಶದ, ಬೇರೆ ಬೇರೆ ಸಂಸ್ಥೆಗಳ, ಬೇರೆ ಬೇರೆ ಸಂಘಟನೆಗಳ ತಾಣಗಳನ್ನು ಸಂಪರ್ಕಿಸುವ ಒಂದು ಮಹಾಜಾಲ. ಹೀಗಿದ್ದಾಗ ಇದನ್ನು ಯಾರೋ ಒಬ್ಬ ವ್ಯಕ್ತಿ ಅಥವಾ ಒಂದು ಸಂಸ್ಥೆ ನಿರ್ಬಂಧಿಸಲು ಸಾಧ್ಯವಿಲ್ಲ. ಆದರೆ ಕೆಲವೊಂದು ದೇಶಗಳಲ್ಲಿ ಅಂತರಜಾಲದ ಪ್ರವೇಶವನ್ನು ಒಂದೊಂದೇ ಸಂಸ್ಥೆ ಅಥವಾ ವ್ಯಕ್ತಿ ಅಥವಾ ಒಂದು ಗುಂಪು ನಿರ್ಬಂಧಿಸಬಹುದು. ಉದಾಹರಣೆಗೆ ನಾನಿರುವ ಸಂಯುಕ್ತ ಅರಬ್ ಎಮಿರೆಟ್ಸಿನಲ್ಲಿ 2006ಕ್ಕೆ ಮುಂಚೆ ದೇಶದ ಇಂಟರ್ನೆಟ್ ಟ್ರಾಫಿಕ್ಕನ್ನು ‘ಎತಿಸಲಾತ್’ ಎಂಬ ಕಂಪನಿಯೇ ನಿರ್ಧರಿಸುತ್ತಿತ್ತು. ಈಗ ‘ಎತಿಸಲಾತ್’ ಮತ್ತು ‘ಡು’ ಎಂಬ ಎರಡು ಕಂಪನಿಗಳಿವೆ. ನಾಳೆ ಏನಾದರೂ ಇವೆರಡೂ ಕಂಪನಿಗಳ ಸಿ.ಇ.ಒಗಳು ಸೇರಿ ಯು.ಎ.ಇ ಗೆ ಇಂಟರ್ನೆಟ್ ಬೇಡ ಎಂದಾಗಲೀ ಅಥವಾ ಅಂತರ್ಜಾಲದ ಇಂತಿಂತಾ ಪುಟಗಳು ಮಾತ್ರ ಇಲ್ಲಿನ ನಾಗರೀಕರಿಗೆ ಸಿಗುವಂತಾಗಲಿ ಎಂದು ನಿರ್ಧರಿಸಿದರೆ ನನಗೆ ಅವರು ಕೊಟ್ಟಷ್ಟು ಪ್ರಸಾದವೇ ಗತಿ. ಹಾಗೂ ಇದು ನಡೆಯುತ್ತಿದೆ ಕೂಡಾ. ಇಲ್ಲಿನ ಸರ್ಕಾರ ಅಥವಾ ಇಸ್ಲಾಂಗೆ ವಿರುದ್ಧವಾಗಿ ಮಾತನಾಡುವ ಜಾಲಪುಟಗಳನ್ನು ಹಾಗೂ ಅಶ್ಲೀಲತೆ/ನಗ್ನತೆಯನ್ನು ತೋರಿಸುವ ಪುಟಗಳನ್ನು ಈ ಕಂಪನಿಗಳು ನಿರ್ಬಂಧಿಸುತ್ತವೆ. ಇದೇ ರೀತಿ ಚೀನಾ, ಉ.ಕೊರಿಯಾ, ಇರಾನ್ ಮುಂತಾದ ದೇಶಗಳಲ್ಲಿಯೂ ಇದೇ ರೀತಿ ನಡೆಯುತ್ತದೆ. ಪ್ರತಿಯೊಂದು ಸರ್ಕಾರ ಹಾಗೂ ಆಯಾ ದೇಶದ ಟೆಲಿಕಾಂ ಕಂಪನಿಗಳು ಜಾಲವನ್ನು ಸ್ವಲ್ಪಮಟ್ಟಿಗೆ ನಿರ್ಬಂಧಿಸುತ್ತವೆ.

ಆದರೆ, ಜಗತ್ತಿನ ಕೆಲ ಕಂಪನಿಗಳಿಗೆ ಇಡೀ ಇಂಟರ್ನೆಟ್ಟನ್ನೇ ನಿರ್ಬಂಧಿಸುವ ಶಕ್ತಿಯಿದೆಯೆಂದರೆ ನಂಬುತ್ತೀರಾ? ಇಲ್ಲಿ ಕೇಳಿ. ನಮ್ಮ ನಮ್ಮ ದೇಶದ ಟೆಲಿಕಾಂ ಕಂಪನಿಗಳಿಗೆ ನಾವು ISP (Internet Service Providers) ಎಂದು ಕರೆಯುತ್ತೇವೆ. ಈ ISPಗಳು ನೇರವಾಗಿ ತಾವೇ ಅಂತರ್ಜಾಲವನ್ನು ನಿಮಗೆ ಒದಗಿಸುವುದಿಲ್ಲ. ಇವುಗಳಿಗೂ ಸೇವೆ ಒದಗಿಸುವ ಕೆಲ ಸಂಸ್ಥೆಗಳಿವೆ. ಇವನ್ನು upstream ISPಗಳೆನ್ನುತ್ತಾರೆ. ಅಂತರ್ಜಾಲ ಪ್ರಾರಂಭವಾದಾಗಲಿಂದಲೂ ಈ ಸಂಸ್ಥೆಗಳು ಕಾರ್ಯನಿರ್ವಹಿಸುತ್ತಿರುವುದರಿಂದ, ಅಂತರ್ಜಾಲದ ಪರಿಕಲ್ಪನೆಯನ್ನು ನಿಜವಾಗಿಸಿದ್ದೇ ಈ ಕಂಪನಿಗಳಾದ್ದರಿಂದ, ಹಾಗೂ ಇವತ್ತಿನ ಅಂತರ್ಜಾಲದ ಎಲ್ಲಾ ತಂತ್ರಜ್ಞಾನಗಳೂ ಈ ಕಂಪನಿಗಳಿಂದಲೇ ಉಗಮವಾದ್ದರಿಂದ ಇಡೀ ಅಂತರ್ಜಾಲದ ಬೆನ್ನೆಲುಬಾಗಿ ಈ ಕಂಪನಿಗಳು ಕಾರ್ಯನಿರ್ವಹಿಸುತ್ತವೆ. ಇವುಗಳಲ್ಲಿ ಅತ್ಯಂತ ಮುಖ್ಯವಾದವುಗಳು:

(*) UUNET
(*) Verizon
(*) Level3
(*) AT&T
(*) Qwest
(*) Sprint
(*) IBM

ಅಂತರ್ಜಾಲದ ಪ್ರತಿಯೊಂದು ಬೈಟ್ ಮಾಹಿತಿ ಹರಿಯುವುದೇ ಇವುಗಳ ಮೂಲಕ. ಇವು ಯಾವಾಗ ಬೇಕಾದರೂ ನಿಮ್ಮ ಅಂತರ್ಜಾಲದ ಬಾಗಿಲನ್ನು ಮುಚ್ಚಬಲ್ಲವು. ಆದರೆ, ಹಾಗಾಗುವ ಸಾಧ್ಯತೆ ಕಡಿಮೆ. ಯಾಕೆಂದರೆ, ಇವೆಲ್ಲವೂ ಬಂಡವಾಳಶಾಹಿ ಕಂಪನಿಗಳಾದ್ದರಿಂದ, ಇವುಗಳ ಆದಾಯವೂ ಅಂತರ್ಜಾಲದಿಂದಲೇ ಬರುತ್ತಿರುತ್ತದೆ. ಇವುಗಳಲ್ಲಿ ಯಾವ ಕಂಪನಿಯೂ ಅಂತರ್ಜಾಲವನ್ನು ನಿಲ್ಲಿಸಹೋಗಿ ತನ್ನ ಕಾಲಿಗೆ ತಾನೇ ಗುಂಡು ಹೊಡೆದುಕೊಳ್ಳುವ ಕೆಲಸ ಮಾಡಲಾರದು. ಹಾಗೂ ಈ ಕಂಪನಿಗಳು ವ್ಯಾವಹಾರಿಕ ಕಾಯ್ದೆಯಡಿಯಲ್ಲಿ ಬರುವುದರಿಂದ ಸರ್ಕಾರಗಳು ಮತ್ತು ಗ್ರಾಹಕರು ಇವನ್ನು ನಿಯಂತ್ರಿಸಬಹುದು.

ಆದರೆ, ಅಂತರ್ಜಾಲವನ್ನು ನಿಯಂತ್ರಿಸುವಲ್ಲಿ ಇವುಗಳಷ್ಟೇ ಮುಖ್ಯವಾದ ಇನ್ನೂ ಕೆಲವು ಅಂಗಗಳಿವೆ. ಅಂತರ್ಜಾಲದ ಆವಿಷ್ಕಾರವಾದಾಗ (ಅದಿನ್ನೂ ARPANET ಎಂದು ಕರೆಯಲ್ಪಡುತ್ತಿದ್ದಾಗ) ಅದನ್ನು ಒಂದೇ ಸಂಸ್ಥೆ ನಿರ್ವಹಿಸುತ್ತಿತ್ತು. ಆದರೆ, ನಿಧಾನವಾಗಿ ಬೇರೆ ಬೇರೆ ಅಂಗಗಳು ARPANETನೊಂದಿಗೆ ಸೇರಲಾರಂಭಿಸಿದಾಗ, ಇದರ ಕ್ಲಿಷ್ಟತೆ ಹೆಚ್ಚುತ್ತಾ ಹೋಯಿತು. ಹಾಗೂ ಕೆಲವೊಮ್ಮೆ ಈ ಅಂಗಸಂಸ್ಥೆಗಳು ಬೇರೆ ದೇಶಗಳಿಗೆ ಸೇರಿದವುಗಳಾಗಿದ್ದವು. ಅಂತರ್ಜಾಲ ಬೆಳೆಯುತ್ತಿರುವ ವೇಗ ನೋಡಿದ ಕೆಲ ತಜ್ಞರು ಇದನ್ನು ತಹಬಂದಿಯಲ್ಲಿಡಲು ಒಂದಷ್ಟು ನಿಯಮಾವಳಿಗಳನ್ನು ರೂಪಿಸಬೇಕೆಂಬ ಅಭಿಪ್ರಾಯಕ್ಕೆ ಬಂದರು. ಅಷ್ಟೇ ಅಲ್ಲದೆ, ಅಂತರ್ಜಾಲ ಬೆಳೆಯಲಾರಂಭಿಸಿದಂತೆ ಒಂದೇ ಹೆಸರಿನ ಹಲವು ಅಂತರ್ಜಾಲ ಪುಟಗಳು ಬರಲಾರಂಭಿಸಿದವು. ನೆನಪಿರಲಿ, ಕಂಪ್ಯೂಟರುಗಳಿಗೆ ನಾನು ನೀವು ಮಾತನಾಡುವ ಭಾಷೆ ಅರ್ಥವಾಗುವುದಿಲ್ಲ. ಅವಕ್ಕೇನಿದ್ದರೂ ಅಂಕಿಸಂಖ್ಯೆಗಳಷ್ಟೇ ಅರ್ಥವಾಗುವುದು. ನೀವು http://www.businessinsider.com ಎಂದು ಬರೆದದ್ದು ಅವಕ್ಕೆ 64.27.101.155 ಎಂದೇ ಅರ್ಥವಾಗುವುದು. ಹೀಗಿದ್ದಾಗ ಪ್ರತಿಯೊಂದು ಅಂತರ್ಜಾಲ ಪುಟಕ್ಕೆ ಅದರದ್ದೇ ಆದ ಸಂಖ್ಯಾವಿಳಾಸ (numeric address) ಇರಬೇಕಲ್ಲವೇ? ಇದನ್ನು ನಿರ್ಧರಿಸುವುದ್ಯಾರು? ಅದಕ್ಕಾಗಿಯೇ, ಜಗತ್ತಿನಲ್ಲಿ ಕೆಲ ಸಂಸ್ಥೆಗಳಿವೆ. ಇವು ಅಂತರ್ಜಾಲದ ನಿಯಾಮಾವಳಿಗಳನ್ನು (protocols) ರೂಪಿಸುತ್ತವೆ, ಅಂತರ್ಜಾಲದಲ್ಲಿ ಮಾಹಿತಿಗಳು ಹೇಗೆ ಹರಿದಾಡಬೇಕೆಂದು ನಿರ್ಧರಿಸುತ್ತವೆ, ಹಾಗೂ ಪ್ರತಿಯೊಂದು ಅಂತರ್ಜಾಲ ಪುಟಕ್ಕೂ ಸಂಖ್ಯಾನಾಮಕರಣ ಮಾಡುತ್ತವೆ. Internet Engineering Task Force, ICANN, National Science Foundation, InterNIC, Internet Architecture Board ಈ ಸಂಸ್ಥೆಗಳು. ಇವೆಲ್ಲವೂ ಯಾವುದೇ ಲಾಭಕ್ಕಾಗಿ ನಡೆಯುವ ಸಂಸ್ಥೆಗಳಲ್ಲ. ಉತ್ತಮವಾದ ಅಂತರ್ಜಾಲ ಅನುಭವ ನೀಡುವ ನಿಟ್ಟಿನಲ್ಲಿ ಕೆಲಸಮಾಡುವ nonprofit organisationಗಳು. ಯಾರೋ ಪ್ರೋಗ್ರಾಮರ್ ಮೌಟನ್-ವ್ಯೂನಲ್ಲಿ ಕುಳಿತು ತನ್ನ ವಿಂಡೋಸ್ ಕಂಪ್ಯೂಟರಿನಲ್ಲಿ http ನಿಯಮದಡಿ ಬರೆದ ಅರಬ್ಬೀ ಭಾಷೆಯ ಅಂತರ್ಜಾಲ ಪುಟವೊಂದು, ಐಬಿಎಂನ ಡೇಟಾ ಸೆಂಟರುಗಳ ಮೂಲಕ ಹಾದು, AT&Tಯ ಕೇಬಲ್ಲುಗಳಲ್ಲಿ ಹರಿದು, ಕಝಕಿಸ್ಥಾನದ kaznetನ ಕೇಬಲ್ಲು ತಲುಪಿ, ಅಲ್ಲಿನ ಗ್ರಾಹಕನೊಬ್ಬನ ಆಡ್ರಾಯ್ಡ್ ಫೋನಿನಲ್ಲಿ ಒಪೇರಾ ಬೌಸರಿನಲ್ಲಿ ನೋಡಿದರೂ ಮೂಲರೂಪದಲ್ಲೇ ದೊರಕುವ ‘ಅಂತರ್ಜಾಲ ಪಯಣ’ದಲ್ಲಿ ಒಂದೇ ಒಂದು ಬೈಟ್ ದತ್ತಾಂಶ ಕಳೆದುಹೋಗದಂತೆ ಮಾಡುವಲ್ಲಿ ಈ ಸಂಸ್ಥೆಗಳ ಪಾತ್ರ ಬಹು ದೊಡ್ಡದು.

1998ರಲ್ಲಿ ಪ್ರಾರಂಭವಾದ ICANN (Internet Corporation for Assigned Names and Numbers)ದ ಮುಖ್ಯ ಕೆಲಸ ಅಂತರ್ಜಾಲ ಪುಟಗಳಿಗೆ ತನ್ನದೇ ಆದ ವಿಶಿಷ್ಟ ಸಂಖ್ಯಾವಿಳಾಸ ನಿಯೋಜಿಸುವುದು. ಅಂದರೆ http://www.hotmail.com ಹಾಗೂ http://www.hotmale.com ಎರಡಕ್ಕೂ ವ್ಯತ್ಯಾಸ ಇರುವಂತೆ ನೋಡಿಕೊಳ್ಳುವುದು 😉 ಅಂದರೆ, ಯಾವುದೋ ಒಂದು ಫೋನು ಡಯಲ್ ಮಾಡಿದಾಗ ‘ಆ’ ನಂಬರಿಗೇ ಕರೆಹೋಗುವಂತೆ ಹೇಗೆ ಟೆಲಿಫೊನು ಎಕ್ಸ್ಚೇಂಜುಗಳು ನೋಡಿಕೊಳ್ಳುತ್ತವೋ, ಹಾಗೆಯೇ ICANN ಒಂದು ಇಂಟರ್ನೆಟ್ ಡೈರೆಕ್ಟರಿ ಇದ್ದಹಾಗೆ. ಎಲ್ಲ ಅಂತರ್ಜಾಲ ಪುಟಗಳ ನಂಬರುಗಳನ್ನು ಇಟ್ಕೊಂಡಿರುತ್ತೆ, ಹಾಗೂ ಒಂದೇ ಪೋನ್ ನಂಬರ್ ಇಬ್ಬರಿಗೆ ಸಿಗದಿರುವ ಹಾಗೆ ನೋಡಿಕೊಳ್ಳುತ್ತೆ. ಇದೇ ಅಲ್ಲದೆ ಈ ಸಂಸ್ಥೆ ಅಂತರ್ಜಾಲವನ್ನು ಸ್ಥಿರವಾಗಿ ನಿಲ್ಲುವಂತೆ ಮಾಡುವಲ್ಲಿ, ನಮ್ಮ ನಿಮ್ಮ ಮಧ್ಯದ ಕನೆಕ್ಷನ್ ಮುರಿದುಹೋಗದಿರುವಂತೆ ನೋಡಿಕೊಳ್ಳುವಲ್ಲಿ ಕೂಡಾ ಮಹತ್ವದ ಪಾತ್ರವಹಿಸುತ್ತದೆ.

ಈಗ ವಿಷಯಕ್ಕೆ ಬರೋಣ. ಯಾರಾದರೂ ಕಂಪ್ಯೂಟರ್ ಕಿಲಾಡಿ ICANN ಸಂಸ್ಥೆಯ ಡೇಟಾಬೇಸಿಗೆ ಲಗ್ಗೆ ಹಾಕಿ ಇಡೀ ಅಂತರ್ಜಾಲವನ್ನು ನಿಯಂತ್ರಿಸಬಹುದು ಮತ್ತು ಅಂತರ್ಜಾಲ ಕುಸಿದುಬೀಳಲೂ ಕಾರಣನಾಗಬಹುದು. ಹೇಗೆ ಅಂತೀರಾ? ಇದರ ಡೇಟಾಬೇಸಿಗೆ ಹೋಗಿ ನಿಜವಾದ ಬ್ಯಾಂಕ್ ವೆಬ್ಸೈಟಿನ ಬದಲು ನಕಲಿ ವೈಬ್ಸೈಟಿಗೆ ಗ್ರಾಹಕರನ್ನು ಕಳಿಸಿ, ದುಡ್ಡು ಲಪಟಾಯಿಸಬಹುದು. ಗೂಗಲ್ ಅಂತಾ ಟೈಪಿಸಿದವರನ್ನು ಇನ್ಯಾವುದೋ ಅಶ್ಲೀಲ ವೆಬ್ಸೈಟಿಗೆ ಕಳುಹಿಸಿ ಮುಜುಗರವನ್ನುಂಟು ಮಾಡಬಹುದು ಇತ್ಯಾದಿ ಇತ್ಯಾದಿ. ಅಂದರೆ, ಈ ಕಂಪನಿಯ ಡೇಟಾಬೇಸೇ ಅಂತರ್ಜಾಲಕ್ಕೆ ಹೆಬ್ಬಾಗಿಲಿದ್ದಂತೆ!!

ಹೀಗೇನಾದರೂ ಆಗಿ (ಅಥವಾ ಜಗತ್ತಿನಲ್ಲೇದರೂ ಅನಿರೀಕ್ಷಿತ ವಿಪತ್ತು ಘಟಿಸಿ) ಅಂತರ್ಜಾಲವೇ ಕುಸಿದುಬಿದ್ದರೆ, ಮತ್ತೆ ಅದನ್ನು ಕಟ್ಟಲು ಬಹಳಷ್ಟು ಸಮಯ ಬೇಕಾಗುತ್ತದೆ. ಹೀಗಿದ್ದಾಗ, ICANN ತನ್ನಲ್ಲಿರುವ ಮಾಹಿತಿಯನ್ನು ಅತ್ಯಂತ ಗೌಪ್ಯವಾಗಿ ಕಾಯ್ದಿಡಬೇಕು (ಅಂದರೆ ಹೆಚ್ಚು ಜನರಿಗೆ ತಿಳಿಯದಂತೆ) ಆದರೆ ಹಾಗಂತ ಒಬ್ಬರಿಗೇ ಇದರ ಕೀಲಿಕೈ ಕೊಟ್ಟರೆ ಅದೂ ಕಷ್ಟ. ಒಳ್ಳೇ ಪೀಕಲಾಟಕ್ಕೆ ಬಂತಲ್ಲಾಪ್ಪಾ! ಇದಕ್ಕಾಗಿಯೇ ICANN ತನ್ನ ಡೇಟಾಬೇಸ್ ಅನ್ನು ಅತ್ಯಂತ ಸುರಕ್ಷತೆಯಿಂದ ಕಾಯಲು ಹಾಗೂ ಅದರ ನಿಯಂತ್ರಣ ಒಬ್ಬನೇ ವ್ಯಕ್ತಿಯಲ್ಲಿ ಇರದಿರುವಂತೆ ನೋಡಿಕೊಳ್ಳಲು ಅನುಕೂಲವಾಗುವಂತೆ ಒಂದು ಕೆಲಸ ಮಾಡಿದೆ. ಅದೇನೆಂದರೆ ಜಗತ್ತಿನಾದ್ಯಂತ ಬೇರೆ ಬೇರೆ ದೇಶದಲ್ಲಿ ಹರಡಿ ಹೋಗಿರುವ ಏಳುಜನರನ್ನು ಆರಿಸಿ ಅವರಿಗೊಂದೊಂದು ‘ಅಂತರ್ಜಾಲದ ಕೀಲಿಕೈ’ಯನ್ನು ಕೊಟ್ಟಿದೆ. ಕೀಲಿಕೈಯೆಂದರೆ ಪಾಸ್ವರ್ಡ್ ಅಲ್ಲ. ನಿಜವಾದ ಕೀಲಿಕೈ!! ಈ ಏಳು ಜನರಿಗೆ ಒಬ್ಬೊಬ್ಬರು ಬ್ಯಾಕ್-ಅಪ್ ಇದ್ದಾರೆ. ಅಂದರೆ ಈ ಒಟ್ಟು ಹದಿನಾಲ್ಕು ಜನರ ಹತ್ತಿರ ಅಂತರ್ಜಾಲದ ಕೀಲಿಕೈ ಇರುತ್ತದೆ. ವರ್ಷದಲ್ಲಿ ನಾಲ್ಕು ಬಾರಿ ಈ ಹದಿನಾಲ್ಕು ಮಂದಿ ಅಮೇರಿಕಾದ ಪೂರ್ವತೀರ ಮತ್ತು ಪಶ್ಚಿಮ ತೀರದಲ್ಲಿ ಸೇರಿ, ಈ ಕೀಲಿಕೈಯನ್ನು ಬದಲಾಯಿಸುತ್ತಾರೆ. ಅಂತರ್ಜಾಲವನ್ನು ಸುರಕ್ಷಿತವಾಗಿಡಲು ಈ ನಿಯಮವನ್ನು 2010ರಿಂದ ICANN ಪಾಲಿಸಿಕೊಂಡು ಬಂದಿದೆ.

ಈ ಏಳು ಜನ ಯಾರ್ಯಾರೋ ದಾರಿಹೋಕರಲ್ಲ. ಬದಲಿಗೆ ಅಂತರರ್ಜಾಲ ಸುರಕ್ಷತೆಗಾಗಿ ಶ್ರಮಿಸಿ, ಅದರಲ್ಲಿ ಅಪಾರ ಜ್ಞಾನವುಳ್ಳವರೂ ಹಾಗೂ ಬೇರೆ ಬೇರೆ ಅಂತರ್ಜಾಲ ಸಂಬಂಧಿತ ಸಂಸ್ಥೆಗಳಲ್ಲಿ ಸೇವೆ ಸಲ್ಲಿಸಿದವರಾಗಿರುತ್ತಾರೆ. ಇವರ ಆಯ್ಕೆ ಪ್ರಕ್ರಿಯೆ ಹಾಗೂ ಕೀಲಿಕೈ ಮಾರ್ಪಾಡುವಿಕೆಯ ಕೆಲಸ ಅತ್ಯಂತ್ಯ ಗೌಪ್ಯವಾಗಿ ನಡೆಯುತ್ತದೆ. ವರ್ಷಕ್ಕೆ ನಾಲ್ಕುಬಾರಿ ನಡೆಯುವ ಕೀ ಬದಲಾವಣೆಯ ಗೌಪ್ಯ ಕಾರ್ಯಕ್ರಮಕ್ಕೆ ‘key ceremony’ ಎಂದೇ ಹೆಸರು. ಈವರೆಗೆ ಎರಡು ಬಾರಿ ಈ ಕಾರ್ಯಕ್ರಮದ ವೀಕ್ಷಣೆಗೆ ಕೆಲ ಪತ್ರಕರ್ತರನ್ನೂ ಆಹ್ವಾನಿಸಲಾಗಿದೆ ಹಾಗೂ ಇದರ ಬಗ್ಗೆ ಬರೆದಿದ್ದಾರೋ ಅದಷ್ಟೇ ನಮಗೆ ತಿಳಿದಿರುವ ವಿಷಯ.

Key ceremoneyಯ ದಿನ ಒಂದೆಡೆ ಸೇರುವ ಈ ಏಳೂ ಜನರನ್ನು ಒಂದು ಅತೀವ ಸುರಕ್ಷತೆಯ ಕೋಣೆಯಲ್ಲಿ ಸೇರಿಸಲಾಗುತ್ತದೆ. ಆ ಕೋಣೆಗೆ ಹೋಗುವ ಮುನ್ನ ಬಹಳಷ್ಟು ಸುರಕ್ಷತಾ ಬಾಗಿಲುಗಳನ್ನು ದಾಟಿಯೇ ಹೊಗಬೇಕು. ಕೀಗಳು, ಫಿಂಗರ್ ಪ್ರಿಂಟ್, ಆಕ್ಸೆಸ್ ಕಾರ್ಡ್, ಐರಿಸ್ ಸ್ಕ್ಯಾನ್ ಮುಂತಾದ ಹಂತಗಳನ್ನು ದಾಟಿ ಆ ceremony ನಡೆಯುವ ಕೋಣೆಗೆ ತಲುಪುವ ಈ ‘ಅಂತರ್ಜಾಲ ವಾರಸುದಾರರು’ ತಂತಮ್ಮ ಕೀಗಳಿಂದ ಒಂದೊಂದ್ ಲಾಕರ್ ಡಬ್ಬವನ್ನು ತೆರೆಯುತ್ತಾರೆ. ಅದರೊಳಗೆ ಇಟ್ಟಿರುವ ತಂತಮ್ಮ ಸ್ಮಾರ್ಟ್-ಕಾರ್ಡುಗಳನ್ನು ತೆಗೆದುಕೊಳ್ಳುತ್ತಾರೆ. ಅವುಗಳನ್ನು ಉಪಯೋಗಿಸಲೂ ಒಂದೊಂದು ಪಾಸ್ವರ್ಡುಗಳನ್ನು ಆ ಕಾರ್ಡುಗಳ ಬಳಕೆದಾರರೇ ನಿರ್ಧರಿಸುತ್ತಾರೆ. ಈ ಏಳೂ ಸ್ಮಾರ್ಟ್ ಕಾರ್ಡುಗಳನ್ನು ಒಟ್ಟಿಗೆ ಉಪಯೋಗಿಸಿದಾಗ ಅಂತರ್ಜಾಲದ ಮಹಾದ್ವಾರವನ್ನು ತೆಗೆಯುವ ‘ಮಾಸ್ಟರ್ ಕೀ’ ದೊರೆಯುತ್ತದೆ. ಅದನ್ನು ಜನರೇಟ್ ಮಾಡಲೂ ಸುಮಾರು ನೂರಾಏಳು ಹಂತಗಳ ಕ್ರಮಸೂಚಿಯಿದೆ. ಇದೆಲ್ಲಾ ನಡೆಯುವುದು ಸುಮಾರು ಒಂಬತ್ತು ಜನ ನಿಲ್ಲಬಹುದಾದ ಸಣ್ಣ ಪಂಜರದಲ್ಲಿ ಹಾಗೂ ಒಂದಿಪ್ಪತು ಜನ ಕೂರಬಹುದಾದ ಸಣ್ಣ ಕೋಣೆಯಲ್ಲಿ. ಈ ಮಾಸ್ಟರ್ ಕೀ ಒಂದು ಪಾಸ್ವರ್ಡ್ ತರಹದ್ದೇನೋ ಆಗಿರುತ್ತದೆ. ಈ ಪಾಸ್ವರ್ಡ್ ಬಳಸಿದರೆ ಮಾತ್ರ ಮುಖ್ಯ ಡೇಟಾಬೇಸ್ ಅನ್ನು ಉಪಯೋಗಿಸಲು ಸಾಧ್ಯ.

ಓಹೋ ಸರಿ ಸರಿ. ಒಂದುವೇಳೆ ಈ ಮಾಸ್ಟರ್ ಕೀ ಜನರೇಟ್ ಮಾಡುವ ಯಂತ್ರವೇ ಏನಾದರೂ ಕೆಲಸಮಾಡುವುದನ್ನು ನಿಲ್ಲಿಸಿದರೆ ಏನು ಮಾಡುತ್ತಾರೆ ಅಂತಾ ಕೇಳ್ತೀರಾ? ICANN ಅದಕ್ಕೂ ಒಂದು ವ್ಯವಸ್ಥೆ ಮಾಡಿದೆ. ಅದೇನೆಂದರೆ, ಜಗತ್ತಿನಾದ್ಯಂತ ಹರಡಿಹೋಗಿರುವ ಇನ್ನೂ ಏಳು ಜನ ಈ ಇಡೀ ವ್ಯವಸ್ಥೆಗೆ ಸೂಪರ್ ಬ್ಯಾಕ್-ಅಪ್ ಆಗಿ ನಿಲ್ಲುವಂತಹ ವ್ಯವಸ್ಥೆ. ಒಂದು ವೇಳೆ ಈ ಮಾಸ್ಟರ್ ಕೀ ಜನರೇಟ್ ಮಾಡುವ ಯಂತ್ರ ಕೆಲಸಮಾಡುವುದನ್ನು ನಿಲ್ಲಿಸಿದರೆ, ಅಥವಾ ಏನಾದರೂ ಅವಘಡ ಸಂಭವಿಸಿದರೆ, ಅದನ್ನು ಪುನಃ ರಚಿಸಲು ಬೇಕಾಗುವ ಕಂಪೂಟರ್ ಪ್ರೋಗ್ರಾಮ್ ಅನ್ನು ಏಳು ಭಾಗಗಳಾಗಿ ವಿಂಗಡಿಸಿ ಈ ಏಳು ಜನರ ಮಧ್ಯೆ ಹಂಚಲಾಗಿದೆ. ಒಂದುವೇಳೆಯೇನಾದರೂ ICANNನ ಆಫೀಸೇನಾದರೂ ನಿರ್ನಾಮವಾದರೆ ಇನ್ನೊಂದು ಕಡೆ ಈ ಯಂತ್ರವನ್ನು ಪುನರ್ನಿಮಿಸಲು ಈ ಏಳು ಜನ ಒಂದಾಗುತ್ತಾರೆ. ವರ್ಷಕ್ಕೊಮ್ಮೆ ಈ ಏಳು ಜನ ತಾವು ಸುರಕ್ಷಿತವಾಗಿದ್ದೇವೆ ಹಾಗೂ ‘ಎಲ್ಲವೂ ಸರಿಯಿದೆ’ ಎಂದು ನಿರೂಪಿಸಲು, ತಮ್ಮ ಒಂದು ಭಾವಚಿತ್ರ, ಅಂದಿನ ದಿನಪತ್ರಿಕೆ ಮತ್ತು ತಮ್ಮ ಕೀ (ಕೋಡ್) ಅನ್ನು ICANN ಆಫೀಸಿಗೆ ಕಳಿಸುತ್ತಾರೆ. ಹೇಗಿದೆ ವ್ಯವಸ್ಥೆ!?

ಇದರ ಬಗ್ಗೆ ಹೆಚ್ಚಿನ ಆಸಕ್ತಿಯಿದ್ದರೆ, http://bit.ly/1pDUq3g ಇಲ್ಲಿ ಕ್ಲಿಕ್ಕಿಸಿ. ಅಲ್ಲೊಂದು ಸಣ್ಣ ವಿಡಿಯೋ ಕೂಡಾ ಇದೆ. ಇತ್ತೀಚೆಗೆ ನಡೆದ key ceremoneyಯೊಂದರ ದೃಶ್ಯ ತುಣುಕು ಕೂಡಾ ಇದೆ. ಓದಿ….ನೋಡಿ.

ಇಷ್ಟೆಲ್ಲಾ ಸರ್ಕಸ್ಸು ನಡೆಯುವುದು ನಾವು ನೀವು ನಿರಂತರವಾಗಿ ಅವಲಂಬಿತವಾಗಿರುವ ಅಂತರ್ಜಾಲವನ್ನು ಸುರಕ್ಷಿತವಾಗಿಸಲು ಹಾಗೂ ಅದರ ಮೇಲೆ ನಾವಿಟ್ಟಿರುವ ನಂಬಿಕೆಯನ್ನು ಹಾಗೆಯೇ ನಿಲ್ಲಿಸುವುದಕ್ಕಾಗಿ. ಜನರ ಜೀವನಗಳನ್ನು, ದೇಶಗಳ ಸರ್ಕಾರಗಳನ್ನು, ಜಗತ್ತಿನ ಇತಿಹಾಸವನ್ನೇ ಬದಲಾಯಿಸುವಷ್ಟರಮಟ್ಟಿಗೆ ಶಕ್ತಿಶಾಲಿಯಾಗಿರುವ ಅಂತರ್ಜಾಲವನ್ನು ನಂಬಿಕಾರ್ಹ ವೇದಿಕೆಯಾಗಿ ಉಳಿಸುವುದಕ್ಕಾಗಿ. ನಾವು ಇವೆಲ್ಲರ ತಲೆಬಿಸಿಯೇ ಇಲ್ಲದೆ, ಸುಮ್ಮನೆ ಗೂಗಲ್ಲಿಗೆ ಹೋಗಿ ನಮಗೆ ಬೇಕಾದ ವಿಷಯವನ್ನು ಟೈಪಿಸುತ್ತೇವೆ. ಅದು ಉತ್ತರಗಳನ್ನು ಕೊಡುತ್ತದೆ. ನಾವು ಅದನ್ನೇ ನಂಬಿ ಕ್ಲಿಕ್ಕಿಸುತ್ತೇವೆ. ಅಲ್ಲಿ ಏನಿದೆಯೋ ಇಲ್ಲವೋ ಒಂದೂ ಗೊತ್ತಿಲ್ಲದೆ ಗುರುತು ಪರಿಚಯವಿರದ ಹುತ್ತಕ್ಕೆ ಕೈ ಹಾಕುತ್ತೇವೆ. ಅದನ್ನೆಲ್ಲಾ ನಂಬಿಕಾರ್ಹವಾಗಿ ಉಳಿಸುವುದು ICANNನಂತಹ ಕೆಲ ಸಂಸ್ಥೆಗಳು. ಅವರಿಗೊಂದು ಸಣ್ಣ ಥಾಂಕ್ಸ್ ಕೊಡಲೇ ಬೇಕಲ್ಲವೇ?

 

ಚಿತ್ರಕೃಪೆ: ಆರೋನ್ ಟಿಲ್ಲಿ
Image courtesy: Aaron Tilley

ಬುದ್ಧಿಗೊಂದು ಗುದ್ದು – ೨೫

ಆಕಸ್ಮಿಕ ಹಾಗೂ ಸಾಮ್ಯತೆಗಳ ಲೋಕದಲ್ಲಿ ಇನ್ನೊಂದು ಸುತ್ತು, ಹಾಗೂ ಲಿಂಕನ್-ಕೆನಡಿ ಕನೆಕ್ಷನ್ನು!

ಹೋದಸಲ ಅವಳಿಜವಳಿಗಳ ಅದ್ಭುತವೊಂದರ ಬಗ್ಗೆ ಬರೆದಿದ್ದೆ. ಅದರ ಬಗ್ಗೆಯೇ ಹಾಗೆಯೇ ಯೋಚಿಸುತ್ತಿರಬೇಕಾದರೆ ಕೆಲವೊಮ್ಮೆ ಕಾಕತಾಳೀಯಗಳೂ ಎಷ್ಟೊಂದು ಅಶ್ಚರ್ಯಕರವಾಗಿ ಸಂಭವಿಸಬಲ್ಲವಲ್ಲವೇ ಎಂದೆನ್ನಿಸಿತು. ಹಾಗೆಯೇ ಯಾವಾಗಲೋ ಕಾಲೇಜಿನಲ್ಲಿ ಒಂದು ಹುಡುಗಿಯ (ಹಸಿರು ಲಂಗದವಳಲ್ಲ ) ಹಿಂದೆ ಬಿದ್ದಿದ್ದಾಗ ಬರೆದಿದ್ದ

‘ನಿನ್ನ ಭೇಟಿಯಾದ ಮೇಲೆ,
ನಮ್ಮ ಪ್ರೀತಿ ಹುಟ್ಟಿದ ಮೇಲೆ,
ಆಕಸ್ಮಿಕಗಳೂ ಇಷ್ಟು ಅರ್ಥಪೂರ್ಣವಾಗಿರಬಲ್ಲವೇ? ಎಂದೆನ್ನಿಸಿತು.
ನಮ್ಮ ಜೀವನವೇ ಅರ್ಥಪೂರ್ಣ ಆಕಸ್ಮಿಕಗಳ ಸರಮಾಲೆಯೇ?
ಎಂಬ ಪ್ರಶ್ನೆ ಕಾಡಿತು’

ಎಂಬ ಹುಚ್ಚು ಕವಿತೆಯ ಸಾಲೂ ಸಹ ನೆನಪಾಯಿತು. ಇಂತಹ ಆಕಸ್ಮಿಕಗಳ ಬಗ್ಗೆ ಯೋಚಿಸುತ್ತಿದ್ದಾಗ ನನಗೆ ನೆನಪಾಗಿದ್ದು, ಅಮೇರಿಕಾದ ಇಬ್ಬರು ಜನಪ್ರಿಯ ನಾಯಕರುಗಳಾದ ಅಬ್ರಹಾಂ ಲಿಂಕನ್ ಹಾಗು ಜಾನ್ ಕೆನಡಿಯ ಸಾವಿನ ಸುತ್ತಮುತ್ತವಿದ್ದ ಆಕಸ್ಮಿಕಗಳ ಸಾಲುಸಾಲು ಪಟ್ಟಿ! ಹೋದಬಾರಿ ಹುಟ್ಟು ಹಾಗೂ ಜೀವನದ ಸಾಮ್ಯತೆಯ ಬಗ್ಗೆ ಬರೆದಿದ್ದವನಿಗೆ ಇಲ್ಲಿ ಜೀವನದ ಮತ್ತು ಮರಣದ ಸುತ್ತಮುತ್ತಲಿದ್ದ ಸಾಮ್ಯತೆಯ ಬಗ್ಗೆ ಬರೆಯೋಣವೆಂದಿನೆಸಿದ್ದು ಸಹಜವೇ ಅಲ್ಲವೇ?

ಅಬ್ರಹಾಂ ಲಿಂಕನ್ ಮತ್ತು ಜಾನ್ ಕೆನಡಿ ಅಮೇರಿಕಾದ ವರ್ಚಸ್ವೀ ನಾಯಕರುಗಳ ಪಟ್ಟಿಯಲ್ಲಿ ಮೊದಲನೇ ಸ್ಥಾನದಲ್ಲಿ ನಿಲ್ಲುತ್ತಾರೆ. ಅಮೇರಿಕಾ ಸಂಯುಕ್ತ ಸಂಸ್ಥಾನದ ಆಂತರಿಕ ಕಲಹದ ಸಮಯದಲ್ಲಿ ದೇಶವನ್ನು ಮುನ್ನಡೆಸಿ ಒಂದುಗೂಡಿಸಿದ ಖ್ಯಾತಿ ಲಿಂಕನ್’ಗೆ ಸಲ್ಲಿದರೆ, ಕೆನಡಿ ತಮ್ಮ ಬೇ ಆಫ್ ಪಿಗ್ಸ್ ಆಕ್ರಮಣ, ಶೀತಲ ಹಾಗೂ ಅಂತರಿಕ್ಷ ಸಮರ ಹಾಗೂ ಕ್ಯೂಬಾ ಕ್ಷಿಪಣಿ ಬಿಕ್ಕಟ್ಟಿನ ಸಮಯದಲ್ಲಿ ದೇಶವನ್ನು ಮುನ್ನಡೆಸಿದರು. ಇಬ್ಬರೂ ಸಹ ಸಾಮಾಜಿಕ ಸುಧಾರಣೆಗಳಿಗಾಗಿ ಹಾಗೂ ನಾಗರೀಕ ಹಕ್ಕುಗಳಿಗಾಗಿ ಹೋರಾಡಿದರು. ಇವರಿಬ್ಬರ ಜೀವನ, ಸಾಧನೆಗಳು, ಸಾವು ಹಾಗೂ ಅದರ ಸುತ್ತಲಿನ ವಿಷಯಗಳು ಕೂಡ ನನ್ನ ಹಿಂದಿನ ಲೇಖನದಲ್ಲಿದ್ದಂತೆಯೇ ಬಹಳಷ್ಟು ಸಾಮ್ಯತೆಯಿಂದ ಕೂಡಿತ್ತು ಎನ್ನುವುದೇ ವಿಶೇಷ. ಆ ಸಾಮ್ಯತೆಗಳೇನೆಂದರೆ:

10690134_746295848793696_7925149320860373224_n

(*) ಇಬ್ಬರೂ ’46ರಲ್ಲಿ ‘ಹೌಸ್ ಆಫ್ ರೆಪ್ರೆಸೆಂಟೇಟಿವ್ಸ್’ಗೆ ಚುನಾಯಿತರಾದರು (ಲಿಂಕನ್ 1846ರಲ್ಲಿ ಹಾಗೂ ಕೆನಡಿ 1946ರಲ್ಲಿ). ಸರಿಯಾಗಿ ನೂರು ವರ್ಷಗಳ ಅಂತರದಲ್ಲಿ!

(*) ಇಬ್ಬರೂ ’60ರಲ್ಲಿ ಅಮೇರಿಕಾದ ಅಧ್ಯಕ್ಷರಾಗಿ ಆಯ್ಕೆಯಾದರು! (ಲಿಂಕನ್ 1860ರಲ್ಲಿ ಹಾಗೂ ಕೆನಡಿ 1960ರಲ್ಲಿ ಎಂದು ಇನ್ನೊಮ್ಮೆ ಹೇಳಬೇಕಿಲ್ಲ ತಾನೆ )

(*) ಇಬ್ಬರೂ ಸಹ ತಮ್ಮ ಅಧ್ಯಕ್ಷೀಯ ಚುನಾವಣೆಗೆ ಎದುರಾಳಿಯಾಗಿ ಆಗ ಉಪಾಧ್ಯಕ್ಷರಾಗಿ ಸೇವೆ ಸಲ್ಲಿಸುತ್ತಿದ್ದವರನ್ನೇ ಎದುರಿಸಿದರು. ಲಿಂಕನ್ ತನ್ನ ಪ್ರತಿಸ್ಪರ್ಧಿಯಾಗಿ ಜಾನ್ ಬ್ರೆಕೆನ್ರಿಡ್ಜ್ ಅವರನ್ನು ಎದುರಿಸಿದರೆ, ಕೆನಡಿ ಅಂದಿನ ಉಪಾಧ್ಯಕ್ಷರಾಗಿದ್ದ ರಿಚರ್ಡ್ ನಿಕ್ಸನ್ ಅವರನ್ನು ಎದುರಿಸಿದರು!

(*) ಇವರಿಬ್ಬರ ಪೂರ್ವಾಧಿಕಾರಿಗಳೂ ತಮ್ಮ ಎಪ್ಪತ್ತರ ವಯಸ್ಸಿನಲ್ಲಿ ನಿವೃತ್ತಿಹೊಂದಿ, ಮುಂದಿನ ವಾಸಕ್ಕಾಗಿ ಪೆನ್ಸಿಲ್ವೇನಿಯಾಗೆ ತೆರಳಿದರು. ಲಿಂಕನ್ನರ ಪೂರ್ವಾಧಿಕಾರಿ ಜೇಮ್ಸ್ ಬುಕಾನನ್ ನಿವೃತ್ತಿಯ ನಂತರ ಲಾಂಕಾಸ್ಟರಿನಲ್ಲಿ ವಾಸಮಾಡಲು ತೆರಳಿದರೆ, ಕೆನಡಿಯ ಪೂರ್ವಾಧಿಕಾರಿ ಡ್ವೈಟ್ ಐಸನ್ಹೂವರ್ ನಿವೃತ್ತಿಯ ನಂತರ ಗೆಟ್ಟಿಸ್ಬರ್ಗಿಗೆ ತೆರಳಿದರು.

(*) ಈ ಎರಡೂ ಅಧ್ಯಕ್ಷರುಗಳ ಜೊತೆ ಚುನಾಯಿತರಾದ ಉಪಾಧ್ಯಕ್ಷರುಗಳು, ಡೆಮೋಕ್ರಾಟರಾಗಿದ್ದರು ಹಾಗೂ ಅಮೇರಿಕಾ ಸಂಯುಕ್ತ ಸಂಸ್ಥಾನದ ದಕ್ಷಿಣದ ರಾಜ್ಯಗಳಿಂದ ಬಂದವರಾಗಿದ್ದರು. ಇಬ್ಬರ ಹೆಸರೂ ಜಾನ್ಸನ್ ಎಂದೇ ಆಗಿತ್ತು! ಲಿಂಕನ್ ಕಾಲದ ಉಪಾಧ್ಯಕ್ಷರಾಗಿದ್ದ ಆಂಡ್ರ್ಯೂ ಜಾನ್ಸನ್ ಉತ್ತರ ಕ್ಯಾರೋಲೀನಾದವರಾಗಿದ್ದರೆ, ಕೆನಡಿಯವರ ಉಪಾಧ್ಯಕ್ಷರಾಗಿದ್ದ ಲಿಂಡನ್ ಜಾನ್ಸನ್ ಟೆಕ್ಸಾಸಿನವರಾಗಿದ್ದರು!

(*) ಇಬ್ಬರೂ ಉಪಾಧ್ಯಕ್ಷ ಜಾನ್ಸನ್ನರು ’08ರಲ್ಲಿ ಜನಿಸಿದವರಾಗಿದ್ದರು! (ನೂರು ವರ್ಷಗಳ ಅಂತರದಲ್ಲಿ)

(*) ಎರಡೂ ಜಾನ್ಸನ್ನರ ಹೆಸರುಗಳಲ್ಲಿ 6 ಅಕ್ಷರಗಳಿದ್ದವು!

(*) ಇಬ್ಬರೂ ಉಪಾಧ್ಯಕ್ಷರುಗಳು ಅವರ ಕಾಲದ ಅಧ್ಯಕ್ಷರ ಹತ್ಯೆಯ ನಂತರ ’69ರಲ್ಲಿ ಅಮೇರಿಕಾದ ಅಧ್ಯಕ್ಷರಾದರು! ಹಾಗೂ ಈ ಇಬ್ಬರ ಉತ್ತರಾಧಿಕಾರಿಗಳೂ ರಿಪಬ್ಲಿಕನ್ನರಾಗಿದ್ದರು ಮತ್ತು ಅವರ ತಾಯಿಯ ಹೆಸರು ಹನ್ನಾ ಎಂದಾಗಿತ್ತು!

(*) ಇಬ್ಬರೂ ಅಧ್ಯಕ್ಷರ ಕಾಲದಲ್ಲಿ ಆಫ್ರಿಕನ್ ಅಮೇರಿಕನ್ನರ ಹಕ್ಕುಗಳ ಹೋರಾಟ ಉಚ್ಛ್ರಾಯ ಸ್ಥಿತಿಯಲ್ಲಿತ್ತು ಹಾಗೂ ಇಬ್ಬರೂ ಅಧ್ಯಕ್ಷರು ಸಮಾನ ಹಕ್ಕುಗಳಿಗಾಗಿ ಶ್ರಮಿಸಿದರು. ಇಬ್ಬರೂ ಸಹ ಈ ವಿಷಯಗಳ ಬಗ್ಗೆ ತಮ್ಮ ನಿಲುವನ್ನು ಸ್ಪಷ್ಟಪಡಿಸುತ್ತಾ ’63ರಲ್ಲಿ ಕಾನೂನುಗಳನ್ನ್ನು ಜಾರಿಗೊಳಿಸಿದರು. ಲಿಂಕನ್ 1862ರಲ್ಲಿ ತನ್ನ ‘ಗುಲಾಮಗಿರಿ ವಿಮೋಚನಾ ಘೋಷಣೆ’ಗೆ ಸಹಿ ಹಾಕಿ 1863ರಲ್ಲಿ ಅದನ್ನು ಶಾಸನವಾಗಿ ಜಾರಿಗೆ ತಂದರೆ, ಕೆನಡಿ 1963ರಲ್ಲಿ ‘ಸಮಾನ ನಾಗರೀಕ ಹಕ್ಕುಗಳ’ ಹಕ್ಕುಪತ್ರಕ್ಕೆ ಸಹಿಹಾಕಿ ಶಾಸನಬದ್ದಗೊಳಿಸಿದರು! ಅದೇವರ್ಷ ಪ್ರಖ್ಯಾತ ‘ಉದ್ಯೋಗ ಮತ್ತು ಸ್ವತಂತ್ರಕ್ಕಾಗಿ ವಾಷಿಂಗ್ಟನ್ ನಡಿಗೆ’ ನಡೆಯಿತು

(*) ಇಬ್ಬರೂ ಅಧ್ಯಕ್ಷರ ಕೊನೆಯ ಹೆಸರಿನಲ್ಲಿ 7 ಅಕ್ಷರಗಳಿದ್ದವು!

(*) ಇಬ್ಬರೂ ಅಧ್ಯಕ್ಷರ ಅಧಿಕಾರವಧಿಯಲ್ಲಿ ಅವರ ಗಂಡು ಮಗುವೊಂದು ತೀರಿಕೊಂಡಿತ್ತು!

(*) ಇಬ್ಬರೂ ಅಧ್ಯಕ್ಷರೂ ತಮ್ಮ ಹೆಂಡತಿಯರ ಸಮ್ಮುಖದಲ್ಲಿ ಶುಕ್ರವಾರದಂದೇ ಹತ್ಯೆಗೀಡಾದರು. ಆ ಎರಡೂ ಶುಕ್ರವಾರಗಳಿಗಿಂತ ಮುಂಚೆ ಆ ವಾರದಲ್ಲಿ ಮುಖ್ಯವಾದ ಸಾರ್ವಜನಿಕ ರಜಾದಿನಗಳಿದ್ದವು!

(*) ಹತ್ಯೆಯ ದಿನ ಇಬ್ಬರೂ ಅಧ್ಯಕ್ಷರ ಜೊತೆ, ಇನ್ನೊಬ್ಬ ದಂಪತಿಗಳಿದ್ದರು!

(*) ಎರಡೂ ಹತ್ಯೆಗಳಲ್ಲಿ, ಆ ಇನ್ನೊಬ್ಬ ದಂಪತಿಗಳಲ್ಲಿ, ಪುರುಷನಿಗೆ ಗುಂಡೇಟಿನ ಗಾಯವಾಗಿತ್ತು!

(*) ಲಿಂಕನ್ ಅವರನ್ನು ಜಾನ್ ವಿಲ್ಕ್ಸ್ ಬೂತ್ ಎಂಬಾತ ‘ಫೋರ್ಡ್ ಥಿಯೇಟರ್’ನಲ್ಲಿ ಕೊಂದರೆ, ಕೆನಡಿಯನ್ನು ಲೀ ಹಾರ್ವಿ ಒಸ್ವಾಲ್ಡ್ ಎಂಬಾತ ಫೋರ್ಡ್ ಕಂಪನಿಯಿಂದ ತಯಾರಿಸಲ್ಪಟ್ಟ ‘ಲಿಂಕನ್’ ಕಾರಿನಲ್ಲಿ ಪ್ರಯಾಣಿಸುತ್ತಿದ್ದಾಗ ಕೊಂದ!

(*) ಲಿಂಕನ್’ಗೆ ಒಬ್ಬ ಕೆನಡಿ ಎಂಬ ಹೆಸರಿನ ಸೆಕ್ರೆಟರಿಯಿದ್ದ, ಹಾಗೂ ಆತ ಲಿಂಕನ್ ಅವರನ್ನು ಹತ್ಯೆಯ ದಿನ ಫೋರ್ಡ್ ಥಿಯೇಟರ್’ಗೆ ಹೋಗದಂತೆ ತಡೆದಿದ್ದ. ಕೆನಡಿಗೆ ಎವಿಲಿನ್ ಲಿಂಕನ್ ಎಂಬ ಹೆಸರಿನ ಸೆಕ್ರೆಟರಿಯಿದ್ದಳು, ಹಾಗೂ ಆಕೆ ಹತ್ಯೆಯ ದಿನ ಡಲ್ಲಾಸ್ ನಗರದ ಬೇಟಿಯನ್ನು ರದ್ದುಮಾಡಲು ಸಲಹೆ ನೀಡಿದ್ದಳು!

(*) ಲಿಂಕನ್ ಅವರನ್ನ್ನು ಕೊಂದನಂತರ ಜಾನ್ ಬೂತ್, ಥಿಯೇಟರಿನಿಂದ ಒಂದು ಗೋದಾಮಿನೊಳಗೆ ಓಡಿದ. ಕೆನಡಿಯನ್ನು ಕೊಂದ ನಂತರ ಲೀ ಓಸ್ವಾಲ್ಡ್, ಗೋದಾಮಿನಿಂದ ಥಿಯೇಟರೊಂದರೊಳಗೆ ಓಡಿದ!

(*) ಇಬ್ಬರೂ ಕೊಲೆಗಾರರು ತಮ್ಮಿಂದ ಕೊಲ್ಲಲ್ಪಟ್ಟವರು ಸತ್ತ ತಿಂಗಳಿನಲ್ಲಿಯೇ ಸತ್ತರು. ಆಶ್ಚರ್ಯವೆಂದರೆ ಇಬ್ಬರೂ ತಾವು ಹುಟ್ಟಿದ ರಾಜ್ಯದ ಪಕ್ಕದ ರಾಜ್ಯದಲ್ಲೇ ಸತ್ತರು!

(*) ಇಬ್ಬರೂ ಕೊಲೆಗಾರರು ಅ.ಸಂ.ಸಂ.ದ ದಕ್ಷಿಣದ ರಾಜ್ಯಗಳಿಂದ ಬಂದವರಾಗಿದ್ದರು. ಇಬ್ಬರೂ ಬಿಳಿಯರೇ. ಇಬ್ಬರೂ ’30ರ ದಶಕದ ಕೊನೆಯಲ್ಲಿ ಹುಟ್ಟಿದವರಾಗಿದ್ದರು ಹಾಗೂ ಕೊಲೆನಡೆದಾಗ ಇಬ್ಬರೂ ತಮ್ಮ ಇಪ್ಪತ್ತರ ಹರೆಯದ ಮಧ್ಯದಲ್ಲಿದ್ದರು!

(*) ಜಾನ್ ಬೂತ್ 1838ರಲ್ಲಿ ಜನಿಸಿದ್ದರೆ, ಲೀ ಓಸ್ವಾಲ್ಡ್ 1939ರಲ್ಲಿ ಜನಿಸಿದ!

(*) ಇಬ್ಬರೂ ಕೊಲೆಗಾರರ ಹೆಸರಿನಲ್ಲಿ ಒಟ್ಟು 15 ಅಕ್ಷರಗಳಿದ್ದವು!

(*) ಇಬ್ಬರೂ ಕೊಲೆಗಾರರು ತಮ್ಮ ಕೇಸಿನ ವಿಚಾರಣೆ ಮುಗಿಯುವ ಮುನ್ನವೇ ಕೊಲೆಗೀಡಾದರು. ಇಬ್ಬರಿಗೂ ತಲೆಗೆ ಗುಂಡಿಕ್ಕಿ ಕೊಲ್ಲಲಾಯಿತು!

(*) ಈ ಕೊಲೆಗಾರರನ್ನು ಕೊಂದವರಿಬ್ಬರೂ ಅಮೇರಿಕದ ಉತ್ತರದಲ್ಲಿ ಬೆಳೆದವರಾಗಿದ್ದರು, ಇಬ್ಬರೂ ವಯಸ್ಕರಾದ ಮೇಲೆ ತಮ್ಮ ಹೆಸರನ್ನು ಬದಲಾಯಿಸಿಕೊಂಡಿದ್ದರು ಹಾಗೂ ಇಬ್ಬರೂ ಅವಿವಾಹಿತರಾಗಿದ್ದರು!

10628269_746295642127050_8290037868584641968_n

ಬಹುಷಃ ಕೂದಲು ಸೀಳುತ್ತಲೇ ಹೋದರೆ ಇನ್ನಷ್ಟು ಸಾಮ್ಯತೆಗಳು ಕಂಡುಬರಬಹುದೇನೋ! ಇಷ್ಟಕ್ಕೇ ಇದನ್ನು ನಿಲ್ಲಿಸುತ್ತಿದ್ದೇನೆ

ಜಗತ್ತು ಅದೆಷ್ಟು ಕುತೂಹಲಭರಿತ ಹಾಗೂ ವಿಚಿತ್ರ ವಿಷಯಗಳಿಂದ ತುಂಬಿದೆಯಲ್ಲವೇ!?

ಕೊಸರು: ವೀರಪ್ಪನ್ ಹುಟ್ಟಿದ್ದೂ ಹಾಗೂ ಅವನನ್ನು ಕೊಂದ ಪೋಲೀಸ್ ದಳದ ಮುಖ್ಯಸ್ಥರಾಗಿದ್ದ ಕೆ. ವಿಜಯ್ ಕುಮಾರ್ ಹುಟ್ಟಿದ್ದೂ 1952ರಲ್ಲಿ!

ಬುದ್ಧಿಗೊಂದು ಗುದ್ದು – ೨೪

ಮೂವತ್ತೊಂಬತ್ತು ವರ್ಷಗಳ ನಂತರ ಅರಳಿದ ಅವಳಿಗಳ ಕಚಗುಳಿ:

ನಿಮ್ಮಲ್ಲಿ ಯಾರಾದರೂ ಜೋಡಿ ಬಾಳೆಹಣ್ಣು ತಿಂದಿದ್ದೀರಾ!? ನಾನು ಸಣ್ಣವನಿದ್ದಾಗ, ನನಗೆ ತಿನ್ನೋಕೇ ಬಿಡ್ತಾ ಇರಲಿಲ್ಲ. ‘ಅದು ತಿಂದ್ರೆ ನಿನಗೆ ಅವಳಿ-ಜವಳಿ ಮಕ್ಳಾಗುತ್ವೆ’ ಅನ್ನೋ ಕಾರಣ ಕೊಡ್ತಾ ಇದ್ರು. ನನಗೆ ಆಶ್ಚರ್ಯವಾಗ್ತಾ ಇತ್ತು. ‘ಅಯ್ಯೋ ಅವಳಿ ಜವಳಿ ಆದ್ರೆ ಇನ್ನೂ ಒಳ್ಳೇದಲ್ವಾ! ನನ್ ಹೆಂಡ್ತಿ ಎರಡೆರಡು ಸಲ ಕಷ್ಟ ಅನುಭವಿಸೋದು ತಪ್ಪುತ್ತೆ’ ಅಂತಾ ಹೇಳಿ, ತಲೆ ಮೇಲೆ ಮೊಟಕಿಸಿಕೊಳ್ತಾ ಇದ್ದೆ. ಅದೂ ಅಲ್ದೆ ‘ಬಾಳೆಹಣ್ಣು ತಿಂದ್ರೆ ಮಕ್ಕಳಾಗುತ್ವಾ? ಜೋಡಿ ತಿಂದ್ರೆ ಎರಡು ಮಕ್ಕಳಾಗೋದಾದ್ರೆ, ಒಂದು ತಿಂದ್ರೆ ಒಂದು ಮಗು ಹುಟ್ಬೇಕಲ್ವಾ? ಮತ್ತೆ ಒಂದೊಂದೇ ತಿನ್ನೋಕೆ ಬಿಡ್ತೀರಾ, ಜೋಡಿ ಯಾಕೆ ತಿನ್ನಬಾರ್ದು!?’ ಅಂತೆಲ್ಲಾ ಕೇಳಿ ಲೆಕ್ಕಿ ಬರಲಿನಲ್ಲಿ ಪೆಟ್ಟು ತಿಂತಾ ಇದ್ದೆ. ಈ ಅವಳಿಗಳು ಅನ್ನೋ ವಿಸ್ಮಯ ನನಗೆ ಮಾತ್ರವಲ್ಲದೇ, ಜೀವವಿಜ್ಞಾನಿಗಳಿಗೂ ಸಹ ಸದಾ ಒಂದು ಕುತೂಹಲದ ವಿಷಯ. ಕೆಲವು ಥಿಯರಿಗಳ ಪ್ರಕಾರ, ಅವಳಿಗಳು ಒಂದೇ ರೀತಿ ಯೋಚಿಸ್ತಾರೆ ಹಾಗೂ ವರ್ತಿಸುತ್ತಾರೆ. ಕೆಲವು ವಾದಗಳ ಪ್ರಕಾರ ಅವಳಿಗಳು ಬೆಳೆಯುವ ಪರಿಸರಕ್ಕೆ ಹೊಂದಿಕೊಂಡಂತೆ ಅವರ ವರ್ತನೆಗಳಲ್ಲಿ, ನಿರ್ಧಾರಶಕ್ತಿಗಳಲ್ಲಿ ಬದಲಾವಣೆಗಳು ಕಂಡುಬರುತ್ತವೆ. ಇನ್ನೂ ಕೆಲವು ವಾದಗಳ ಪ್ರಕಾರ, ಅವಳಿಗಳು ಹುಟ್ಟುವಾಗಲಷ್ಟೇ ಅದು ಕೌತುಕದ ವಿಚಾರ. ಆನಂತರದ್ದೆಲ್ಲಾ ಸಾಮಾನ್ಯ ಆಗುಹೋಗುಗಳೇ. ಅವರು ಬರೇ ‘ಇಬ್ಬರು ಮನುಷ್ಯರು’ ಅಷ್ಟೇ. ಅವರಿಬ್ಬರ ಮಧ್ಯೆ ಸಾಮ್ಯಗಳು ಇರಲೇಬೇಕೆಂದೇನೂ ಇಲ್ಲ ಇತ್ಯಾದಿ ಇತ್ಯಾದಿ. ಇದಕ್ಕೆ ಸೂಕ್ತವಾದ ಉತ್ತರ ಇನ್ನೂ ಸಿಕ್ಕಿಲ್ಲ. ಇದನ್ನು ವಸ್ತುನಿಷ್ಟವಾಗಿ ಅಧ್ಯಯನ ಮಾಡಬೇಕೆಂದರೆ, ಇಬ್ಬರು ಅವಳಿಮಕ್ಕಳನ್ನು ಹುಟ್ಟುವಾಗಲೇ ಬೇರ್ಪಡಿಸಿ, ಅವರನ್ನು ಬೇರೆ ಬೇರೆ ವಲಯಗಳಲ್ಲಿ ಬೆಳೆಸಿ ಪಲಿತಾಂಶವನ್ನು ತಾಳೆ ನೋಡಬೇಕು. ಆದರೆ ಇಂತಹ ಒಂದು ಪ್ರಯೊಗವನ್ನು ಮನುಷ್ಯರ ಮೇಲೆ ನಡೆಸುವುದು ಸಾಧ್ಯವಿಲ್ಲ (ಹಾಗೂ ಸರಿಯಲ್ಲ ಕೂಡ).

ಅವಳಿಗಳಲ್ಲಿ, ಅನನ್ಯ/ತದ್ರೂಪಿ ಅವಳಿಗಳು (Identical twins – ಒಂದೇ ಅಂಡಾಣು ಹಾಗೂ ಒಂದೇ ವೀರ್ಯಾಣುವಿನಿಂದ ಹುಟ್ಟಿ, ಮುಂದೆ ಅಂಡಾಣು ವಿಭಜನೆಯಾಗಿ ಒಂದೇ ಪ್ರಸವದಲ್ಲಿ ಹುಟ್ಟುವ) ಹಾಗೂ ಸಹೋದರ ಅವಳಿಗಳು (Fraternal twins – ಪ್ರತ್ಯೇಕ ಅಂಡಾಣು ಹಾಗೂ ಪ್ರತ್ಯೇಕ ವೀಯಾಣುವಿನಿಂದ ಹುಟ್ಟಿ, ಒಂದೇ ಪ್ರಸವದಲ್ಲಿ ಹೊರಬಂದ) ಎಂಬ ಸ್ಥೂಲ ವಿಂಗಡೆಣೆಗಳಿವೆ. (ಇವಲ್ಲದೇ ಸಯಾಮೀ ಅವಳಿಗಳು, ಮಿಶ್ರ ಅವಳಿಗಳು, ಪರಾವಲಂಬಿ ಅವಳಿಗಳು, ಅಸಾಮಾನ್ಯ ಅವಳಿಗಳು ಮುಂತಾದ ಹಲವಾರು ವಿಂಗಡಣೆಗಳಿವೆ). ಇವುಗಳಲ್ಲಿ ಅನನ್ಯ/ತದ್ರೂಪಿ ಅವಳಿಗಳು ಬೇರೆಲ್ಲಕ್ಕಿಂತ ಹೆಚ್ಚು ಕುತೂಹಲ ಮೂಡಿಸುವಂತಹ ಸೋಜಿಗಗಳು.

ಮಿನ್ನಿಸೋಟಾ ವಿಶ್ವವಿದ್ಯಾನಿಲಯದಲ್ಲಿ ಅಧ್ಯಯನ ಮಾಡುವ ಥಾಮಸ್ ಬೌಚಾರ್ಡ್ ಎಂಬ ಪುಣ್ಯಾತ್ಮ,’ಅವಳಿಗಳು ಒಂದೇ ರೀತಿ ಯೋಚಿಸಲು ಹಾಗು ವರ್ತಿಸಲು ಸಾಧ್ಯವೇ?’ ಎನ್ನುವುದರ ಬಗ್ಗೆ ವರ್ಷಾನುಗಟ್ಟಲೆ ಅವಳಿಮಕ್ಕಳ ಮೇಲೆ, ಮಕ್ಕಳಿಗೆ ತಿಳಿಯದ ರೀತಿಯಲ್ಲೇ ಸಾಧ್ಯವಾದಷ್ಟೂ ನೈಸರ್ಗಿಕ ಪರಿಸರದಲ್ಲೇ ಅಧ್ಯಯನ ನಡೆಸುತ್ತಿದ್ದ. ಹನ್ನೊಂದು ವರ್ಷಗಳ ಸುದೀರ್ಘ ಸಂಶೋಧನೆಯ ನಂತರವೂ ಏನೂ ಹೆಚ್ಚಿನ ಮಾಹಿತಿ ಸಿಗದೇ ಹತಾಶೆಯಿಂದ ಇನ್ನೇನು ಅಧ್ಯಯನ ಕೈಬಿಡಬೇಕೆಂದು ನಿರ್ಧರಿಸಿದ್ದವನಿಗೆ, ಅದೇನು ಅದೃಷ್ಟ ಖುಲಾಯಿಸಿತ್ತೋ ಏನೋ! ಮುಂದಿನ ಐದುವರ್ಷಕ್ಕೆ ಸಾಕಾಗುವಷ್ಟು ಸರಕು ಒಂದೇ ರಾತ್ರಿಯಲ್ಲಿ ಸಿಕ್ಕಿತು. ಅದೇನೆಂದರೆ, 1939ನೇ ಇಸವಿಯಲ್ಲಿ ಅನನ್ಯ ಅವಳಿಗಳಾಗಿ ಹುಟ್ಟಿ, ಹುಟ್ಟಿದ ಮೂರೇ ವಾರಕ್ಕೆ ಬೇರೆ ಬೇರೆ ಪೋಷಕರಿಂದ ದತ್ತುತೆಗೆದುಕೊಳ್ಳಲ್ಪಟ್ಟು, ಸಂಪೂರ್ಣ ಬೇರೆ ಬೇರೆ ಪರಿಸರದಲ್ಲಿ ಬೆಳೆದು, ಮೂವತ್ತೊಂಬತ್ತು ವರ್ಷಗಳ ನಂತರ ಒಂದಾದ ಇಬ್ಬರು ಅಣ್ಣತಮ್ಮಂದಿರ ಜೋಡಿಯೊಂದು ಸಿಕ್ಕಿಬಿಟ್ಟಿತ್ತು. ಅವಳಿಗಳು (ಬೇರೆಲ್ಲಾ ಅನನ್ಯ ಅವಳಿಗಳಂತೆಯೇ) ನೋಡಲು ಒಂದೇ ತೆರನಾಗಿದ್ದರು. ಆಶ್ಚರ್ಯವೆಂದರೆ ಇಬ್ಬರ ಹೆಸರೂ ಜಿಮ್ ಎಂದಾಗಿತ್ತು!! ಆದರೆ ಅವರ ಜೀವನವನ್ನು ಕೆದಕುತ್ತಾ ಹೋದ ಥಾಮಸ್’ಗೆ ಸಿಕ್ಕ ವಿಚಾರಗಳು ಒಂದಕ್ಕಿಂತ ಒಂದು ಬೆಚ್ಚಿಬೀಳಿಸುವಂತಿದ್ದವು. ಒಂದೇ ತಂದೆ ಮತ್ತು ತಾಯಿಗೆ ಹುಟ್ಟಿ, ಒಂದೇ ಪರಿಸರದಲ್ಲಿ ಬೆಳೆದ ಮಕ್ಕಳು ಸಾಮಾನ್ಯವಾಗಿ ಹಲವಾರು ರೀತಿಯಲ್ಲಿ ಒಂದೇ ರೀತಿಯಿದ್ದರೂ ಸಹ, ಈ ಪ್ರಕರಣದಲ್ಲಿ (ಸಂಪೂರ್ಣ ಬೇರೆ ಬೇರೆ ಪರಿಸರದಲ್ಲಿ ಬೆಳೆದಿದ್ದರೂ ಸಹ) ಕೆಲ ಹೋಲಿಕೆಗಳು ನಂಬಲಸಾಧ್ಯವಾದಷ್ಟು ಸಾಮ್ಯತೆಯಿಂದ ಕೂಡಿದ್ದವು.

(*) ಇಬ್ಬರ ದತ್ತು ಪೋಷಕರೂ ಆ ಹುಡುಗರಿಗೆ ಜಿಮ್ ಎಂದೇ ಹೆಸರಿಟ್ಟರು (ಒಬ್ಬ ಜಿಮ್ ಸ್ಪ್ರಿಂಗರ್ (Jim Springer) ಹಾಗೂ ಇನ್ನೊಬ್ಬ ಜಿಮ್ ಲೆವಿಸ್ (Jim Lewis). ಪೋಷಕರಿಗೂ ಸಹ ಇನ್ನೊಂದು ಮಗುವಿನ ಹೆಸರು ಜಿಮ್ ಎಂದು ತಿಳಿದಿರಲಿಲ್ಲ)!
(*) ತನಗೊಬ್ಬ ಸಹೋದರನಿದ್ದಾನೆ ಎಂದು ತಿಳಿಯದೇ ಬೆಳೆದ ಇಬ್ಬರೂ ಜಿಮ್’ಗಳು ರಕ್ಷಣೆಗೆ ಸಂಬಂದಿಸಿದ ಉದ್ಯೋಗಗಳನ್ನೇ ಆಯ್ದುಕೊಂಡರು. ಜಿಮ್ ಲೆವಿಸ್ ಉಕ್ಕಿನ ಕಾರ್ಖಾನೆಯೊಂದರಲ್ಲಿ ರಕ್ಷಣಾ ಸಿಬ್ಬಂದಿಯಾಗಿದ್ದರೆ, ಜಿಮ್ ಸ್ಪ್ರಿಂಗರ್ ಸಹಾಯಕ ಪೋಲೀಸ್ ಅಧಿಕಾರಿಯ ಹುದ್ದೆ ಸೇರಿದ!
(*) ಇಬ್ಬರಿಗೂ ಸಮಾನ ರೂಪದ ಗಣಿತ ಹಾಗೂ ಮರಗೆಲಸದ ಕೌಶಲ್ಯಗಳಿದ್ದವು!
(*) ಇಬ್ಬರಿಗೂ ಕಾಗುಣಿತ(Spelling)ವೆಂದರೆ ಆಗುತ್ತಿರಲಿಲ್ಲ!
(*) ಇಬ್ಬರೂ ತೆಳುನೀಲಿ ಬಣ್ಣದ ಶೆವಿ (Chevy) ಕಾರುಗಳನ್ನೇ ಕೊಂಡರು!
(*) ಇಬ್ಬರೂ ಫ್ಲೋರಿಡಾದ ಪಾಸ್ ಗ್ರಿಲ್ ಬೀಚಿನಲ್ಲಿ ರಜಾದಿನಗಳನ್ನು ಕಳೆಯಲು ಇಷ್ಟಪಡುತ್ತಿದ್ದರು!
(*) ಇಬ್ಬರೂ Miller Lite ಹಾಗೂ Salem ಸಿಗರೇಟುಗಳನ್ನೇ ಸೇದುತ್ತಿದ್ದರು!
(*) ಇಬ್ಬರಿಗೂ ಉಗುರು ಕಚ್ಚುವ ಅಭ್ಯಾಸವಿತ್ತು!
(*) ಇಬ್ಬರಿಗೂ ತಮ್ಮ ಹೆಂಡತಿಯರಿಗಾಗಿ ಮನೆಯಲ್ಲೆಲ್ಲೆಲ್ಲೋ love notes ಇಡುವುದೆಂದರೆ ಇಷ್ಟವಿತ್ತು!
(*) ಇಬ್ಬರಿಗೂ ಮೈಗ್ರೇನ್ ಕಾಡುತ್ತಿತ್ತು!
(*) ಇಬ್ಬರಿಗೂ ಅಧಿಕ ರಕ್ತದೊತ್ತಡವಿತ್ತು!
(*) ಇಬ್ಬರ ಬ್ರೈನ್ ವೇವ್’ಗಳೂ ಒಂದೇ ರೀತಿಯ ಆಕಾರದಲ್ಲಿದ್ದವು!
(*) ಇಬ್ಬರ ಹೆಂಡತಿಯರ ಹೆಸರೂ ಲಿಂಡಾ ಎಂದಾಗಿತ್ತು!
(*) ಇಬ್ಬರೂ ತಂತಮ್ಮ ಮಕ್ಕಳಿಗೆ ಜೇಮ್ಸ್ ಅಲನ್ ಎಂದು ಹೆಸರಿಟ್ಟಿದ್ದರು. ಒಬ್ಬನ ಹೆಸರು James Alan ಎಂದಿದ್ದರೆ ಮತ್ತೊಬ್ಬನ ಹೆಸರು James Allan ಎಂದಾಗಿತ್ತು!
(*) ಇಬ್ಬರೂ ವಿವಾಹ ವಿಚ್ಚೇದನಕ್ಕೊಳಗಾದರು!
(*) ಇಬ್ಬರ ಎರಡನೆಯ ಹೆಂಡತಿಯರ ಹೆಸರೂ ಬೆಟ್ಟಿ (Betty) ಎಂದಾಗಿತ್ತು!
(*) ಇಬ್ಬರೂ ತಮ್ಮ ನಾಯಿಗಳಿಗೆ ಟಾಯ್ (Toy) ಎಂದು ಹೆಸರಿಟ್ಟಿದ್ದರು!

ಇವಿಷ್ಟೇ ಅಲ್ಲದೆ, ಆಗಾಗ ಇಬ್ಬರಿಗೂ ‘ಏಕೋ ನಾನು ಖಾಲಿ ಖಾಲಿ. ನಾನು ಪೂರ್ತಿಯಲ್ಲ’ ಎಂಬ ಭಾವನೆ ಕಾರಣವೇ ಇಲ್ಲದೆ ಆಗಾಗ ಕಾಡುತ್ತಿತ್ತಂತೆ. ಇಬ್ಬರು ಜಿಮ್’ಗಳ ಪೋಷಕರೂ ಈ ಅವಳಿಗಳ ಹೆತ್ತಮ್ಮನನ್ನು ನೋಡಿರಲಿಲ್ಲ. ಆ ಪುಣ್ಯಾತಿಗಿತ್ತಿ 15ನೇ ವಯಸ್ಸಿನಲ್ಲಿಯೇ, ಮದುವೆಯಾಗದೆ ಗರ್ಭವತಿಯಾಗಿದ್ದರಿಂದ, ಪ್ರಸೂತಿಯ ನಂತರ, ಮಕ್ಕಳನ್ನು, ಚರ್ಚೊಂದು ನಡೆಸುವ ಅನಾಥಾಲಯದಲ್ಲಿ ಬಿಟ್ಟು ಹೋಗಿದ್ದಳು. ಇಬ್ಬರು ಪೋಷಕರೂ ಈ ಮಕ್ಕಳನ್ನು 3 ವಾರಗಳ ವ್ಯತ್ಯಾಸದಲ್ಲಿ ಅಲ್ಲಿಂದ ದತ್ತುತೆಗೆದುಕೊಂಡರು. ದತ್ತುತೆಗೆದುಕೊಳ್ಳುವಾಗ ಎರಡೂ ಪೋಷಕರಿಗೆ ‘ಈ ಮಗುವಿಗೆ ಇನ್ನೊಂದು ಅವಳಿ ತಮ್ಮ ಹುಟ್ಟಿದ್ದ. ಆದರೆ ಹುಟ್ಟಿದ ಕೆಲಗಂಟೆಗಳಲ್ಲೇ ಆ ಮಗು ತೀರಿಕೊಂಡಿತು’ ಎಂದು ಹೇಳಲಾಗಿತ್ತು. ಜಿಮ್ ಲೆವಿಸ್ಸನ ಅಮ್ಮ ಆತ ಹದಿನಾರು ತಿಂಗಳ ಮಗುವಾಗಿದ್ದಾಗ, ಕೋರ್ಟಿನಲ್ಲಿ ದತ್ತಿನ ಕಾಗದ ಪತ್ರಗಳಿಗೆ ಸಂಬಂಧಿಸಿದಂತೆ ಏನೋ ಕೆಲಸಕ್ಕೆ ಹೋಗಿದ್ದಾಗ, ಅಲ್ಲಿದ್ದ ಕ್ಲರ್ಕ್ ಯಾರೊಂದಿಗೋ ಮಾತಾನಾಡುತ್ತ ‘ಹೇಯ್! ನಿನಗ್ಗೊತ್ತಾ. ಆ ಇನ್ನೊಂದು ಮಗುವಿಗೂ ಜಿಮ್ ಎಂದೇ ಹೆಸರಿಟ್ಟಿದ್ದಾರೆ’ ಎಂದು ಪಿಸುಗುಟ್ಟಿದ್ದ. ಜಿಮ್’ನ ಅಮ್ಮ, ಅದನ್ನು ಕೇಳಿಸಿಕೊಂಡರೂ ಅದರ ಬೆಗ್ಗೆ ಹೆಚ್ಚಿನ ಗಮನವನ್ನೇ ಕೊಡಲಿಲ್ಲ. ‘ಆ ಮಾತಿಗೆ ಗಮನ ಕೊಟ್ಟು, ಇನ್ನೂ ಕೆದಕಿ ಆ ಮಗುವನ್ನು ಹುಡುಕಿದ್ದರೂ ಸಹ ನಮ್ಮ ಕೈಲಿ ಎರಡು ಮಕ್ಕಳನ್ನು ಸಾಕಲು ಸಾಧ್ಯವಾಗುತ್ತಿರಲಿಲ್ಲ ಬಿಡಿ. ಆದರೆ ಜಿಮ್ ಖುಷಿಯಾಗಿ ತನ್ನ ತಮ್ಮನೊಂದಿಗೇ ಬೆಳೆಯುವ ಅವಕಾಶ ಮಿಸ್ ಮಾಡ್ಕೊಂಡ್ಬಿಟ್ಟ ಪಾಪ’ ಎಂದು ಸಂದರ್ಶನವೊಂದರಲ್ಲಿ ಆಕೆ ಹೇಳಿದಳು.

ಮೂವತ್ತೇಳು ವರ್ಷಗಳ ನಂತರ ಇದ್ದಕ್ಕಿದ್ದಂತೆ ಜಿಮ್ ಲೆವಿಸ್’ನ ಅಮ್ಮನಿಗೆ ಆ ಕ್ಲರ್ಕಿನ ಮಾತು ಯಾಕೋ ನೆನಪಾಯಿತು. ಅದೇನಾದರೂ ನಿಜವಿರಬಹುದೇ ಎಂದು ತಿಳಿಯುವ ಕುತೂಹಲ ಆಕೆಗೆ ಕೊರೆಯಲು ಪ್ರಾರಂಭವಾಯಿತು (ಯಾಕೆ ಆ ಯೋಚನೆ ಬಂತು, ಅದೇಕೆ ಕಾಡಲು ಪ್ರಾರಂಭಿಸಿತು ಎಂದು ನನಗೇ ಗೊತ್ತಿಲ್ಲ ಎಂದು ಆಕೆ ಹೇಳುತ್ತಾಳೆ!). ಮಗನಿಗೆ ಈ ಕಥೆಯನ್ನು ಹೇಳಿ, ತನ್ನ ಸಹೋದರನನ್ನು ಹುಡುಕುವಂತೆ ಪ್ರೇರೇಪಿಸಿದಳು. ಮೊದಲಿಗೆ ನಿರಾಕರಿಸಿದ, ಬಹಳಷ್ಟು ಬಾರಿ, ಮತ್ತೆ ಮತ್ತೆ ಹೇಳಿದ ನಂತರ, 1978ರ ಥ್ಯಾಂಕ್ಸ್-ಗಿವಿಂಗ್ ಹಬ್ಬದ ದಿನ ಅಮ್ಮನ ಮಾತು ಕೇಳಲು ನಿರ್ಧರಿಸಿದ ಜಿಮ್ ಲೆವಿಸ್ ತನ್ನ ಪ್ರಯತ್ನವನ್ನು ಪ್ರಾರಂಭಿಸಿದ. ಎಲ್ಲಿಂದ ಹುಡುಕುವುದು!? ತನ್ನನ್ನು ದತ್ತುಕೊಟ್ಟ ಅನಾಥಾಲಯಕ್ಕೆ ಹೋಗಿ ಹೇಳಿದರೆ, ಅವರು ‘ಕಾನೂನಿನ ಪ್ರಕಾರ ನಾವು ಆ ವಿವರಗಳನ್ನು ನೀಡುವಂತಿಲ್ಲ. ಕೋರ್ಟ್ ಆದೇಶ ಬೇಕು’ ಎಂದರು. ದೃತಿಗೆಡದ ಜಿಮ್ ತನ್ನ ದತ್ತು ಕಾಗದಗಳನ್ನು ನಿರ್ಧರಿಸಿದ ಪ್ರೊಬೇಟ್ ನ್ಯಾಯಾಲಯದ ಮೊರೆಹೋದ. ಆ ಕೋರ್ಟ್, ಅನಾಥಾಲಯವನ್ನು ಸಂಪರ್ಕಿಸಿ, ಆ ಇನ್ನೊಬ್ಬ ಜಿಮ್’ನ ವಿಳಾಸ ಹುಡುಕಿಕೊಡುವಂತೆ ಹೇಳಿತು. ಜಿಮ್ ಲೆವಿಸ್’ನ ಮಾತಿನಲ್ಲೇ ಹೇಳುವುದಾದರೆ ‘ಒಂದು ದಿನ ನಾನು ಕೆಲಸ ಮುಗಿಸಿ ಮನೆಗೆ ಬಂದೆ. ಊಟದ ಟೇಬಲ್ ಮೇಲೆ ಒಂದು ಕಾಗದದಲ್ಲಿ “ಜಿಮ್ ಸ್ಪ್ರಿಂಗರ್’ನನ್ನು ಸಂಪರ್ಕಿಸಿ” ಎಂಬ ಬರಹದಡಿ ಒಂದು ಫೋನ್ ನಂಬರ್ ಇತ್ತು. ತಕ್ಷಣ ಫೋನಾಯಿಸಿದೆ. ನನಗೆ ಹಲೋ ಹೇಳುವಷ್ಟೂ ಉಸಿರು ಹೊರಡಲಿಲ್ಲ. ಏನು ಹೇಳಬೇಕೆಂದೇ ತಿಳಿಯದೇ ‘ನೀನೇನಾ ನನ್ನ ತಮ್ಮ?’ಎಂದಷ್ಟೇ ಕೇಳಿದೆ. ಆ ಕಡೆಯಿಂದ ‘ಹೌದು’ ಎಂದಷ್ಟೇ ಉತ್ತರಬಂತು. ಇಬ್ಬರೂ ತುಂಬಾ ಹೊತ್ತು ಏನೂ ಮಾತನಾಡದೇ, ಫೋನ್-ಲೈನು ನಿಶಬ್ದವಾಗಿತ್ತು. ನಾನು ಹಲ್ಲು ಕಚ್ಚಿಹಿಡಿದು ಅಳುತ್ತಿದ್ದೆ. ಹೆಚ್ಚೇನೂ ಮಾತನಾಡದೇ ಉಕ್ಕಿಬರುತ್ತಿದ್ದ ಅಳು ತಡೆಹಿಡಿದು ಆತನ ಆಡ್ರೆಸ್ ಕೇಳಿ ಬರೆದುಕೊಂಡೆ. ನಾನಿದ್ದ ಜಾಗಕ್ಕೆ ಪಶ್ಚಿಮದಲ್ಲಿ ನಾಲ್ಕುನೂರಮೂವತ್ತೈದು ಕಿಲೋಮೀಟರ್ ದೂರದಲ್ಲಿದ್ದ ಊರಿಗೆ ಕಾರು ಓಡಿಸಿಕೊಂಡೇ ಹೋದೆ. ಫೆಬ್ರವರಿ 9, 1978ರಂದು ಅಲ್ಲಿ ತಲುಪಿದಾಗ ಸಿಕ್ಕ ಸ್ವಾಗತ ಮರೆಯಲಾರದ್ದು. ಅವತ್ತು ಫೋನ್ ಕೆಳಗಿಟ್ಟಾಗ ಅಳಲು ಶುರುಮಾಡಿದ ಜಿಮ್ ಸ್ಪ್ರಿಂಗರ್, ಅದನ್ನು ಇನ್ನೂ ಜಾರಿಯಲ್ಲಿಟ್ಟಿದ್ದ. ತುಂಬಾ ಭಾವನಾತ್ಮಕವಾದ ಭೇಟಿಯಾಗಿತ್ತು ಅದು. ಅವನೊಂದಿಗೆ ಮಾತನಾಡುತ್ತಾ ಹೊರಟಾಗ, ಇಷ್ಟು ದಿನ ನಾನೊಬ್ಬ ಸಾಮಾನ್ಯ ಮನುಷ್ಯನೆಂದುಕೊಂಡಿದ್ದ ನನಗೆ ಇಂತಾ ಅಸಾಮಾನ್ಯ ಗತಕಾಲವೊಂದಿರಬಹುದೆಂದು ನಂಬಲೂ ಸಾಧ್ಯವಾಗಲಿಲ್ಲ!’

1690468_741852275904720_1695811321250525747_n

ಈ ವಿಷಯ ತಿಳಿದ ಥಾಮಸ್ ಬೌಚಾರ್ಡ್, ಒಂದು ವಾರದ ಕಾಲಕ್ಕೆ ಮಿನಿಯಾಪೊಲೀಸ್’ಗೆ ಬರಲು ಹಾಗೂ ಅಲ್ಲಿ ತಂಗಲು ಬೇಕಾಗುವ ಎಲ್ಲಾ ಖರ್ಚನ್ನು ವಹಿಸಿಕೊಂಡು, ಇಬ್ಬರೂ ಸಹೋದರರನ್ನು ತನ್ನ ಪ್ರಯೋಗಾಲಕ್ಕೆ ಕರೆಸಿಕೊಂಡು, ವ್ಯಾಪಕವಾದ ದೈಹಿಕ ಹಾಗೂ ಮಾನಸಿಕ ಪರೀಕ್ಷೆಗಳನ್ನು ನಡೆಸಿದ. ವಿಷಯ ಮಾಧ್ಯಮಗಳಿಗೆ ತಿಳಿದು, ಇವರಿಬ್ಬರೂ ಮಾಧ್ಯಮಪ್ರಚಾರಗಳಿಂದ ಗಾಬರಿಗೊಂಡು ಅವರ ಹೇಳಿಕೆಗಳೆಲ್ಲಾ ‘ಕಲುಷಿತ’ಗೊಳ್ಳುವ ಮೊದಲೇ ಥಾಮಸ್ ಸಾಧ್ಯವಾದಷ್ಟು ವಸ್ತುನಿಷ್ಟ ಹಾಗೂ ವೈಜ್ಞಾನಿಕ ಅಧ್ಯಯನಗಳನ್ನು ನಡೆಸಬಯಸಿದ್ದ. ಇದೇನೂ ಜಗತ್ತಿನ ಮೊದಲ ಅವಳಿಗಳ ಪುನರ್ಮಿಲನದ ಪ್ರಕರಣವೇನೂ ಆಗಿರಲಿಲ್ಲ. ವಿಶ್ವಾದ್ಯಂತ ಸುಮಾರು 75 ಹಾಗೂ ಅಮೇರಿಕಾದಲ್ಲೇ 19 ಇಂತಹ ಪ್ರಕರಣಗಳು ಬೆಳಕಿಗೆ ಬಂದಿದ್ದವು. ಆದರೆ, ಆ ಎಲ್ಲಾ ಪ್ರಕರಣಗಳಿಗಿಂತ ಹೆಚ್ಚು ಕಾಲ ಈ ಅವಳಿಗಳು ಬೇರ್ಪಟ್ಟಿದ್ದರು ಹಾಗೂ ಇಬ್ಬರಲ್ಲೂ ಅಷ್ಟೂ ವರ್ಷದ ಪ್ರತ್ಯೇಕತೆ ಹಾಗೂ ಬೆಳೆದ ಪರಿಸರದ ವ್ಯತ್ಯಾಸದ ನಡುವೆಯೂ ಅಸಾಮನ್ಯ ಸಾಮ್ಯತೆಗಳಿದ್ದವು.

ಮೇಲೆ ಹೇಳಿದ ವಿವರಣೆಗಳಿಗೆ ವಿರುದ್ದವಾಗಿ ಘಟಿಸಿದ ಒಂದೇ ವ್ಯತ್ಯಾಸವೆಂದರೆ, ಫೆಬ್ರವರಿ 28, 1979ರಂದು ಜಿಮ್ ಲೆವಿಸ್, ತನ್ನ ಎರಡನೇ ಪತ್ನಿ, ಬೆಟ್ಟಿಯಿಂದ ವಿಚ್ಛೇದನ ಪಡೆದು, ಸ್ಯಾಂಡಿ ಜೇಕಬ್ಸ್ ಎಂಬ ಮಹಿಳೆಯನ್ನು ಮದುವೆಯಾದ. ಜಿಮ್ ಸ್ಪ್ರಿಂಗರ್ ಮಾತ್ರ ತನ್ನ ಎರಡನೇ ಹೆಂಡತಿ ಬೆಟ್ಟಿಯೊಂದಿಗೇ ಉಳಿದ ಜೀವನವನ್ನು (ಸುಖವಾಗಿ ಕಳೆದ ಎಂದು ಹೇಳಲು ಯಾವ ದಾಖಲೆಯೂ ಇಲ್ಲದಿದ್ದರೂ 😛 ) ಕಳೆದ. ಜಿಮ್ ಸ್ಪ್ರಿಂಗರ್ ಮತ್ತವನ ಬೆಟ್ಟಿ ಇಬ್ಬರೂ ತನ್ನ ಹೊಸದಾಗಿ ಸಿಕ್ಕ ಸಹೋದರನ ಮದುವೆಯಲ್ಲಿ ಉಪಸ್ಥಿತರಿದ್ದರು ಹಾಗೂ ಜಿಮ್ (ಸ್ಪ್ರಿಂಗರ್) ಜಿಮ್ (ಲೆವಿಸ್)ನ ‘ಬೆಸ್ಟ್ ಮ್ಯಾನ್’ ಆಗಿ ಸೇವೆ ಸಲ್ಲಿಸಿದ.

10624979_741852272571387_3297169756770331172_n

ಕೊಸರು:
“ಅವಳಿಗಳಲ್ಲಿ ಎಷ್ಟೇ ಸಾಮ್ಯತೆಯಿರಲಿ, ನಮ್ಮ ಮುಂದೆ ಅವೆಲ್ಲಾ ಗೌಣ. ನಮ್ಮನ್ನು ನೋಡಿ!! ಬೇರೆ ಬೇರೆ ಪೋಷಕರಿಗೆ ಹುಟ್ಟಿದರೂ, ಎಷ್ಟೇ ಬೇರೆ ಬೇರೆ ವಾತಾವರಣದಲ್ಲಿ ಬೆಳೆದರೂ, ಯಾವ ಪಕ್ಷಕ್ಕಾಗಿ ಕೆಲಸ ಮಾಡಿದರೂ, ಹೊಟ್ಟೆಗೇ ಏನೇ ತಿಂದರೂ, ಜಗತ್ತಿನಾದ್ಯಂತ ನಮ್ಮವರ ವರ್ತನೆ ಒಂದೇ ರೀತಿ ಇರುತ್ತದೆ” ಅಂತಾ ರಾಜಕಾರಣಿಗಳು ಶಾಸಕರ ಭವನದಲ್ಲಿ ಪ್ರಕಟಣೆ ಹೊರಡಿಸಿದ್ದಾರಂತೆ.

ಬುದ್ಧಿಗೊಂದು ಗುದ್ದು – ೨೩

ಚೆಂಡು, ಹಕ್ಕಿಪುಕ್ಕ, ಸಾಪೇಕ್ಷಸಿದ್ಧಾಂತ ಹಾಗೂ ಸಮಾನತೆ

ಒಂದು ಪ್ರಶ್ನೆ:

ಒಂದಷ್ಟು ಎತ್ತರದಿಂದ 5ಕೆಜಿ ತೂಕದ ಒಂದು ಚಂಡನ್ನು ಮತ್ತು ಏಳುಮಲ್ಲಿಗೆ ತೂಕದ ಒಂದು ಹಕ್ಕಿಪುಕ್ಕವನ್ನೂ ಒಟ್ಟಿಗೆ ಕೆಳಬಿಟ್ಟರೆ, ಯಾವುದು ಮೊದಲು ಭೂಮಿಗೆ ತಲುಪುತ್ತದೆ?

ಬಹಳಷ್ಟು ಜನರು ಹೇಳುವ ಉತ್ತರ “ಚೆಂಡು ಬೇಗ ಭೂಮಿಗೆ ತಲುಪುತ್ತದೆ, ಪುಕ್ಕ ನಿಧಾನವಾಗಿ ಕೆಳಗೆ ಬಂದು ತಲುಪುತ್ತದೆ.” ಇದು ನಿಜವೇ? ಉತ್ತರ ‘ಹೌದು’. ಆದರೆ ಯಾಕೆ!?

ವಿಜ್ಞಾನದ ಬಗ್ಗೆ ತಲೆಕೆಡೆಸಿಕೊಳ್ಳದ ಜನ ಇದಕ್ಕೆ ‘ಚೆಂಡು ಹೆಚ್ಚು ಭಾರವಾಗಿದೆ. ಅದಕ್ಕೇ ಬೇಗ ಭೂಮಿಯನ್ನು ತಲುಪಿತು’ ಎಂಬ ಕಾರಣ ಕೊಡಬಹುದು. ಆದರೆ ತಮಾಷೆಯ ವಿಷಯವೆಂದರೆ, ಈ ‘ಭೂಮಿಯನ್ನು ತಲುಪುವುದು’ ಎಂಬ ಕ್ರಿಯೆಯಿದೆ ನೋಡಿ, ಇದು ನಿಜವಾಗಿ ಭೂಮಿಯನ್ನು ತಲುಪುವುದಲ್ಲ. ಅದು ಭೂಮಿ ಆ ಚೆಂಡನ್ನು ಎಷ್ಟು ವೇಗವಾಗಿ ತನ್ನತ್ತ ಸೆಳೆಯುತ್ತಿದೆ ಎಂಬುದಾಗಿದೆ. ಇನ್ನೂ ವೈಜ್ಞಾನಿಕವಾಗಿ ಹೇಳಬೇಕಂದರೆ ವಸ್ತುಗಳು ಭೂಮಿಯನ್ನು ತಲುಪಲು ಎಷ್ಟು ವೇಗೋತ್ಕರ್ಷವನ್ನು (acceleration) ಪಡೆಯುತ್ತವೆ ಎಂಬುದಾಗಿದೆ. ಇದನ್ನು ಸುಲಭವಾದ ಪದಗಳಲ್ಲಿ ‘ಗುರುತ್ವ ಬಲ’ಎನ್ನುತ್ತಾರೆ. ಭೂಮಿ ತನ್ನ ಮೇಲಿರುವ ಎಲ್ಲಾ ವಸ್ತುಗಳನ್ನು ಒಂದೇಸಮನಾಗಿ (ಪ್ರತಿ ಸೆಕೆಂಡಿಗೆ 9.8ಮೀಟರಿನಷ್ಟು ಬಲದಲ್ಲಿ) ತನ್ನತ್ತ ಸೆಳೆಯುತ್ತದೆ. ಭೂಮಿ ನೀವು ಹೆಚ್ಚು ಭಾರವಾಗಿದ್ದಷ್ಟೂ ನಿಮ್ಮನ್ನು ಹೆಚ್ಚು ವೇಗವಾಗಿ ತನ್ನತ್ತ ಸೆಳೆಯುತ್ತದೆ. F=m.a ಅಂದರೆ ವಸ್ತುವಿನ ಭಾರ ಮತ್ತು ಅದರ ವೇಗೋತ್ಕರ್ಷ ಎರಡೂ ಸೇರಿ, ವಸ್ತುವಿನ ಮೇಲಿರುವ ಒಟ್ಟು ಶಕ್ತಿಯನ್ನು ನಿರ್ಧರಿಸುತ್ತವೆ (ಇದೇ ಕಾರಣಕ್ಕೆ ನಿಧಾನವಾಗಿ ಬಂದು ಗುದ್ದುವ ಲಾರಿ ಹಾಗೂ ವೇಗವಾಗಿ ಬಂದು ಗುದ್ದುವ ಲಾರಿಗಳ ಅಪಘಾತ ಪರಿಣಾಮ ಬೇರೆ ಬೇರೆ)

ಆದರೆ, ಈ ಚೆಂಡು ಮತ್ತು ಹಕ್ಕಿಪುಕ್ಕದ ಉದಾಹರಣೆಯಲ್ಲಿ, ಹಕ್ಕಿಪುಕ್ಕದ ವೇಗೋತ್ಕರ್ಷವನ್ನು ಕಡಿಮೆ ಮಾಡುವ ಇನ್ನೊಂದು ಮಹತ್ವದ ಅಂಶವನ್ನು ಮರೆಯಬಾರದು. ಅದೇ ಗಾಳಿಯ ಪ್ರತಿರೋಧ. ಚೆಂಡಿನ ಮೇಲ್ಮೈ ನುಣುಪಾಗಿಯೂ ಒಂದೇ ರೀತಿ ಇರುವುದರಿಂದಾಗಿಯೂ, ಆ ವಸ್ತುವಿಗೆ ಗಾಳಿ ಒಡ್ಡುವ ಪ್ರತಿರೋಧ ಕಡಿಮೆ. ಅದರ ಮೈ ಮೇಲೆ ಗಾಳಿ ಸುಲಭವಾಗಿ ಸವರಿಕೊಂಡು ಹೋಗುತ್ತದೆ. ಹಕ್ಕಿಪುಕ್ಕದ ಇಡೀ ಮೇಲ್ಮೈ ಒಂದೇ ರೀತಿಯಿಲ್ಲದ ಕಾರಣ ಅದಕ್ಕೆ ಗಾಳಿ ಒಡ್ಡುವ ಪ್ರತಿರೋಧ ಹೆಚ್ಚು. ವೇಗವಾಗಿ ಹೋಗುತ್ತಿರುವ ಕಾರಿನ ಅಥವ ರೈಲಿನಲ್ಲಿ ಕಿಟಕಿಯಿಂದ ಕೈ ಹೊರಹಾಕಿ ನೋಡಿ! (ಮೊದಲು ಕೈಯನ್ನು ಹೊರಹಾಕುವುದು ಸುರಕ್ಷಿತವೇ ಎಂಬುದನ್ನು ಖಚಿತಪಡಿಸಿಕೊಳ್ಳಿ) ಹಸ್ತವನ್ನು ತೆರೆದಾಗ ಗಾಳಿಯ ಪ್ರತಿರೋಧದ ಅನುಭವ ನಿಮಗಾಗುತ್ತದೆ. ಈಗ ಕೈಯನ್ನು ಮುಷ್ಟಿಕಟ್ಟಿ, ಗಾಳಿಯ ಪ್ರತಿರೋಧ ಕಡಿಮೆಯಾಗುವುದು ನಿಮ್ಮ ಅನುಭವಕ್ಕೆ ಬರುತ್ತದೆ. ಈ ಕಾರಣಕ್ಕಾಗಿಯೇ ವಾಹನ ತಯಾರಿಕಾ ಕಂಪನಿಗಳು ಗಾಳಿಯ ಹರಿವಿಗನುಗುಣವಾಗಿ ವಾಹನಗಳ ಮುಖಗಳನ್ನು ವಿನ್ಯಾಸಿಸುವುದು.

ಇಲ್ಲಿ ಕೆಳಗೊಂದು ಕುತೂಹಲಕಾರಿ ವಿಡಿಯೋ ಇದೆ ನೋಡಿ. ಈ ವಿಡಿಯೋದಲ್ಲಿ ಒಂದು ಪ್ರಯೋಗ, ಮತ್ತದರ ವಿವರಣೆ ಇದೆ. ಒಂದು ರೂಮಿನಲ್ಲಿ ಇರುವ ಗಾಳಿಯನ್ನೆಲ್ಲಾ ತೆಗೆದು, ಒಂದು ಭಾರದ ಚೆಂಡು ಮತ್ತು ಒಂದಷ್ಟು ಹಕ್ಕಿಪುಕ್ಕಗಳನ್ನು ಒಂದೇ ಎತ್ತರದಿಂದ, ಒಂದೇ ಸಮಯಕ್ಕೆ ಕೆಳಬಿಟ್ಟರೆ ಏನಾಗುತ್ತದೆ ಎಂಬುದನ್ನು ತೋರಿಸುವ ಪ್ರಯೋಗವಿದು. ನೋಡಿ ಆನಂದಿಸಿ.

ಇದನ್ನು ನೋಡಿದಾಗ ನನಗನ್ನಿಸಿದ್ದು, ಜಗತ್ತಿನಲ್ಲಿ ಜನರೂ ಇಷ್ಟೇ ಸಮಾನರಾಗಿ ಹುಟ್ಟಿದ್ದರು. ಆದರೆ ನಿಧಾನವಾಗಿ (ಕು)ಯುಕ್ತಿ, ಹಣಬಲ, ಭಾಂಧವ್ಯಪ್ರೇಮ, ಮುಂತಾದವನ್ನೆಲ್ಲಾ ಬೆಳೆಸಿಕೊಂಡು ಅಸಮಾನರಾಗಿಬಿಟ್ಟರು. ಹಾಗಾಗಿಯೇ ಇವತ್ತು ಕೆಲವರ ಅಪರಾದ ಮುಚ್ಚಿಹೋಗುತ್ತೆ, ಕೆಲವರ ಮುಗ್ಧತೆ ಎಂದಿಗೂ ಹೊರಬರೊಲ್ಲ. ಈ ಪ್ರಯೋಗದಲ್ಲಿ ಮಾಡಿದಂತೆ ಈ ‘ವಿಶೇಷ’ ಬಲಗಳನ್ನೆಲ್ಲಾ ಹೊರಗೆಳೆದು ನಿರ್ವಾತದ ವಾತಾವರಣ ನಿರ್ಮಾಣ ಮಾಡಿದಾಗ, ಯಾವುದೇ ಪ್ರಭಾವ/ವರ್ಚಸ್ಸು ಇಲ್ಲವಾದಾಗ, ಎಲ್ಲರೂ ಒಂದೇ ಎಂದಾದಾಗ ಮಾತ್ರ ಎಲ್ಲ ಅಪರಾಧಗಳೂ ಸಮಾನವಾಗಿ ನಿರ್ಧರಿಸಲ್ಪಡುತ್ತವೆ. ಅಲ್ಲಿಯವರೆಗೆ, ಸಮಾಜದ ಅಂಕುಡೊಂಕುಗಳನ್ನು ಒಪ್ಪಿಕೊಂಡು ಬದುಕುವುದಷ್ಟೇ ನಮಗುಳಿದ ದಾರಿ. ಇಲ್ಲವೆಂದಾದಲ್ಲಿ ಆ ಅಂಕುಡೊಂಕುಗಳನ್ನು ಸರಿಪಡಿಸುವ ಪ್ರಯತ್ನ ನಡೆಯಬೇಕು. ಅದಕ್ಕಾಗಿ ಹೋರಾಡಬೇಕು. ನಮ್ಮ ಅಭಿಪ್ರಾಯಗಳು ವ್ಯಕ್ತವಾಗಬೇಕು. ಮಾತನಾಡಬೇಕು. ಎದೆಬಿಚ್ಚಿ ಕೂಗಬೇಕು. ಸಾಕುಬಿಡಿ ತುಂಬಾ ಎಮೋಶನಲ್ ಆದ್ರೆ ಕಷ್ಟ…. 😦

ಕೊಸರು:

ನಿಮ್ಮ ತೂಕ ಭೂಮಿಯ ಮೇಲೆ x ಎಂದಿಟ್ಟುಕೊಳ್ಳೋಣ. ಮೊದಲೇ ಹೇಳಿದಂತೆ ಈ ತೂಕ ಭೂಮಿಯ ಗುರುತ್ವಬಲದಿಂದ ನಿರ್ಧಾರಿತವಾದದ್ದು. ನಿಮ್ಮ ನಿಜವಾದ ತೂಕ ಅದಲ್ಲ. ಹಾಗೂ ಈ ತೂಕ ನೀವೆಲ್ಲಿದ್ದೀರಿ ಎನ್ನುವುದರ ಮೇಲೂ ನಿರ್ಧಾರಿತವಾಗುತ್ತದೆ. ಅಂದರೆ ಯಾವ ಗ್ರಹದ ಮೇಲಿದ್ದೀರಿ ಎನ್ನುವುದರ ಮೇಲೆ ಅವಲಂಬಿತವಾಗಿದೆ. (ಭೂಮಿಯಮೇಲೂ ಕೆಲವೊಮ್ಮೆ ಬೇರೆ ಬೇರೆ ಎತ್ತರದ ಪ್ರದೇಶಗಳಲ್ಲಿದ್ದಾಗ ನಿಮ್ಮ ತೂಕ ಬದಲಾಗುತ್ತದೆ! ನಿಮಗೇ ಗೊತ್ತಿಲ್ಲದಂತೆ!!) ಉದಾಹರಣೆಗೆ ಮಂಗಳಗ್ರಹವನ್ನು ತೆಗೆದುಕೊಳ್ಳೋಣ. ಮಂಗಳಗ್ರಹ ನೋಡಲು ಭೂಮಿಯಷ್ಟೇ ದೊಡ್ಡದಿದ್ದರೂ, ಅದರ ಸಾಂದ್ರತೆ ಭೂಮಿಗಿಂತಾ ಕಡಿಮೆ. ಹಾಗಾಗಿ ಅದರ ವಾತಾವರಣವೂ ಭೂಮಿಯ ವಾತಾವರಣಕ್ಕಿಂತ ತೆಳು. ಈ ಕಾರಣದಿಂದಾಗಿ ಮಂಗಳನ ಗುರುತ್ವ ಭೂಮಿಯ ಗುರುತ್ವಕ್ಕೆ ಹೋಲಿಸಿದರೆ 38% ಅಷ್ಟೇ. ಅಂದರೆ ಮಂಗಳ ತನ್ನ ಮೇಲಿರುವ ವಸ್ತುಗಳನ್ನು ಪ್ರತಿಸೆಕೆಂಡಿಗೆ 3.7ಮೀಟರ್ ಬಲದಲ್ಲಷ್ಟೇ ಕೆಳಗೆಳೆಯುತ್ತಾನೆ (ಭೂಮಿ 9.8ಮೀ, ಪ್ರತಿ ಸೆಕೆಂಡಿಗೆ). ಆದ್ದರಿಂದ ಭೂಮಿಯ ಮೇಲೆ 85 ಕಿಲೋ ಇರುವ ನಾನು ಮಂಗಳನಲ್ಲಿ ಬರೇ 32 ಕಿಲೋ ತೂಗುತ್ತೇನೆ! ಇದೇ ರೀತಿ ಚಂದ್ರನ ಮೇಲೆ ನನ್ನ ಭಾರ 14 ಕಿಲೋ ಅಷ್ಟೇ!! ತೂಕ ಇಳಿಸಬೇಕೆಂಬ ಇಚ್ಚೆಯಿರುವವರು ಸುಮ್ಮನೆ ಜಿಮ್ ಸದಸ್ಯತ್ವದ ಮೇಲೆ ದುಡ್ಡು ಖರ್ಚು ಮಾಡುವುದನ್ನು ಬಿಟ್ಟು ಮಂಗಳಗ್ರಹಕ್ಕೆ ಹೋದರೆ ಸಾಕು. ಹೇಗೂ ನಮ್ಮ ಇಸ್ರೋದವರು ಅತ್ಯಂತ ಕಡಿಮೆ ಖರ್ಚಿನಲ್ಲಿ ಅಲ್ಲಿಗೆ ಹೋಗೋಕೆ ಸ್ಕೈ-ಟ್ಯಾಕ್ಸಿ ಮಾಡ್ತಾ ಇದ್ದಾರಂತೆ 😉 😀

ಒಂದು ನಿಮಿಷ, ಈ ಚರ್ಚೆಯ ಇನ್ನೊಂದು ಬದಿಯನ್ನೂ ನೋಡಿ ಹೋಗಿ ಸ್ವಾಮಿ. ನೆಪ್ಚೂನ್ ಗ್ರಹಕ್ಕೆ ಭೇಟಿ ಕೊಟ್ಟರೆ ಅಲ್ಲಿ ನನ್ನ ತೂಕ 95.6 ಕಿಲೋ! ಗುರುಗ್ರಹ ಮೇಲೆ ನನ್ನ ತೂಕ 200 ಕಿಲೋ!! ಸೂರ್ಯನ ಮೇಲೆ ಏನಾದರೂ ನಿಲ್ಲಲು ಸಾಧ್ಯವಾದರೆ, ಅಲ್ಲಿ ನನ್ನ ತೂಕ 2,301 ಕಿಲೋ!! ಸೃಷ್ಟಿಯಲ್ಲಿ ಅತ್ಯಂತ ಹೆಚ್ಚಿನ ಸಾಂದ್ರತೆಯ ಆಕಾಶಕಾಯವಾದ ನ್ಯೂಟ್ರಾನ್ ನಕ್ಷತ್ರದ ಮೇಲೇನೇನಾದರೂ ನಿಲ್ಲಲು ಸಾಧ್ಯವಾದರೆ ಅಲ್ಲಿ ತೂಕ 1,190 ಶತಕೋಟಿ ಕಿಲೋ!!! (ಕೃಷ್ಣರಂಧ್ರಗಳ ಬಗ್ಗೆ ಮಾತೇ ಬೇಡ ಬಿಡಿ) ಯಾರಿಗಾದರೂ ತೂಕ ಹೆಚ್ಚಿಸಿಕೊಳ್ಲಬೇಕೆಂದಿದ್ದರೆ ಆ ನ್ಯೂಟ್ರಿಗೈನ್ ತಿನ್ನೋ ಬದಲು ನೆಪ್ಚೂನಿಗೋ ಗುರುಗ್ರಹಕ್ಕೋ ಟಿಕೇಟು ತಗೊಳ್ಳಿ 🙂

ನಿಮ್ಮ ತೂಕ ಬೇರೆ ಗ್ರಹದ ಮೇಲೆ ಎಷ್ಟು ಅಂತಾ ತಿಳಿಯೋ ಆಸೆ ಇದ್ರೆ, ಒಂದ್ರೂಪಾಯಿ ನನ್ನ ಸ್ವಿಸ್ ಬ್ಯಾಂಕ್ ಅಕೌಟಿಗೆ ಟ್ರಾಸ್ಪರ್ರ್ ಮಾಡಿ, ಇಲ್ಲಿ ಈ ಕೊಂಡಿಯ ಕಿವಿ ಹಿಂಡಿ http://bit.ly/1bngVTQ

ಇನ್ಮೇಲೆ ಯಾರಾದ್ರೂ “ನಿಮ್ ವೈಟು ಎಷ್ಟು?” ಅಂತಾ ಕೇಳಿದ್ರೆ ಯಾವ ಗ್ರಹದ ಮೇಲೆ ಅಂತಾ ಕೇಳಿ ಅವರನ್ನು ಒಂದೆರೆಡು ಕ್ಷಣ ತಬ್ಬಿಬ್ಬು ಮಾಡಿ. ಆಮೇಲೆ ಅವರು ‘ಯಾಕೆ ಹಾಗೆ ಕೇಳಿದ್ದು?’ ಅಂತಾ ಕೇಳಿದ್ರೆ, ನಾನು ಹೇಳಿದ ಈ ಹರಿಕಥೆ ಪುರಾಣವನ್ನೆಲ್ಲಾ ಅವರಿಗೆ ಕೊರೀರಿ 🙂 ಪುಗ್ಸಟ್ಟೆ ಕೇಳುಗರು ಸಿಕ್ಕಾಗ ಬಿಡಬಾರದು 🙂

ಬುದ್ಧಿಗೊಂದು ಗುದ್ದು – ೨೨

ದಯಾಮರಣಕ್ಕೊಂದು ಉತ್ಕರ್ಷದ ದಾರಿ:

ಒಂದು ಜೋಕು ಹೀಗಿದೆ:
‘ನಾನು ಸಾಯುವುದೇ ಆದರೆ, ನನ್ನಜ್ಜನಂತೆ ಶಾಂತವಾಗಿ ಸಂತೋಷದಿಂದ ನಿದ್ರೆಯಲ್ಲಿಯೇ ಮರಣಹೊಂದಬಯಸುತ್ತೇನೆ. ಅವನು ಚಲಾಯಿಸುತ್ತಿದ್ದ ಬಸ್ಸಿನ ಪ್ರಯಾಣಿಕರಂತೆ ಕಿರಿಚಾಡುತ್ತಾ ಅಲ್ಲ’.

ಕೆಲವು ಚಲನಚಿತ್ರಗಳಲ್ಲಿ ‘ನೀನು ಒಂದ್ಸಲ ಐ ಲವ್ ಯೂ ಅಂದ್ರೆ ನಾನು ಸಂತೋಷದಿಂದ ಹಾಗೇ ಪ್ರಾಣ ಬಿಟ್ಬಿಡ್ತೀನಿ’ ಅನ್ನೋ ಡಬ್ಬಾ ಡೈಲಾಗ್ ಕೂಡಾ ಕೇಳಿಬರುತ್ತೆ.

ಬರೀಮಾತಿಗೇ ಈ ಸಾಲುಗಳಾದರೂ, ‘ಸಂತೋಷದಿಂದ ಸಾಯುವುದು ಸಾಧ್ಯವಿದೆಯಾ?’ ಎಂದು ನಾನು ಯೋಚಿಸಿದ್ದುಂಟು. ಮೊನ್ನೆ ಏನೋ ಓದುವಾಗ ಎಡವಿ ಬಿದ್ದದ್ದು ಈ ವಿಷಯದ ಮೇಲೆ. ಅದೇನೆಂದರೆ, ‘ಯುಥನೇಷಿಯಾ ಕೋಸ್ಟರ್ (Euthanasia Coaster)’. ನೀವು ಗ್ರಹಿಸಿದಂತೆಯೇ, ಇದೊಂದು ರೋಲರ್-ಕೋಸ್ಟರ್. ಇವನ್ನು ನೀವು ವಂಡರ್-ಲಾ, ಅಪ್ಪುಘರ್, ಜಿಆರೆಸ್ ಪ್ಯಾಂಟಸಿ ಪಾರ್ಕುಗಳಲ್ಲಿ ನೋಡಿರುತ್ತೀರಿ. ವೇಗವಾಗಿ ಸುಯ್ಯೆಂದು ಮೇಲೆ ಹೋಗಿ, ರೊಯ್ಯೆಂದು ಕೆಳಗೆ ಬಂದು, ಅತ್ತಿತ್ತ ಓಲಾಡಿ, ನೀರಿನ ಮೇಲೆ ಓಡುತ್ತಾ ಬುಸ್ಸೆಂದು ನೀರು ಹಾರಿಸುತ್ತಾ, ಪ್ರಯಾಣಿಕರನ್ನು ಸಂತಸಗೊಳಿಸುವ ಇವನ್ನು ಯಾರನ್ನಾದರೂ ಕೊಲ್ಲಲೂ ಕೂಡಾ ಬಳಸಬಹುದು ಎಂದರೆ ನಂಬುತ್ತೀರಾ!? ಇಂತದ ಒಂದು ಸವಾರಿಯೇ ಯುಥನೇಷಿಯಾ ಕೋಸ್ಟರ್. ನಾವು ನೋಡಿರುವ ಕೋಸ್ಟರಿಗೂ, ಇದಕ್ಕೂ ಇರುವ ಒಂದೇ ವ್ಯತ್ಯಾಸವೆಂದರೆ, ಇದರ ಮೂಲ ಉದ್ದೇಶ ಮನರಂಜನೆಯಲ್ಲ…..ಸಾವು! ಆದರೆ ಸಂತೋಷದ ಸಾವು!!

ಯುಥನೇಷಿಯಾಕ್ಕೆ ಕನ್ನಡದಲ್ಲಿ ಉತ್ತಮ ಪದವೆಂದರೆ ದಯಾಮರಣ. ಗ್ರೀಕ್ ಭಾಷೆಯ ‘ಯು’ (ಒಳ್ಳೆಯ) ಹಾಗೂ ‘ಥನಾಟೋಸ್’ (ಮರಣ) ಎಂಬ ಪದಗಳಿಂದ ಹೊಮ್ಮಿರುವ ಪದ ಯುಥನೇಷಿಯಾ. ದಯಾಮರಣಕ್ಕೆ ಬೇರೆ ಬೇರೆ ದೇಶಗಳಲ್ಲಿ ಬೇರೆ ಬೇರೆ ವ್ಯಾಖ್ಯಾನಗಳೂ, ಬೇರೆ ಬೇರೆ ಕಾನೂನುಗಳೂ ಇವೆ. ಉದಾಹರಣೆಗೆ ಬ್ರಿಟನ್ನಿನಲ್ಲಿ ವೈದ್ಯಕೀಯ ನೈತಿಕತಾ ಸಮಿತಿಯ ಪ್ರಕಾರ ದಯಾಮರಣ ಎಂದರೆ ‘ಪರಿಹರಿಸಲಾಗದ ನೋವನ್ನು ನಿವಾರಿಸಲು, ಜೀವನವನ್ನು ಕೊನೆಗಾಣಿಸುವ ಉದ್ದೇಶದಿಂದ ಕೈಗೊಂಡ ಉದ್ದೇಶಪೂರ್ವಕ ಹಸ್ತಕ್ಷೇಪ’. ಅದೇ ನೆದರ್ಲ್ಯಾಂಡಿನಲ್ಲಿ ಇದನ್ನು ‘ರೋಗಿಯ ಕೋರಿಕೆಯ ಮೇರೆಗೆ, ವೈದ್ಯರು ಜೀವನವನ್ನು ಅಂತ್ಯಗೊಳಿಸುವುದು’ ಎಂದು ವಿವರಿಸಲಾಗಿದೆ.

ದಯಾಮರಣದಲ್ಲಿ ಸ್ವಯಂಪ್ರೇರಿತ ದಯಾಮರಣ (Voluntary Euthanasia) ಮತ್ತು ಸ್ವಯಂಪ್ರೇರಿತವಲ್ಲದ ದಯಾಮರಣ (Non-Voluntary Euthanasia) ಎಂಬ ಎರಡು ಸ್ಥೂಲ ವಿಭಾಗಳಿವೆ. ಸ್ವಯಂಪ್ರೇರಿತ ದಯಾಮರಣದಲ್ಲಿ ರೋಗಿ ಸ್ವತಃ ತಾನಾಗಿಯೇ ದಯಾಮರಣವನ್ನು ಬಯಸುತ್ತಾನೆ. ತದನಂತರ ವೈದ್ಯರೊಬ್ಬರು ಅದನ್ನು ಕಾರ್ಯರೂಪಕ್ಕಿಳಿಸುವಲ್ಲಿ ಸಹಾಯಮಾಡುತ್ತಾರೆ. ಬೆಲ್ಜಿಯಂ, ಲಕ್ಸಂಬರ್ಗ್, ನೆದರ್ಲ್ಯಾಂಡ್ಸ್, ಸ್ವಿಟ್ಝೆರ್ಲ್ಯಾಂಡ್ ದೇಶಗಳಲ್ಲಿ ಹಾಗೂ ಅ.ಸಂ.ಸಂ(USA)ನ ಓರೆಗಾಂವ್ ಮತ್ತು ವಾಶಿಂಗ್ಟನ್ ರಾಜ್ಯಗಳಲ್ಲಿ ಈ ರೀತಿಯ ದಯಾಮರಣ ಕಾನೂನುಬದ್ಧ. ಅಸ್ವಯಂಪ್ರೇರಿತ ದಯಾಮರಣದಲ್ಲಿ, ರೋಗಿ ಯಾವುದೇ ಸಮ್ಮತಿ ಅಥವಾ ಅಸಮ್ಮತಿಯನ್ನು ಸೂಚಿಸಲು ಅಸಮರ್ಥನಾಗಿರುತ್ತಾನೆ ಹಾಗೂ ಬೇರೊಬ್ಬರು ರೋಗಿಯ ಪರವಾಗಿ ಈ ನಿರ್ಧಾರವನ್ನು ತೆಗೆದುಕೊಳ್ಳುತ್ತಾರೆ. ರೋಗಿ ಮಾತನಾಡಲಾರದ ಅಥವಾ ದೀರ್ಘಾವಧಿ ಕೋಮಾದಲ್ಲಿರುವುದು ಅಸ್ವಯಂಪ್ರೇರಿತ ದಯಾಮರಣದಡಿಯಲ್ಲಿ ಬರುತ್ತದೆ.

ಭಾರತದಲ್ಲಿ ಈ ಮೊದಲು ಎಲ್ಲರೀತಿಯ ದಯಾಮರಣಗಳು ಕಾನೂನುಬಾಹಿರವಾಗಿದ್ದವು. ಅರುಣಾ ಶಾನುಭಾಗ್ ಕೇಸಿನಲ್ಲಿ (http://bit.ly/1g67eho) ಆಕೆ 37 ವರ್ಷಗಳ ಕಾಲ ಅಲ್ಲಾಡಲೂ ಸಾಧ್ಯವಾಗದೇ ಆಸ್ಪತ್ರೆಯ ಹಾಸಿಗೆಯಲ್ಲೇ ಇದ್ದಾಗ, ಆಕೆ ಸ್ನೇಹಿತೆ ಅರುಣಾಳ ಪರವಾಗಿ ದಯಾಮರಣ ಕೋರಿ ನ್ಯಾಯಾಲಯದ ಮೊರೆ ಹೋಗಿದ್ದಳು. ಅವಳ ಕೋರಿಕೆಗೆ ಪ್ರತಿಕ್ರಿಯಿಸಿದ ನ್ಯಾಯಾಲಯ ಒಂದು ವೈದ್ಯಕೀಯ ಸಮಿತಿಯನ್ನು ರಚಿಸಿ, ಅದರ ಸಲಹೆ ಕೇಳಿತ್ತು. 7ನೇ ಮಾರ್ಚ್ 2011ರಂದು ದಯಾಮರಣ ಅರ್ಜಿಯನ್ನು ತಿರಸ್ಕರಿಸಿದ ಸರ್ವೋಚ್ಛ ನ್ಯಾಯಲಯ, ತನ್ನ ಮಹತ್ವದ ತೀರ್ಪಿನಲ್ಲಿ ಭಾರತ ದೇಶದಲ್ಲಿ ಪರೋಕ್ಷ ದಯಾಮರಣಕ್ಕೆ ಅನುವುಮಾಡಿಕೊಟ್ಟಿತು. ಪರೋಕ್ಷ ದಯಾಮರಣ ವೆದರೆ, ರೋಗಿಯ ಕೋರಿಕೆಯ ಮೇರೆಗೆ ಜೀವನದಾಯೀ ಔಷಧಗಳ ಪೂರೈಕೆಯನ್ನು ನಿಲ್ಲಿಸುವುದು. [ಇಲ್ಲಿ ಪರೋಕ್ಷ (passive) ಅನ್ನುವ ಪದಬಳಕೆ ಏಕೆಂದರೆ, ಇದೇ ರೀತಿಯಲ್ಲಿ Active Euthanasia ಕೂಡಾ ಇದೆ. ಈ ಕ್ರಿಯೆಯಲ್ಲಿ, ರೋಗಿಗೆ ವಿಷಕಾರಿ ಇಂಜೆಕ್ಷನ್ ನೋಡುವುದರ ಮೂಲಕ ದಯಾಮರಣಕ್ಕೆ ಅನುವುಮಾಡಿಕೊಡಲಾಗುತ್ತದೆ. ಸ್ವಿಟ್ಝೆರ್ಲ್ಯಾಂಡ್ ಮತ್ತು ಕೆಲ ದೇಶಗಳಲ್ಲಿ, ‘ಸಾವಿನ ಉದ್ದೇಶ ನಿಸ್ವಾರ್ಥತೆಯಿಂದ ಕೂಡಿದ್ದಲ್ಲಿ’ ಈ ರೀತಿಯ ದಯಾಮರಣಕ್ಕೆ ಕಾನೂನುರೀತ್ಯಾ ಅವಕಾಶವಿದೆ]

ಓಕೆ ಓಕೆ….ವಿಷಯಕ್ಕೆ ಬರೋಣ. 2011ರ ಡಬ್ಲಿನ್ನಿನ ವಿಜ್ಞಾನ ಗ್ಯಾಲರಿಯಲ್ಲಿ, ಲಂಡನ್ನಿನ ‘ರಾಯಲ್ ಕಾಲೇಜ್ ಆಫ್ ಆರ್ಟ್ಸ್’ನ ಪಿ.ಎಚ್.ಡಿ ವಿದ್ಯಾರ್ಥಿಯಾದ ಜೂಲಿಯೋನಸ್ ಊರ್ಬೋನಸ್ ಈ ‘ಯುಥನೇಷಿಯಾ ಕೋಸ್ಟರ್’ನ ಕಲಾತ್ಮಕ ಪರಿಕಲ್ಪನೆಯನ್ನು ಮುಂದಿಟ್ಟ (ಚಿತ್ರ 1). ಈ ಕಲ್ಪನೆ, ಈಗಾಗಲೇ ಅಸ್ತಿತ್ವದಲ್ಲಿರುವ ರೋಲರ್ ಕೋಸ್ಟರಿಗಿಂತಾ ಭಿನ್ನವಾಗೇನೂ ಇಲ್ಲ. ಕೆಲವೇ ಕೆಲವು ವ್ಯತ್ಯಾಸಗಳೆಂದರೆ, (೧) ಈ ಕೋಸ್ಟರಿನ ಗರಿಷ್ಟ ಎತ್ತರ ಸುಮಾರು 510ಮೀಟರ್; ಹಾಗೂ (೨) ಇದರ ಒಟ್ಟು ಉದ್ದ ಸುಮಾರು 7.5 ಕಿಲೋಮೀಟರುಗಳು. ಈ ರೋಲರ್-ಕೋಸ್ಟರ್ ತನ್ನ 2 ನಿಮಿಷದ ಒಟ್ಟು ಪ್ರಯಾಣದಲ್ಲಿ ಒಂದುಬಾರಿಗೆ 24 ಪ್ರಯಾಣಿಕರನ್ನು ಸ್ವರ್ಗಕ್ಕೆ (ಅಥವಾ ಇನ್ನೆಲ್ಲಿಗೋ) ತಲುಪಿಸಬಲ್ಲುದು.

ಕಾರ್ಯರೀತಿ:
ಈ ಕೋಸ್ಟರ್ ತನ್ನ 24 ಪ್ರಯಾಣಿಕರೊಂದಿಗೆ ಮೊದಲು ನಿಧಾನವಾಗಿ ಸಮತಲದಲ್ಲಿ ಚಲಿಸಿ ನಂತರ 510 ಮೀ. ಎತ್ತರದ ಕಡಿದಾದ ದಾರಿಯನ್ನು ನಿಧಾನವಾಗಿ ಮೇಲ್ಮುಖವಾಗಿ ಕ್ರಮಿಸುತ್ತದೆ. ತನ್ನ ಗರಿಷ್ಟ ಎತ್ತರದ ಬಿಂದುವನ್ನು ತಲುಪಿದ ನಂತರ, ಇದ್ದಕ್ಕಿಂದಂತೆ ಅತೀವ ಇಳಿಜಾರಿನ 510ಮೀ ದಾರಿಯಲ್ಲಿ ಇಳಿಯತೊಡಗುತ್ತದೆ. ಈ ಪ್ರಕ್ರಿಯೆಯಲ್ಲಿ ಕೋಸ್ಟರ್ ಗಂಟೆಗೆ ಸುಮಾರು 360ಕಿಮೀಗಳಷ್ಟು ವೇಗವನ್ನು ಪಡೆಯುತ್ತದೆ. ಈ ಇಳಿಜಾರನ್ನು ಇಳಿದನಂತರ ಏಳು ಒಂದಕ್ಕಿಂತಾ ಒಂದು ಚಿಕ್ಕದಾಗಿರುವ) ತಿರುವುಗಳಲ್ಲಿ ಚಲಿಸುತ್ತದೆ. ಈ ಇಡೀ ಸವಾರಿಯಲ್ಲಿ ಪ್ರಯಾಣಿಕರು ಸುಮಾರು 10Gಗಳಷ್ಟು (ಸಾಮಾನ್ಯ ಗುರುತ್ವಬಲದ ಹತ್ತುಪಟ್ಟು) ಗುರುತ್ವಬಲದ ಪ್ರಭಾವಕ್ಕೆ ಒಳಗಾಗುತ್ತಾರೆ. ಇದರಿಂದಾಗಿ ಅವರ ಮೆದುಳಿಗೆ ರಕ್ತಸಂಚಾರ ನಿಧಾನವಾಗಿ ನಿಂತುಹೋಗುತ್ತದೆ. ಮೆದುಳಿಗೆ ರಕ್ತಸಂಚಾರವಿಲ್ಲದಾದಾಗ ಮಿದುಳಿಗೆ ಆಮ್ಲಜನಕದ ಪೂರೈಕೆಯಿಲ್ಲವಾಗುತ್ತದೆ. ಅದಿಲ್ಲದೆ ಮೆದುಳು ಕೆಲಸಮಾಡುವುದು ಅಸಾಧ್ಯ. ಇದಕ್ಕೆ ವೈದ್ಯಕೀಯ ಭಾಷೆಯಲ್ಲಿ ಸೆರೆಬ್ರಲ್ ಹೈಪಾಕ್ಸಿಯಾ ಎಂದು ಕರೆಯುತ್ತಾರೆ. ಅರವತ್ತು ಸೆಕೆಂಡುಗಳ ಕಾಲ ಸೆರೆಬ್ರಲ್ ಹೈಪಾಕ್ಸಿಯಾ ಉಂಟಾದರೆ ಮೆದುಳು ಪುನಃ ಎಂದಿಗೂ ಸರಿಯಾಗಿ ಕೆಲಸಮಾಡಲಾಗದ ಸ್ಥಿತಿಗೆ ತಲುಪುತ್ತದೆ. ಯುಥನೇಷಿಯಾ ರೋಲರ್ ಕೋಸ್ಟರಿನ ಒಟ್ಟು ಪ್ರಯಾಣ 120 ಸೆಕೆಂಡುಗಳು! ಮೊದಲನೇ ಇಳಿಜಾರಿನಲ್ಲಿ ಪ್ರಯಾಣಿಕರ ದೃಷ್ಟಿ ಮಂಜಾಗುತ್ತದೆ, ಅಲ್ಲಿಂದ ಮುಂದೆ ಮೊದಲನೇ ಹಾಗೂ ಎರಡನೇ ಸುರುಳಿಗಳಲ್ಲಿ ನಿಧಾನವಾಗಿ ಮೆದುಳು ನಿಷ್ಕ್ರಿಯಗೊಂಡು, ಪ್ರಯಾಣಿಕರು g-LOC (ಗುರುತ್ವದಿಂದಾಗಿ ಉಂಟಾಗುವ ಅಪ್ರಜ್ಞಾವಸ್ಥೆ) ಸ್ಥಿತಿಗೆ ಜಾರುತ್ತಾರೆ. ಎಂಥ ಸೈರಣೆ ಇರುವ ಮನುಷ್ಯನಾದರೂ ಮೂರನೇ ಸುರುಳಿ ತಲುಪುವ ಹೊತ್ತಿಗೆ ಮೆದುಳು ಸಂಪೂರ್ಣ ನಿಷ್ಕ್ರಿಯವಾಗಿರುತ್ತದೆ. ಮುಂದಿನ ಮೂರು ಸುರುಳಿಗಳನ್ನು, ಯಾವುದೇ ಅಸಹಜ ಪ್ರಕರಣಗಳಲ್ಲಿ ಪ್ರಯಾಣಿಕರು ಬದುಕುಳಿಯುವುದನ್ನು ತಪ್ಪಿಸಲೆಂದೇ ಸೇರಿಸಲಾಗಿದೆ.

ಜೀವನವನ್ನು ಕೊನೆಗಾಣಿಸುವುದು ಎಂದಿಗೂ ಸಂತಸದ ವಿಷಯವಲ್ಲ. ಆದರೆ ಎಲ್ಲರ ಜೀವನವೂ ಒಂದೇ ತರಾ ಇರೋಲ್ಲ. ಎಲ್ಲಾ ಮನುಷ್ಯರೂ ಜೀವನವನ್ನು ಒಂದೇ ತರಹ ಸ್ವೀಕರಿಸೋಲ್ಲ ಕೂಡಾ. ಕೆಲಸಂಧರ್ಭದಲ್ಲಿ ದಯಾಮರಣ ಸರಿಯೆಂದು ಕಂಡುಬರುವ ಸಾಧ್ಯತೆಯಿದೆ. ಅಂತಹ ಪ್ರಕರಣಗಳಲ್ಲಿ, ಆ ಕೊನೆಯ ಕೆಲ ಕ್ಷಣಗಳನ್ನು ಆದಷ್ಟೂ ನೋವಿಲ್ಲದಂತೆ ಮಾಡುವುದಕ್ಕಾಗಿ ಈ ಎಲ್ಲಾ ಸರ್ಕಸ್ಸುಗಳು. ದಯಾಮರಣ ಇಂದಿನ ವೈದ್ಯಕೀಯ ಜಗತ್ತಿನಲ್ಲಿ ಹಾಗೂ ವೈದ್ಯಕೀಯ ನೀತಿಶಾಸ್ತ್ರದ ಕ್ಷೇತ್ರದಲ್ಲಿ ಅತ್ಯಂತ ಹೆಚ್ಚಿನ ಮಟ್ಟಿಗೆ ಚರ್ಚಿಸಲಾಗುತ್ತಿರುವ ವಿಷಯವಾಗಿದೆ.

ಇದರಬಗ್ಗೆ ಹೆಚ್ಚಿನ ಆಸಕ್ತಿ ಇದ್ದವರು ಕೆಳಗಿನ ಕೊಂಡಿಗಳನ್ನು ಪರಿಶೀಲಿಸಬಹುದು:
http://bit.ly/Ki6MwR
http://bit.ly/1kMt8X1
http://bit.ly/1zDJSZo
http://bit.ly/1zejYKD
http://bit.ly/1wDfU1Y

10679761_726094827480465_4435169976283812951_o

ಬುದ್ಧಿಗೊಂದು ಗುದ್ದು‬ – ೨೧

ಮೊದಲನೆಯದಾಗಿ…..ಎಷ್ಟು ಬೇಕಾದ್ರೂ ಉಗೀರಿ. ಯಾಕಂದ್ರೆ ದಿನಾ ಬರೀತೀನಿ ಅಂತಾ ಕೊಚ್ಕೊಂಡು, ಆಮೇಲೆ ಪಕ್ಕಾ ರಾಜಕಾರಣಿ ಥರಾ ಮಾತು ಉಳಿಸಿಕೊಳ್ಳದೇ ಕೈಕೊಟ್ಟು ಎಸ್ಕೇಪ್ ಆಗಿದ್ದೆ. ಕೇಳಿದವರಿಗೆಲ್ಲಾ, ಇದ್ದಿದ್ದು ಇಲ್ಲದ್ದು ಕೆಲ ಸುಳ್ಳುಗಳನ್ನೂ ಹೇಳಿದ್ದೆ, ಬ್ಯುಸಿ ಇದ್ದೀನಿ, ಹುಷಾರಿಲ್ಲ ಅಂತೆಲ್ಲಾ. ನಿಜ ಹೇಳ್ಬೇಕು ಅಂದ್ರೆ ಸೋಂಬೇರಿಯಾಗಿದ್ದೆ. ಮಧ್ಯ ಮಧ್ಯ ಆಗಾಗ (ನಿಜವಾಗ್ಲೂ….ನನ್ನ ನಂಬಿ ಪ್ಲೀಸ್) ಬ್ಯುಸಿನೂ ಇದ್ದೆ ಅನ್ನಿ. ಆದ್ರೂ ಈ ಕೆಲಸದ ಒತ್ತಡ, ಸಂಜೆ ಆರಕ್ಕೆ ಆಫೀಸ್ ಬಿಟ್ಟಮೇಲೆ ಜಿಮ್ಮು, ಕುಕ್ಕಿಂಗೂ, ತಿನ್ನಿಂಗೂ, ಅದರ ಮಧ್ಯ ಟೈಮ್ಸ್-ನೌ ಕಿರಿಚಾಟ ಕೇಳಿಂಗೂ ಅನ್ನುವಷ್ಟರಲ್ಲಿ, ನಿದ್ದೆ ಬರಿಂಗೂ 😦  ಹಾಗಾಗಿ ಬರೆಯೋಕೆ ಸಾಧ್ಯವೇ ನಾಟ್ ಆಗಿಂಗೂ. ಅದೂ ಅಲ್ದೆ, ಯಾವುದರ ಬಗ್ಗೆ ಬರೆದರೂ ಆ ವಿಷಯದ ಬಗ್ಗೆ ಚೆನ್ನಾಗಿ ರೀಸರ್ಚ್ ಮಾಡಿ ಬರೀಬೇಕು, ಜನ ಕೆಮ್ಮಗಿರಬಾರ್ದು ಅನ್ನೋ ನನ್ನ ಪಾಲಿಸಿಯನ್ನ ಪಾಲಿಸಿಕೊಂಡು ಬಂದವನು ನಾನು. ಕೆಲವೊಮ್ಮೆ ಅಂಕಣವನ್ನು ಟೈಪು ಮಾಡೋಕ್ಕಿಂತಾ ಹೆಚ್ಚು ಸಮಯ, ಸಂಶೋಧನೆಯಲ್ಲೇ ಹೊರಟು ಹೋಗುತ್ತೆ.

ನನಗ್ಗೊತ್ತು, ಈಗ ಏನೇ ಸಬೂಬು ಕೊಟ್ರೂ ಅವೆಲ್ಲಾ ಬರೇ ಸಬೂಬು ಮಾತ್ರವೇ ಅಂತಾ. ಅದಕ್ಕೇ ಇನ್ಮೇಲೆ ದಿನಕ್ಕೊಂದು ವಿಷಯ ಅಂತಾ ಹೆಡ್ಡಿಂಗು ಹಾಕ್ಕೊಂಡು, ನನ್ ಕಾಲ್ ಮೇಲೆ ನಾನೇ ಕಲ್ಲು ಎತ್ತಾಕೊಳ್ಳೋದು ಬೇಡ ಅಂತಾ ನಿರ್ಧರಿಸಿ ಇದಕ್ಕೆ “ಬುದ್ಧಿಗೊಂದು ಗುದ್ದು” ಅಂತಾ ಹೆಸರಿಡೋದು ಅಂತಾ, ನನ್ನ ನೇತೃತ್ವದಲ್ಲಿ ನಿಯುಕ್ತಿಗೊಂಡ ಏಕ ವ್ಯಕ್ತಿ ಆಯೋಗ ತೀರ್ಮಾನಿಸಿದೆ. ಆದ್ದರಿಂದ, ದಿನಕ್ಕೊಮ್ಮೆ ಬರೆಯಲಾಗದಿದ್ದರೂ, ಆಗಾಗ ಖಂಡಿತಾ ಬರೆಯುತ್ತಿರುತ್ತೇನೆ. ನಾನು ಬರೆದ ಎಲ್ಲಾ ಬರಹಗಳನ್ನೂ ಓದಿ ಲೈಕಿಸಿದ, ಕಮೆಂಟಿಸಿದ ಎಲ್ಲಾ ಓದುಗರಿಗೆ ಹಾಗೂ ನಿಲುಮೆಯ ನಿರ್ವಾಹಕ ಬಳಗಕ್ಕೆ ಪ್ರೀತಿಯ ನಮನಗಳು.

ಇವತಿನ ಗುದ್ದು ಒಂದು ಸಣ್ಣ ಇಂಗ್ಳೀಷ್ ಪಾಠ. ಈ ವಿಷಯ ಬಹಳಷ್ಟು ಜನರಿಗೆ ತಿಳಿದಿರಬಹುದು. ಆದರೂ, ಇನ್ನೊಮ್ಮೆ ಕೇಳಿಸ್ಕೊಳ್ಳಿ. ಗೊತ್ತಿಲ್ಲದವರಿಗೆ ತಿಳಿಸಿಕೊಡಿ.

ಬಹಳಷ್ಟು ಜನರಿಗೆ ಇಂಗ್ಳೀಷಿನಲ್ಲಿ discovery ಹಾಗೂ invention ಇವೆರಡೂ ಪದದ ಅರ್ಥ ತಿಳಿಯದೆ, ತಪ್ಪಾಗಿ ಬಳಸುವುದುಂಟು. ಕನ್ನಡದಲ್ಲಿ ಕಂಡುಹಿಡಿಯುವುದು ಮತ್ತು ಆವಿಷ್ಕಾರ ಎಂಬೆರಡು ಪದಗಳು ಬಳಕೆಯಲ್ಲಿದ್ದರೂ, ಆ ಪದಗಳು ಡಿಸ್ಕವರಿ ಮತ್ತು ಇನ್ವೆನ್ಶನ್ ಎಂಬ ಪದಗಳಿಗೆ ಎಲ್ಲಾ ಕಾಲದಲ್ಲೂ ಸಮಬಳಕೆಯ ಪದಗಳಾಗಿ ಬಳಕೆಯಾಗುವುದಿಲ್ಲ. ಹಾಗೂ ಇಂಗ್ಳೀಷಿನಲ್ಲಿ ಈ ಎರಡೂ ಪದಗಳಿಗೆ ಸಣ್ಣದೊಂದು ವ್ಯತ್ಯಾಸವಿದೆ. ಅದೇನೆಂದರೆ, Discovery ಎಂದರೆ, ಅದಾಗಲೇ ಅಸ್ತಿತ್ವದಲ್ಲಿದ್ದೂ ಜನರ ಕಣ್ಣಿಗೆ ಕಾಣದಿರದ ವಸ್ತು/ವಿಷಯಗಳನ್ನು ಕಂಡುಹಿಡಿದು ಪ್ರಚುರಪಡಿಸುವುದು. ಉದಾಹರಣೆಗೆ, ಕೊಲಂಬಸ್ ಅಮೇರಿಕಾವನ್ನು ಕಂಡುಹಿಡಿದದ್ದು Discovery. ರುಧರ್ಫೋರ್ಡ್ ನೂಟ್ರಾನ್ ಕಂಡುಹಿಡಿದದ್ದು ಕೂಡಾ ಡಿಸ್ಕವರಿಯೇ. ಎಚ್.ಐ.ವಿ ವೈರಸ್, ನೆಪ್ಚೂನ್ ಮತ್ತು ಪ್ಲೂಟೋ ಗ್ರಹಗಳು ಇವೆಲ್ಲವೂ ಡಿಸ್ಕವರಿಗಳೇ!

Invention ಅಂದರೆ, ಇದುವರೆಗೂ ಅಸ್ತಿತ್ವದಲ್ಲಿಲ್ಲದ ವಸ್ತುವೊಂದನ್ನು ಅಥವಾ ತಂತ್ರಜ್ಞಾನವನ್ನು ಹೊಸದಾಗಿ ಸೃಷ್ಟಿಸುವುದು ಅಥವಾ ಸಂಶ್ಲೇಷಿಸುವುದು. ಉದಾಹರಣೆಗೆ, ಮೊಬೈಲ್ ಫೋನ್ ಅನ್ನು ಡಿಸ್ಕವರ್ ಮಾಡಿದ್ದಲ್ಲ. ಇನ್ವೆನ್ಶನ್ ಮಾಡಿದ್ದು. ಕನ್ನಡದಲ್ಲಿ ಮೊಬೈಲ್ ಫೋನ್ ಅನ್ನು ಆವಿಷ್ಕರಿಸಲಾಯಿತು ಎಂದರೂ ಏನೂ ತಪ್ಪಿಲ್ಲ. ಆದರೆ ಇಂಗ್ಳೀಷಿನಲ್ಲಿ ಮೊಬೈಲ್ ಫೋನ್ ಅನ್ನು ಇನ್ವೆಂಟ್ ಮಾತ್ರ ಮಾಡಲು ಸಾಧ್ಯ 🙂  ನಾವು ಬರೆಯಲು ಉಪಯೋಗಿಸುವ ಪೆನ್, ನೀವು ಇದನ್ನು ಓದ್ತಾ ಇರೋ ಕಂಪ್ಯೂಟರ್, ಇದನ್ನು ನಾನು ಪೋಸ್ಟ್ ಮಾಡಿರೋ ಫೇಸ್ಬುಕ್ ಇವೆಲ್ಲವೂ ಇನ್ವೆನ್ಶನ್ ಗಳು.

ಮುಂದಿನ ಬಾರಿ ನೀವು ಏನನ್ನಾದರೂ ಡಿಸ್ಕವರಿ ಅಥವಾ ಇನ್ವೆನ್ಶನ್ ಮಾಡಿದಾಗ, ಈ ಮಾತು ನೆನಪಿರಲಿ.

ಕೊಸರು:

ಮೊದಲನೆಯದಾಗಿ, ‘ಕ್ರಿಸ್ಟೋಫರ್ ಕೊಲಂಬಸ್ ಅಮೇರಿಕಾವನ್ನು ಕಂಡುಹಿಡಿದನು….’ ಹೀಗಂತ ನಾವು ಆರನೇ ಕ್ಲಾಸಿನ ಸಮಾಜ ಪರಿಚಯದಲ್ಲಿ ಓದಿದ್ವಿ. ಆದರೆ ಕೊಲಂಬಸ್ ಕಂಡುಹಿಡಿದದ್ದು ವೆಸ್ಟ್ ಇಂಡೀಸ್ ಹಾಗೂ ಬಹಾಮಾಸ್ ದ್ವೀಪಗಳನ್ನಷ್ಟೇ. ಅದೂ ಕೂಡ ಪುಣ್ಯಾತ್ಮ ಆ ದ್ವೀಪಗಳು ಭಾರತಕ್ಕೆ ಸೇರಿದ ದ್ವೀಪಗಳು ಅಂತಾ ಸಿಕ್ಕಸಿಕ್ಕವರ ಹತ್ತಿರವೆಲ್ಲಾ ಜಗಳ ಮಾಡಿದ್ದ. ಅಮೇರಿಕಾದ ಮುಖ್ಯ ಭೂಭಾಗವನ್ನು ಕಂಡುಹಿಡಿದದ್ದು ಪ್ಲೋರೆಂಟೈನ್ ಮತ್ತವನ ತಂಡ ಹಾಗೂ ಅವರೆಲ್ಲರಿಗಿಂತಾ ಮುಖ್ಯವಾಗಿ ಅಮೆರಿಗೋ ವೆಸ್ಪುಸ್ಸಿ. ಅದಕ್ಕೆ ಅಮೇರಿಕಾಕ್ಕೆ ಅವನ ಹೆಸರನ್ನೇ ಇಟ್ಟಿದ್ದು! 😛  ಅದಕ್ಕೇ ಹೇಳೋದು ಜಗಳ ಮಾಡಬಾರ್ದು ಅಂತಾ 😉

ಎರಡನೆಯದಾಗಿ, ಆರ್ಯಭಟ ಸೊನ್ನೆಯನ್ನು ಕಂಡುಹಿಡಿದದ್ದು Discoveryಯಾ ಅಥವಾ Inventionನ್ನಾ ಅಂತಾ ಇನ್ನೂ ಗೊತ್ತಿಲ್ವಂತೆ 😉 🙂